*ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ IX ໄດ້ໄຂຂຶ້ນ ແລະ ດໍາເນີນຢ່າງຟົດຟື້ນທ່າມກາງສະພາບອາກາດປອດໂປ່ງໃນຕອນເຊົ້າວັນທີ 9 ມິຖຸນາ 2025 ເຊິ່ງນັບແຕ່ເວລາ 7:30 ໂມງ ບັນດາການນໍາພັກ-ລັດ, ອະດີດການນໍາ, ສະມາຊິກສະພາແຫ່ງຊາດ ແຕ່ລະເຂດເລືອກຕັ້ງ, ແຂກຖືກເຊີນ, ນັກຮຽນຮູ້ປັນຍາຊົນຕ່າງກໍ່ທະຍ່ອຍເຂົ້າສູ່ຫໍສະພາແຫ່ງຊາດດ້ວຍຂະບວນລົດນໍາໜ້າຂອງເຈົ້າໜ້າທີ່ ແລະ ເວລາ 8:00 ໂມງ ຄະນະປະທານກໍ່ໄດ້ກ້າວສູ່ເວທີກອງປະຊຸມຢ່າງເປັນທາງການ ເພື່ອດຳເນີນກອງປະຊຸມຄັ້ງນີ້ໃຫ້ປະສົບຜົນສຳເລັດຕາມຄາດໝາຍທີ່ວາງໄວ້. 

   ນັບວ່າກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ  IX ມີບັນຍາດຟົດຟື້ນເປັນພິເສດເຕັມໄປດ້ວຍຄວາມຍີ້ມແຍ້ມແຈ່ມໃສ ໂດຍສະເພາະບັນດາການນໍາ, ສະມາຊິກສະພາເມື່ອໄດ້ພົບໜ້າພໍ້ຕາກັນກໍ່ໄດ້ທັກທາຍສະບາຍດີດ້ວຍຄວາມແຈ່ມໃສ, ຖາມຂ່າວເຊິ່ງກັນ ແລະ ກັນດ້ວຍຄວາມອົບອຸ່ນ. ຂະນະທີ່ທາງໃນຫ້ອງປະຊຸມຖືກຕົກແຕ່ງປະດັບປະດາດ້ວຍດອກໄມ້ຢ່າງສວຍງາມ, ຄິດຄໍາຂວັນການດໍາເນີນກອງປະຊຸມ, ໂຕະ, ຕັ່ງກໍ່ຖືກຈັດເປັນລະບຽບ, ຕິດຊື່ການນໍາແຕ່ລະທ່ານ, ຊື່ບັນດາສະມາຊິກສະພາແຫ່ງຊາດແຕ່ລະເຂດເລືອກຕັ້ງຢ່າງເປັນລະບຽບຈົບງາມ.

    ສຳລັບຢູ່ດ້ານນອກຫໍປະຊຸມສະພາແຫ່ງຊາດ ກໍ່ໄດ້ມີການປ້ອງຄວາມປອດໄພຈາກອ້າຍນ້ອງກໍາລັງ ປກສ-ປກຊ ຢູ່ຕະຫລອດເວລາເພື່ອເຮັດໃຫ້ກອງປະຊຸມໄດ້ດຳເນີນໄປດ້ວຍຄວາມປອດໄພ ແລະ ປະສົບຜົນສຳເລັດຕາມແຜນທີ່ວາງໄວ້. ຂະນະທີ່ນັກຮົບສື່ມວນຊົນແຕ່ລະສຳນັກ ບໍ່ວ່ານັກຮົບສື່ມວນຊົນໜັງສືພິມ, ວິທະຍຸ, ໂທລະພາບຕ່າງກໍ່ໄດ້ກຽມຄວາມພ້ອມທາງດ້ານອຸປະກອນໃນວິຊາຊີບຂອງຕົນ ເປັນຕົ້ນກ້ອງຖ່າຍພາບນິ້ງ-ກ້ອງວິດີໂອ, ປື້ມ, ບິກ-ສໍ, ເຄື່ອງບັນທຶກສຽງ, ຄອມພິວເຕີເຂົ້າຮັບໃຊ້ກອງປະຊຸມຢ່າງຈູບຈ້າວຫ້າວຫັນ, ຜູ້ຮັບໜ້າທີ່ຖ່າຍພາບກໍ່ໄດ້ຕັ້ງໃຈເຮັດໜ້າທີ່ຖ່າຍພາບຈາກມູນນີ້ສູ່ມູນນັ້ນ ເພື່ອໄດ້ພາບທີ່ໄດ້ມາດຖານຕາມຄວາມຕ້ອງການຂອງບັນນາທິການຕົນສັງກັດ. ນອກນີ້, ຜູ້ເຮັດໜ້າທ່ີຂຽນຂ່າວ-ຂຽນບົດຕ່າງກ່ໍໄດ້ລົງມືເປີດຄອມພິວເຕີ, ຈົດແຕ້ມຂໍ້ມູນ, ບັນທຶກສຽງເພື່ອຂຽນຂ່າວ- ບົດລາຍງານໃຫ້ສັງຄົມໄດ້ຮັບຮູ້ຢ່າງທົ່ວເຖິງ ໃນໄລຍະດຳເນີນກອງປະຊຸມນັບແຕ່ມື້ເປີດຫາມື້ປິດ.  ສ່ວນໜ່ວຍງານສາຍດ່ວນໃນກອງປະຊຸມສະພາແຫ່ງຊາດກ່ໍພ້ອມທີ່ຈະຮັບເອົາຄໍາສະເໜີຕ່າງໆຈາກປະຊາຊົນ, ພະນັກງານ, ທະຫານ-ຕໍາຫລວດທີ່ໂທຜ່ານສາຍດ່ວນ 156 ໄປຍັງກອງປະຊຸມເພື່ອໃຫ້ລັດຖະບານກໍ່ຄືພາກສ່ວນກ່ຽວຂ້ອງພິຈາລະນາແກ້ໄຂໃນກອງປະຊຸມກໍ່ຄືໃນຕໍ່ໜ້າ. 

    ຢ່າງໃດກໍ່ດີ ພາຍຫລັງຄະນະປະທານກອງປະຊຸມເຂົ້າສູ່ເວທີກອງປະຊຸມໃນເວລາ 8:00 ໂມງ ກ່ໍໄດ້ບັນເລງເພງຊາດ ແລະ ເຄົາລົບທຸງຊາດ, ຈາກນັ້ນທ່ານປະທານສະພາແຫ່ງຊາດ ໄຊສົມພອນ ພົມວິຫານ ກໍ່ໄດ້ກ່າວສູນທອນພົດເປີດກອງປະຊຸມຢ່າງເປັນທາງການ. ນອກຈາກນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ກໍ່ໄດ້ລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາໄລຍະ 6 ເດືອນຕົ້ນປີ 2025 ແລະ ທິດທາງແຜນວຽກຈຸດ ສຸມ 6 ເດືອນທ້າຍປີ 2025 ຕິດພັນກັບການຈັດຕັ້ງປະຕິບັດ 2 ວາລະ ແຫ່ງຊາດ ແລະ ການແກ້ໄຂບັນຫາເຄັ່ງຮ້ອນ ທາງດ້ານເສດຖະກິດ. ຫລັງຈາກນັ້ນ, ກໍ່ດໍາເນີນໄປຕາມວາລະກອງປະຊຸມໂດຍຈະດໍາເນີນແຕ່ວັນທີ 9-26 ມິຖຸນາ 2025 ນີ້, ເຊິ່ງຕະ ຫລອດໄລຍະຂອງກອງປະຊຸມບັນດາສະມາຊິກສະພາແຫ່ງຊາດ ແຕ່ລະເຂດກ່ໍຈະໄດ້ພ້ອມກັນສຸມສະຕິປັນຍາປະກອບຄຳຄິດຄຳເຫັນຕໍ່ບົດລາຍງານຂອງລັດຖະບານ, ຂອງຊາດດ້ວຍຄວາມຮັບຜິດຊອບສູງພ້ອມທັງຈະນໍາເອົາຄຳສະເໜີຕ່າງໆຂອງປະຊາຊົນໃນເຂດເລືອກຕັ້ງຕົນສະເໜີຕໍ່ກອງປະຊຸມຄັ້ງນີ້ ເພື່ອໃຫ້ໄດ້ຮັບການແກ້ໄຂຕາມຄວາມເໝາະສົມ ແລະ ພິຈາລະນາຮັບຮອງເອົາບັນຫາສຳຄັນຂອງຊາດ. 

ໂດຍ: ຢ່າຕົ່ງ

KPL