ອີງຕາມຂໍ້ມູນສະຖິຕິການນໍາເຂົ້າ-ສົ່ງອອກສິນຄ້າ ລະຫວ່າງ ລາວ ແລະ ຫວຽດນາມ ແຕ່ປີ 2018 ຫາປີ 2021 ທີ່ລາຍງານເມື່ອບໍ່ດົນນີ້ວ່າ: ມູນຄ່າການຄ້າລະຫວ່າງ ສອງປະເທດ ລາວ-ຫວຽດນາມ ສາມາດບັນລຸ 4,5 ຕື້ໂດລາສະຫະລັດ. ໃນນີ້, ມູນຄ່າການສົ່ງ ອອກຂອງລາວ ໄປ ຫວຽດນາມ ບັນລຸ 2,1 ຕື້ໂດລາສະຫະລັດ ແລະ ການນໍາເຂົ້າ ຂອງລາວ ຈາກຫວຽດນາມ ບັນລຸ 2,4 ຕື້ໂດລາສະຫະລັດ.

ກ່ອນສະພາບການແພ່ລະບາດ ຂອງພະຍາດໂຄວິດ-19 ສະພາບການຄ້າສອງຝ່າຍ ລະຫວ່າງ ລາວ-ຫວຽດນາມ ແມ່ນມີການຂະຫຍາຍຕົວ ໄປຕາມຄາດໝາຍ ທີ່ສອງລັດຖະບານວາງອອກ ກໍ່ຄືສາມາດບັນລຸ ເປົ້າໝາຍອັດຕາ ການຂະຫຍາຍຕົວ ຂອງມູນຄ່າການຄ້າ ຢ່າງໜ້ອຍ 10%/ປີ. ແຕ່ມາຮອດປີ 2020 ມູນຄ່າການຄ້າ ສອງຝ່າຍໄດ້ຫລຸດລົງ (-11,5%) ທຽບໃສ່ປີ 2019 ຍ້ອນສະພາບການ ແພ່ລະບາດ ຂອງພະຍາດໂຄວິດ-19 ແລະ ການນໍາໃຊ້ມາດຕະການ ໃນການກວດກາສະກັດກັ້ນ ການແພ່ລະບາດ ຂອງພະຍາດດັ່ງກ່າວ ເປັນຕົ້ນ: ການປ່ຽນຄົນຂັບລົດ, ການຄ່ຽນຖ່າຍລົດ ແລະ ສິນຄ້າ ເຮັດໃຫ້ ການພົວພັນໄປມາ ແລະ ການຂົນສົ່ງສິນຄ້າ ລະຫວ່າງ ສອງປະເທດ ຖືກຜົນກະທົບຢ່າງຮ້າຍແຮງ. 

ເຖິງຢ່າງໃດກໍຕາມ ຍ້ອນສາຍສໍາພັນອັນແໜ້ນແຟ້ນຂອງ ສປປ ລາວ ແລະ ສສ ຫວຽດນາມ, ເຈົ້າໜ້າທີ່ ແລະ ກະຊວງທີ່ກ່ຽວຂ້ອງ ຂອງສອງປະເທດ ໄດ້ມີຄວາມພະຍາຍາມສູງ ໃນການຄົ້ນຄວ້າ ປັບປຸງຂັ້ນຕອນ ແລະ ຜ່ອນຜັນບາງມາດຕະການ ເພື່ອອໍານວຍ ຄວາມສະດວກ ໃຫ້ ແກ່ການນໍາເຂົ້າ ແລະ ສົ່ງອອກ ເປັນແຕ່ລະໄລຍະ ສົ່ງຜົນເຮັດໃຫ້ມູນຄ່າ ການຄ້າລະຫວ່າງສອງປະເທດ ມີການຂະຫຍາຍຕົວ ແບບກ້າວກະໂດດ ໃນປີ 2021 ຊຶ່ງສາມາດບັນລຸໄດ້ 1,37 ຕື້ ໂດລາສະຫະລັດ ເພີ່ມຂຶ້ນ 33,32% ທຽບໃສ່ປີ 2020 ກາຍ ຄາດໝາຍທີ່  ສອງລັດຖະບານ ໄດ້ ວາງໄວ້ ແລະ ຖືວ່າເປັນມູນຄ່າ ການຄ້າສອງຝ່າຍ ລາວ-ຫວຽດນາມ ທີ່ສູງທີ່ສຸດ ໃນໄລຍະ 10 ປີຜ່ານມາ.

ນັ້ນສະແດງໃຫ້ເຫັນເຖິງຄວາມສາມັກຄີພິເສດລະຫວ່າງສອງປະເທດ ລາວ-ຫວຽດນາມ ເຖິງວ່າຈະມີອຸປະສັກ ກໍຄຽງບ່າຄຽງໄຫລ່ກັນແກ້ໄຂ ແລະ ພ້ອມກັນຜ່ານຜ່າ ອຸປະສັກນາໆປະການ ໄດ້ຢ່າງມີໄຊ ແລະ ປະສົບຜົນສຳເລັດ ເພື່ອນຳພາປະເທດຊາດ ກໍຄືປະຊາ ຊົນ ທັງສອງຊາດ ກ້າວສູ່ຄວາມຈະເລີນສີວິໄລ, ຊີວິດການເປັນຢູ່ ຂອງປະຊາຊົນ ນັບມື້ດີຂຶ້ນເປັນກ້າວໆ./.

KPL