ຂປລ.ໃນວັນທີ 22 ກໍລະກົດ 2022, ສະຖານເອກອັກຄະລັດຖະທູດ ແຫ່ງ ສປປ ລາວ ປະ ຈຳ ສ ຣັດເຊຍ ໄດ້ຮ່ວມກັບ ສະຖານ ເອກອັກຄະລັດຖະທູດ ແຫ່ງ ສສ ຫວຽດນາມ ປະຈຳ ສ ຣັດເຊຍ ຈັດກິດຈະກຳ ທາງດ້ານກິລາ, ວັດທະນະທຳ ແລະ ສິລະປະວັນນະຂະດີ ເພື່ອສະເຫລີມສະຫລອງ 60 ປີ ແຫ່ງການສ້າງຕັ້ງ ສາຍພົວພັນການທູດ ລະຫວ່າງ ລາວ-ຫວຽດນາມ ແລະ ວັນຄົບຮອບ 45 ປີ ແຫ່ງວັນລົງນາມ ສົນທິສັນຍາມິດຕະພາບ, ການຮ່ວມມື ແລະ ການຊ່ວຍເຫລືອເຊິ່ງກັນ ແລະ ກັນ ລະຫວ່າງ ລາວ ແລະ ຫວຽດນາມ. ໃຫ້ກຽດເຂົ້າຮ່ວມຂອງ ທ່ານ ນາງ ວິລາວັນ ເຍ່ຍປໍເຮີ ເອກອັກຄະລັດຖະທູດ ແຫ່ງສປປ ລາວ ປະຈຳ ສ ຣັດເຊຍ ແລະ ທ່ານ ດັງມິງຄອຍ ເອກອັກຄະລັດຖະທູດ ແຫ່ງ ສສ ຫວຽດນາມ ປະຈຳ ສ ຣັດເຊຍ ພ້ອມດ້ວຍພະນັກງານ ຂອງສອງສະຖານທູດ ແລະ ນັກສຶກສາ ລາວ-ຫວຽດນາມ  ເຂົ້າຮ່ວມ.

ໃນໂອກາດດັ່ງກ່າວ ທ່ານ ເອກອັກຄະລັດຖະທູດ ສອງປະເທດໄດ້ຜັດປ່ຽນກັນ ກ່າວຄຳເຫັນ ເຊິ່ງໄດ້ກ່າວ ຄວາມເຫັນຄວາມສຳຄັນ ຂອງສອງວັນປະຫວັດສາດ, ພ້ອມນັ້ນ ທັງສອງສະຖານເອກອັກຄະລັດຖະທູດ ໄດ້ມີການຈັດການ ແຂ່ງຂັນກິລາມິດຕະພາບ, ການສະແດງ ສິລະປະວັນນະຄະດີ ທີ່ສະແດງເຖິງ ວັດທະນະທຳອັນດີງາມ ຂອງສອງປະເທດ ແລະ ພາເຂົ້າສາມັກຄີ.

ທ່ານ ນາງ ວິລາວັນ ເຍ່ຍປໍເຮີ ໄດ້ຍົກໃຫ້ເຫັນເຖິງ ຄຸນງາມຄວາມດີ ແລະ ຮູ້ບຸນຄຸນຢ່າງເລິກ ເຊິ່ງ ຕໍ່ປະທານໂຮ່ຈິມິນ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ເຄົາລົບທີ່ເປັນຜູ້ກໍ່ຕັ້ງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມື ຮອບດ້ານ ລະ ຫວ່າງສອງປະເທດ. ປັດຈຸບັນການພົວພັນມິດຕະພາບ ແລະ ການຮ່ວມມື ໄດ້ກ້າວເຂົ້າສູ່ລວງເລິກ, ແໜ້ນແຟ້ນ ແລະ ຮອບດ້ານ. ສອງວັນປະຫວັດສາດດັ່ງກ່າວ ມີຄວາມໝາຍສໍາຄັນທີ່ສຸດ ສໍາລັບສອງປະ ເທດເຮົາ ເຊິ່ງເປັນການໄຂສັງກາດໃໝ່ ໃຫ້ແກ່ພາລະກິດ ຕໍ່ສູ້ປົດປ່ອຍຊາດ, ເສີມຂະຫຍາຍ ແລະ ຮັດແໜ້ນການພົວພັນ ອັນເປັນມູນເຊື້ອມາແຕ່ຍາວນານ ແລະ ສ້າງສາຍພົວພັນ ມິດຕະພາບອັນຫຍິ່ງໃຫຍ່, ຄວາມສາມັກຄີພິເສດ ແລະ ການພົວພັນຮ່ວມມືຮອບດ້ານ ລະຫວ່າງສອງພັກ, ສອງ​ລັດຖະບານ ແລະ ປະຊາຊົນສອງຊາດ ລາວ-ຫວຽດນາມ. ໃນໄລຍະຜ່ານມາ ລາວ-ຫວຽດນາມ ໄດ້ໃຫ້ການຊ່ວຍເຫລືອເຊິ່ງກັນ ແລະ ກັນຢ່າງຮອບດ້ານ ໃນຂະບວນການຕໍ່ສູ້ ປົດປ່ອຍຊາດ ໃຫ້ຫລຸດພົ້ນ ອອກຈາກ ແອກຄອບຄອງ ຂອງຈັກະພັດລ່າເມືອງຂຶ້ນແບບເກົ່າ ແລະ ແບບໃໝ່ ກໍຄືພາລະກິດແຫ່ງ ການປົກປັກຮັກສາ ແລະ ສ້າງສາພັດທະນາ ຂອງສອງປະເທດ ໃນປັດຈຸບັນ. ພ້ອມກັນນັ້ນ, ທ່ານ ຍັງໄດ້ຢືນຢັນວ່າ: ຈະສືບຕໍ່ເສີມ ຂະຫຍາຍສາຍພົວພັນ, ການຮ່ວມມືຮອບດ້ານ ແລະ ການປະສານງານ ລະຫວ່າງ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສ ຣັດເຊຍ ກັບ ສະຖານເອກອັກຄະລັດຖະທູດ ແຫ່ງ ສສ ຫວຽດນາມ ປະຈຳ ສ ຣັດເຊຍ ກໍຄືສືບຕໍ່ເສີມຂະຫຍາຍມູນເຊື້ອ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມື ຮອບດ້ານ ລະຫວ່າງ ສອງພັກ-ສອງລັດ ແລະ ປະຊາ ຊົນສອງຊາດລາວ-ຫວຽດນາມ, ຫວຽດນາມ-ລາວ ໃຫ້ໝັ້ນຄົງຂະໜົງແກ່ນຕະຫລອດໄປ.

ໃນຕອນທ້າຍຂອງພິທີ ທ່ານ ນາງ ວິລາວັນ ໄດ້ຕາງໜ້າໃຫ້ສະຖານທູດ ແລະ ໃນນາມສ່ວນຕົວ ໄດ້ກ່າວສະແດງຄວາມ ຊົມເຊີຍຢ່າງສຸດໃຈ ແລະ ອວຍພອນໄຊອັນປະເສີດຕໍ່ ທ່ານທູດ ດັງມິງຄອຍ ພ້ອມດ້ວຍນັກການທູດ ພະນັກງານສະຖານທູດຫວຽດນາມ ແລະ ລາວ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ຈະເລີນກ້າວໜ້າ, ທັງອວຍພອນໃຫ້ ສາຍພົວພັນມິດຕະພາບ ອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດຖະບານ ແລະ ປະຊາຊົນສອງຊາດ ຈົ່ງໝັ້ນຄົງຕະຫລອດໄປ.

KPL