ຂປລ. ໃນວັນທີ 21 ພະຈິກ 2024 ນີ້, ຢູ່ທີ່ສະຖານີລົດໄຟ ເມືອງໂພນໂຮງ ແຂວງວຽງຈັນ ໄດ້ຈັດພິທີປິດການຝຶກຊ້ອມຮ່ວມສອງກອງທັບ ລາວ-ຈີນ ພາຍໃຕ້ຫົວຂໍ້ "ຂະບວນລົດໄຟສັນຕິພາບ 2024" ເພື່ອຊ່ວຍເຫລືອມະນຸດສະທຳດ້ານການແພດ ໂດຍການເປັນປະທານຂອງ ສະຫາຍ ພົນຕີ ຄຳເພັດ ສີຊານົນ ຫົວໜ້າຫົມໃຫຍ່ ພະລາທິການກອງທັບ, ຫົວໜ້າຊີ້ນໍາລວມ ການຝຶກຊ້ອມຝ່າຍລາວ, ມີສະຫາຍ ພັນເອກ ພິເສດ ຫລິວ ຢາງ ຮອງຫົວໜ້າກົມເສນາຮັກ ກົມໃຫຍ່ຮັບປະກັນພະລາທິການທະຫານສູນກາງ ກອງທັບປົດປ່ອຍປະຊາຊົນຈີນ,  ມີບັນດາສະຫາຍຕາງໜ້າຄະນະນໍາກະຊວງ, ບັນດາກົມໃຫຍ່, ຫ້ອງວ່າການ, ອົງການປົກຄອງທ້ອງຖິ່ນ, ຄະນະຊີ້ນໍາລວມ, ບັນດາອະນຸກໍາມະການຮັບປະກັນ, ພ້ອມດ້ວຍນາຍ ແລະ ພົນທະຫານ ຈາກກອງທັບປົດປ່ອຍປະຊາຊົນຈີນ ແລະ ກອງທັບປະຊາຊົນລາວ ເຂົ້າຮ່ວມ .

ສະຫາຍ ພົນຈັດຕະວາ ຄໍາແພງ ພູມມາແກ້ວ ຫົວໜ້າກົມເສນາຮັກ ກົມໃຫຍ່ພະລາທິການກອງທັບປະຊາຊົນລາວ, ຄະນະຊີ້ນໍາລວມຝ່າຍລາວ ໄດ້ລາຍງານຜົນສໍາເລັດ ການຈັດຕັ້ງຫັດແອບ-ຝຶກຊ້ອມຮ່ວມ ສອງກອງ ທັບ ລາວ-ຈີນ ຄັ້ງນີ້ ໂດຍໄດ້ນຳໃຊ້ກຳລັງຈາກສອງກອງທັບ ທັງໝົດ 638 ຄົນ, ພາຫະນະເຕັກນິກວິຊາສະເພາະ ຈຳນວນ 30 ຄັນ, ມີລົດໄຟການແພດ 1 ຂະບວນ ແລະ ຍົນຂຶ້ນຊື່ 1 ລຳ. ນອກຈາກນີ້, ທັງສອງພາກສ່ວນແມ່ນຮ່ວມກັນໄດ້ຊອກຄົ້ນ ແລະ ກອບກູ້ຜູ້ປະສົບໄພຢູ່ເຂດ ທີ່ເກີດດິນເຈື່ອນທັບຖົມ, ໄດ້ກວດກາ ແລະ ຄັດແຍກລະດັບຄວາມຮ້າຍແຮງ ຂອງຜູ້ທີ່ຖືກບາດເຈັບ (ຄົນເຈັບໜັກ, ຄົນເຈັບກາງ ແລະ ຄົນເຈັບເບົາ ), ຮ່ວມກັນກອບກູ້ ແລະ ຊ່ວຍເຫລືອຄົນເຈັບທີ່ມີ ບັນຫາກ່ຽວກັບລະບົບຫາຍໃຈ, ຮ່ວມກັນຝຶກແອບວີທີແກ້ໄຂ, ປິ່ນປົວ, ການເຄື່ອນຍ້າຍ ແລະ ນຳສົ່ງຜູ້ຖືກບາດເຈັບ ຈາກຈາກໂຮງໝໍສະໜາມຂັ້ນ 2ແລະ  ໄປຫາໂຮງໝໍຂັ້ນ 3 ທີ່ຂະບວນລົດໄຟສັນຕິພາບ ດ້ວຍການນຳໃຊ້ລົດແພດສະໜາມນຳສົ່ງ.

ຜ່ານຝືກຊ້ອມໃນໄລຍະ7 ວັນຜ່ານມາ, ເຫລົ່າຮົບເສນາຮັກ ກອງທັບປະຂາຊົນລາວ ຍັງໄດ້ຮຽນຮູ້ເຕັກນິກການເຊີດຊູ ແລະ ປີ່ນປົວຄົນເຈັບເວລາເຄື່ອນຍ້າຍຢູ່ເທິງລົດໄຟ, ຮຽນຮູ້ວິທີນຳສົ່ງຄົນເຈັບທາງອາກາດ (ນຳສົ່ງດ້ວຍຍົນ) ເຊິ່ງການຝຶກຂະບວນລົດໄຟສັນຕິພາບ 2024 ຄັ້ງນີ້ ໄດ້ສ້າງສາຍສຳພັນສະໜິດແໜ້ນ, ເພີ່ມຄວາມສາມັກຄີຮັກແພງ ລະຫວ່າງທິມແພດ-ນັກຝຶກ ຂອງລາວ ແລະ ຈີນ ໂດຍສະເພາະແມ່ນໄດ້ແລກປ່ຽນບົດຮຽນຄວາມຮູ້ ແລະ ປະສົບການໃນການກອບກູ້ ແລະ ຊ່ວຍເຫລືອຜູ້ທີ່ໄດ້ຮັບຜົນກະທົບ ຈາກໄພພິບັດທຳມະຊາດ ແລະ ແລກປ່ຽນບົດຮຽນໃນການປິ່ນປົວຄົນເຈັບຢູ່ໂຮງໝໍ ຕື່ມອີກ.

ພ້ອມນີ້, ໃນພິທີກໍໄດ້ຜ່ານຂໍ້ຕົກລົງຂອງ ກະຊວງປ້ອງກັນປະເທດ ວ່າດ້ວຍການມອບຫລຽນໄຊພິລະອາດ ຫານຊັ້ນ III ໃຫ້ຝ່າຍຈີນ ຈໍານວນ 40  ສະຫາຍ; ມອບຫລຽນກາມິດຕະພາບ ກອງທັບປະຊາຊົນລາວ ໃຫ້ ຈຳນວນ 110 ສະຫາຍ ແລະ ຕາງໜ້າກໍາລັງຝຶກຊ້ອມຝ່າຍລາວ 10 ສະຫາຍ.

ໂອກາດນີ້, ສະຫາຍ ພົນຕີ ຄຳເພັດ ສີຊານົນ ໄດ້ມີຄໍາເຫັນວ່າ: ການຝືກຊ້ອມຮ່ວມສອງກອງທັບ ລາວ-ຈີນ ຄັ້ງນີ້ ຈະເກີດຂຶ້ນ ແລະ ສຳເລັດລົງໄດ້ ຍ້ອນການນຳຂັ້ນສູງເຫັນໄດ້ ຄວາມໝາຍຄວາມສຳຄັນ ໂດຍແມ່ນລັດຖະມົນຕີ ກະຊວງປ້ອງກັນປະເທດ ທັງສອງຝ່າຍໄດ້ອະນຸມັດໃຫ້ ຈັດຕັ້ງຂະບວນລົດໄຟສັນຕິພາບ 2024 ນີ້, ໄດ້ແຕ່ງຕັ້ງຄະນະຊີ້ນຳ ແລະ ມອບໝາຍໜ້າທີ່ໃຫ້ແຕ່ລະພາກສ່ວນ ຮັບຜິດຊອບຢ່າງລະອຽດ ໂດຍສະເພາະ ແມ່ນກົມເສນາຮັກ, ກົມໃຫຍ່ພະລາທິການ ເຊິ່ງຮັບຜິດຊອບໂດຍກົງກ່ຽວກັບ ເນື້ອໃນການຫັດແອບ, ບັນດາສະຫາຍທີ່ໄດ້ຮັບ ການແຕ່ງຕັ້ງກໍໄດ້ຕັ້ງໜ້າ ປະຕິບັດໜ້າທີ່ຂອງຕົນຢ່າງຕັ້ງໜ້າ ແລະ ມີຄວາມຮັບຜິດຊອບສູງ, ເຖິງວ່າການຝຶກຊ້ອມຄັ້ງນີ້ ສະພາບອາກາດບໍ່ເອື້ອອຳນວຍ (ອາກາດຮ້ອນ), ໄລຍະເວລາໃນການກະກຽມ-ຝຶກຊ້ອມສັ້ນ, ແຕ່ຄະນະຮັບຜິດຊອບຊີ້ນຳ, ອະນຸກຳມະການ ແລະ ນັກຝຶກແອບທຸກສະຫາຍທັງລາວ ແລະ ຈີນ ກໍໄດ້ເອົາໃຈໃສ່ສຸມໝົດທຸກສະຕິ ກຳລັງເຫື່ອແຮງຂອງຕົນຜ່ານຜ່າ ໂດຍນຳໃຊ້ເຕັກນິກການຫັດແອບ ໄດ້ຖືກຕ້ອງຕາມຫລັກການສາກົນ, ພ້ອມທັງມີຄວາມປອດໄພ 100% ແລະ ການຝຶກຊ້ອມຄັ້ງນີ້, ນອກຈາກເປັນການສ້າງຄວາມເຂັ້ມແຂງ ໃຫ້ແກ່ນັກວິຊາການ-ແພດໝໍ ແລະ ການແລກປ່ຽນບົດຮຽນ-ປະສົບການ ໃນການປິ່ນປົວແລ້ວ ຍັງເປັນຂີດໝາຍທີ່ສຳຄັນເຖິງ ການຮັດແໜ້ນຄວາມສາມັກຄີ ມິດຕະພາບ, ສອງພັກ, ສອງລັດ ກໍຄື ປາຊາສອງຊາດ ລາວ-ຈີນ ໃນການກະຄວາມພ້ອມໃຫ້ການຊ່ວຍ ເຫລືອເຊິ່ງກັນ ແລະ ກັນ ໃນທຸກສະພາບການ.

ຂ່າວ: ບິກໄຊ

KPL