ຂປລ. ສາຍການບິນຫວຽດເຈັດ (VietJet) ໄດ້ປະຕິບັດຖ້ຽວບິນພິເສດເພື່ອບັນເທົາທຸກ 2 ຖ້ຽວ ຄື VJ2875 ແລະ VJ2877 ໂດຍນໍາໃຊ້ເຮືອບິນ Airbus A330 ແລະ A321 ເພື່ອຂົນສົ່ງໜ່ວຍກູ້ໄພຫວຽດນາມ ໄປຍັງມຽນມາ ຫລັງຈາກເກີດແຜ່ນດິນໄຫວຮ້າຍແຮງ. ສາຍການບິນໄດ້ອຳນວຍຄວາມສະດວກໃຫ້ແກ່ການຂົນສົ່ງພະນັກງານກູ້ໄພຂອງກະຊວງປ້ອງກັນຄວາມສະຫງົບ ແລະ ກະຊວງປ້ອງກັນປະເທດຫວຽດນາມ ຢ່າງວ່ອງໄວ. ສອງຖ້ຽວບິນໄດ້ອອກຈາກສະໜາມບິນນານາຊາດ Noi Bai ຂອງຮ່າໂນ້ຍ ໄປ Yangon ໃນວັນທີ 30 ມີນານີ້.

ຖ້ຽວບິນດັ່ງກ່າວໄດ້ຂົນສົ່ງເຈົ້າໜ້າທີ່ກູ້ໄພ 106 ຄົນຈາກກອງກໍາລັງປະກອບອາວຸດຫວຽດນາມ ພ້ອມດ້ວຍໝາຄົ້ນຫາແລະໜ່ວຍຍກູ້ໄພທີ່ໄດ້ຮັບການຝຶກອົບຮົມ ແລະ ເຄື່ອງຊ່ວຍເຫລືອທີ່ຈຳເປັນກວ່າ 60 ໂຕນ, ໃນນັ້ນມີອຸປະກອນການແພດ ແລະ ສະບຽງອາຫານ ເພື່ອໜູນຊ່ວຍວຽກງານກູ້ໄພແຜ່ນດິນໄຫວຢູ່ມຽນມາ.ທ່ານ Dinh Viet Phuong ຜູ້ອຳນວຍການໃຫຍ່ VietJet ໃຫ້ກ່າວວ່າ: “VietJet ກຽມພ້ອມສະເໝີສຳລັບພາລະກິດພິເສດ, ພວກເຮົາໄດ້ກະກຽມສິ່ງທີ່ຈຳເປັນຢ່າງວ່ອງໄວ ແລະ ປະຕິບັດສຳເລັດ 2 ຖ້ຽວເພື່ອຂົນສົ່ງໜ່ວຍກູ້ໄພສຸກເສີນຈາກກະຊວງປ້ອງກັນຄວາມສະຫງົບ ແລະ ກະຊວງປ້ອງກັນປະເທດ ໄປຍັງ ປະເທດມຽນມາ, ເພື່ອຊ່ວຍວຽກງານບັນເທົາທຸກໄພແຜ່ນດິນໄຫວຢ່າງທັນເວລາ.”ເມື່ອລົງຈອດຢູ່ສະໜາມບິນຢາງກຸ້ງ, ປະເທດມຽນມາ, ເຈົ້າໜ້າທີ່ກູ້ໄພຂອງກອງກຳລັງປະກອບອາວຸດຫວຽດນາມ ພ້ອມກັບພະນັກງານ VietJet, ເລີ່ມຂົນສົ່ງ ແລະ ຂົນສົ່ງອຸປະກອນທີ່ຈຳເປັນໄປຍັງສະຖານທີ່ກູ້ໄພທີ່ໄດ້ກຳນົດໄວ້ໃນທັນທີ. ເຈົ້າໜ້າທີ່ຕຳຫລວດ ແລະ ທະຫານຍັງເຂົ້າຮ່ວມໃນການເຄື່ອນໄຫວຊອກຫາແລະກູ້ໄພ ໃຫ້ຄວາມຊ່ວຍເຫລືອດ້ານການແພດ, ແລະສະໜັບສະໜູນຄວາມພະຍາຍາມໃນການຟື້ນຟູພາຍຫຼັງແຜ່ນດິນໄຫວ.

ໄລຍະຜ່ານມາ VietJet ມີບັນດາການເຄື່ອນໄຫວດ້ານມະນຸດສະທຳຢ່າງແຂງແຮງ, ສະແດງໃຫ້ເຫັນນ້ຳໃຈຄວາມເມດຕາ ແລະ ຄວາມສາມັກຄີ. ສາຍການບິນໄດ້ດຳເນີນຖ້ຽວບິນບັນເທົາທຸກຫລາຍຖ້ຽວ, ລວມທັງການຂົນສົ່ງຊ່ວຍເຫລືອ ແລະ ໜ່ວຍກູ້ໄພສຳລັບເຫດແຜ່ນດິນໄຫວແລະຄື້ນສຶນາມິປີ 2018 ຂອງອິນໂດເນເຊຍ, ພາຍຸໄຕ້ຝຸ່ນ Haiyan ໃນຟີລິບປິນໃນປີ 2013 ແລະ ການຕອບໂຕ້ການແຜ່ລະບາດຂອງພະຍາດໂຄວິດ-19 ສາຍການບິນ VietJet ໄດ້ເຄື່ອນໄຫວຢ່າງວ່ອງໄວ ໂດຍຕອບສະໜອງບັນດາຖ້ຽວບິນທີ່ບັນທຸກພະນັກງານແພດ, ຕຳຫລວດ, ທະຫານ ໃນການຊ່ວຍເຫລືອຂອງຊຸມຊົນ, ກິດຈະກຳການກຸສົນແມ່ນຫົວໃຈຫລັກຂອງພາລະກິດຂອງ VietJet.

KPL