ຂປລ
* ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ສັງຄົມນິຍົມຫວຽດນາມ, ນອກຈາກເປັນປະເທດ ບ້ານໃກ້ເຮືອນຄຽງ ທີ່ມີຊາຍແດນ ຕິດຈອດກັນ.
* ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ສັງຄົມນິຍົມ ຫວຽດນາມ, ນອກຈາກ ເປັນປະເທດບ້ານ ໃກ້ເຮືອນຄຽງ ທີ່ມີຊາຍແດນ ຕິດຈອດກັນ ຍາວເຖິງ 2.340 ກິໂລແມັດແລ້ວ; ສອງປະເທດ ຍັງມີມູນເຊື້ອ ການພົວພັນ ຮ່ວມມືມາ ຍາວນານ, ປະຊາຊົນສອງຊາດ ເຄີຍໄປມາຫາສູ່ກັນ ມາແຕ່ບູຮານ.
ໃນໄລຍະຕໍ່ສູ້ກູ້ຊາດ, ລາວ-ຫວຽດນາມ ໄດ້ຄຽງບ່າຄຽງໄຫລ່ ຕໍ່ສູ້ກັບສັດຕູ ໂຕດຽວກັນ, ສາມັກຄີຮັກແພງກັນ ເຂົ້າເມັດຫັກ ຜັກເສັ້ນໜຶ່ງ ກໍ່ແບ່ງປັນກັນກິນ ກາຍເປັນຄວາມຮັກແພງໃກ້ຊິດສະໜິດສະໜົມ ອັນຫາສິ່ງປຽບບໍ່ໄດ້ ຊຶ່ງມູນເຊື້ອດັ່ງ ກ່າວແມ່ນປະທານໂຮ່ຈີ່ມິງ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ແສນເຄົາລົບຮັກ ເປັນຜູ້ສ້າງຂຶ້ນ, ຖະ ໜຸຖະໜອມ ແລະ ໄດ້ຮັບການ ເພີ່ມພູນຄູນສ້າງ ຕະຫລອດມາ. ພາຍຫລັງສອງ ປະເທດ ລາວ-ຫວຽດນາມ ໄດ້ຮັບການປົດປ່ອຍ ຢ່າງສົມບູນ; ການພົວພັນ ຮ່ວມມື ກໍ່ຍິ່ງນັບມື້ ແໜ້ນແກ່ນ, ກ້າວສູ່ລວງເລິກຍິ່ງຂຶ້ນ ແລະ ມີຜົນສຳເລັດ ໃນຫລາຍດ້ານ; ການແລກປ່ຽນ ຢ້ຽມຢາມຂອງ ການນຳຂັ້ນສູງ ຂັ້ນປະມຸກລັດ ສອງປະເທດ, ການນຳຂັ້ນຕ່າງໆ ທັງສູນກາງ ແລະ ທ້ອງຖິ່ນ, ລວມ ທັງລະດັບ ວິຊາການ ໄດ້ມີຂຶ້ນຢ່າງ ເປັນປົກກະຕິ ແລະ ທຸກຂົງເຂດ ວຽກງານ.ນັ້ນແມ່ນບໍ່ເກີດ ຂອງການພົວພັນ ສາມັກຄີພິເສດ ທີ່ກາຍເປັນປັດໄຈ ຕັດສິນຜົນສຳເລັດ ແລະ ໄຊຊະນະ ຂອງ ການປະຕິວັດ ຢູ່ສອງປະເທດ ຂອງພວກເຮົາ ຊຶ່ງເປັນຕົວແບບ ທີ່ຫາໄດ້ຍາກ ໃນການພົວພັນ ລະຫວ່າງຊາດ ຢູ່ໃນໂລກ, ເປັນສາຍພົວພັນ ທີ່ຍິ່ງໃຫຍ່, ເລິກເຊິ່ງ, ດູດດື່ມ ແລະ ເປັນມໍລະດົກ ລ້ຳ ຄ່າ ຂອງທັງ ສອງຊາດ ລາວ-ຫວຽດນາມ.
ປີ 2022 ນີ້ ເປັນປີທີ່ມີຄວາມໝາຍຄວາມສຳຄັນ ຍິ່ງຕໍ່ການພົວພັນ ຮ່ວມມືລະຫວ່າງ ລາວ-ຫວຽດນາມ ເພາະເປັນປີ ແຫ່ງການມິດຕະພາບ ແລະ ການຮ່ວມມື ທີ່ແໜ້ນແກ່ນ ຍາວ ນາວ ຂອງຊາດ ເປັນວາລະ ຄົບຮອບ 45 ປີ ວັນເຊັນສົນທິສັນຍາ ມິດຕະພາບ ແລະ ການຮ່ວມມື (18 ກໍລະກົດ 1977-18 ກໍລະກົດ 2022) ແລະ ວັນສ້າງຕັ້ງ ສາຍພົວພັນ ການທູດ ລາວ- ຫວຽດນາມ ຄົບຮອບ 60 ປີ (5 ກັນຍາ 1962- 5 ກັນຍາ 2022). ສອງພັກ-ສອງລັດ ພ້ອມກັບປະຊາຊົນ ສອງຊາດລາວ-ຫວຽດນາມ ໄດ້ພ້ອມກັນຈັດຕັ້ງ ປີສາມັກຄີ ມິດຕະພາບ ລາວ- ຫວຽດ ນາມ, ຫວຽດນາມ-ລາວ ດ້ວຍຫລາຍກິດຈະກຳ ເພື່ອສະເຫລີມສະຫລອງ ວັນສຳຄັນຕ່າງໆ ຂອງລາວ ແລະ ຫວຽດນາມ. ເວົ້າສະເພາະ ການພົວພັນ ດ້ານການເມືອງ ກໍຄືການພົວພັນ ການທູດລະ ຫວ່າງສອງຝ່າຍ ໃນໄລຍະ 60 ປີຜ່ານມາ ມີຜົນສຳເລັດ ອັນສະຫງ່າງາມ ໂດຍເວົ້າໄດ້ວ່າ ບໍ່ມີການພົວພັນ ຮ່ວມມືສອງຝ່າຍ ໃດໃນໂລກ ຄືກັບກັບສອງຊາດ ຫວຽດນາມ-ລາວ, ລາວ-ຫວຽດນາມ ໂດຍມີລະດັບ ການແລກປ່ຽນ ຢ້ຽມຢາມ ລະຫວ່າງ ການນຳຂັ້ນສູງ ຢ່າງເນື່ອງນິດລຽນຕິດ, ການພົວພັນ ການທູດສອງຝ່າຍ ແມ່ນອີງໃສ່ ມູນເຊື້ອແຕ່ອະດີດ ຫລາຍທົດສະວັດ ຜ່ານມາ ທີ່ສອງຊາດໄດ້ຮ່ວມກັນຕໍ່ສູ້ ຕ້ານສັດຕູໂຕດຽວກັນ, ອີກປັດໄຈໜຶ່ງ ແມ່ນຄວາມເຊື່ອໝັ້ນ ລະຫວ່າງສອງຝ່າຍ ທີ່ເລິກເຊິ່ງ ເຮັດໃຫ້ການພົວພັນ ຮ່ວມມືທາງດ້ານ ການເມືອງ ແລະ ການທູດ ມີການພັດ ທະນາຢ່າງຈົບງາມ. ການພົວພັນ ທາງເສດຖະກິດ ຍິ່ງເປັນອົງປະກອບສຳຄັນ ໃນການພົວພັນ ຫວຽດນາມ-ລາວ, ເພາະວ່າສອງຊາດ ມີຄວາມມຸ່ງຫວັງ ແລະ ເປົ້າໝາຍ ອັນດຽວກັນ ໃນການສ້າງ ສາພັດທະນາ ປະເທດຊາດ ສີວິໄລ ແລະ ນຳເອົາຊີວິດ ການເປັນຢູ່ ທີ່ດີຂຶ້ນມາສູ່ ປະຊາຊົນທັງສອງຊາດ. ເຖິງແມ່ນວ່າ ສະພາບແວດລ້ອມ ຂອງໂລກ ກໍຄືສາກົນ ໄດ້ຜັນແປໄປ ຢ່າງໄວວາ ສັບສົນທີ່ ມີທັງ ກາລະໂອກາດ ແລະ ສິ່ງທ້າທາຍນາໆ ປະການກໍ່ຕາມ, ແຕ່ ພັກ-ລັດ ແລະ ປະຊາຊົນ ລາວບັນດາເຜົ່າ ກໍ່ໄດ້ເອົາໃຈໃສ່ ເພີ່ມທະວີສ້າງ ໃຫ້ການພົວພັນ ຮ່ວມມືຂອງ ສອງຊາດ ຍິ່ງເພີ່ມພູນ ຄູນສ້າງ ໃຫ້ອຸດົມສົມບູນ ແລະ ໄດ້ຮັບການປັບປຸງ ຍົກລະດັບທັງທາງ ດ້ານປະລິມານ ແລະ ຄຸນນະພາບ ໃຫ້ສູງຂຶ້ນເລື້ອຍໆ. ການຮ່ວມມື ນັບມື້ເຂົ້າສູ່ ລວງເລິກແທດຕົວຈິງ; ກົນໄກ ແລະ ວິທີ ການຕ່າງໆ ແມ່ນນັບມື້ ຄ່ອງຕົວຍິ່ງຂຶ້ນ, ການພົວພັນຮ່ວມມື ລະຫວ່າງທ້ອງຖິ່ນ, ຂະແໜງການ ມີປະສິດທິຜົນຫລາຍຂຶ້ນ ແລະ ຂົງເຂດຕ່າງໆ ນັບມື້ເປີດກວ້າງອອກ ນຳເອົາຜົນ ປະໂຫຍດຕົວ ຈິງມາສູ່ ປະຊາຊົນສອງຊາດພວກເຮົາ.
ຜ່ານມາ ພັກ, ລັດຖະບານ ແລະ ປະຊາຊົນ ຫວຽດນາມອ້າຍນ້ອງ ໄດ້ໃຫ້ການຊ່ວຍເຫລືອ ອັນລໍ້າຄ່າ, ທັນການ ແລະ ມີປະສິດທິຜົນ ທັງການຊ່ວຍເຫລືອ ປົກກະຕິປະຈໍາປີ ກໍຄືການຊ່ວຍ ເຫລືອ ໃນຍາມໄພພິບັດຕ່າງໆ ພິເສດ ແມ່ນການຮັບມື ກັບພະຍາດໂຄວິດ-19 ຊຶ່ງ ສສ ຫວຽດນາມ ເປັນປະເທດທໍາອິດ ທີ່ເຂົ້າມາໃຫ້ການຊ່ວຍເຫລືອ ແກ່ ສປປ ລາວ ອັນນີ້ແມ່ນສະແດງ ໃຫ້ ເຫັນລັກສະນະ ພິເສດຂອງການພົວພັນ ຮ່ວມມື ລາວ-ຫວຽດນາມ ທີ່ໄດ້ກາຍເປັນປັດໄຈ ຊ່ວຍໜູນທີ່ສຳຄັນ ໃຫ້ແກ່ການພັດທະນາ ປະເທດຊາດຂອງ ພວກເຮົາ ຊຶ່ງການນຳຂັ້ນສູງ ຂອງສອງປະ ເທດຍາມໃດກໍ່ໄດ້ຊີ້ນຳ ຢ່າງເຂັ້ມງວດ ໃຫ້ອຳນາດການປົກຄອງ ຂອງທັງສອງຝ່າຍ ເພີ່ມທະວີການເຊື່ອມຕໍ່ ລະຫວ່າງ ສອງພື້ນຖານເສດຖະກິດ, ໂດຍສະເພາະ ແມ່ນການເຊື່ອມຕໍ່ ໃນພື້ນຖານ ໂຄງລ່າງ, ການຂົນສົ່ງ, ການຂຸດຄົ້ນ ແລະ ການພັດທະນາ ພະລັງງານ. ຄຽງຄູ່ກັບ ການແກ້ໄຂຜ່ານຜ່າ ບັນດາບັນຫາທີ່ມີຢູ່ແລ້ວ ເພື່ອເຮັດໃຫ້ການຮ່ວມມືນັບມື້ນັບເລິກເຊິ່ງ, ມີປະສິດທິຜົນ, ແທດ ເໝາະກັບທ່າແຮງ ຂອງສອງປະເທດ.
ປັດຈຸບັນ, ຫວຽດນາມແມ່ນໜຶ່ງໃນບັນດາປະເທດນຳໜ້າ ໃນການລົງທຶນ ແລະ ເປັນຄູ່ຮ່ວມມື ການຄ້າໃຫຍ່ຂອງລາວ. ສ່ວນການຮ່ວມມື ດ້ານປ້ອງກັນຊາດ-ປ້ອງກັນ ຄວາມສະຫງົບ ສືບຕໍ່ບັນລຸ ໝາກຜົນສຳຄັນ ຫລາຍຢ່າງ, ປະກອບສ່ວນ ຮັບປະກັນ ຄວາມໝັ້ນຄົງ ດ້ານການເມືອງ, ຄວາມເປັນ ລະບຽບຮຽບຮ້ອຍ ແລະ ຄວາມປອດໄພ ຂອງແຕ່ລະປະເທດ. ສອງຝ່າຍສືບ ຕໍ່ປະສານສົມທົບ ເພື່ອຈັດຕັ້ງປະຕິບັດ ເປັນຢ່າງດີຕາມຂໍ້ຕົກລົງ ກ່ຽວກັບຊາຍແດນ ທີ່ໄດ້ລົງນາມ, ປ້ອງກັນ ແລະ ແກ້ໄຂ ການກະທຳລະເມີດ ຊາຍແດນໂດຍທັນທີ, ປະສານສົມທົບ ກັນຕໍ່ສູ້ ຕ້ານ ອາດຊະຍາກຳ ຂ້າມຊາດ, ຊຸກຍູ້ການລົງນາມ ບັນດາຂໍ້ຕົກລົງ ໃນຂົງເຂດປ້ອງກັນຊາດ, ປ້ອງກັນຄວາມສະຫງົບ, ການຕ່າງປະເທດ, ວັດທະນະທຳ, ການສຶກສາ, ວິທະຍາສາດ-ເຕັກໂນໂລຊີ ໄດ້ສືບຕໍ່ ມີໝາກຜົນຢ່າງຕັ້ງໜ້າ. ກ່ຽວກັບການຮ່ວມມື ຫລາຍຝ່າຍ ນັບແຕ່ເວລາ ເຂົ້າເປັນສະມາຊິກ ອາຊຽນ ຫວຽດນາມ ແລະ ລາວໄດ້ປະສານງານ ແລະ ສະໜັບສະໜູນເຊິ່ງກັນ ແລະ ກັນ ໃນຫລາຍບັນຫາ ທີ່ໄດ້ປຶກສາຫາລື ຢູ່ໃນບັນດາເວທີ ປາໄສອາຊຽນ ຊຶ່ງທັງໝົດນັ້ນ ໄດ້ປະກອບສ່ວນ ເພີ່ມພູນຄູນສ້າງ ແລະ ເສີມຂະຫຍາຍ ມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມື ຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ໃຫ້ຈະເລີນງອກງາມ ແລະ ເກີດດອກອອກຜົນ ຫລາຍຂຶ້ນຕື່ມ, ປະກອບສ່ວນ ຢ່າງ ຕັ້ງໜ້າ ເຂົ້າໃນການເສີມສ້າງ ສັນຕິພາບ, ມິດຕະພາບ, ການຮ່ວມມື ແລະ ການເຊື່ອມໂຍງ ໃນພາກພື້ນ ແລະ ໃນໂລກ ເພື່ອຄວາມສັນຕິສຸກ ແລະ ຄວາມຈະເລີນ ວັດທະນາຂອງ ບັນດາປະຊາ ຊາດ.
ການສ້າງຕັ້ງສາຍພົວພັນການທູດ ແລະ ການເຊັນສົນທິສັນຍາມິດຕະພາບ ແລະ ການຮ່ວມມືລະຫວ່າງ ສປປ ລາວ ແລະ ສສ ຫວຽດນາມ ໄດ້ກາຍເປັນເຫດ ການທີ່ມີຄວາມ ໝາຍ ຄວາມສໍາຄັນ ທາງດ້ານປະຫວັດສາດ ຂອງສອງຊາດ; ການພົວພັນດັ່ງກ່າວ ໄດ້ກາຍເປັນກົດເກນ ແຫ່ງການຄົງຕົວ ແລະ ຂະຫຍາຍຕົວ ຂອງສອງປະເທດ, ເປັນສາຍພົວພັນ ທີ່ຫາໄດ້ຍາກໃນ ການພົວພັນສາກົນ ແລະ ໃນໂລກ.
ພວກເຮົາຈົ່ງພ້ອມກັນເພີ່ມພູນຄູນສ້າງມູນເຊື້ອ ສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມື ຮອບດ້ານ ລະຫວ່າງ ລາວ-ຫວຽດນາມ ໃຫ້ນັບມື້ຈະເລີນ ງອກງາມ ຍິ່ງໆຂຶ້ນ!
KPL
