ລາວ ແລະ ຫວຽດນາມ ແມ່ນສອງປະເທດບ້ານໄກ້ເຮືອນຄຽງ, ມີພູຜາແມ່ນໍ້າລໍາເຊເຊື່ອມຕໍ່ກັນ, ມີຄວາມສາມັກຄີ ທາງດ້ານຈິດໃຈ, ການຈັດຕັ້ງ, ການຕໍ່ສູ້ ແລະ ການຮ່ວມພັດທະນາ ອັນເປັນມູນເຊື້ອ, ມີວັດທະນະທໍາຫລາຍ ຈຸດທີ່ຄ້າຍຄືກັນ; ປະຊາຊົນສອງຊາດ ລ້ວນແຕ່ດຸໝັ່ນ, ປະດິດສ້າງ, ມີສາຍພົວພັນ ໄປມາຫາສູ່ກັນ ສະໜິດສະໝົມມາແຕ່ດົນນານ, ຜ່ານຂະບວນວິວັດ ຕໍ່ສູ້ອັນຍາວນານ, ທຸກຍາກລໍາບາກ, ສອງຊາດ ລາວ-ຫວຽດນາມ ໄດ້ສາມັກຄີ, ສະໜັບໜູນ, ຊ່ວຍເຫຼືອເຊິ່ງກັນ ແລະ ກັນ, ຄຽງບ່າຄຽງໄຫລ່ກັນ ຕໍ່ສູ້ຍາດເອົາເອກະລາດ, ເສລີພາບ, ກໍ່ສ້າງ ແລະ ປົກປັກຮັກສາປະເທດຊາດ ຂອງແຕ່ລະປະເທດ.

          ໃນໄລຍະຜ່ານມາ ນັບແຕ່ມື້ມີພັກປະຕິວັດນໍາພາ, ສາຍພົວພັນມິດຕະພາບ ລະຫວ່າງສອງປະເທດລາວ-ຫວຽດນາມ ໂດຍແມ່ນປະທານ ໄກສອນ ພົມວິຫານ ແລະ ປະທານໂຮ່ຈີ່ມິງ ພ້ອມບັນດາການນໍາຫຼາຍຮຸ່ນ ແລະ ປະຊາຊົນສອງຊາດ ເພີ່ມພູນຄູນສ້າງ ໄດ້ເກີດດອກອອກຜົນ ຢ່າງ ບໍ່ຢຸດຢັ້ງ. ສາຍພົວພັນທີ່ບໍລິສຸດສັດຊື່, ໃສແຈ້ງ ແລະ ຫາຍາກນີ້ ໄດ້ມີມາຕະຫລອດ ໄລຍະປະຫວັດສາດ ອັນສະຫງ່າງາມ, ກາຍເປັນຊັບສົມບັດ ອັນລໍ້າຄ່າຂອງສອງຊາດ.

          ໃນສາຍພົວພັນສາມັກຄີພິເສດທັງໝົດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດນັ້ນ, ສາຍພົວພັນລະຫວ່າງ ສໍານັກພິມ ແລະ ຈໍາໜ່າຍປຶ້ມແຫ່ງລັດ ກະຊວງຖະແຫຼງຂ່າວ, ວັດທະນະທໍາ ທ່ອງທ່ຽວ ແລະ ສໍານັກພິມຈໍາໜ່າຍ ການເມືອງ ແຫ່ງຊາດສືຶ້ເຖີ້ດ ແມ່ນພາກສ່ວນໜຶ່ງ ທີ່ປະກອບສ່ວນສໍາຄັນ ເຊິ່ງປະຊາຊົນ, ພະນັກງານ ແລະ ການນໍາຂອງແຕ່ລະຮຸ່ນ ໄດ້ເອົາໃຈໃສ່ ເພີ່ມພູນຄູນສ້າງ ຢ່າງບໍຢຸດຢັ້ງ, ເຮັດໃຫ້ວຽກງານ ພິມຈໍາໜ່າຍ ນັບມື້ນັບຂະຫຍາຍຕົວ ທາງລວງກ້ວາງ ແລະ ລວງເລິກ, ຕອບສະໜອງ ກັບຄວາມຮຽກຮ້ອງ ຕ້ອງການໃໝ່, ກໍ່ສ້າງ ແລະ ພັດທະນາຂອງແຕ່ລະປະເທດ.

          ການຢ້ຽມຢາມເຮັດວຽກ ແລະ ແລກປ່ຽນບົດຮຽນຂອງສອງສໍານັກພິມ ໄດ້ມີການຮ່ວມມື ແລະ ຊ່ວຍເຫຼືອເຊິ່ງກັນ ແລະ ກັນເຂົ້າໃນວຽກງານ ການພິມຈໍາໜ່າຍ ສະແດງອອກ ພັກກອມມູນິດ ຫວຽດນາມ ສໍານັກພິມຈໍາໜ່າຍ ການເມືອງແຫ່ງຊາດ ສຶ້ເຖິ້ດ ໄດ້ໃຫ້ການຊ່ວຍເຫຼືອ ກໍ່ສ້າງ ອານຄານສີ່ຊັ້ນ ໃຫ້ສໍານັກພິມ ແລະ ຈໍໜ່າຍປຶ້ມແຫ່ງລັດ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ. ນອກນັ້ນ, ການຈັດຕັ້ງຕ່າງໆ ຂອງສູນກາງພັກກອມມູນິດ ຫວຽດນາມ ແລະ ສໍານັກພິມຈໍາໜ່າຍ ການເມືອງແຫ່ງຊາດ ສຶ້ເຖິ້ດປະກອບເຄື່ອງຈັກພິມ ແລະ ກໍ່ສ້າງບຸກຄະລາກອນ ໃຫ້ສໍານັກພິມ ແລະ ຈໍາໜ່າຍປຶ້ມ ແຫ່ງລັດ. ປັດຈຸບັນ ໂດຍການມອບສິດ ຂອງການນໍາກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ສອງສໍານັກພິມ ໄດ້ຮ່ວມມືກັນໃນການ ຄັດເລືອກເອົາປຶ້ມຂອງ ສສ ຫວຽດນາມ ທີ່ມີຄຸນຄ່າສູງ ຂອງແຕ່ລະຂົງເຂດ ປຶ້ມຂົງເຂດການກໍ່ສ້າງພັກ, ການ ພັດທະນາ ເສດຖະກິດ, ວັດທະນາທໍາ-ສັງຄົມ ຂອງຫວຽດນາມ, ປຶ້ມກ່ຽວກັບປະທານ ໂຮ່ຈີ່ມິງ, ບັນດາບັນຫາສາກົນ, ເຊື່ອມໂຍງສາກົນ, ປຶ້ມແບບຮຽນ ແລະ ຄົ້ນຄວ້າເສດຖະສາດ ການເມືອງມາກ-ເລນິນ, ປຶ້ມກ່ຽວກັບການປັບປຸງ ແລະ ເພີ່ມທະວີ ລະບົບກົດໝາຍ ມາເປັນພາສາລາວ ໄດ້ ຫລາຍກວ່າ 60ຫົວເລື່ອງ.

          ໃນເງື່ອນໄຂໃໝ່ປັດຈຸບັນ, ພວກເຮົາຍິ່ງມີກາລະໂອກາດ ເພື່ອສືບຕໍ່ເພີ້ມທະວີ ແລະ ເສີມຂະຫຍາຍ ສາຍພົວພັນພິເສດ, ການຮ່ວມມືຮອບດ້ານ ແລະ ຄວາມສາມັກຄີ ທີ່ສະໜິດແໜ້ນ ລະຫວ່າງສອງຊາດ ລາວ-ຫວຽດນາມ. ນີ້ບໍ່ພຽງແຕ່ເປັນຄວາມ ຮຽກຮ້ອງຕ້ອງການ ຂະຫຍາຍຕົວ ຢ່າງ ພາວະວິໄສເທົ່ານັ້ນ, ຫາກຍັງແມ່ນອາລົມຈິດ, ຄວາມມຸ້ງຫວັງຂອງການຮ່ວມມພັດທະນາ.

          ການເພີ້ມທະວີ ແລະ ປັບປຸງຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ແມ່ນມີຄວາມສໍາຄັນທີ່ສຸດ, ແມ່ນປັດໄຈໜຶ່ງ ທີ່ຮັບປະກັນ ໄຊຊະນະຂອງ ພາລະກິດກໍ່ສ້າງ ແລະ ປົກປັກຮັກສາ ປະເທດຊາດ ຂອງແຕ່ລະປະເທດ. ການພົວພັນຮ່ວມມື ລະຫວ່າງ ສໍານັກພິມ ແລະ ຈໍາໜ່າຍປຶ້ມແຫ່ງລັດ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ກັບສໍານັກພິມຈໍາໜ່າຍ ການເມືອງແຫ່ງຊາດ ສຶ້ເຖິ້ດ ແມ່ນນັບມື້ນັບ ກ້າວເຂົ້າສູ່ລວງເລິກ, ຮອບດ້ານ ແລະ ມີປະສິດທິຜົນແທດຈິງ, ຈະປະກອບສ່ວນ ເຂົ້າໃນການພັດທະນາລວມ ລະຫວ່າງສອງ ປະເທດ ສອງສໍານັກພິມຢ່າງຍືນຍົງ, ດ້ວຍມູນເຊືອທີ່ມີມາແຕ່ໃດໆ ແລະ ພວກເຮົາເຊື່ອໝັ້ນ ຢ່າງສົມບຸນວ່າ ສາຍພົວພັນ ທີ່ບໍລິສຸດສັດຊື່, ໝັ້ນແກ່ນ ລະຫວ່າງລາວ-ຫວຽດນາມ ສອງສໍານັກພິມ ຈະໄດ້ຮັບການປົກປັກຮັກສາ, ເພີ່ມພູນຄູນສ້າງ ແລະ ຂະຫຍາຍຕົວຍິ່ງໆຂຶ້ນ ດັ່ງຄໍາເວົ້າຂອງ ຜູ້ນໍາ ທີ່ແສນເຄົາລົບຮັກ ຂອງລາວ-ຫວຽດນາມ ໄດ້ຢັ້ງຢືນວ່າ:

          ປະທານ ໄກສອນ ພົມວະຫານ  ເວົ້າວ່າ:          ພູອາດຈະເຈື່ອນ            ແມ່ນໍ້າອາດຈະບົກແຫ້ງ

                                                                    ແຕ່ສາຍໃຈ                  ລາວ-ຫວຽດນາມ

                                                                    ຈະໝັ້ນຄົງຂະໜົງແກ່ນ     ຍິ່ງກວ່າພູ

                                                                                                  ຍິ່ງກວ່າແມ່ນໍ້າ.

          ປະທານ ສຸພານຸວົງ    ເວົ້າວ່າ:          ຈິດໃຈມິດຕະພາບ         ລາວ-ຫວຽດນາມ

                                                        ສູງກວ່າພູ                ຍາວກວ່າແມ່ນໍ້າ

                                                        ກວ້າງກວ່າທະເລ         ແຈ້ງກວ່າເດືອນເພັງ

                                                        ຫອມຫວນກວ່າດອກໄມ້   ທີ່ຫອມກວ່າໝູ່.

          ປະທານ ໂຮ່ຈິມິນ   ເວົ້າວ່າ:         ຮັກຫອມກັນໝາຍໝັ້ນ             ຫລາຍສັນພູກໍປິນໄຕ

                                                    ຫຼາຍນໍ້າໃຫ່ຍ ແລະ ໂຄກນ້ອຍ       ຂວາງຂັ້ນກະດຸ່ງໄປ

                                                    ສອງຊາດລາວ-ຫວຽດໄດ້          ຝັງຄວາມຮັກຢູ່ໃນໃຈ

                                                    ຮົງຮ່າທັງແມ່ຂອງ                   ບໍ່ເລິກປຸ້ນປານໃດ.

          ສອງສໍານັກພິມ ລາວ-ຫວຽດນາມ ໝັ້ນໝາຍຈະພ້ອມກັນ ເຮັດສຸດຄວາມສາມາດຂອງຕົນ ເພື່ອປະກອບສ່ວນ ເຂົ້າໃນການປັບປຸງ ແລະ ເສີມຂະຫຍາຍ ສາຍພົວພັນພິເສດ ລາວ-ຫວຽດນາມ ໃຫ້ສວຍສົດງົດງາມ ແລະ ໝັ້ນຄົງຂະໜົງແກ່ນຕະຫຼອດໄປ.

  ໂດຍ: ໄຊຍະພອນ ອານຸລາດ

KPL