*ເລີແກຣນ ປາກແບງຣີສອດ,ເມືອງປາກແບງ, ແຂວງອຸດົມໄຊ ໃນການບໍລິການດຳເນີນທຸລະກິດກ່ຽວກັບທີ່ພັກ ແລະ ຮ້ານອາຫານອີກແຫ່ງໜຶ່ງທີ່ຂຶ້ນຊື່ລືນາມ ເລື່ອງການບໍລິການທີ່ດີ, ສະຖານທີ່ສວຍງາມປານຮູບແຕ້ມ ເນື່ອງຈາກວ່າອ້ອມຮອບໄປ ດ້ວຍພູຜາປ່າໄມ້ ແລະ ສາຍນໍ້າ ຂອງເຮັດໃຫ້ອາກາດສົດຊື່ນເຢັນສະບາຍຕະຫລອດປີ ຈຶ່ງເໝາະແກ່ການໄປພັກຜ່ອນຢ່ອນໃຈຂອງນັກທ່ອງທ່ຽວທັງພາຍໃນ ແລະ ຕ່າງປະເທດ. 

    ທ່ານ ເກດ ທິບພະຈັນ ຜູ້ບໍລິຫານເລີແກຣນ ປາກແບງຣີສອດ ໃຫ້ຮູ້ວ່າ : ໃນເມື່ອກ່ອນເຈົ້າຂອງ ເລີແກຣນ ປາກແບງ ຣີສອດ ໄດ້ເລີ່ມກິດຈະການ ບໍລິສັດ ທ່ອງທ່ຽວ ຢູ່ນະຄອນຫລວງວຽງຈັນ ເຊິ່ງເປັນບໍລິສັດໜຶ່ງທີ່ຖືເອົາການບໍລິການທ່ອງທ່ຽວເປັນຫລັກ ແລະ ໄດ້ສຶກສາ, ຄົ້ນຄວ້າ ແລະ ຮັບຂໍ້ມູນຂ່າວສານ ກ່ຽວກັບການບໍລິການ- ການທ່ອງທ່ຽວຢູ່ເມືອງປາກແບງ ເຊິ່ງເຫັນວ່າເມືອງປາກແບງ ມີທ່າແຮງທາງດ້ານການບໍລິການ-ການທ່ອງທ່ຽວ ແລະ ມີນັກທ່ອງທ່ຽວເຂົ້າມາທ່ຽວຊົມ ແລະ ພັກແຮມ.  ມາຮອດ ປີ 2009 ຈຶ່ງໄດ້ມາສໍາຫລວດຄວາມເປັນໄປໄດ້ການລົງທຶນກໍ່ສ້າງຣີສອດ ເພື່ອຮອງຮັບນັກທ່ອງທ່ຽວ. ສະນັ້ນ, ມາຮອດປີ 2010 ໄດ້ເລີ່ມຕົ້ນລົງມືກໍ່ສ້າງ ເລີແກຣນ ປາກແບງ ຣີສອດ ຢູ່ເມືອງປາກແບງ ໃຊ້ເວລາໃນການກໍ່ສ້າງຫລາຍປີສົມຄວນ ເຊິ່ງປະກອບ ມີເຮືອນພັກ 45 ຫລັງ ມີ 45 ຫ້ອງ, ມີ 64 ຕຽງນອນ ແລະ ຮ້ານອາຫານ 1 ຫລັງ, ສະລອຍນ້ຳ 1 ແຫ່ງ ລວມມູນຄ່າການກໍ່ສ້າງ 7.600.000 ໂດລາສະຫະລັດ ແລະ ໄດ້ຊື້ອຸປະກອນຕ່າງໆປະກອບເຂົ້າໃນຣີສອດ ມູນຄ່າ 600.000 ໂດລາສະຫະລັດ ລວມມູນຄ່າທັງໝົດ 8.200.000 ໂດລາສະຫະລັດ, ເປັນເງິນກີບປະມານ 172 ຕື້ກວ່າກີບ. ພາຍຫລັງສ້າງຕັ້ງສໍາເລັດແລ້ວ ໄດ້ຕັ້ງຊື່ວ່າ: “ເລີແກຣນ ປາກແບງ ຣີສອດ” ເຊິ່ງໄດ້ເຮັດໜ້າທີ່ບໍລິການທີ່ພັກ ແລະ ຮ້ານອາຫານເພື່ອຕ້ອນຮັບແຂກພາຍໃນ ແລະ ຕ່າງປະເທດ ທີ່ເຂົ້າມາທ່ອງທ່ຽວ ຢູ່ເມືອງ ປາກແບງ. ນອກຈາກນີ້ ກໍ່ໄດ້ສ້າງກິດຈະກໍາການທ່ອງທ່ຽວຈຳນວນໜຶ່ງ ເຊັ່ນ: ສ້າງກິດຈະກໍາຢ້ຽມຢາມບ້ານຊົນເຜົ່າ ໂດຍໃຫ້ປະຊາຊົນມີສ່ວນຮ່ວມ; ສ້າງກິດຈະກໍາທ່ຽວເບິ່ງຊາພັນປີຢູ່ບ້ານມົກເເຄະ ແລະ ສ້າງ ກິດຈະກໍາທ່ຽວຕະຫລາດ, ທ່ຽວຊົມວັດວາອາຣາມ ແລະ ວິຖີຊີວິດຂອງຊາວເມືອງປາກແບງ. ເລີແກຣນ ປາກແບງ ຣີສອດ ເປີດຮັບໃຊ້ການບໍລິການນັກທ່ອງທ່ຽວຢ່າງເປັນທາງການ ເລີ່ມແຕ່ 12 ທັນວາ 2018 ເປັນຕົ້ນມາ  ມີພະນັກງານບໍລິການພາຍໃນຣີສອດທັງໝົດ 25 ຄົນ, ຍິງ 18 ຄົນ. 

    ທ່ານ ເກດ ທິບພະຈັນ ໃຫ້ຮູ້ຕື່ມວ່າ: ບັນດານັກທ່ອງທ່ຽວທີ່ມາພັກ- ເຊົາ ເລີແກຣນ ປາກແບງ ຣີສອດ ສ່ວນຫລາຍແມ່ນ ແຂກຂອງບໍລິສັດ ທ່ອງທ່ຽວ ຢູ່ພາຍໃນປະເທດ, ຈາກຢູໂຣບ ແລະ ອາຊີຈໍານວນໜຶ່ງ. ໂດຍສະເລ່ຍແລ້ວບໍ່ຕໍ່າກວ່າ 160 ຄົນຕ່ໍ ເດືອນ, ລາຄາຫ້ອງຄືນໜຶ່ງ 70 ໂດລາສະຫະລັດ, ສະເລ່ຍແລ້ວລາຍຮັບ 1 ເດືອນ ໄດ້ປະມານ 150 ລ້ານກີບ. ໃນ 1 ປີ ສາມາດສ້າງລາຍຮັບໄດ້ປະມານ 1,8 ກວ່າຕື້ກີບ, ໃນນີ້, ຈ່າຍຈັດຊື້-ຈັດຈ້າງ, ຄ່າສ້ີນເປືອງ, ພັນທະຕ່າງໆ ແລະ ເງິນເດືອນຂອງພະນັກງານລວມທັງໝົດ ປະມານ 100 ກວ່າລ້ານກີບຕໍ່ເດືອນ ຕໍ່ມາໃນໄລຍະປີ 2019-2022 ແມ່ນຖືກໄລຍະການລະບາດຂອງພະຍາດໂຄວິດ-19 ເຫັນວ່າ ບໍ່ມີແຂກເຂ້ົາມາພັກແຮມ, ມາໃນໄລຍະ ປີ 2023-2024 ແຂກເລີ່ມມາທ່ຽວ ແລະ ພັກແຮມ ເພີ່ມຂຶ້ນ. ຜ່ານການດໍາເນີນທຸລະກິດ ໄດ້ເຮັດໃຫ້ເລີແກຣນ ປາກແບງ ຣີສອດ ຄ່ອຍໆຂະຫຍາຍຕົວດີຂຶ້ນ ແລະ ພະນັກງານໃນບໍລິສັດມີຊີວິດການເປັນຢູ່ດີຂຶ້ນ, ສາມາດຫລຸດພົ້ນອອກຈາກຄວາມທຸກຍາກເທື່ອລະກ້າວ. ຜ່ານການດໍາເນີນທຸລະກິດຂອງ ເລີແກຣນ ປາກແບງ ຣີສອດ ຢູ່ເມືອງປາກແບງ ເປັນໄລຍະ 6 ກວ່າ ປີຜ່ານມາເຫັນວ່າການນຳເມືອງ ກໍ່ຄືຂະແໜງການທີ່ກ່ຽວຂ້ອງຂັ້ນ ເມືອງກໍ່ໄດ້ໃຫ້ການໃກ້ຊິດຕິດແທດອຳນວຍຄວາມສະດວກໃຫ້ແກ່ການດຳເນີນທຸລະກິດເປັນຕົ້ນແມ່ນທາງດ້ານວິຊາການ, ຄວາມເປັນລະບຽບຮຽບຮ້ອຍ ແລະ ອື່ນໆຈຶງສາມາດເຮັດໃຫ້ ເລີແກຣນ ປາກແບງ ຣີສອດ ດໍາເນີນມາດ້ວຍດີ ແລະ ມີການຂະຫຍາຍຕົວເປັນກ້າວໆມາ.

ໂດຍ: ອ່ຽງຄຳ

KPL