ທ່ານ ໂພເພັດ ກຸນນາວົງ ຮອງຫົວໜ້າພະແນກສຶກສາທິການ-ກິລາ ແຂວງບໍລິຄຳໄຊ ໄດ້ໃຫ້ສຳພາດຜ່ານສື່ມວນຊົນ ຂອງແຂວງບໍລິຄຳໄຊ ເນື່ອງໃນໂອກາດ ການກະກຽມສະເຫຼີມສະຫຼອງ 2 ວັນປະຫວັດສາດ ໃນວັນທີ 20 ກໍລະກົດຜ່ານມານີ້ວ່າ: ຜົນສຳເລັດ ການພົວພັນຮ່ວມມື ທີ່ສອງພະແນກ ສຶກສາທິ ການ-ກິລາ ທີ່ຍາດມາໄດ້ ໃນຊຸມປີຜ່ານມາ ໄດ້ປະກອບສ່ວນ ອັນສຳຄັນເຂົ້າໃນການ ເສີມສ້າງສາຍພົວພັນ ລະຫວ່າງ ສອງປະເທດ ໂດຍສະເພາະຄື ແຂວງແຮກສ່ຽວແຂວງຮາຕິ່ງ ໃຫ້ນັບມື້ກ້າວເຂົ້າສູ່ລວງກວ້າງ ແລະ ລວງເລິກ. ມາຮອດປັດຈຸບັນນີ້, ທົ່ວພັກ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ຮ່ວມກັບປະຊາຊົນ ຂອງເພື່ອນ ສສ ຫວຽດນາມ ພວມສ້າງຂະບວນການຮອບດ້ານ ເພື່ອສະເຫຼີມສະຫຼອງ ສອງວັນປະຫວັດສາດຄື: ວັນເຊັນສົນທິສັນຍາ ມິດຕະພາບ ແລະ ການຮ່ວມມືຮອບດ້ານ ຄົບຮອບ 45 ປີ (18/7/1977-18/7/2012) ແລະ ວັນສ້າງຕັ້ງ ສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (5/9/1962 – 5/9/2022 ).

ທ່ານ ໂພເພັດ ກຸນນາວົງ ໄດ້ຍົກໃຫ້ເຫັນໃນການຮ່ວມມືຮອບດ້ານ ລະຫວ່າງແຂວງບໍລິຄຳໄຊ ສປປ ລາວ ແລະ 6 ແຂວງ ຂອງ ສສ ຫວຽດນາມ ໃນໄລຍະ 5 ປີຜ່ານມາ ຊຶ່ງທັງຫົກແຂວງ ໄດ້ຮ່ວມມືກັນ ພັດທະນາວຽກງານ ສຶກສາ-ກິລາແຕ່ປີ 2017-2022 ແຂວງບໍລິຄໍາໄຊ ໄດ້ສົ່ງນັກສຶກສາ, ພະນັກງານໄປ ຮຽນຕໍ່ວິຊາຊີບ ແລະ ຍົກລະດັບ ວິຊາສະເພາະຢູ່ 6 ແຂວງ ຄື: ແຂວງຮາຕິ່ງ, ຖາຍຫງວຽນ, ເລີ້ມດົງ, ເຫງະອານ, ດານັງ ແລະ ຮາຍຟອງ ຈໍານວນ 703 ຄົນ ຍິງ 321 ຄົນ (ນອກແຜນ 39 ຄົນ ຍິງ 26 ຄົນ). ໃນນັ້ນ, ພະນັກງານ 40 ຄົນ ຍິງ 4 ຄົນ (ປະລິນຍາໂທ 11 ຄົນ ຍິງ 4 ຄົນ). ຕໍ່ກັບຜູ້ທີ່ຮຽນຈົບມາ ໄດ້ປະກອບ ອາຊີບ ຢູ່ໃນກົງຈັກລັດ, ວິສາຫະກິດ ແລະ ປະກອບອາຊີບສ່ວນຕົວ ຊຶ່ງເຮັດໃຫ້ເປັນການ ພັດທະນາຄອບຄົວ ແລະ ເຮັດໃຫ້ເສດຖະກິດ-ສັງຄົມ ພາຍໃນແຂວງດີຂຶ້ນ. ແຂວງບໍລິຄໍາໄຊ ກໍໄດ້ປະຕິບັດ ຕາມບົດບັນທຶກ ສັນຍາຊ່ວຍຈໍາ ລະຫວ່າງ ແຂວງຮາຕິ່ງ-ບໍລິຄໍາໄຊ ໂດຍໄດ້ຮັບເອົາ ພະນັກງານຂອງ ສສ ຫວຽດນາມ ມາຍົກລະດັບ ພາສາລາວ ຢູ່ມະຫາວິທະຍາໄລແຫ່ງຊາດ ຂອງ ສປປ ລາວ ໃນໄລຍະ 5 ປີຜ່ານມາ ມີຈໍານວນ 12 ຄົນ. ປີ 2017 ຈໍານວນ 7 ຄົນ (ແຂວງຮ່າງຕິ່ງ 5 ຄົນ ແລະ ເຫງະອານ 2 ຄົນ); ປີ 2018 ຈໍານວນ 3 ຄົນ (ແຂວງຮ່າຕິ່ງ); ປີ 2022 ຈໍານວນ 2 ຄົນ (ແຂວງຮ່າຕິ່ງ). ການຊ່ວຍເຫຼືອ ດ້ານພື້ນຖານໂຄງລ່າງ ການສຶກສາ: ແຂວງບໍລິຄໍາໄຊ ໄດ້ຮັບທຶນຊ່ວຍເຫຼືອ ຈາກລັດຖະບານ ສສ ຫວຽດນາມ (ແຂວງຮາຕິ່ງ) ຈໍານວນ 7 ໂຄງການ ແລະ ຈາກເລຂາທິການໃຫຍ່ ພັກກອມມູນິດ ຫວຽດນາມ 1 ໂຄງການ ຄື: ສົກປີ 2012-2013: ໄດ້ຮັບທຶນກໍ່ສ້າງ ອາຄານຮຽນ 3 ໂຄງການຄື: ອາຄານຮຽນ ມ.ສ ຊົນເຜົ່າ ເມືອງຄໍາເກີດ ມູນຄ່າ 2 ຕື້ດົງ, ມ.ສ ສີທ່ານາໄຊ ເມືອງປາກຊັນ ມູນຄ່າ 1,2 ຕື້ດົງ ແລະ ມ.ສ ສົມມຸງຄຸນ ເມືອງບໍລິຄັນ ມູນຄ່າ 1 ຕື້ດົງ. ສົກປີ 2014-2015: ໄດ້ຮັບທຶນ ກໍ່ສ້າງອາຄານຮຽນ ມ.ສ ຊົນເຜົ່າ ເມືອງຄໍາເກີດ ມູນຄ່າ 6 ຕື້ດົງ; ສົກປີ 2015-2016: ໃຫ້ທຶນກໍ່ສ້າງ ອາຄານຮຽນ ອ/ບ ເອກະພາບ ເມືອງປາກຊັນ ມູນຄ່າ 1,5 ຕື້ດົງ. ປີ 2018: ມ.ສ ສີທ່ານາໄຊ ແຂວງບໍລິຄໍາໄຊ ໄດ້ຮັບທຶນຊ່ວຍເຫຼືອ ຈາກລັດຖະບານ ສສ ຫວຽດນາມ ຈໍານວນ 4 ໂຄງການຄື: ຈາກເລຂາທິການໃຫຍ່ ພັກກອມມູນິດຫວຽດນາມ ເປັນອາຄານຮຽນ 4 ຊັ້ນ ມູນຄ່າ 30 ຕື້ດົງ; ຈາກແຂວງຮາຕິ່ງ ໃຫ້ທຶນກໍ່ສ້າງ ຫໍສະໝຸດຂອງແຂວງ ມູນຄ່າ 3 ຕື້ດົງ ແລະ ກໍ່ສ້າງເສັ້ນທາງເບຕົງ ມູນຄ່າ 2 ຕື້ດົງ.

ທ່ານກ່າວຕື່ມວ່າ: ແຜນການຮ່ວມມືໃນຕໍ່ໜ້າ: ສືບຕໍ່ເສີມຂະຫຍາຍສາຍພົວພັນພິເສດ ລາວ-ຫວຽດນາມ ເວົ້າລວມ ເວົ້າສະເພາະ ກໍຄື ແຂວງຮຽກສ່ຽວ: ບໍລິຄໍາໄຊ-ຮ່າຕິ່ງ ແລະ ຮ່າຕິ່ງ-ບໍລິຄໍາໄຊ ໃຫ້ແໜ້ນແຟ້ນ ຍືນຍົງຍິ່ງໆຂຶ້ນ. ສືບຕໍ່ປະສານຮ່ວມມື ໃນການພັດທະນາ ຊັບພະຍາກອນມະນຸດ, ແລກປ່ຽນ ດ້ານວິຊາການຮ່ວມກັນ ໂດຍການນໍາສົ່ງນັກສຶກສາ ແລະ ພະນັກງານແຂວງບໍລິຄໍາໄຊ ໄປສຶກສາ ແລະ ຍົກລະດັບວິຊາສະເພາະ ຢູ່ສະຖາບັນການສຶກສາ ແຫ່ງຕ່າງໆຂອງ ສສ ຫວຽດນາມ; ພ້ອມທັງສືບຕໍ່ ຮັບເອົາພະນັກງານ ແລະ ນັກສຶກສາ ສສ ຫວຽດນາມ ມາຮຽນ ຢູ່ມະຫາວິທະຍາໄລແຫ່ງຊາດ ສປປ ລາວ ໃຫ້ນັບມື້ ຫຼາຍຂຶ້ນ. ສືບຕໍ່ປະສານ ຂໍຄວາມຮ່ວມມື ໃນການຊ່ວຍເຫຼືອ ດ້ານການພັດທະນາ ພື້ນຖານໂຄງລ່າງ ຂອງຂະແໜງການສຶກສາ ແລະ ກິລາ ພາຍໃນແຂວງບໍລິຄໍາໄຊ; ສືບຕໍ່ປົກປັກຮັກສາ ແລະ ນໍາໃຊ້ອາຄານຮຽນ ທີ່ໄດ້ຮັບການຊ່ວຍເຫຼືອ ຈາກ ສສ ຫວຽດນາມ ເຂົ້າໃນການ ຈັດການຮຽນ-ການສອນ ໃຫ້ເກີດປະໂຫຍດສູງ ສຸດ.

ໂດຍ: ສີເວດ

KPL