ທ່ານ ອຸດົມ ວົງໄກສອນ ຫົວໜ້າພະແນກການຕ່າງປະເທດ ແຂວງບໍລິຄຳໄຊ ໄດ້ໃຫ້ສຳພາດ ຜ່ານສື່ມວນຊົນ ຂອງແຂວງບໍລິຄຳໄຊ ເນື່ອງໃນໂອກາດ ການກະກຽມ ສະເຫລີມສະຫລອງ 2 ວັນປະຫວັດສາດ ເມື່ອບໍ່ດົນນີ້ ວ່າ: ຜົນສຳເລັດ ການພົວພັນຮ່ວມມື ທີ່ສອງປະເທດ ລາວ- ຫວຽດນາມ ທີ່ຍາດມາ ໄດ້ໃນຊຸມປີຜ່ານມາ ໄດ້ປະກອບສ່ວນ ອັນສຳຄັນເຂົ້າ ໃນການເສີມສ້າງ ສາຍພົວພັນ ລະຫວ່າງສອງປະເທດ ໂດຍສະເພາະ ວຽກງານການຕ່າງປະເທດ ໃຫ້ນັບມື້ໜັກແໜ້ນ ເຂັ້ມແຂງຂຶ້ນເລື້ອຍໆ. ເຫັນວ່າ ມາຮອດປັດຈຸບັນນີ້ ທົ່ວພັກ, ທົ່ວກຳລັງປະກອບອາວຸດ ແລະ ທົ່ວປວງຊົນລາວ ທັງຊາດຮ່ວມກັບ ປະຊາຊົນຂອງເພື່ອນ ສສ ຫວຽດນາມ ພວມສ້າງຂະບວນການຮອບດ້ານ ເພື່ອສະເຫລີມສະຫລອງ ສອງວັນປະຫວັດສາດ ຄື: ວັນເຊັນສົນທິສັນຍາ ມິດຕະພາບ ແລະການຮ່ວມມື ຮອບດ້ານ ຄົບຮອບ 45 ປີ 18/7/1977-18/7/2012)ແລະ ວັນສ້າງຕັ້ງ ສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (05/9/1962-05/9/2022).

ສະເພາະດ້ານການຮ່ວມມືຮອບດ້ານ ລະຫວ່າງແຂວງບໍລິຄຳໄຊ ສປປ ລາວ ກັບສສ ຫວຽດນາມ ໂດຍສະເພາະແຂວງແຮກສ່ຽວ ແຂວງຮ່າຕິ້ງ-ແຂວງເຫງະອານ ໃນໄລຍະ 5 ປີຜ່ານມາ ທີ່ໄດ້ຮ່ວມມືກັນ ພັດທະນາ ວຽກງານຫລາຍດ້ານ ຂອງພະແນກການ ຕ່າງປະເທດແຂວງ ບໍລິ ຄໍາໄຊ ໃນນາມເປັນເສນາທິການ ໃຫ້ແກ່ຄະນະພັກ-ອົງການປົກຄອງແຂວງ ກໍຄືກະຊວງການຕ່າງປະເທດ ເຊິ່ງໄດ້ປະກອບສ່ວນ ອັນສໍາຄັນ ເຂົ້າໃນການເສີມ ຂະຫຍາຍມູນເຊື້ອ ສາຍພົວພັນ ມິດຕະພາບດັ່ງກ່າວ ໃນການເຊື່ອມຊຶມ ແລະ ຈັດຕັ້ງປະຕິບັດ ແນວທາງນະໂຍບາຍ ການຕ່າງປະເທດ ຂອງພັກ-ລັດ, ລັດຖະທໍາມະນູນ, ກົດໝາຍ ແລະ ລະບຽບຕ່າງໆຂອງລັດ ກ່ຽວກັບເຄື່ອນໄຫວ ວຽກງານການຕ່າງ ປະເທດຢູ່ແຂວງບໍລິຄໍາໄຊ ເປັນໃຈກາງ ໃນການສ້າງແຜນການ ແລະ ຫັນເປັນແຜນວຽກ ອັນລະອຽດ ໃຫ້ແກ່ການນຳຂອງແຂວງ ໃນການເຄື່ອນໄຫວ ວຽກງານການຕ່າງ ປະ ເທດ ໃນແຕ່ ລະໄລຍະ. ພ້ອມນີ້, ກໍເປັນໃຈກາງ ໃນການປະສານງານ ກັບບັນດາອົງການຈັດຕັ້ງ, ພະແນກການ, ເມືອງ, ຂະແໜງການຕ່າງໆ ຂອງລາວ ແລະ ຫວຽດນາມ ໃນການພົບປະແລກປ່ຽນ, ຈັດກອງປະຊຸມຮ່ວມກັນ, ໄປ-ມາຢ້ຽມຢາມ ແລະ ເຮັດວຽກຮ່ວມກັນ  ເຊິ່ງສາມາດຍາດ ຜົນ ສໍາເລັດ ໄດ້ຫລາຍດ້ານ ສະແດງອອກດັ່ງນີ້: ດ້ານການພົວພັນຮ່ວມມື, ພົບປະແລກປ່ຽນ ແລະ ປະຊຸມຮ່ວມກັນ; ໂດຍ​ສືບ​ຕໍ່​ປະຕິບັດ​ ຕາມ​ແນວທາງ ​ຂອງ​ສອງ​ພັກ-ສອງ​ລັດ​ຖະບານ ກໍ​ຄື​ມູນ​ເຊື້ອ​ ແຫ່ງ​ສາຍ​ພົວພັນ ​ມິດຕະພາບ ຄວາມ​ສາມັກຄີ ​ແບບ​ພິ​ເສດ ​ແລະ ການ​ຮ່ວມ​ມື ຮອບດ້ານ ​ລາວ​- ຫວຽດນາມ ທີ່​ມີ​ມາ​ແຕ່​ດຶກ​ດໍາ​ບັນ, ແຂວງບໍລິຄໍາໄຊ ກໍ​ໄດ້​ເອົາ​ໃຈ​​ໃສ່ ຢ່າງຕັ້ງໜ້າໃນການ ປະກອບສ່ວນ ​ແລະ ​ເພີ່ມ​ພູນ​ຄູນ​ສ້າງ ສາ​ຍພົວພັນ​ອັນເປັນມູນເຊື້ອ ລາວ-ຫວຽດນາມ ​ນັບ​ມື້​ນັບກວ້າງຂວາງ​ ແລະ ​ຫັນເຂົ້າ​ສູ່​ລວງ​ເລິກ; ໄດ້ລົງ​ນາມ​ບົດ​ບັນທຶກ ​ສ້າງສາຍພົວພັນ ຮ່ວມ​ມື​ມິດຕະພາບ ​ແລະ ແຮກສ່ຽວ​ແບບ​ພິ​ເສດ ກັບ ແຂວງ ຮ່າຕິ້ງ ສສ ຫວຽດນາມ, ສ້າງສາຍພົວພັນ ຮ່ວມມືມິດຕະພາບ ກັບແຂວງເຫງະອານ, ແຂວງເລິມດົ່ງ (ສາມ​ແຂວງ​ນີ້​ ພວກ​ເຮົາ​ໄດ້​ມີ​ບົດ​ບັນ​ທຶກ ​ຮ່ວມ​ກັນ​ລະຫວ່າງ​ ການ​ນໍາ​ຂັ້ນ​ສູງ ​ສອງ​ຝ່າຍຮ່ວມ​ກັນ) ​ແລະ ຍັງ​ມີ​ຫລາຍ​ແຂວງ ​ທີ່​ມີ​ການ​ພົວພັນ​ຮ່ວມ​ມື​ ບາງ​ດ້ານ​ຮ່ວມ​ກັນ; ເຊິ່ງ​ໃນ​ແຕ່ລະ​ປີ​ ຄະນະ​ຜູ້​ແທນ​ ສອງ​ຝ່າຍກໍ​ໄດ້ມີ ການຜັດປ່ຽນກັນ ​ເປັນ​ເຈົ້າພາບ ຈັດກອງປະຊຸມຮ່ວມກັນ. ພ້ອມ​ນີ້​ພວກ​ເຮົາ ​ຍັງ​ມີ​ການຊຸກຍູ້ ​ໃຫ້​ມີ​ການ​ແຮກສ່ຽວ ​ລະດັບ​ພະ​ແນ​ກການຂັ້ນ​ແຂວງ, ບັນດາ​ເມືອງຈໍານວນ​ໜຶ່ງ, ຕະຫລອດ​ຮອດ​ ບາງບ້ານລຽບຕາມຊາຍແດນ ​ຂອງ​ແຂວງ​ບໍລິ​ຄໍາ​ໄຊ ກໍ່ໄດ້ການແຮກ ສ່ຽວກັບບັນດາບ້ານ-ຕາ​ແສງຂອງເມືອງ ຂອງແຂວງຮ່າຕິ້ງ ແລະ ແຂວງເຫງະອານ. ດ້ານວຽກງານ ກໍ່ສ້າງບຸກຄະລະກອນ ໃນ​ແຕ່ລະ​ປີ​ພວກ​ເຮົາ​ ກໍ​ໄດ້​ເປັນ​ໃຈກາງ​​ ໃນ​ການປະສານ ​ສົມທົບ​ຂໍ​ທຶນ​ຊ່ວຍ​ເຫລືອ ຈາກ​ບັນດາ​ແຂວງ​ຂອງ ສສ ຫວຽດນາມ ​ໃນ​ການ​ບໍາລຸງ ກໍ່ສ້າງ​ບຸກຄະລາ​ກອນ​ ແຂວງ​ບໍລິ​ຄໍາ​ໄຊ ຈໍານວນ 100 ກວ່າ​ທຶນ​ ໃນ​ແຕ່ລະ​ປີ ​ເພື່ອ​ຮຽນ​ກຽມ​ພາສາ ​ແລະ ສືບ​ຕໍ່​ຮຽນ​ວິຊາ​ສະ​ເພາະ​ຢູ່ ​ສສ ຫວຽດນາມ (​ເຊິ່ງ 5 ປີຜ່າ​ນມາ​ ມີຈໍານວນ​ເຖິງ 688 ທຶນ); ພ້ອມ​ນີ້ແຕ່ລະ​ປີ​ ແຂວງ​ບໍລິ​ຄໍາ​ໄຊ ກໍ​ໃຫ້ການ​ຊ່ວຍ​ເຫຼືອ​ ນັກຮຽນ​ຂອງ​ແຂວງ​ຮ່າ​ຕິງ ມາ​ກຽມ​ພາສາ ​ແລະ ສືບ​ຕໍ່​ຮຽນ​ວິຊາ​ ສະ​ເພາະ​ຢູ່​ມະຫາວິທະຍາ​ໄລ ແຫ່ງຊາດ​ລາວ ປີລະ 2-3 ທຶນ.ດ້ານການຮ່ວມມື ປະສານສົມທົບ ແລະ ຊ່ວຍເຫຼືອເຊິ່ງກັນ ແລະ ກັນ.ໄລຍະຜ່ານມາ ພວກ​ເຮົາ​ ກໍໄດ້​ເປັນ​ເຈົ້າ​ການ​ ປະສານ​ສົມທົບ ​ໃນ​ການ​ຍາດ​ແຍ່ງ ​ການ​ຊ່ວຍ​ເຫລືອດ້ານ​ຕ່າງໆ ເຊິ່ງຜ່ານມາ ກໍ ໄດ້ຮັບ​ກາ​ນນໍາ​ຂັ້ນ​ສູງ ​ຂອງ​ພັກ-ລັດຖະບານ​ຫວຽດນາມ, ​ຈາກແຂວງ​ຮ່າ​ຕິງ, ແຂວງເຫງະອານ  ​ແລະ ບັນດາ​ແຂວງ​ຕ່າງໆ ຈາກ​ ສສ ສສ ຫວຽດນາມ ​​ເປັນ​ຕົ້ນ​ແມ່ນ​ການ​ ກໍໍ່ສ້າງ​ທາງ​​ພື້ນຖານ​ໂຄງ​ລ່າງ ​ດ້ານ​ການ​ສຶກສາ, ສາທາລະນະ​ສຸກ​, ງົບປະມານ, ອຸປະກ​ອນຮັບ​ໃຊ້​ ​ແລະ ສະບຽງ​ອາຫານ​ຈໍາ ນວນ​ໜຶ່ງ ມູນ​ຄ່າຫລາຍ​ກວ່າ 66 ກວ່າຕື້​ດົງ; ພ້ອມ​ນີ້​ໃນ​ໄລຍະ​ການ​ແພ່ລະບາດ​ຂອງ​ພະຍາດ​ໂຄ​ວິດ 19 ບັນດາ​ແຂວງ​ຂອງ ສສ ຫວຽດນາມ​ກໍ​ໄດ້​ໃຫ້ການ​ຊ່ວ​ຍ​ເຫລືອ​ເປັນງົບປະມານ ​ແລະ ​ອຸປະກອການ​ແພດ​ຕ່າງໆ​ໃຫ້​ແຂວງ​ບໍລິ​ຄໍາ​ໄຊ ​ລວາມ​ເປັນ​ມູນ​ຄ່າ ຫລາຍ​ກວ່າ 6 ກວ່າຕື້​ດົງ; ​ແຂວງ​ບໍລິ​ຄໍາ​ໄຊ ​ໄດ້​ຊ່ວຍ​ປຸກ​ເຮືອນ​ ມິດຕະພາບ, ຊ່ວ​ຍ​ເຫລືອ ​ຜູ້​ຖືກ​​ໄພພິບັດ ​ແລະ ປະກ​ອບສ່ວນ​ຊ່ວຍ ປ້ອງ​ກັນ​ພະຍາດ​ໂຄ​ວິດ-19 ໃຫ້ແຂວງຮ່າຕິງ ​ເປັນ​ງົບປະມານ 30.000 ​ໂດ​ລາ. ການຮ່ວມມື ດ້ານເສດຖະກິດ ແລະ ດຶງດູດການລົງທຶນ ພວກເຮົາໄດ້ເປັນໃຈການ ໃນການປະສານງານ ກັບພະແນກ ການ, ຂະແໜງການ ທີ່ກ່ຽວຂ້ອງ ໃນການເທື່ອອໍານວຍ ຄວາມສະດວກ ໃນການດຶງດູດ ການລົງທຶນ ຈາກບັນດາແຂວງຂອງ ສສ ຫວຽດນາມ ເຊິ່ງມາຮອດປັດຈຸບັນ ປະກອບມີທັງໝົດ 9 ໂຄງການ (ຂັ້ນສູນກາງອະນຸມັດ 1 ໂຄງການ ແລະ ຂັ້ນແຂວງອະນຸມັດ 08 ໂຄງການ) ລວມມູນຄ່າການ ລົງທຶນ 41.414.348 ໂດລາສະຫະລັດ. ໃນນັ້ນ ປະກອບມີໂຄງການ ຮ່ວມມືລະຫວ່າງ ສູນກາງຊາວໜຸ່ມ ຂອງສອງປະເທດ (ຕາງໜ້າສອງຝ່າຍແມ່ນ ບໍລິສັດ ຢາງພາລາບໍລິຄໍາໄຊ-ຮ່າຕິ້ງ ແລະ ຊາວໜຸ່ມແຂວງບໍລິຄຳໄຊ) ຢູ່ເມືອງຄໍາເກີດ; ບໍລິສັດຢາງພາລາຈໍາກັດ ຂອງກຸ່ມ ບໍລິສັດ ຮ່ວມມືເສດ ຖະກິດໂກເອໂກ ຢູ່ເມືອງປາກກະດິງ; ບໍລິສັດດຶກຮ່ຽນກວ້າງຈີ້ ຈໍາກັດ, ບໍລິສັດ ພັດທະນາພູດອຍ ໄດ້ສໍາເລັດການກໍ່ສ້າງ ພື້ນຖານໂຄງລ່າງ ຢູ່ເຂດຊາຍແດນ ຢູ່ ເມືອງວຽງທອງ, ບໍລິສັດສາມັກກຄີລາວ-ຫວຽດ ກໍ່ສ້າງ ຈໍາກັດແລະ ຍັງມີພາກທຸລະກິດ ຈໍານວນໜຶ່ງ ຂອງຫວຽດນາມ ຕື່ມອີກ. ເຊິ່ງ ບັນດາກິດ ຈະການເລົ່ານີ້ ໄດ້ປະກອບສ່ວນ ສ້າງລາຍຮັບ ເຂົ້າງົບປະມານ ແລະ ສ້າງວຽກເຮັດງານທໍາ ໃຫ້ປະຊາຊົນ ຊາວແຂວງບໍລິຄໍາໄຊ ໄດ້ຫລາຍສົມຄວນ. ດ້ານການຮ່ວມມື ວຽກງານປ້ອງກັນ ຊາດ-ປ້ອງກັນຄວາມສະຫງົບ ໄດ້​ເປັນ​ເຈົ້າ​ການ ຕິດຕາມຊຸກຍູ້ ເຈົ້າໜ້າທີ່ກ່ຽວຂ້ອງ ທັງສອງຝ່າຍ ໃນການກວດກາ ລາດຕະເວນ ເພື່ອປົກປັນຮັກສາ ຫຼັກໝາຍຊາຍແດນ ແລະ ຮັກສາຄວາມສະຫງົບຮຽບຮ້ອຍ ຕາມບໍລິເວນຊາຍແດນ ເປັນປົກກະຕິ; ໄດ້​ເປັນ​ເຈົ້າ​ການຊ່ວຍ ປະສານງານກັບ ກອງບັນຊາການທະຫານ ແຂວງຮ່າຕິ້ງ ຍາດແຍ່ງການຊ່ວຍເຫລືອ ສ້ອມແປງພາຫະກອງທັບ, ທຶນຝຶກ ອົບຮົມ ວຽກງານເສນາ-ພາລາທິການ-ເຕັກນິກ, ວຽກງານກວດກາ ລາດຕະເວນຊາຍແດນ, ວຽກງານການຕ້ານ ແລະ ສະກັດກັ້ນ ການກະທໍາຜິດ ໃຫ້ພະນັກງານ ນັກຮົບກອງບັນຊາການ ທະຫານແຂວງ ແລະ ກອງບັນຊາ ປກສ ແຂວງ. ພ້ອມນີ້ ແຕ່ປະປີທັງສອງກໍາລັງ ກໍໄດ້ຜັນປ່ຽນ ຈັດກອງ ປະຊຸມ ພົບປະເພື່ອແລກປ່ຽນ ສະພາບຮ່ວມກັນ.ກະຊວງຕຳຫລວດຂອງ ສສ ຫວຽດນາມ ກໍ່ໄດ້ຊ່ວຍເຫຼືອ ກໍ່ສ້າງຫ້ອງການປະສານງານຢູ່ 05 ບ້ານຕາມລຽບຊາແດນ ລາວ-ຫວຽດນາມ ຢູ່ແຂວງບໍລິຄຳໄຊ ນັບແຕ່ປີ 1999-2022 ແຂວງບໍລິຄໍາໄຊ-ແຂວງຮ່າຕິ້ງ ໄດ້ປະສານສົມທົບ ດຳເນີນ ການສໍາຫຼວດ ຊອກຫາ ແລະ ຂຸດຄົ້ນ ອັດຖິທະຫານ ອາສາສະໝັກ ແລະ ຊ່ຽວຊານ ຫວຽດນາມ ທີ່ເສຍສະລະຊີວິດ ໃນປາງສົງຄາມຢູ່ ແຂວງບໍລິຄຳໄຊ ໄດ້ຈໍານວນທັງໝົດ 535 ອັດຖິ ແລະ ໄດ້ຈັດພິທີມອບ-ສົ່ງ ກັບຄືນປະເທດ ຢ່າງສົມກຽດ. ໄດ້ປະສານສົມທົບ ໃນແກ້ໄຂບັນຫາ ຜູ້ຍົກ ຍ້າຍຕັ້ງ ພູມລໍາເນົາ ຕາມລໍາພັງໃຈ ແລະ ສ້າງຄອບຄົວ ບໍ່ຖືກລະບຽບ ຕາມບໍລິເວນຊາຍ ແດນ ລາວ-ຫວຽດນາມ ເຊິ່ງມີປະຊາຊົນຫວຽດນາມ ຍົກຍ້າຍລຽບ ຕາມຊາຍແດນມາຢູ່ ແຂວງບໍລິຄໍາໄຊ ທັງໝົດ 727 ຄອບຄົວ, ຈໍານວນພົນ 4,374 ຄົນ; ລັດຖະບານລາວ ອະນຸມັດໃຫ້ສັນຊາດແລ້ວ ຈໍານວນ 149 ຄອບຄົວ, 893 ແລະ ກໍາລັງລໍຖ້າ ລັດຖະບານ ອະນຸມັດ ຈໍານວນ 567 ຄອບຄົວ, 3,417 ຄົນ.

ທ່ານ ກ່າວຕື່ມວ່າ ການທີ່ສອງພັກ-ລັດຖະບານ ໄດ້ກໍານົດເອົາ ປີ 2022 ນີ້ ເປັນປີສາມັກຄີ ມິດຕະພາບ ລາວ-ຫວຽດນາມ ຖືເປັນໂອກາດ ແລະ ນິມິດໝາຍອັນດີ ໃຫ້ແກ່ການຈັດຕັ້ງ ພັກ-ລັດແຕ່ລະຂັ້ນ, ສະມາຊິກພັກ-ພະນັກງານ ແລະ ປະຊາຊົນ ສອງຊາດ ລາວ-ຫວຽດນາມ ໄດ້ ພ້ອມກັນຫວນຄືນມູນເຊື້ອ ແຫ່ງສາຍພົວພັນ ມິດຕະພາບອັນຍິ່ງໃຫ່ຍ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ທີ່ປະທານ ໂຮ່ຈີ່ມິງ, ປະທານ ໄກສອນ ພົມວິຫານ ແລະ ປະທານ ສູພານຸວົງ ທີ່ແສນເຄົາລົບຮັກ ທີ່ໄດ້ທຸ່ມເທເຫື່ອແຮງ ເພີ່ມພູນຄູນສ້າງ ແລະ ໄດ້ຮັບການເສີມຂະຫຍາຍ ໂດຍບັນດາການນໍາຮຸ້ນຕໍ່ຮຸ້ນ, ນັກປະຕິວັດ ແລະ ປະຊາຊົນສອງຊາດ ລາວ-ຫວຽດນາມ ເລື້ອຍໆມາ; ທ້າຍສຸດ ຂ້າພະເຈົ້າ ໃນນາມຕາງໜ້າ ໃຫ້ພະແນກການຕ່າງ ປະເທດແຂວງບໍລິຄໍາໄຊ ແລະ ໃນນາມສ່ວນຕົວ, ຂໍສະແດງຄວາມຮູ້ ບຸນຄຸນອັນລົ້ນເຫລືອ ແລະ ຂໍສົ່ງຄວາມອວຍພອນໄຊ ອັນປະເສີດ ທີ່ສຸດໄປຍັງ ອະດີດການນໍາ, ການນໍາແຕ່ລະຂັ້ນ, ສະມາຊິກພັກ-ພະນັກງານ ຕະຫຼອດຮອດ ປະຊາຊົນບັນດາເຜົ່າ ສອງຊາດລາວ-ຫວຽດນາມ ໃຫ້ຈະເລີນງອກງາມຍິ່ງໆຂຶ້ນ.

KPL