ທ່ານ ສີໄຄ ຄຳສະຫວັດ ຫົວໜ້າພະແນກການຕ່າງປະເທດ ແຂວງຄຳມ່ວນ ໄດ້ຍົກໃຫ້ເຫັນວ່າ:  ຕະຫລອດໄລຍະ 60 ປີ ແຫ່ງການສ້າງຕັ້ງ ສາຍພົວພັນການທູດ ລະຫວ່າງ ລາວ ແລະ ຫວຽດນາມ ແລະ 45 ປີ ແຫ່ງການປະຕິບັດ ສົນທິສັນຍາ ມິດຕະພາບ ແລະ ການຮ່ວມມືຮອບດ້ານ ລະຫວ່າງລາວ-ຫວຽດນາມ, ສອງຊາດລາວຫວຽດນາມ ໄດ້ພ້ອມກັນ ເພີ່ມພູນຄູນສ້າງ ສາຍພົວພັນ ມິດຕະພາບແບບພິເສດ, ການພົວພັນຮ່ວມມື ຮອບດ້ານ ນັບມື້ຂະຫຍາຍຕົວ ກ້າວເຂົ້າສູ່ລວງເລິກ, ແທດເໝາະກັບ ສະພາບການຕົວຈິງ ແລະ ມີປະ ສິດທິຜົນ, ສາມາດຕອບສະໜອງ ຄວາມມຸ້ງມາດປາດຖະໜາ ຂອງປະຊາຊົນສອງຊາດ, ເພື່ອສັນຕິພາບ,ສະຖຽນລະພາບ, ການຮ່ວມມື ການພັດທະນາ ໃນພາກພື້ນ ແລະ ໃນໂລກ.

ສຳລັບພະແນກການຕ່າງປະເທດແຂວງຄຳມ່ວນ ໃນນາມເປັນເສນາທິການ ໃຫ້ແກ່ການນຳຂອງແຂວງ ໃນດ້ານວຽກງານ ການຕ່າງປະເທດ ໄດ້ເອົາໃຈໃສ່ຄົ້ນຄວ້າ ແລະ ນຳສະເໜີ ຕໍ່ການນຳຂອງແຂວງ ໃນການເຄື່ອນໄຫວ ພົບປະລະຫວ່າງ ການນຳພັກ- ອຳນາດ ການປົກຄອງ ຂັ້ນສູງຂອງແຂວງຄຳມ່ວນ ກັບບັນດາການນຳພັກ-ອຳນາດການປົກຄອງ ຂັ້ນສູງຂອງແຂວງພາກກາງ ແລະ ພາກໃຕ້ ຂອງສາທາລະນະລັດ ສັງຄົມນິຍົມ ຫວຽດນາມ. ນອກຈາກນນີ້ ຍັງໄດ້ຄົ້ນຄວ້າ ນຳສະເໜີຂັ້ນເທິງ ເພື່ອຊຸກຍູ້ໃຫ້ ບັນດາພະແນກການ, ອົງ ການຈັດຕັ້ງ ມະຫາຊົນ, ພາກສ່ວນກຳລັງ ປ້ອງກັນຊາດ-ປ້ອງກັນ ຄວາມສະຫງົບ ແລະ ບັນດາເມືອງ ທີ່ມີການຮ່ວມມື ກັບພາກສ່ວນ ທີ່ກ່ຽວຂ້ອງຂອງ ສາທາລະນະລັດ ສັງຄົມນິຍົມ ຫວຽດນາມ ມີການພົບປະຢ້ຽມຢາມ ເຊິ່ງກັນ ແລະ ກັນ ເພື່ອພ້ອມກັນ ສືບຕໍ່ຮັດແໜ້ນ ຄວາມສາມັກຄີ, ສ້າງຄວາມໄວ້ເນື້ອເຊື່ອໃຈ ເຊິ່ງກັນ ແລະ ກັນ, ຜູກພັນລະຫວ່າງການນຳ ແລະ ປະຊາຊົນຂອງສອງຊາດ ລາວ-ຫວຽດນາມ, ຫວຽດນາມ-ລາວ ໃຫ້ມີຄວາມເລິກເຊິ່ງກວ່າເກົ່າ.

ທ່ານ ສີໄຄ ຄຳສະຫວັດ ຍັງຍົກໃຫ້ເຫັນຕື່ມວ່າ: ໃນປີ 2022 ແມ່ນປີສາມັກຄີມິດຕະພາບ ແຂວງຄຳມ່ວນ ໄດ້ເພີ່ມທະວີການຮ່ວມມື ເຂົ້າສູ່ລວງເລິກ, ຮັກສາບົດບາດ ການກຳນົດທິດລວມ ຂອງການຮ່ວມມືສອງຝ່າຍ ແລະ ຍົກສູງປະສິດທິພາບ ບັນດາກົນໄກ ການຮ່ວມມື, ຈັດຕັ້ງປະຕິບັດ ບົດບັນທືກການຮ່ວມມື ສອງຝ່າຍ ໄດ້ເປັນຢ່າງດີ ໂດຍສະເພາະການຈັດຕັ້ງ ເຄື່ອນໄຫວຢ້ຽມຢາມ ແລະ ພົບປະລະຫວ່າງ ການນຳຂັ້ນສູງຂອງແຂວງ, ບັນດາພະແນກການ, ອົງການຈັດຕັ້ງມະຫາຊົນ, ກຳລັງປ້ອງກັນຊາດ-ປ້ອງກັນ ຄວາມສະ ຫງົບ ແລະ ບັນດາເມືອງສະນັ້ນ, ແຂວງຄຳມ່ວນ ໄດ້ມີການພົວພັນ ສາມັກຄີແບບພິເສດ ຮອບດ້ານ ກັບ ຫວຽດນາມ ໂດຍສະເພາະບັນດາ ແຂວງພາກກາງ, ພາກໃຕ້ຂອງ ສສ ຫວຽດນາມ ໃຫ້ເກີດດອກອອກຜົນ ຜ່ານມາເພື່ອນຫວຽດນາມ ໄດ້ໃຫ້ການຊ່ວຍເຫລືອລ້າ ໃຫ້ແກ່ແຂວງຄຳມ່ວນ ຫລາຍດ້ານເປັນຕົ້ນ: ໄດ້ໃຫ້ທຶນການສຶກສາ ສະເລ່ຍປີລະ 150-200 ທຶນ, ສ້າງໂຮງຮຽນ ມູນຄ່າມະຫາສານ ເຊັ່ນ: ໂຮງຮຽນມັດທະຍົມນາໂບ, ໂຮງຮຽນມິດຕະພາບ ລາວ-ຫວຽດນາມ ແລະ ໂຮງຮຽນວິຊາຊີບ ຢູ່ເມືອງໜອງບົກ ທີ່ກຳລັງກໍ່ສ້າງ, ໃຫ້ ທຶນຊ່ວຍເຫຼືອ ແກ່ວິທະຍາໄລ ເຕັກນິກ-ວິຊາຊີບແຂວງຄຳມ່ວນ. ໄດ້ປູກສ້າງໂຮງໝໍ ຢູ່ບ້ານໝາກເຝືອງ, ເມືອງນາກາຍ, ແຂວງຄໍາມ່ວນ, ໂຮງໝໍຢູ່ຫຼັງຄັງ, ເມືອງບົວລະພາ ໃຫ້ການຊ່ວຍເຫຼືອ ການຕ້ານພະຍາດໂຄວິດ-19. ໄດ້ຊ່ວຍສ້າງ ຊົນລະປະທານ ຢູ່ບ້ານຊຽງຫວາງ, ເມືອງໜອງບົກ, ແຂວງຄຳມ່ວນ, ທຶນຈັດສຳມະນາ ແກ່ວິຊາການ ໃນການປ້ອງກັນ ພະຍາດລະບາດຂອງສັດ, ຮ່ວມມືກັນ ໃນການອະນຸລັກ ທຳມະຊາດພູຫີນໜາມໜໍ່ ເພື່ອສະເໜີ ເປັນມໍລະດົກໂລກ, ດ້ານການຄ້າແມ່ນໄດ້ ມີການແລກປ່ຽນຄ້າ ຂາຍສິນຄ້າຮ່ວມກັນ ນັບ ມື້ນັບຫລາຍຂຶ້ນ.

ທັງໝົດສະແດງໃຫ້ເຫັນຢ່າງເລິກເຊິ່ງວ່າ ສາຍພົວພັນ, ຄວາມສາມັກຄີພິເສດ, ການຮ່ວມມືຮອບດ້ານ ບໍ່ແມ່ນເກີດຂຶ້ນເອງ ແຕ່ຫາກເກີດຂຶ້ນ ໃນຂະບວນວິວັດ ອັນຍາວໄກ ບົນເສັ້ນທາງການຕໍ່ສູ້ ຕ້ານພວກລ່າ ເມືອງຂຶ້ນຝລັ່ງ ແລະ ຈັກກະພັດອາເມລິກາ ທີ່ເຕັມ ໄປດ້ວຍການ ເສຍສະຫລະທັງຊີວິດ ແລະ ເລືອດເນື້ອ ລະຫວ່າງກອງທັບ ແລະ ປະຊາຊົນ ຂອງສອງຊາດ. ພວກເຮົາຕ້ອງສືບຕໍ່ ຂະຫຍາຍສາຍພົວພັນ ມິດຕະພາບ ອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໃຫ້ເຂົ້າສູ່ລວງເລິກ ໂດຍສະພາະແຂວງຄຳມ່ວນ ກັບບັນດາແຂວງພາກໃຕ້, ພາກກາງ, ແຂວງທີ່ມີຊາຍແດນ ຕິດຈອດກັນກັບ ແຂວງຄຳມ່ວນ, ສູ້ຊົນເຮັດໃຫ້ ການພົວພັນຮ່ວມມື ນັບມື້ນັບຂະຫຍາຍຕົວ, ພ້ອມກັນເພີ່ມພູນຄູນສ້າງ ສາຍພົວພັນມິດຕະພາບ ອັນຍິ່ງໃຫຍ່ ຄວາມສາມັກຄີແບບ ພິເສດ ລະຫວ່າງ ລາວ-ຫວຽດນາມ, ຫວຽດນາມ-ລາວ ໃຫ້ຈະເລີນງອກງາມຍິ່ງໆຂຶ້ນ.

 
ໂດຍ : ແດງສະຫວັດ ແສນພານິດ .

KPL