ການພົວພັນສະໜິດແໜ້ນ ລາວ -​ຫວຽດນາມ ໄດ້ກໍາເນີດເກີດຂຶ້ນຈາກ ປະຫວັດສາດແຫ່ງການ ສ້າງສາ ແລະ ປົກປັກຮັກສາປະເທດຊາດ ຂອງສອງປະເທດບ້ານໃກ້ເຮືອນຄຽງ. ປະຊາຊົນ ສອງປະເທດ, ໂດຍສະເພາະ ຢູ່ຂອບເຂດຊາຍແດນ ໄດ້ເພິ່ງພາອາໄສກັນ, ອຸ້ມຊູຊ່ວຍເຫລືອ ເຊິ່ງກັນ ແລະ ກັນໃນຊີວິດ ປະຈຳວັນ ໂດຍສະເພາະ ໃນຍາມມີໄພພິບັດ ທາງທຳມະຊາດເກີດຂຶ້ນ. ສອງປະເທດຍາມ ໃດກໍຮັກສາການພົວພັນ ແບບສັນຕິພາບ, ຜູກພັນອັນສະໜິດແໜ້ນ ນຳກັນໂດຍຜ່ານໄລຍະປະຫວັດສາດມາຍາວນານ.

ສາຍພົວພັນພິເສດ ລະຫວ່າງ ສອງປະເທດ ລາວ-ຫວຽດນາມ ໂດຍແມ່ນປະທານໂຮ່ຈີ່ມິງ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ເປັນຜູ້ລິເລິ່ມ, ເພີ່ມພູນຄນສ້າງ ພາຍໃຕ້ການນຳພາ ຂອງພັກຄອມມູນິດ ຫວຽດນາມ, ພັກປະຊາຊົນ ປະຕິວັດລາວ ໃນໄລະຍະປະ ຫວັດສາດ, ໄດ້ກາຍເປັນຊັບສົມບັດ ອັນລ້ຳຄ່າຂອງສອງຊາດ ແລະ ເປັນກົດເກນ ຂະຫຍາຍຕົວ ລວມຂອງສອງປະເທດ ບົນເສັ້ນທາງພັດທະນາ ປະເທດຊາດ ຮຸ່ງເຮືອງສີວິໄລ, ປະຊາຊົນອີ່ມໜໍາສຳລານ ແລະ ມີຄວາມຜາສຸກ. ໃນການຕໍ່ສູ້ຍາດ ເອົາເອກລາດແຫ່ງຊາດ (ໄລຍະປີ 1930 – 1945 ) ສອງປະເທດມີສະພາບ ປະຫວັດສາດ ທີ່ຄາຍຄືກັນ, ມີຈຸດໝາຍດຽວກັນ ແລະ ຄວາມຄາດຫວັງ ເປັນເອກະລາດ, ສິດເສລີພາບ, ເສັ້ນທາງປົດປ່ອຍຊາດ ຫວຽດນາມ ເດີນຕາມແນວທາງ ການປະຕິວັດກຳມະຊີບ ແລະ ກໍເປັນເສັ້ນທາງ ທີ່ສອດຄອງ ເພື່ອປົດປ່ອຍຊາດລາວ ອອກຈາກແອກ ກົດຂີ່ຂູດຮີດ. ພາຍຫລັງທີ່ຢຶດໄດ້ອຳນາດ, ສອງປະເທດໄດ້ລົງນາມ ເຊັນສົນທິສັນຍາ ການຊ່ວຍເຫລືອ ລະຫວ່າງ ລາວ-ຫວຽດນາມ ແລະ ສັນຍາ ວ່າດ້ວຍການຈັດຕັ້ງ ທະຫານປະສົມ ​ລາວ-ຫວຽດນາມ, ສ້າງພື້ນຖານນິຕິກຳ ສະບັບທຳອິດ ໃຫ້ແກ່ການຮ່ວມມື, ຊ່ວຍເຫລືອ ແລະ ຮ່ວມສຳພັນ ສູ້ຮົບ ຕ້ານສັດຕູໂຕດຽວກັນ, ຊ່ວຍເຫລືອເຊິ່ງກັນ ແລະ ກັນ, ທັງ ເຮັດໜ້າທີ່ສາກົນອັນສູງຊົງ, ທັງເຮັດເພື່ອຜົນປະໂຫຍດຂອງແຕ່ລະຊາດ. ທັດສະນະທີ່ວ່າ: “ ຊ່ວຍເຫລືອເພື່ອນ ແມ່ນຊ່ວຍເຫລືອຕົວເອງ ” ເຊິ່ງບັນດາລຸ້ນການນຳ ແລະ ປະຊາຊົນສອງປະເທດ ລາວ-ຫວຽດນາມ ຕ່າງກໍຮັບຮູ້ ແລະ ສືບຕໍ່ເປັນແບບຢາງ ຂອງຂະບວນວິວັດ ແຫ່ງປະຫວັດສາດຂອງສອງຊາດ.

ກ້າວເຂົ້າສູ່ສັງກາດໃໝ່ການສ້າງສາປະເທດແຫ່ງສັນຕິພາບ ແລະ ກ້າວຂຶ້ນລະບອບສັງຄົມນິຍົມ, ການພົວພັນສອງປະເທດ, ຄວາມສາມັກຄີພິເສດ ແລະ ການຮ່ວມມືຮອບດ້ານ ໂດຍພາຍໃຕ້ການນຳພາ ຂອງພັກຄອມມູນິດ ຫວຽດນາມ ແລະ ພັກປະຊາຊົນ ປະຕິວັດລາວ ທັງສອງ ປະເທດ ໄດ້ລົງນາມເຊັນບັນດາ ສົນທິສັນຍາ ແລະ ການຮ່ວມມື ລະຫວ່າງ ສາທາ ລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ສັງຄົມນິຍົມ ຫວຽດນາມ ອັນໄດ້ຢັ້ງຢືນ ເຖິງນ້ຳໃຈສາມັກຄີພິເສດ ທີ່ສະເໝີຕົ້ນສະເໝີປາຍ, ການຮ່ວມມື, ສະໜັບສະໜູນ ແລະ ການຊ່ວຍ ເຫລືອເຊິ່ງກັນ ແລະ ກັນ ໃນພາລະກິດສ້າງສາ ແລະ ປົກປັກຮັກສາ ຄວາມເປັນເອກະລາດ, ອຳນາດອະທິປະໄຕ ແລະ ຜື່ນແຜນດິນອັນຄົບຖ້ວນ ຂອງແຕ່ລະປະເທດ. ນີ້ແມ່ນເອກະສານ ທີ່ມີຄວາມໝາຍສຳຄັນ ທາງປະຫວັດສາດຢ່າງຍິ່ງ, ທັງເປັນຂີດໝາຍຂອງບາດກ້າວ ການຂະຫຍາຍຕົວ ອັນໃໝ່, ຮອບດ້ານຂອງສາຍພົວພັນພິເສດຂອງສອງປະເທດ.

ກ້າວເຂົ້າສູ່ສັດຕະວັດທີ 21, ນີ້ແມ່ນໄລຍະທີ່ສອງປະເທດເພີ່ມທະວີຄວາມສາມັກຄີພິເສດ, ການຮ່ວມມືຮອບ ດ້ານທັງດ້ານລ່ວງກວ້າງ ແລະ ລ່ວງເລິກ, ບົນພື່ນຖານ ທີ່ສອງປະເທດບັນລຸ ໄດ້ຜົນສຳເລັດ ທີ່ສຳຄັນຫລາຍດ້ານ, ບັນດາໝາກຜົນ ທີ່ໄດ້ຮັບຈາກການຮ່່ວມມື ດ້ານເສດ ຖະກິດ, ວັດທະນະທຳ, ວິທະຍາສາດ-ເຕັກນິກ, ການຮ່ວມມື ລະຫວ່າງບັນດາ ທ້ອງຖິ່ນ, ໄດ້ປະກອບສ່ວນຍູ້ແຮງ ຂະບວນການສ້າງສາ, ພັດທະນາ, ເຊື່ອມໂຍ່ງລະຫວ່າງພາກພື້ນ ແລະ ສາກົນຢູ່ແຕ່ລະປະເທດ. ປະຊາຊົນສອງປະເທດ ສາມາດເອກອ້າງທະນົງໃຈ ກ່ຽວກັບໄລຍະ ການກຳເນີດ ເຕີບໃຫຍ່ ແລະ ການຂະຫຍາຍຕົວ ຂອງສາຍພົວພັນພິເສດ, ຫາໄດ້ຍາກຂອງສອງຊາດ. ພົວພັນເຫລົ່ານີ້ ພວມສືບຕໍ່ໄດ້ຮັບການປັບປຸງ, ປ່ຽນແປງໃໝ່ ແລະ ພັດ ທະນາຫລາຍຂື້ນກ່ວາເກົ່າ, ເປັນການປະກອບສ່ວນ ອັນແທດເໝາະ ເຂົ້າໃນພາລະກິດສ້າງສາ, ປົກປັກຮັກສາ ແລະ ການພັດທະນາ ຂອງແຕ່ລະປະເທດ. ອາດເວົ້າໄດ້ວ່າ, ໃນທຸກໆບາດກ້າວ ຂອງສອງປະເທດ, ສອງຊາດໃນປັດຈຸບັນ ລ້ວນແຕ່ມີການ ປະກອບສ່ວນ ຢ່າງຕັ້ງໜ້າຂອງສອງຝ່າຍ, ຊ່ວຍເຮັດໃຫ້ສາຍພົວພັນພິເສດ ລາວ-ຫວຽດນາມ ນັບມື້ຜູກພັນຢ່າງກົມກຽວ ໜຽວແໜ້ນ, ກາຍເປັນກົດເກນ ການພັດທະນາ, ເປັນ ປັດໄຈສຳຄັນ ຮັບປະກັນໄຊຊະນະສົມບູນ ຂອງພາລະກິດປະຕິວັດ ແຕ່ລະປະເທດ ແລະ ເປັນຊັບສົມບັດລວມ ອັນລ້ຳຄ່າຂອງສອງພັກ, ສອງຊາດພວກເຮົາ.

ປີນີ້, ປະຊາຊົນສອງຊາດ ລາວ ແລະ ຫວຽດນາມ ພວມຈັດຕັ້ງກິດຈະກຳເຄື່ອນໄຫວ ຫລາຍຢ່າງເພື່ອສະເຫລີມສະຫລອງ ວັນສ້າງຕັ້ງສາຍພົວພັນການທູດ ລາວ - ຫວຽດນາມ ຄົບຮອບ 60 ປີ (5/9/1962-5/9/2022) ແລະ ວັນເຊັນສົນທິສັນຍາ ມິດຕະພາບ ແລະ ການຮ່ວມມື ຄົບຮອບ 45 ປີ (18/7/1977- 18/7/2022) ແລະ ຂໍ່ານັບຮັບຕ້ອນ ປີສາມັກຄີ ລາວ - ຫວຽດນາມ, ຫວຽດນາມ - ລາວ ປີ 2022 ຂຶ້ນຢ່າງສົມກຽດ. ນີ້ເປັນໂອກາດ ທີ່ສອງປະເທດ ພ້ອມກັນສືບຕໍ່ພິສູດຢັ້ງຢືນ, ຕັດສິນໃຈສູ້ຊົນສືບທອດ ແລະ ເພີ່ມພູນຄູນສ້າງສາຍພົວພັນ ມິດຕະພາບພິ ເສດ ອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ສວຍສົດ ງົດງາມ ແລະ ໝັ້ນຄົງທະນົງແກ່ນ ຕະຫລອດກາລະນານ. ປະກອບສ່ວນຢ່າງຕັ້ງໜ້າ ເຂົ້າໃນພາລະກິດສ້າງສາ, ປົກປັກ ຮັກສາປະເທດຊາດ ສັງຄົມນິຍົມຂອງແຕ່ລະປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາ ຢູ່ພາກພື້ນ ແລະ ໃນໂລກ.

KPL