ຂປລ. ໃນກອງປະຊຸມ ສະໄໝສາມັນເທື່ອທີ 8 ຂອງສະພາ ແຫ່ງຊາດ ຊຸດທີ IX ໃນຕອນເຊົ້າວັນທີ 21 ພະຈິກ 2024 ນີ້, ທ່ານ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ລາຍງານກ່ຽວກັບການຈັດຕັ້ງປະຕິບັດ ແຜນຍຸດທະສາດ ການປະຕິຮູບລະບົບການສຶກສາແຫ່ງຊາດ, ຍຸດທະສາດ ການພັດທະນາ ຊັບພະຍາກອນມະນຸດແຫ່ງຊາດ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ.

ໂອກາດນີ້, ທ່ານ ພຸດ ສິມມາລາວົງ ໄດ້ໃຫ້ຮູ້ກ່ຽວກັບການຜັນຂະຫຍາຍຜົນ ຂອງການປະຕິຮູບການສຶກສາ ໄລຍະທີ 1 ແລະ 2 ເຂົ້າໃນແຜນພັດທະນາການສຶກສາ ແລະ ກິລາ 5 ປີ ຄັ້ງທີ VIII (2016-2020) ວ່າ: ມະຕິກອງປະຊຸມໃຫຍ່ຄັ້ງທີ X ຂອງພັກ ໄດ້ລະບຸໃຫ້ສືບຕໍ່ເສີມຂະຫຍາຍ ຜົນສໍາເລັດຂອງການປະຕິຮູບການສຶກສາ ກໍຄືການພັດທະນາ ຊັບພະຍາກອນມະນຸດ ໃຫ້ມີຄຸນນະພາບເທົ່າທຽມກັບ ມາດຕະຖານຂອງພາກພື້ນ ແລະ ສາກົນ ຊຶ່ງແຜນພັດທະນາການສຶກສາ ແລະ ກິລາ 5 ປີ (2016-2020) ສ້າງຂຶ້ນບົນພື້ນຖານຜົນສໍາເລັດ, ສິ່ງທ້າທາຍ ແລະ ບົດຮຽນທີ່ຖອດຖອນໄດ້ ຈາກການປະຕິບັດແຜນຍຸດທະສາດ ການປະຕິຮູບລະບົບ ການສຶກສາແຫ່ງຊາດ (2006-2015) ກໍຄື ເພື່ອບັນລຸເປົ້າໝາຍ ການພັດທະນາແບບຍືນຍົງໃນປີ 2030 ໂດຍສຸມໃສ່ເປົ້າໝາຍ  ເຮັດໃຫ້ລະບົບການສຶກສາຂັ້ນພື້ນຖານ ແລະ ຫລັງຂັ້ນພື້ນຖານມີຄວາມເຂັ້ມແຂງ, ສາມາດຕອບສະໜອງໄດ້ຕາມ ຄວາມຮຽກຮ້ອງຕ້ອງການຂອງ ການພັດທະນາເສດຖະກິດ-ສັງຄົມ;  ບັນລຸໄດ້ນະໂຍບາຍການສຶກສາ ພາກບັງຄັບຊັ້ນປະຖົມສຶກສາ ແລະ ຂະຫຍາຍໄປເຖິງ ຊັ້ນມັດທະຍົມສຶກສາຕອນຕົ້ນ ເພື່ອເປັນພື້ນຖານໃຫ້ແກ່ ການຍົກລະດັບທັກສະຄວາມຮູ້ຄວາມສາມາດ ແລະ ຄຸນນະພາບຂອງກໍາລັງແຮງງານ, ພ້ອມທັງ ປັບປຸງຂີດຄວາມສາມາດ ເພື່ອໃຫ້ເຊື່ອມໂຍງ ແລະ ສາມາດແຂ່ງຂັນກັບ ບັນດາປະເທດໃນພາກພື້ນ ແລະ ສາກົນໄດ້.

ຜ່ານການຈັດຕັ້ງປະຕິບັດ ແຜນພັດທະນາການສຶກສາ ແລະ ກິລາ 5 ປີ (2016-2020) ໄດ້ມີຜົນສໍາເລັດທີ່ພົ້ນເດັ່ນ ຄື: ການສະໜອງການສຶກສາກ່ອນໄວຮຽນ ໄດ້ຂະຫຍາຍຕົວຢ່າງກວ້າງຂວາງ, ອັດຕາສ່ວນພົນລະເມືອງ ອາຍຸ 5 ປີ ໃນຊັ້ນການສຶກສາກ່ອນໄວຮຽນ ໄດ້ເພີ່ມຂຶ້ນຈາກ 70,9% ໃນສົກຮຽນ 2015-2016 ເປັນ 82,7% ໃນສົກຮຽນ 2019-2020 ແລະ ມີ 142 ເມືອງ ໃນຈໍານວນ 148 ເມືອງ ຊຶ່ງມີອັດຕາການເຂົ້າ ຮຽນຂອງເດັກອາຍຸ 5 ປີ ສູງກວ່າ 60%, ອັດຕາການເຂົ້າຮຽນລວມໃໝ່ຊັ້ນປະຖົມສຶກສາ ປ5 ໃນສົກຮຽນ 2015-2016 ແລະ 2019-2020 ມີ ການເພີ່ມຂຶ້ນຈາກ 103,5% ເປັນ 105,5%. ພ້ອມກັນນັ້ນ, ອັດຕາການຄ້າງຫ້ອງ ກໍໄດ້ຫລຸດລົງຈາກ 4,8% ໃນສົກຮຽນ 2015-2016 ເປັນ 3,1% ໃນສົກຮຽນ 2019-2020, ອັດຕາການເຂົ້າຮຽນລວມໃໝ່ ຊັ້ນມັດທະຍົມຕອນຕົ້ນ ມ4 ໄດ້ຮັບການປັບປຸງດີຂຶ້ນ ຊຶ່ງເພີ່ມຈາກ 70,4% ໃນສົກຮຽນ 2015-2016 ເປັນ 71,6% ໃນສົກຮຽນ 2019-2020, ອັດຕາການປະລະການຮຽນ, ແຕ່ສົກຮຽນ 2015-16 ຫາ 2019-2020 ໄດ້ຫລຸດລົງຈາກ 4,7% ເປັນ 4,3% ໃນສົກຮຽນ 2019-2020, ໃນຊັ້ນມັດທະຍົມຕອນປາຍ ອັດຕາເຂົ້າຮຽນລວມໃໝ່ ມ7 ເພີ່ມຂຶ້ນຈາກ 42,7% ໃນສົກຮຽນ 2015-2016 ເປັນ 54,8% ໃນສົກຮຽນ 2019-2020, ດັດຊະນີຄວາມເທົ່າທຽມທາງເພດ ໄດ້ເພີ່ມຂຶ້ນຈາກ 0,87% ໃນສົກຮຽນ 2015-2016 ເປັນ 0,91% ໃນສົກຮຽນ 2019-2020, ການສໍາຫລວດດັດຊະນີໝາຍສັງຄົມລາວ (LSIS) ໃນປີ 2017 ພົບວ່າ ໜຶ່ງສ່ວນສາມຂອງປະຊາຊົນລາວ ອາຍຸລະຫວ່າງ 15-30 ປີ ສາມາດອ່ານອອກ ແລະ ຂຽນໄດ້; ອັດຕາການກືກໜັງສື ກໍໄດ້ຫລຸດລົງເຖິງ 11% ສໍາລັບເພດຊາຍ ແລະ 17% ສໍາລັບເພດຍິງ (ກຸ່ມອາຍຸ 15-17 ປີ); ໄດ້ນໍາໃຊ້ຫລັກສູດໃໝ່, ສະໜອງປື້ມແບບຮຽນ, ຄູ່ມືຄູ ແລະ ສື່ການຮຽນການສອນຕ່າງໆ ໄປຄຽງຄູ່ກັບການ ຝຶກອົບຮົມຄູປະຈໍາການ ໃນການນໍາໃຊ້ຫລັກສູດໃໝ່ ແລະ ໄດ້ພັດທະນາຂອບປະເມີນຜົນ ການຮຽນຂອງນັກຮຽນ ໃນສາຍສາມັນສຶກສາ, ໄດ້ປັບປຸງຫລັກສູດກໍ່ສ້າງຄູ ໃຫ້ສອດ ຄ່ອງກັບຫລັກສູດ ການສຶກສາກ່ອນໄວຮຽນ, ປະຖົມ ແລະ ມັດທະຍົມຕົ້ນ ສຶກສາ, ໄດ້ນໍາໃຊ້ຫລັກການສິດສອນແບບເອົານັກຮຽນເປັນໃຈກາງ ແລະ ມີສ່ວນຮ່ວມ ສາມາດຮັບມືກັບ ຄວາມຕ້ອງການທີ່ຫລາກຫລາຍຂອງຜູ້ຮຽນ; ໄດ້ປັບປຸງຫລັກສູດ, ພ້ອມທັງໄດ້ມີການຝຶກອົບຮົມ ໃຫ້ແກ່ຄູສອນ ໃນສາຍອາຊີວະສຶກສາ ໃຫ້ສອດຄ່ອງກັບເປົ້າ ໝາຍການພັດທະນາເສດຖະກິດ-ສັງຄົມ.

ພ້ອມນີ້, ໄດ້ມີການພັດທະນາຫລັກສູດໃໝ່ເພີ່ມຂຶ້ນ ໃນລະດັບມະຫາວິທະຍາໄລ, ພ້ອມທັງໄດ້ລິເລີ່ມສ້າງສູນແຫ່ງຄວາມເປັນເລີດ ໃນບາງສາຂາວິຊາ ເຊັ່ນ: ການກະເສດ, ໂລຈິສຕິກ, ວິສະວະກຳ, ທ່ອງທ່ຽວ ແລະ ການສຶກສາສິ່ງແວດລ້ອມ, ຄູອາຈານ ໄດ້ຮັບການຍົກລະດັບວຸດທິການສຶກສາ ໃນຂັ້ນປະລິນຍາໂທ ແລະ ປະລິນຍາເອກທັງຢູ່ພາຍໃນ ແລະ ຕ່າງປະເທດເປັນຈຳນວນຫລວງຫລາຍ, ໄດ້ສະໜອງເງິນບໍລິຫານໂຮງຮຽນ ໃຫ້ບັນດາໂຮງຮຽນໃນທົ່ວປະເທດ ເພື່ອສະໜັບສະໜູນໃຫ້ແກ່ການ ພັດທະນາໂຮງຮຽນ; ໄດ້ສະໜອງທຶນການສຶກສາ ໃຫ້ນັກຮຽນໃນໂຮງຮຽນຊົນເຜົ່າ, ນັກຮຽນພອນສະຫວັນ, ນັກຮຽນເກັ່ງລະດັບຊາດ, ໃຫ້ນັກຮຽນ ໃນສະຖານອາຊີວະສຶກສາ ແລະ ໃນສູນຝຶກອົບຮົມວິຊາຊີບ ໃນອັດຕາສ່ວນ 40% ຂອງ ນັກຮຽນເຂົ້າໃໝ່ທັງໝົດ ໂດຍສະເພາະນັກຮຽນ ທີ່ມາຈາກຄອບຄົວທຸກຍາກ.

ຂ່າວ: ສົມຫວັງ

ພາບ: ເກດສະໜາ

KPL