ຂປລ. ແຂວງຄຳມ່ວນ ເປີດຂະບວນການວັນສັກຢາແຫ່ງຊາດ (ວສຊ) ເພື່ອກຳຈັດພະຍາດໝາກແດງໃຫຍ່ ແລະ ໝາກແດງນ້ອຍ ໃນວັນທີ 20 ພຶດສະພາ 2024 ພາຍໃຕ້ການສະໜັບສະໜູນ ຂອງອົງການອຸຍນີເຊບ ແລະ ອົງການຈັດຕັ້ງສາກົນ ປະຈຳ ສປປ ລາວ ໂດຍມີຜູ້ຕາງໜ້າອົງການຈັດຕັ້ງສາກົນ ແລະ ພາກສ່ວນທີ່ກ່ຽວຂ້ອງ, ພ້ອມດ້ວຍມວນຊົນ ເຂົ້າຮ່ວມຢ່າງເປັນຂະບວນ.

ໂອກາດນີ້, ທ່ານ ແກ້ວອຸດອນ ບຸດສິງຂອນ ເຈົ້າແຂວງຄຳມ່ວນ ໄດ້ໃຫ້ຮູ້ວ່າ: ແຂວງຄຳມ່ວນ ຂະບວນການວັນສັກຢາປ້ອງກັນພະຍາດແຫ່ງຊາດ ໄດ້ກຳນົດເອົາວັນທີ 20-29 ພຶດສະພາ 2024 ເຊິ່ງການກະກຽມ ຄວາມພ້ອມ ແມ່ນໄດ້ຈັດກອງປະຊຸມຊີ້ແຈງ ໃຫ້ແກ່ຄະນະກໍາມາທິການ ເພື່ອສຸຂະພາບແມ່ ແລະ ເດັກ ຂັ້ນແຂວງ, ຂັ້ນເມືອງ, ຄະນະຮັກສາສຸຂະພາບຂັ້ນບ້ານ, ມີການຝຶກອົບຮົມ ທາງດ້ານເຕັກນິກວິຊາການ ພ້ອມທັງໄດ້ກຳນົດຈຸດສັກຢາຄົງທີ່ ຕາມໂຮງໝໍແຂວງ, ໂຮງໝໍເມືອງ, ໂຮງໝໍນ້ອຍຊຸມຊົນ, ສຸກສາລາ ທັງໝົດ 102 ຈຸດ. ນອກນີ້, ຍັງມີຈຸດສັກຢາແບບເຄື່ອນທີ່ ເພື່ອບໍລິການໃຫ້ທົ່ວເຖິງ ເປົ້າໝາຍຢ່າງກວ້າງຂວາງ. ໃນທົ່ວແຂວງຄຳມ່ວນ ມີເປົ້າໝາຍໃນການສັກວັກຊີນປ້ອງກັນພະຍາດໝາກແດງໃຫຍ່-ໝາກແດງນ້ອຍ ທັງໝົດ 31.985 ຄົນ.

ພ້ອມນີ້, ຍັງຍົກໃຫ້ເຫັນເຖິງຄວາມຮ້າຍແຮງ ຂອງພະຍາດໝາກແດງໃຫຍ່ ແມ່ນເປັນເຊື້ອຈຸລະໂລກ ຫລື ໄວຣັສ ທີ່ສາມາດຕິດຕໍ່ໄດ້ໄວຈາກຄົນສູ່ຄົນ ໂດຍຜ່ານທາງລະບົບຫາຍໃຈ ພາໃຫ້ເກີດມີການເຈັບເປັນ ແລະ ເສຍຊີວິດ ເປັນຈຳນວນຫລາຍ ຖ້າເດັກທີ່ຕິດເຊື້ອພະຍາດດັ່ງກ່າວ, ຈະເຮັດໃຫ້ພູມຕ້ານທານ ຂອງຮ່າງກາຍຫລຸດລົງ ແລະ ເກີດມີອາການສົນ ເຊັ່ນ: ໄຂ້, ຫາຍໃຈບໍ່ສະດວກ, ອັກເສບປອດຮຸນແຮງ, ຖອກທ້ອງ, ອັກເສບຫລອດສຽງ, ສະໝອງອັກເສບ ແລະ ອື່ນໆ. ສຳລັບພະຍາດໝາກແດງນ້ອຍ ໂດຍສະເພາະແມ່ນ ການຕິດເຊື້ອໃນແມ່ຍິງຖືພາ ໃນໄລຍະ 3 ເດືອນທໍາອິດ, ຖ້າແມ່ຕິດເຊື້ອດັ່ງກ່າວ ຈະເຮັດໃຫ້ເດັກອ່ອນ ທີ່ຢູ່ໃນທ້ອງມີຜົນກະທົບສູງ ຈະເຮັດໃຫ້ການຈະເລີນເຕີບໂຕ ຂອງສະໜອງບໍ່ປົກກະຕິ, ສະໝອງເຊື່ອມ, ເຮັດໃຫ້ເດັກທີ່ເກີດມາພິການ ເຊັ່ນ: ຫູໜວກ, ຕາບອດ ຮ້າຍແຮງໄປກວ່ານັ້ນແມ່ນ ຈະພາໃຫ້ເດັກເສຍ ຊີວິດຢູ່ໃນທ້ອງ, ພະຍາດທັງສອງຊະນິດນີ້, ແມ່ນສາມາດປ້ອງກັນດ້ວຍວັກຊີນ. ສະນັ້ນ, ໃນຂະບວນການສັກຢາກັນ ພະຍາດແຫ່ງຊາດ ຫລື ວສຊ ຈຶ່ງມີຄວາມຈຳເປັນທີ່ສຸດ ທີ່ຈະຕ້ອງໄດ້ໃຫ້ເດັກທີ່ຢູ່ ໃນເກນສັກຢາກັນພະຍາດທຸກຄົນ ໄປສັກວັກຊີນ ເພື່ອສ້າງພູມຄຸ້ມກັນໃຫ້ກວມ ເປັນຈຳນວນຫລາຍ ກາຍເປັນພູມຄຸ້ມກັນແບບລວມໝູ່ ເພື່ອບໍ່ໃຫ້ພະຍາດແຊກແຊງ ເຂົ້າຫາບຸກຄົນໄດ້ ແລະ  ພະຍາດໝາກແດງ ຍັງໄດ້ສົ່ງກະທົບເຖິງຊີວິດ ແລະ ການເຈັບເປັນຂອງລູກ-ຫລານ ໂດຍສະ ເພາະ ມ່ນເດັກທີ່ມີອາຍຸຕໍ່າກວ່າ 5 ປີ ທີ່ມີຄວາມສ່ຽງສູງ ໃນການຕິດເຊື້ອດັ່ງກ່າວ ແລະ ເນື່ອງຈາກວ່າອັດຕາ ການສັກຢາກັນພະຍາດດັ່ງກ່າວ ຢູ່ແຂວງຄໍາມ່ວນ ຍັງບໍ່ທັນບັນລຸໄດ້ຕາມຕົວເລກຄາດໝາຍ ໃນປີທີ່ຜ່ານມາ ເຮັດໃຫ້ອັດຕາການປົກຄຸມ ໃນການສັກວັກຊີນກັນພະຍາດດັ່ງກ່າວຍັງບໍ່ສູງ ເຊິ່ງເປັນສາເຫດ ແລະ ມີຄວາມສ່ຽງສູງທີ່ ຈະພາໃຫ້ເກີດມີການລະບາດໃນຕໍ່ໜ້າ.

 ພ້ອມກັນນີ້, ທ່ານ ແກ້ວອຸດອນ ບຸດສິງຂອນ ຍັງໄດ້ຮຽກຮ້ອງມາຍັງຜູ້ປົກຄອງເດັກ ຈົ່ງນຳລູກ-ຫລານຂອງຕົນເຂົ້າຮ່ວມ ໃນວັນສັກຢາປ້ອງກັນພະຍາດ ໝາກແດງໃຫຍ່-ໝາຍແດງນ້ອຍ ຢ່າງເປັນຂະບວນຟົດຟື້ນ ກໍຄື ເດັກລຸ່ມ 5 ປີ ໃຫ້ກວມເອົາ 95% ເພື່ອສ້າງພູມຄຸ້ມກັນ, ປ້ອງກັນບໍ່ໃຫ້ລູກ-ຫລານ ເຈັບເປັນດ້ວຍພະຍາດດັ່ງກ່າວ ແລະ ເພື່ອປ້ອງກັນບໍ່ໃຫ້ເກີດມີການແພ່ລະບາດໃຫຍ່ ຢູ່ພາຍໃນແຂວງ, ຮຽກຮ້ອງມາຍັງ ທຸກພາກສ່ວນໃນສັງຄົມ ຈົ່ງໄດ້ໃຫ້ຄວາມສຳຄັນ ໃຫ້ການຮ່ວມມື ແລະ ປະກອບສ່ວນເຂົ້າໃນຂະບວນການ ວສຊ ໃນຄັ້ງນີ້.

ຂ່າວ-ພາບ: ວຽງສະຫວັນ

KPL