ຂປລ. ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຫ່ງ ສປປ ລາວ ຮ່ວມກັບ ກະຊວງວັດທະນະທຳ, ກິລາ ແລະ ທ່ອງທ່ຽວ ແຫ່ງ ສສ ຫວຽດນາມ ຈັດງານສັບປະດາ ວັດທະນະທຳ ຫວຽດນາມ ຢູ່ນະຄອນຫລວງວຽງ ຈັນ ໃນວັນທີ 18 ກໍລະກົດ 2022 ເພື່ອສະເຫລີມສະຫລອງ ປີສາມັກຄີ ມິດຕະພາບ ລາວ-ຫວຽດນາມ ກໍຄື ວັນສ້າງຕັ້ງ ສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາ ມິດຕະພາບ ແລະ ການຮ່ວມມື ຄົບຮອບ 45 ປີ ໂດຍມີ ສະຫາຍ ສອນໄຊ ສີພັນດອນ ກໍາມະການກົມການເມືອງ ສູນກາງພັກ, ຮອງນາຍົກລັດຖະມົນຕີ ແຫ່ງ ສປປ ລາວ, ສະຫາຍ ຫວໍ ວັນ ເຖື້ອງ ກໍາມະການ ກົມການເມືອງ ສູນກາງພັກ, ຜູ້ປະຈຳການ ຄະນະເລຂາ ທິ ການ ສູນກາງພັກ ກອມມູນິດຫວຽດນາມ, ມີບັນດາການນຳຂັ້ນສູງພັກ, ລັດ ຂອງສອງປະເທດ ລາວ-ຫວຽດນາມ ແລະ ພາກສ່ວນກ່ຽວຂ້ອງ ສອງຝ່າຍ ເຂົ້າຮ່ວມ.

ງານສັບປະດາວັດທະນະທຳ ຄັ້ງນີ້, ເລີ່ມຕົ້ນດ້ວຍການວາງສະແດງຮູບພາບ ທີ່ສ່ອງແສງ ໃຫ້ເຫັນເຖິງ ທັດສະນີຍະພາບ ໂດຍລວມຂອງ ສສ ຫວຽດນາມ, ພ້ອມດ້ວຍຜົນງານ ອັນໃຫຍ່ຫລວງ ໃນການປົກປັກຮັກສາ ແລະ ສ້າງສາ ພັດທະນາ ປະເທດຊາດ ພາຍໃຕ້ການນໍາພາ ອັນສະຫລາດສ່ອງໃສ ຂອງພັກຄອມມູນນິດ ຫວຽດນາມ.

ໂອກາດດັ່ງກ່າວ, ສະຫາຍ ວັນສີ ກົວມົວ ກຳມະການສຳຮອງສູນກາງພັກ, ຮອງລັດຖະມົນຕີກະຊວງ ຖວທ ແຫ່ງ ສປປ ລາວ ໄດ້ມີຄໍາເຫັນໃນພິທີວ່າ: ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ຮູ້ສຶກເປັນ ກຽດຢ່າງສູງ ທີ່ໄດ້ຮ່ວມກັບ ກະຊວງວັດທະນະທຳ, ກິລາ ແລະ ທ່ອງທ່ຽວແຫ່ງ ສສ ຫວຽດນາມ ຈັດງານສັບປະດາ ວັດທະນະທຳ ສສ ຫວຽດນາມ ຢູ່ທີ່ນະຄອນຫລວງວຽງຈັນ, ພ້ອມໆກັບການ ຈັດງານສັບປະດາ ວັດທະນະທຳລາວ ຢູ່ນະຄອນ ຫລວງຮ່າໂນ່ຍ ສສ ຫວຽດນາມ ໃນມື້ດຽວກັນ ເຊິ່ງເປັນການຈັດຕັ້ງ ຜັນຂະຫຍາຍ ແຜນການຮ່ວມມື ດ້ານວັດທະນະທໍາ ແລະ ທ່ອງທ່ຽວ ລະຫວ່າງ ສອງກະຊວງ ໃນສົກປີ 2021-2025 ແລະ ແຜນຈັດຕັ້ງ ປະຕິບັດກິດຈະກໍາ ປະຈໍາປີ 2022, ທັງເປັນການສະແດງ ໃຫ້ເຫັນເຖິງ ມິດຕະພາບ ອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຖານອ້າຍນ້ອງ ໃນຕະຫລອດ ໄລຍະ ຜ່ານມາກໍຄື ໃນຍຸກແຫ່ງການເຊື່ອມໂຍງ.

ພ້ອມນີ້, ສະຫາຍ ຕະກວາງດົ່ງ ຮອງລັດຖະມົນຕີກະຊວງ ວັດທະນະທຳ, ກິລາແລະທ່ອງທ່ຽວ ແຫ່ງ ສສ ຫວຽດນາມ ກໍໄດ້ຂຶ້ນມີຄຳເຫັນ ບາງຕອນວ່າ: ຕະຫລອດໄລຍະ ປະຫວັດສາດ 60 ປີ ແຫ່ງສາຍພົວພັນ ທາງການທູດ, ການ ຮ່ວມມື ຮອບດ້ານຫວຽດນາມ-ລາວ ບໍ່ໄດ້ຢຸດຢັ້ງ ໃນການຟື້ນຟູ ແລະ ພັດທະນາຢ່າງເລິກເຊິ່ງ ແລະ ບັນລຸໄດ້ບັນດາ ໝາກຜົນສຳຄັນ ໃນຂົງເຂດການເມືອງ, ເສດຖະກິດ, ຄວາມໝັ້ນຄົງແຫ່ງຊາດ, ວັດທະນະທໍາ, ການສຶກສາ, ການຮ່ວມມື ແລະ ການຊ່ວຍເຫລືອເຊິ່ງກັນ ແລະ ກັນລະຫວ່າງ ບັນດາອົງການຂອງພັກ, ສະພາແຫ່ງຊາດ, ລັດ, ລັດຖະບານ ແລະ ທ້ອງຖິ່ນ ຂອງຫວຽດນາມ ແລະ ລາວ ຍາມໃດກໍໄດ້ຮັບ ການເພີ່ມທະວີ, ບັນລຸໝາກຜົນຕົວຈິງ ໃນຫລາຍດ້ານ ຢ່າງ ເລິກເຊິ່ງ ແລະ ມີຄຸນນະພາບ, ນໍາມາເຊິ່ງຜົນປະໂຫຍດ ຫລາຍຢ່າງ, ປະກອບສ່ວນ ສຳຄັນເຂົ້າໃນການ ພັດທະນາ ຊີວິດການເປັນຢູ່ ຂອງປະຊາຊົນ ສອງປະເທດ ໃຫ້ນັບມື້ນັບຮັ່ງມີ ເຂັ້ມແຂງ. ພ້ອມນີ້, ສະຫາຍຍັງໄດ້ ສະແດງຄວາມເຊື່ອ ໝັ້ນວ່າ ການພ້ອມກັນຈັດຕັ້ງ “ສັບປະດາວັດ ທະນະທຳຫວຽດນາມ ຢູ່ລາວ” ແລະ “ສັບປະດາ ວັດທະນະທຳລາວ ຢູ່ຫວຽດນາມ” ເນື່ອງໃນໂອກາດ ສະເຫລີມສະຫລອງ ບັນດາເຫດ ການທີ່ສໍາຄັນ ໃນການພົວພັນ ທາງການທູດ ລະຫວ່າງ 2 ປະເທດ ໃນປີ 2022 ມີຄວາມໝາຍສໍາຄັນ, ສືບຕໍ່ປະກອບສ່ວນ ເຂົ້າໃນການຟື້ນຟູ, ເພີ່ມທະວີ ສາຍພົວພັນ ທີ່ຍິ່ງໃຫຍ່, ຄວາມສາມັກຄີ ແບບພິເສດ ແລະ ການຮ່ວມມື ຮອບດ້ານ ລະຫວ່າງ ຫວຽດນາມ ແລະ ລາວ.

ນອກຈາກນີ້, ຍັງມີການສະແດງສິລະປະ ຈາກບັນດານັກສິລະປິນ ລາວ  ແລະ ຫວຽດນາມ ທີ່ມີຄວາມຫລາກຫລາຍ ທາງດ້ານສິລະປະ, ວັດທະນະທຳ ອັນຍອດຍິ່ງ ຂອງປະຊາຊົນ ຫວຽດນາມ ໃນພາລະກິດ ແຫ່ງການປົກປັກຮັກສາ ແລະ ສ້າງສາພັດທະນາ ປະເທດຊາດ ຕະຫລອດໄລຍະ ປະຫວັດສາດ ຍາວນານຂອງຕົນ ໂດຍສະເພາະ ໃນໄລຍະພາຍໃຕ້ ການນໍາພາ ອັນສະຫລາດສ່ອງໃສ ຂອງພັກຄອມມູນິດ ຫວຽດນາມ, ສະແດງໃຫ້ເຫັນ ເຖິງມິດຕະພາບ ອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມື ຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ຖານອ້າຍນ້ອງ ໃນຂະບວນວິວັດ ແຫ່ງການເຊື່ອມໂຍງ ສາກົນ. ສໍາລັບລາຍການ ສະແດງ ປະກອບມີ: ບົດເພງ ແລະ ບົດຟ້ອນ ຫວຽດນາມ ບ້ານເກີດເມືອງນອນ ຂອງຂ້ອຍ-ເຜົ່າລາວເອີຍ; ພາກທີ 1 ປະເພດ ແຫ່ງຄວາມຮັກ ບົດເພງສັນລະເສີນ ຜູ້ນໍາຂອງປະເທດ ທ່ານຄືຜູ້ທີ່ ພວກເຮົາເຊື່ອໝັ້ນ ແຫ່ງການນໍາພາ ໄປສູ່ໄຊ ຊະ ນະ; ບົດເພງ ລຸງໄກສອນ ວິລະບູລຸດໃນດວງໃຈ; ບົດຟ້ອນ ຈິດວິນຍານດອກບົວ, ດອກໄມ້ປະຈໍາຊາດ ຂອງຫວຽດນາມ; ບົດເພງ 12 ລະດູດອກໄມ້ ຂອງຮ່າໂນ້ຍ; ບົດເພງ ວຽງຈັນເມືອງງາມ; ບົດຟ້ອນ ລໍາເຕີ້ຍກ້ຽວສາວ; ຮ້ອງຄູ່ຍິງ-ຊາຍ: ສົ່ງເພງຮັກແພງຊຶ່ງກັນ ແລະ ກັນ; ພາກທີ 2 ດອກໄມ້ ທີ່ສວຍສົດງົດງາມ ບົດຟ້ອນ ລະຄັງປ່ຽນລະດູການ; ສີຊໍດ່ຽວ ສຽງບາດຕີນມ້າ ກ້ອງໄປທົ່ວເວຫາ; ຮ້ອງເພງ ແລະ ຟ້ອນ ເສີມຮ່າໂນ້ຍ; ເພງ ແສງອາລຸນ ພົ້ນຂຶ້ນມະຫາສະໜຸດ; ຮ້ອງເພງ ແລະ ຟ້ອນ ຈໍາປາເມືອງລາວ-ຮ່າໂນ້ຍ-ວຽງຈັນ ຊຶ່ງເນື້ອໃນຂອງບົດເພງ ແລະ ບົດຟ້ອນ ທີ່ນໍາມາສະແດງໄດ້ສ່ອງແສງໃຫ້ເຫັນເຖິງສາຍພົວພັນຄວາມສາມັກຄີຮັກແພງ,ໃຫ້ການຮ່ວມມືຊ່ວຍເຫລືອກັນຮອບດ້ານລະຫວ່າງສອງພັກ-ສອງລັດ ກໍຄືປະຊາຊົນ ສອງຊາດລາວ-ຫວຽດນາມ ທີ່ມີສາຍພົວພັນ ຄວາມສາມັກຄີ ແບບພິເສດ ຕະຫລອດ ໄລຍະຜ່ານມາ ກໍຄືປັດຈຸບັນ ທີ່ໄດ້ມີການເສີມຂະຫຍາຍ ແຕກດອກອອກຜົນຢ່າງບໍ່ຢຸດຢັ້ງ.

ຂ່າວ: ທະນູທອງ

ພາບ: ຂັນໄຊ

KPL