ຂປລ. ​​ກອງ​ປະຊຸມລັດຖະມົນຕີ​ ປ້ອງ​ກັນ​ປະ​ເທດ​ອາ​ຊຽນ ຄັ້ງ​ທີ 18, ກອງ​ປະຊຸມ​ລັດຖະມົນຕີ ປ້ອງ​ກັນ​ປະ​ເທດ​ອາ​ຊຽນບວກ ຄັ້ງ​ທີ 11 ​ແລະ ກອງປະຊຸມ​ປິ່ນ​ອ້ອມ ໄດ້ປິດລົງດ້ວຍຜົນສຳເລັດອັນຈົບງາມ ພາຍຫລັງດຳເນີນ 19-22 ພະຈິກ 2024 ທີ່ນະຄອນຫລວງວຽງຈັນ ພາຍ​ໃຕ້​​ຄໍາ​ຂວັນ “ຮ່ວມ​ມື​ກັນ​ເພື່ອ​ສັນຕິພາບ, ຄວາມ​ໝັ້ນຄົງ ​ແລະ ຄວາມ​ເຂັ້ມ​ແຂງ​ຂອງອາ​ຊຽນ”.

ທ່ານ ພົນເອກ ຈັນ​ສະໝອນ ຈັນຍາ​ລາດ ຮອງ​ນາ​ຍົກລັດຖະມົນຕີ, ລັດຖະມົນ​ຕີ​ ກະຊວງ​ປ້ອງ​ກັນ​ປະ​ເທດ ​ແຫ່ງ ສປປ ລາວ ໄດ້ຖະແຫລງຜົນສຳເລັດ​ ໃນຕອນບ່າຍຂອງວັນທີ 21 ພະຈິກ 2024 ວ່າ: ກອງ​ປະຊຸມລັດຖະ ມົນຕີປ້ອງ​ກັນ​ປະ​ເທດອາ​ຊຽນ​ ຄັ້ງ​ທີ 18 ​ໄດ້​ຈັດ​ຂຶ້ນໃນວັນທີ 20 ພະຈິກ 2024 ລວມມີ ບັນດາລັດຖະມົນຕີປ້ອງ​ກັນ​ປະ​ເທດອາ​ຊຽນ​, ລວມທັງ ຕີ​ມໍແລັດສະ​ເຕ ໃນ​ນາມ​ເປັນ​ປະ​ເທດ​ສັງ​ເກດ​ການ ​ແລະ ​ເລຂາທິການ​ໃຫຍ່ອາ​ຊຽນ, ພ້ອມ​​ຄະນະຜູ້​ແທນ​ເຂົ້າ​ຮ່ວມ; ​​​ໄດ້​ປຶກສາ​ຫາລື​ຫລາຍ​ວາລະ​ທີ່​ສໍາຄັນ, ລວມທັງການ​ລາຍ​ງານ​ຫຍໍ້ກ່ຽວ​ກັບ​ ຜົນ​ຂອງ​ກອງ​ປະຊຸ​ມ​ເຈົ້າ​ໜ້າ​ທີ່ ​ອາວຸ​ໂສ​ປ້ອງ​ກັນ​ປະ​ເທດ​ອາ​ຊຽນ, ການ​ຮັບຮອງ​​ເອົາ​ລະ​ບຽບຫລັກການ ​ເພີ່ມ​ເຕີມ​ວ່າ​ດ້ວຍ​ການ​ສັງ​ເກດ​ການ​ ຂອງ​ໜ່ວຍ​ງານ​ຜູ້​ຊ່ຽວຊານ ​ໃນ​ຂອບ​ກອງ​ປະຊຸມລັດຖະມົນຕີ​ ປ້ອງ​ກັນ​ປະ​ເທດ​ອາ​ຊຽນບວກ, ​ເອກະ ສານ​ຍຸດ​ທະ​ສາດ​ ວ່າ​ດ້ວຍ​ຄວາມ​ພ້ອມ​ ຂອງ​ກອງ​ປະຊຸມລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນ ​ໃນ​ອະນາຄົດ, ບົດ​ແນວ​ຄວາມ​ຄິດ​ວ່າ​ດ້ວຍ​ ກອງ​ປະຊຸມ​ການ​ຮ່ວມ​ມື ​ແລະ ການ​ເຊື່ອມ​ຈອດ​ທາງ​ທະ​ເລ, ​ການສະ​ເໜີເອົາ​ມາດ​ຕະຖານ​​ ການ​ປະຕິບັດ​ງານ​​ຂອງ ກອງ​ກໍາລັງ​ກຽມພ້ອມທະຫານ​ອາ​ຊຽນ ​ເພື່ອການ​ຊ່ວຍ​ເຫລືອ​ມະນຸດສະ​ທໍາ ​ແລະ ບັນ​ເທົາ​ທຸກ​ໄພພິບັດ ​​ໃຫ້​ຄະນະ​ກໍາ​ມະ​ການ ​ຄຸ້ມ​ຄອງ​ໄພພິບັດ​ອາ​ຊຽນ ​ແລະ ​ເອກະສານ​ຊ້ອນ​ທ້າຍ​ຂອງ​ບົດ​​ແນວ​ຄວາມ​ຄິດ​ ວ່າ​ດ້ວຍ​ການ​ສ້າງ​ຄວາມ​ກົມກຽວ ​ກິດຈະ​ກໍາການ​ຮ່ວມ​ມື​ຂອງ​​ກອງ​ປະຊຸມ ລັດຖະມົນຕີ​ປ້ອງ​ກັນ​ປະ​ເທດ​ອາ​ຊຽນ, ກອງ​ປະຊຸມ​ລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນບວກ. 

ກອງປະຊຸມໄດ້​ຮັບຮອງ​ເອົາ ການ​​ປະ​ເມີນ​ຜົນກ່ຽວ​ກັບ ການ​ເຂົ້າ​ຮ່ວມສັງ​ເກດ​ການ ​ຂອງ​ໜ່ວຍ​ງານ​ຜູ້​ຊ່ຽວ ຊານ ​ໃນ​ຂອບ​ກອງ​ປະຊຸມ​ລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນບວກ  ​ໃນ​ຮອບ​ວຽນ​ປີ 2021-2023 ​ແລະ ການ​ສະໝັກ​ເຂົ້າ​ຮ່ວມ​ສັງ​ເກດ​ ການ​​ຂອງ​ໜ່ວຍ​ງານ​ດັ່ງ​ກ່າວ ແລະ ​ໃນ​ຮອບ​ວຽນປີ 2024-2027; ສິ່ງ​ສໍາຄັນ​ທີ່​ສຸດ​ໃນ​ກອງ​ປະຊຸມ​ຄັ້ງ​ນີ້, ບັນດາ​ປະ​ເທດ​ສະມາຊິກ​ອາ​ຊຽນ ​ໄດ້​ເຫັນ​ດີ​ຢ່າງ​​ເປັນເອກະ​ສັນ ​ແລະ ຮັບຮອງ​ເອົາຖະ​ແຫລ​ງການ​ຮ່ວມ​​ຂອງ ​ກອງ​ປະຊຸມ​ລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນ ​ຄັ້ງ​ທີ 18 ​ເຊິ່ງ​ເອີ້ນ​ວ່າ: “ຖະ​ແຫລ​ງການ​ຮ່ວມວຽງ​ຈັນ ​ຂອງ​ລັດຖະມົນ​ຕີ​ປ້ອງ​ກັນ​ປະ​ເທດ​ອາ​ຊຽນ ວ່າ​ດ້ວຍຮ່ວມ​ມື​ກັນ​ເພື່ອ​ສັນຕິພາບ, ຄວາມ​ໝັ້ນຄົງ ​ແລະ ຄວາມ​ເຂັ້ມ​ແຂງ​ຂອງອາ​ຊຽນ”. ​ຖະ​ແຫລ​ງການ​ດັ່ງກ່າວ, ​ໄດ້​​ເນັ້ນ​ໜັກ​ບາງ​​ເນື້ອ​ໃນ​ທີ່​ສໍາຄັນຄື: ການ​ເພີ່ມ​ທະ​ວີ​ຄວາມ​ສາມັກຄີ ​ແລະ ຄວາມ​ເປັນ​ແກນ​ກາງຂອງ​ອາ​ຊຽນ ​​​ເພື່ອເປັນ​ພະລັງຂັບ​ເຄື່ອນ​ໃຫ້​ແກ່​ ການ​ພົວພັນ​ຮ່ວມ​ມື​ກັບ​ພາຍ​ນອກ; ການສະ​ແດງ​ຄວາມ​ໝາຍ​ໝັ້ນຂອງ​ອາ​ຊຽນ ​ໃນ​ການ​ສືບ​ຕໍ່​ການຮ່ວມ​ມື​ ດ້ານວຽກ​ງານປ້ອງ​ກັນ​ຊາດ ​ແລະ ຄວາມ​ໝັ້ນຄົງ ລະຫວ່າງ ບັນ​ດາປະ​ເທດ​ສະມາຊິກ​ ອາ​ຊຽນ-ບວກ ​​​ເພື່ອ​ຮັບ​ມື​ກັບ​ບັນດາສິ່ງ​ທ້າທາຍ ​ຕໍ່​ຄວາມ​ໝັ້ນຄົງ​ຂອງ​ພາກ​ພື້ນ; ການ​​ເນັ້ນ​ໜັກ​ຄວາມ​​ສໍາຄັນ​ຕໍ່ການປົກ​ປັກ​​ຮັກສາ ​ແລະ ການ​ສືບ​ຕໍ່​ສົ່ງ​ເສີມ​ສັນຕິພາບ, ສະຖຽນ​ລະ​ພາບ, ຄວາມ​ໝັ້ນຄົງທາງ​ທະ​ເລ ​ແລະ ການຮັບ​ມື​ກັບ​​ໄພ​ຂົ່ມຂູ່ ​ແລະ ສິ່ງ​ທ້າ​ທາຍ​ຕໍ່​ຄວາມ​ໝັ້ນຄົງ​ໃນ​ພາກ​ພື້ນ ​ໂດຍ​ສັນຕິ​ວິທີ​; ການຢໍ້າຄືນຄວາມ​ພະຍາຍາມຂອງ​ອາ​ຊຽນ ​ໃນການຈັດ​ຕັ້ງ​ປະຕິບັດ 5 ຂໍ້​ຕົກລົງ ​ທີ່ເປັນ​ເອກະສັນ​ຂອງ​ຜູ້​ນໍາ​ອາ​ຊຽນ; ການ​ຮັບຮອງ​ເອົາ​ເອກະສານທີ່​ສໍາຄັນ ​​ໃນ​ຂອບ​ການ​ຮ່ວມ​ມື​ ຂອງ​ກອງປະຊຸມ​ລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນ ​ແລະ ກອງ​ປະຊຸມ​ລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນບວກ; ການ​ສະ​ແດງ​ຄວາມ​ປິ​ຕິ​ຍິນ​ດີ ​ຕໍ່​ຖະ​ແຫລງການ​ຮ່ວມ ​ຂອງລັດຖະມົນ​ຕີ​ປ້ອງ​ກັນ​ປະ​ເທດ​ອາ​ຊຽນ ວ່າ​ດ້ວຍ​ຜົນ​ສໍາ​ເລັດ​ຂອງ​ກອງ​ປະຊຸມ​ລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນ ​​ໃນ​ການຈັດ​ຕັ້ງ​ປະຕິບັດ​ແຜນ​ແມ່​ບົດ​ ຂອງ​ປະຊາ​ຄົມ​ການ​ເມືອງ-ຄວາມ​ໝັ້ນ​ຄົງ​ອາ​ຊຽນ ​ໃນ​ປີ 2025, “ຖະ​ແຫລ​ງ ການຮ່ວມຂອງ​ລັດຖະມົນຕີ​ ປ້ອງ​ກັນ​ປະ​ເທດ​ອາ​ຊຽນບວກ ວ່າ​ດ້ວຍການ​ສ້າງ​ຄວາມ​ເຂັ້ມ​ແຂງ​​ ໃນ​ການ​ຮັບ​ມື​ກັບໄພພິບັດ​ ທີ່​ໄດ້​ຮັບຜົນ​ກະທົບ​ຈາກ ການ​ປ່ຽນ​ແປງສະພາບ​ດິນ​ຟ້າ​ອາກາດ ​ແລະ ​ໄພພິບັດ​ທາງ​ທໍາ​ມະ​ຊາດ, ລວມທັງ​ ການ​ແລກປ່ຽນ​ບົດຮຽນ​ທີ່​ດີ ​ແລະ ການ​ສ້າງ​ຂີດ​ຄວາມ​ສາມາດ”, ລວມທັງ ການ​ສືບ​ຕໍ່​ເປັນ​ປະທານ​ອາ​ຊຽນ ຂອງມາ​ເລ​ເຊຍ ​ໃນ​ປີ 2025, ​ແຜນ​ງານ 3 ປີ​ຂອງ​ໜ່ວຍ​ງານ​ຜູ້​ຊ່ຽວຊານ​ ໃນ​ຂອບ​​ກອງ​ປະຊຸມ​ລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນບວກ​ໃນ​ຮອບ​ວຽນ​ປີ 2024-2027 ​ແລະ ບັນຫາ​ອື່ນໆ​ທີ່​ກ່ຽວຂ້ອງ.

ການ​ຮັບ​ຮອງຖະ​ແຫລ​ງການ​ດັ່ງກ່າວ, ​ສະ​ແດງ​ເຖິງ​ຜົນ​ສໍາ​ເລັດທີ່ມີ​ ຄວາມ​ໝາຍ​ຄວາມ​ສໍາຄັນ ຂອງກອງ​ປະ ຊຸມ​ລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນ ຄັ້ງ​ທີ 18 ​ແລະ ກອງ​ປະຊຸມປິ່ນ​ອ້ອມ​ອື່ນໆ​ ​ໂດຍ​ການ​ເປັນ​ປະທານ​ຂອງ ​ກະຊວງ​ປ້ອງ​ກັນ​ປະ​ເທດ ​ແຫ່ງ ສປປ ລາວ ​ໃນ​ປີ 2024. ຜົນ​ສໍາ​ເລັດ​ດັ່ງກ່າວ, ບໍ່​ພຽງ​ແຕ່​ເປັນ​ການ​ປະກອບສ່ວນ ສໍາຄັນ​ ເຂົ້າ​ໃນການ​​ເປັນ​ປະທານ​ອາ​ຊຽນ​ໃນ​ປີ​ນີ້​ເທົ່າ​ນັ້ນ, ແຕ່​ຍັງ​ເປັນ​ການ​ປະກອບສ່ວນ ​​ເຂົ້າ​ໃນ​ການ​ເສີມ​ສ້າງ​ການ​​ຮ່ວມ​ມືດ້ານ​ວຽກ​ງານ ​ປ້ອງ​ກັນຊາດຂອງ​ອາ​ຊຽນ​ ​ແລະ ການ​ສົ່ງ​ເສີມ​ສັນຕິພາບ, ຄວາມ​ໝັ້ນຄົງ ​ແລະ ການ​ພັດທະນາ​​ຂອງພາກ​ພື້ນ ​ໂດຍ​ລວມ.

ນອກຈາກກອງ​ປະຊຸມ​ລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນ​ແລ້ວ, ໃນ​ວັນ​ທີ 21 ພະຈິກ 2024, ກະຊວງ​​ປ້ອງ​ກັນ​ປະ​ເທດ​ ​ຍັງໄດ້​​ເປັນ​ເຈົ້າພາບ ​ແລະ ​ເປັນ​ປະທານ​ກອງ​ປະຊຸມ​ລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນບວກ ຄັ້ງ​ທີ 11 ​ໂດຍການເຂົ້າຮ່ວມຂອງ ລັດຖະມົນຕີ​ປ້ອງ​ກັນ​ປະ​ເທດ ​ຂອງ​ບັນດາ​ປະ​ເທດ​ສະມາຊິກ​ອາ​ຊຽນບວກ ທັງ​ໝົດ 18 ປະ​ເທດ. ໃນ​ນັ້ນ, ປະກອບມີ 10 ປະ​ເທດ​ສະມາຊິກ​ອາ​ຊຽນ ​ແລະ ອີກ 8 ປະ​ເທດ​ບວກ ຄື: ອົດ​ສະຕຣາລີ, ຈີນ, ອິນ​ເດຍ, ສ ເກົາຫລີ​, ຍີ່ປຸ່ນ, ນິວຊີ​ແລນ, ຣັດ​ເຊຍ ​ແລະ ​ອາ​ເມ​ລິ​ກາ. ນອກ​ນັ້ນ, ຍັງ​ມີ​​ ຕີ​ມໍ​ແລັດສະ​ເຕ ​ໃນ​ນາມ​ປະ​ເທດ​ສັງ​ເກດ​ການ ​ແລະ ​ເລຂາທິການ​ໃຫ່ຍອາ​ຊຽນ. ​ກອງ​ປະຊຸມ​ໄດ້​ຮັບ​ຟັງ ​ການ​ລາຍ​ງານຫຍໍ້ກ່ຽວ​ກັບ​ ຜົນ​ຂອງ​ກອງ​ປະຊຸມ​ເຈົ້າໜ້າ​ທີ່ ​ອາວຸ​ໂສ​ປ້ອງ​ກັນ​ປະ​ເທດ​ອາ​ຊຽນບວກ ​ແລະ ການ​ລາຍ​ງານ​ຂອງ​ກອງ​ເລຂາ​ອາ​ຊຽນ ກ່ຽວ​ກັບການ​ເຄື່ອນ​ໄຫວ​ ວຽກງານທີ່​ພົ້ນ​ເດັ່ນ​ຂອງອາ​ຊຽນ; ບັນດາ​ລັດຖະມົນ​ຕີ ປ້ອງ​ກັນ​ປະ​ເທດ​ອາ​ຊຽນບວກ ຍັງ​ໄດ້​ແລກປ່ຽນ​ສະພາບ​ການ​ເມືອງ-ຄວາມ​ໝັ້ນຄົງ​ ທີ່​ພົ້ນ​ເດັ່ນໃນ​ພາກ​ພື້ນ ​ແລະ ສາກົນ ​ແລະ ​ແລກປ່ຽນທັດສະນະ​ກ່ຽວ​ກັບ ການ​ຮັບ​ມື​ກັບບັນດາ​ສິ່ງ​ທ້າ​ທາຍ​ຕໍ່​ຄວາມ​ໝັ້ນຄົງ ​ໃນ​ປັດຈຸ​ບັນ ​ແລະ ອະນາຄົດ; ວາລະ​ທີ່​ສໍາຄັນ​ທີ່​ສຸດ​ໃນ​ກອງ​ປະຊຸມ​ດັ່ງກ່າວ​,  ​ແມ່ນ​ການຮັບຮອງ​ເອົາ ຖະ​ແຫລ​ງການຮ່ວມຂອງ​ລັດຖະມົນຕີ​ ປ້ອງ​ກັນ​ປະ​ເທດ​ອາ​ຊຽນບວກ ວ່າ​ດ້ວຍການ​ສ້າງ​ຄວາມ​ເຂັ້ມ​ແຂງ​​ ໃນ​ການ​ຮັບ​ມື​ກັບໄພພິບັດ ​ທີ່​ໄດ້​ຮັບຜົນ​ກະທົບ​ຈາກການ​ປ່ຽນ​ແປງ ສະພາບ​ດິນ​ຟ້າ​ອາ ກາດ ​ແລະ ​ໄພພິບັດ​ທາງ​ທໍາ​ມະ​ຊາດ, ລວມທັງ​ການ​ແລກປ່ຽນ​ບົດຮຽນ​ທີ່​ດີ ​ແລະ ການ​ສ້າງ​ຂີດ​ຄວາມ​ສາມາດ​. ການ​ຮັບຮອງ​ເອົາ​ຖະ​ແຫລ​ງການ​ດັ່ງກ່າວ, ສະ​ແດງ​ເຖິງຜົນ​ສໍາ​ເລັດ​ອັນ​ໜື່ງ ທີ່​ມີ​ຄວາມ​ໝາຍ​ຄວາມ​ສໍາຄັນ​ ໃນ​ການ​ເປັນ​ປະທານ​ກອງ​ປະຊຸມ​ລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນບວກ ຄັ້ງ​ທີ 11 ທີ່ ສປປ ລາວ, ທັງ​ເປັນການ​ປະ​ກອບ​ສ່ວນ​ອັນ​ສໍາຄັນ ​ເຂົ້າ​ໃນການ​ສົ່ງ​ເສີມການ​ຮ່ວມ​ມື​​​ ລະຫວ່າງ​ ປະ​ເທດ​ສະມາຊິກອາ​ຊຽນ ​ແລະ ອາຊຽນບວກ ​​ໃນ​ການ​ສ້າງຂີດ​ຄວາມ​ສາມາດ ​ເພື່ອຮັບ​ມື​ກັບ​ຜົນ​ກະທົບ​ ຈາກໄພພິບັດ​ທາງ​ທໍາ​ມະ​ຊາດ ​ແລະ ການ​ປ່ຽນ​ແປງ​ສະພາບ​ດິນ​ຟ້າ​ອາກາດ.

ກະຊວງ​ປ້ອງ​ກັນ​ປະ​ເທດ ​ແຫ່ງ ສປປ ລາວ ​​ໄດ້​ມອບ​ໂອນ​ການ​ເປັນ​ປະທານ ​ກອງ​ປະຊຸມ​ລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນ ຄັ້ງ​ທີ 19 ​ແລະ ກອງ​ປະຊຸມ​ລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນບວກ ຄັ້ງ​ທີ 12 ​ໃຫ້​ແກ່ກະຊວງ​ປ້ອງ​ກັນ​ປະ​ເທດ ​ແຫ່ງ ມາ​ເລ​ເຊຍ ສືບ​ຕໍ່​ເປັນ​​ເຈົ້າພາບ ​ໃນ​ປີ 2025. ນອກຈາກນີ້, ຍັງມີ​ກອງ​ປະຊຸມ​ບໍ່​ເປັນ​ທາງ​ການ ຂອງລັດຖະມົນຕີ​ປ້ອງ​ກັນ​ປະ​ເທດ​ອາ​ຊຽນ-ສປ ຈີນ ​ແລະ ອາ​ຊຽນ-ສ ອາ​ເມ​ລິ​ກາ ​ເພື່ອ​ປຶກສາຫາລື​ກ່ຽວ​ກັບ​ການ​ຮ່ວມ​ມືດ້ານ​ວຽກ​ງານປ້ອງ​ກັນຊາດ​ ລະຫວ່າງ ອາ​ຊຽນ ກັບສອງປະ​ເທດ​ດັ່ງກ່າວ; ມີ​​ພິທີ​ສະ​ເຫລີ​ມສະຫລອງການ​ພົວພັນ​ຮ່ວມ​ມື ລະຫວ່າງ ອາ​ຊຽນ-ອົດ​ສະຕຣາລີ ຄົບຮອບ 50 ປີ ​ແລະ ອາ​ຊຽນ-ສ ​ເກົາຫລີ ຄົບຮອບ 35 ປີ​ ​ເຊິ່ງ​ເປັນກິດຈະ​ກໍາ​ໜຶ່ງທີ່​ມີ ​ຄວາມ​ໝາຍ​ຄວາມ​ສໍາຄັນ ສໍາລັບ​ການ​ເປັນ​ປະທານ​ອາ​ຊຽນ ຂອງ​ກະຊວງ​ປ້ອງ​ກັນ​ປະ​ເທດ ​ແຫ່ງ ສປປ ລາວ ​ໃນ​ປີ​ນີ້. ​ໂດຍ​ລວມ​ແລ້ວ, ການ​ເປັນ​ເຈົ້າພາບ ​ແລະ ປະທານ ກອງ​ປະຊຸມ​ລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນ ຄັ້ງ​ທີ 18, ກອງ​ປະຊຸມ​ລັດຖະມົນຕີ ​ປ້ອງ​ກັນ​ປະ​ເທດ​ອາ​ຊຽນບວກ ຄັ້ງ​ທີ 11 ​ແລະ ກິດຈະ​ກໍາ​ປິ່ນ​ອ້ອມອື່ນໆ ໄດ້​ດໍາ​ເນີນ​ໄປດ້ວຍ​ບັນຍາກາດ​ທີ່​ສ້າງສັນ ​ແລະ ມີ​ເນື້ອ​ໃນ​ຄົບ​ຖ້ວນ, ບັນດາ​ປະ​ເທດ​ສະມາຊິກ​ອາ​ຊຽນ ​ແລະ ອາ​ຊຽນບວກ ​ໄດ້ມີ​ສ່ວນ​ຮ່ວມ ​ແລະ ປະກອບສ່ວນ​ເຂົ້າ​ໃນ​​ກອງ​ປະຊຸມ​ຄັ້ງ​ນີ້ ດ້ວຍຜົນ​ສໍາ​ເລັດຢ່າງ​ຈົບງາມ.

ຂ່າວ: ກິດຕາ

ພາບ: ອ່າຍຄຳ

KPL