*ດັ່ງທີ່ເຮົາຮູ້ນໍາກັນວ່າ ປັດຈຸບັນເສດຖະກິດມີການເໜັງຕີງຂຶ້ນສູງ ສະນັ້ນ, ມັນສົ່ງຜົນກະທົບໃຫ້ພະນັກງານກິນເງີນເດືອນປະຈໍາ ຕ້ອງບຸກບືນໂຕເອງເຮັດວຽກຫລາຍທາງເພື່ອໃຫ້ລາຍຮັບພຽງພໍກັບລາຍຈ່າຍ. ສະນັ້ນ , ມັນຈຶ່ງກາຍເປັນແຮງຜັກດັນເຮັດຫລາຍຄົນ ສູ່ຊົນຈົນປະສົບຜົນສໍາເລັດ ເໝືອນ ທ່ານ ຄໍາສຸກ ວິໄລວົງ ພະນັກງານທະຫານ ຢູ່ກົມໃຫຍ່ເຕັກນິກກອງທັບ ທີ່ໃຊ້ເວລາຫວ່າງໃຫ້ເປັນປະໂຫຍດດ້ວຍການປູກຝັງ-ລ້ຽງສັດ ຈົນ ຈັບເງິນ 300 ລ້ານໄດ້ສໍາເລັດ.
ທ່ານ ຄໍາສຸກ ວິໄລວົງ ອາຍຸ 37 ປີ ປພຊາຊົນ ບ້ານ ຄັງສີ ເມືອງແປກ ແຂວງຊຽງຂວາງ ໃຫ້ຮູ້ວ່າ: ຕົນເອງເລີ່ມກ້າວສູ່ການເປັນທະຫານອາຊີບ ສັງກັດຢູ່ ສາງ ອ 5 ກົມໃຫຍ່ເຕັກນິກກອງທັບ, ໃນປີ 2007- 2008 ຮຽນຢູ່ໂຮງຮຽນການທະຫານທ້ອງຖິ່ນ ແຂວງຊຽງຂວາງ ( ໂຮງຮຽນນາຍສິບບ້ານແປນ ) ປີ2013 – 2016 ສຶກສາຢູ່ສະຖາບັນວິຈິດສິນແຫ່ງຊາດ ສາຂາວິຊາຈິດຕະກໍາ ແລະ ນິເທດສິນ, ພາຍຫລັງຈົບການສຶກສາໄດ້ຍົກຍ້າຍຈາກ ສາງ ອ5 ມາປະຈໍາການຢູ່ ພະແນກໂຄສະນາອົບຮົມຫ້ອງການເມືອງ ກົມໃຫຍ່ເຕັກນິກກອງທັບ, ເປັນເວລາຫລາຍປີ ຈຶ່ງມີແນວຄິດຢາກໃຊ້ເວລາຫວ່າງໃຫ້ເປັນປະໂຫຍດ, ເພື່ອຊອກຫາແຫລ່ງລາຍຮັບ ແລະ ແກ້ໄຂຊີວິດການເປັນຢູ່ໃຫ້ແກ່ຄອບຄົວ ໂດຍບໍ່ຄ່ອງຄ່ອຍຖ້າແຕ່ເງິນເດືອນທີ່ຂັ້ນເທິງຕອບສະໜອງໃຫ້ຢ່າງດຽວ.
ໃນໄລຍະ 5 ປີຜ່ານມາ, ໄດ້ປູກຜັກທັງແບບປູກໃສ່ດິນ ແລະ ປູກແບບໄຮໂດໂປນິກ ( ປູກໃສ່ນໍ້າ ), ສາມາດປູກໄດ້ຕະຫລອດປີທັງລະດູແລ້ງ ແລະ ລະດູຝົນ ຜັກທີ່ປູກໄດ້ມີ: ຜັກສະລັດ 200 ກິໂລ , ຫອມປ້ອມ 150 ກິໂລ, ປູກມອນ 30 ກວ່າຕົ້ນ, ປູກດອກໄມ້ ແລະ ຜັກຫອມຈໍານວນໜຶ່ງຕື່ມອີກ. ພ້ອມນັ້ນຍັງໄດ້ລ້ຽງສັດ: ລ້ຽງແບ້ 20 ກວ່າໂຕ, ລ້ຽງເປັດ 100 ກວ່າໂຕ, ລ້ຽງໄກ່ 300 ໂຕ. ມີໜອງປາ 4 ໜອງ: ລ້ຽງປານິນ 15.000 ໂຕ, ປາປາກ 4.000 ໂຕ, ປາກິນຫຍ້າ 15.00 ໂຕ, ປາຂາວມັນ 1.000 ໂຕ, ປາເກັດແລບ 1.500 ໂຕ, ປາເຂັງພັນ 1.000 ກວ່າໂຕ, ປາດຸກພັນ 1.500 ກວ່າໂຕ, ລ້ຽງຫອຍເຊີລີ້ສີທອງ ນອກຈາກການປູກຝັງ ແລະ ລ້ຽງສັດແລ້ວ ຍັງໄດ້ສ້າງຜະລິດຕະພັນຂາຍເປັນສິນຄ້າເພື່ອຮັບໃຊ້ສັງຄົມມີ: ຜະລິດເຕົາເຜົາຖ່ານ ( ເຜົາດ້ວຍນໍ້າມັນເຄື່ອງເກົ່າ ) ໄດ້ 30 ໜ່ວຍ, ເຕົາເຫລັກດັງຖ່ານ-ດັງຟືນຈໍານວນ 500 ກວ່າໜ່ວຍ, ເຕົາປີ້ງນ້ອຍແບບພົກພາ 50 ໜ່ວຍ, ເຮັດໂຖປູກຜັກ, ໂຖປູກດອກໄມ້ ແລະ ອູ່ເດັກນ້ອຍທີ່ເຮັດຈາກຢາງຕີນລົດເກົ່າລວມ 600 ກວ່າອັນ ແລະ ບໍລິການໃສ່ຂອບຮູບ, ພິມເສື້ອ, ຕິດຕັ້ງປະຕູມ້ວນ, ປະຕູຮົ້ວໜ້າບ້ານ, ສະຫຼຸບລວມແລ້ວໃນຊຸມປີຜ່ານມາ, ສາມາດສ້າງລາຍຮັບຈາກການປູກຝັ່ງ-ລ້ຽງສັດ, ຂາຍຜະລິດຕະພັນຮັບໃຊ້ສັງຄົມ ແລະ ການບໍລິການລວມເປັນເງິນ 300ລ້ານກວ່າກີບ ( ສະເພາະລາຍໄດ້ບໍ່ລວມກັບເງິນເດືອນ ).
ລາຍໄດ້ຈາກການປູກຝັງ - ລ້ຽງສັດ ແລະ ຂາຍຜະລິດຕະພັນບວກກັບເງິນເດືອນ ແມ່ນໄດ້ຊື້ດິນເພີ່ມອີກ 1 ຕອນ ຂະໜາດ 30 x 80 ແມັດ ແລະ ຈົກໜອງປາເພີ່ມອີກ 1 ໜອງ, ປັບປຸງເນື້ອທີ່ສວນ, ຊື້ເຄື່ອງມືຂະຫຍາຍການຜະລິດ, ໃຊ້ຈ່າຍໃນຊີວິດປະຈໍາວັນ, ສ່ວນໜຶ່ງແມ່ນເປັນທຶນການສຶກສາຂອງລູກ, ແລະ ຍັງຈະຂະຫຍາຍການປູກຝັງ ແລະ ລ້ຽງສັດໃຫ້ກາຍເປັນຟາມໃນອານາຄົດຕໍ່ໜ້າ. ຈາກຄຸນສົມບັດ - ສິນທຳປະຕິວັດ ແລະ ຜົນງານທີ່ຍາດມາໄດ້ນັ້ນ, ຈຶ່ງໄດ້ຮັບການຍ້ອງຍໍປະເພດຕ່າງໆເຊັ່ນ: ໄດ້ຮັບຫລຽນໄຊພິລະອາດຫານຊັ້ນ III 1 ໜ່ວຍ, ຫລຽນໄຊແຮງງານຊັ້ນ III 1 ໜ່ວຍ, ຫລຽນກາແຮງງານ 1 ໜ່ວຍ, ໃບຍ້ອງຍໍລັດທະບານ 2 ໃບ, ໃບຍ້ອງຍໍກະຊວງປ້ອງກັນປະເທດ 2 ໃບ, ໃບຍ້ອງຍໍກົມໃຫຍ່ເຕັກນິກກອງທັບ ( ຂະບວນການຮັກຊາດ ແລະ ພັດທະນາ ) 2 ໃບ, ໃບຍ້ອງຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ 3 ໃບ, ຍ້ອງຍໍເຈົ້າແຂວງ ແຂວງຊຽງຂວາງ 1 ໃບ, ໃບຍ້ອງຍໍກອງບັນຊາການທະຫານແຂວງຊຽງຂວາງ 1 ໃບ, ກົມກອງໄດ້ຢັ້ງຢືນ ເປັນຊາວໜຸ່ມຜູ້ທີ່ມີຄຸນທາດການເມືອງໜັກແໜ້ນ, ມີຄວາມສະດຸງໄວ, ຫ້າວຫັນຕໍ່ໜ້າທີ່ວຽກງານທີ່ໄດ້ຮັບມອບໝາຍ, ເປັນຊາວໜຸ່ມຜູ້ນຳໜ້າ ແລະ ເປັນອີກບຸກຄົນທີ່ເປັນແບບຢ່າງທີດີ່ຂອງກົມກອງ, ສົມແລ້ວທີ່ສະຫາຍ ເປັນນັກຮົບວັດທະນະທໍາທີ່ຫ້າວຫັນ ແລະ ນໍາໜ້າຂອງກົມກອງ ເຊິ່ງພະນັກງານ-ນັກຮົບຮຸ່ນໜຸ່ມ ຄວນນໍາໄປເປັນແບບຢ່າງໃນການເຝິກຝົນຫລໍ່ຫລອມຕົນເອງ ໃຫ້ກາຍເປັນນັກຮົບວັດທະນະທໍາ ທີ່ດີເດັ່ນຂອງກົມກອງກໍຄືກອງທັບ ເພື່ອປະກອບສ່ວນກໍ່ສ້າງກົມກອງໃຫ້ມີລະບຽບແບບແຜນທີ່ທັນສະໄໝຂຶ້ນເທື່ອລະກ້າວ.
ໂດຍ: ມາລີ
