ຂປລ. ໃນພາກບ່າຍວັນທີ 12 ມິຖຸນາ 2025 ຂອງ​ການ​ດຳ​ເນີນກອງປະຊຸມ ສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ IX ທ່ານ ນາງ ປິ່ງຄຳ ລາຊະສິມມາ ກຳມະການຄະນະປະຈຳສະພາແຫ່ງຊາດ, ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ໄດ້ຕາງໜ້າໃຫ້ຄະນະປະຈຳ ສະພາແຫ່ງຊາດ ປະກອບຄຳຄິດຄຳເຫັນຕໍ່ບົດລາຍງານຂອງລັດຖະບານ ກ່ຽວກັບການຈັດຕັ້ງປະ ຕິບັດບັນດານະໂຍບາຍ, ນິຕິກຳ, ກົນໄກຕ່າງໆ ໃນການພັດທະນາພະລັງງານໄຟຟ້າ ເຊິ່ງຜ່ານການຕິດຕາມກວດກາ ເຫັນວ່າການຄຸ້ມຄອງ ແລະ ການພັດທະນາພະລັງງານ ໄຟຟ້າ ຍັງມີຫລາຍບັນຫາທີ່ຈະຕ້ອງປັບປຸງ ແລະ ແກ້ໄຂ. ສະ​ນັ້ນ, ຈຶ່ງສະເໜີໃຫ້ລັດຖະບານ ປັບປຸງລະບົບພະລັງງານໄຟຟ້າ ໃຫ້ມີຄວາມໝັ້ນຄົງ, ມີຄວາມພ້ອມໃນການສະໜອງໄຟຟ້າ ໃຫ້ພຽງພໍຕໍ່ຄວາມຕ້ອງການ ທັງພາຍໃນ ແລະ ສົ່ງອອກຕ່າງປະເທດ ໂດຍການພິຈາລະນາພັດທະນາ ໄຟຟ້າພະລັງງານຄວາມຮ້ອນ ຫລື ພະລັງງານໄຟຟ້າອື່ນ ເພື່ອຮັບປະກັນການພັດທະນາລະບົບພະລັງງານໄຟຟ້າ ໃຫ້ມີຄວາມສະຖຽນ, ໝັ້ນຄົງ ແລະ ຜູ້ຊົມໃຊ້ ສາມາດເຂົ້າເຖິງດ້ວຍລາຄາ ທີ່ເໝາະສົມ, ເປັນທໍາ.

ພ້ອມ​ນີ້, ຍັງສະເໜີໃຫ້ລັດຖະບານ ໃຫ້ກວດກາຄືນບັນດາໂຄງການລົງທຶນ ດ້ານພະລັງງານໄຟຟ້າ ທີ່ໄດ້ເຊັນສັນຍາສຳປະທານກັບລັດຖະບານ; ເອົາໃຈໃສ່ໃນການຄຸ້ມຄອງ, ຕິດຕາມ, ກວດກາ ແລະ ປະເມີນການມອບເງິນພັນທະຕ່າງໆ ຂອງຜູ້ພັດທະນາໂຄງການ ໂດຍໃຫ້ສອດຄ່ອງກັບກົດໝາຍ, ສັນຍາສຳປະທານ; ຫລຸດຜ່ອນການສະເໜີຂໍຍົກເວັ້ນ ແລະ ຜ່ອນຜັນການປະຕິບັດບາງເນື້ອໃນ, ບາງມາດຕາຂອງກົດໝາຍທີ່ພົວພັບ ກັບການປະຕິບັດພັນທະດ້ານພາສີ, ອາກອນ; ການພັດທະນາພະລັງງານໄຟຟ້າ ຕ້ອງເລັ່ງໃສ່ຮັບປະກັນການສະໜອງໄຟຟ້າ ໃຫ້ສອດຄ່ອງກັບຄວາມຕ້ອງການ ໃນການພັດທະນາເສດຖະກິດ-ສັງຄົມ ກໍຄື ຮັບປະກັນການຕອບສະໜອງຄວາມຕ້ອງການຂອງປະຊາຊົນ ແລະ ການວາງ​ແຜນພັດທະນາພະລັງງານໄຟຟ້າ ຕ້ອງໃຫ້ສົມຄູ່, ສອດຄ່ອງ ແລະ ຄຽງຄູ່ກັບການພັດທະນາ ຂະແໜງການອື່ນທີ່ກ່ຽວຂ້ອງ; ການເກັບກຳຂໍ້ມູນ ແລະ ການປະເມີນຜົນກະທົບຕໍ່ສິ່ງແວດລ້ອມ, ສັງຄົມ ແລະ ທຳມະຊາດ ຕ້ອງລະອຽດຊັດເຈນ, ປະຊາຊົນທີ່ຖືກຜົນກະທົບຕ້ອງມີສ່ວນຮ່ວມ ແລະ ມີປະສານສົມທົບກັບ ພາກສ່ວນທີ່ກ່ຽວຂ້ອງ ຢ່າງກົມກຽວຕໍ່ເນື່ອງ; ປະເມີນຄືນ, ສ້າງ ແລະ ປັບປຸງ ກົດໝາຍ ແລະ ນິຕິກຳໃຕ້ກົດໝາຍໃຫ້ຈະແຈ້ງ, ຮັດກຸມ ແລະ ສອດຄ່ອງກັບສະພາບການຂະຫຍາຍຕົວ ຂອງເສດຖະກິດ-ສັງຄົມ ໃນແຕ່ລະໄລຍະ, ປັບປຸງຂອດປະສານງານ ໃຫ້ມີຄວາມກົມກຽວ, ພ້ອມທັງຄົ້ນຄວ້າ ແລະ ກໍານົດເອົາພະລັງງານທົດແທນອື່ນ ເຊັ່ນ: ພະລັງງານລົມ, ພະລັງງານແສງຕາເວັນ ແລະ ອື່ນໆ ເຂົ້າໃນກົດໝາຍວ່າດ້ວຍ ພະລັງງານໄຟຟ້າ ເພື່ອເປັນບ່ອນອີງໃຫ້ແກ່ ການຈັດຕັ້ງປະຕິບັດວຽກງານຕົວຈິງ; ລົງທຶນ ແລະ ລະດົມທຶນ ເຂົ້າໃນການກໍ່ສ້າງສາຍສົ່ງໄຟຟ້າແຮງສູງ ແຕ່ເໜືອຮອດໃຕ້ ໃຫ້ສາມາດຮອງຮັບເອົາກະແສໄຟຈາກເຂື່ອນຕ່າງໆ ເພື່ອສົ່ງອອກ ແລະ ຊົມໃຊ້ພາຍໃນ, ໃຫ້ພິຈາລະນາລວມເອົາສາຍສົ່ງໄຟຟ້າ ໄປຕ່າງປະເທດເຂົ້າໃນລະບົບດັ່ງກ່າວ, ບໍ່ຄວນອະນຸຍາດໃຫ້ບັນດາ ໂຄງການລົງທຶນກໍ່ສ້າງສາຍສົ່ງໄຟຟ້າ ເປັນຂອງຕົນເອງ; ສືບຕໍ່ຄົ້ນຄວ້າປັບປຸງ ຍຸດທະສາດການພັດທະນາພະລັງງານໄຟຟ້ານໍ້າຕົກ ຄວນສຸມໃສ່ທິດທາງໃດ ເພື່ອໃຫ້ມີການປະສານສົມທົບກັນຢ່າງກົມກຽວ ລະຫວ່າງ ເສດຖະກິດ, ສິ່ງແວດລ້ອມ ແລະ ສັງຄົມ; ຢຸດຕິການກໍ່ສ້າງ ເຂື່ອນໄຟຟ້າພະລັງງານນໍ້າຂະໜາດນ້ອຍ, ຫລຸດຜ່ອນການພັດທະນາ ພະລັງງານໄຟຟ້າ ຈາກເຂື່ອນໄຟຟ້ານໍ້າຕົກ ແລະ ຫັນໄປສູ່ພະລັງງານໄຟຟ້າ, ພະລັງງານທົດແທນໃນຮູບແບບອື່ນ, ຄົ້ນຄວ້າປັບປຸງໂຄງສ້າງລາຄາໄຟຟ້າ ຕ້ອງໃຫ້ສ່ອງຄອດກັບ ສະພາບການດຳລົງຊີວິດ ຂອງປະ ຊາຊົນ ແລະ ການດຳເນີນທຸລະກິດ ຂອງລັດວິສາຫະກິດໄຟຟ້າລາວ; ການແບ່ງຂັ້ນຄຸ້ມຄອງ ຢ່າງຈະແຈ້ງ ຄື ກະຊວງ, ອົງການຂັ້ນສູນກາງ ດຳເນີນໜ້າທີ່ຄຸ້ມຄອງມະຫາພາກ ມອບຄວາມຮັບຜິດຊອບໃນການ ຈັດຕັ້ງປະຕິບັດໂຄງການໃຫ້ຄະນະພັກ ອົງການປົກຄອງທ້ອງຖິ່ນ, ສະພາປະຊາຊົນແຂວງ ແລະ ພະ ແນກການທີ່ກ່ຽວຂ້ອງ; ສ້າງ ແລະ ຍົກລະດັບບຸກຄະລາກອນ ໃນຂະແໜງການໄຟຟ້າ ໃຫ້ມີຄວາມຮູ້, ຄວາມສາມາດ ແລະ ຊຳນານງານ ເພື່ອກະກຽມຄວາມພ້ອມ ໃນການຄຸ້ມຄອງ ແລະ ບໍລິຫານຈັດການ ບັນດາໂຄງການພະລັງງານ ໄຟຟ້ານໍ້າຕົກ ທີ່ຈະສົ່ງມອບຄືນໃຫ້ລັດຖະບານ

ຂ່າວ: ກິດຕາ

ພາບ: ສຸກສະຫວັນ

KPL