ຂປລ
ເນື່ອງໃນໂອກາດ ວັນຊາດຂອງປະເທດສະຫະພັນລັດ ມາເລເຊຍ (Federation of Malaysia) ຫລືເອີ້ນວ່າ ມາເລເຊຍ (Malaysia) ຄົບຮອບ 50 ປີ(31/8/1975-31/8/2025) ໂດຍມີນະຄອນຫລວງຊື່ວ່າ ກົວລາລຳເປີ(Kualalampur), ມາເລເຊຍ ຕັ້ງຢູ່ໃນເຂດເສັ້ນສູນສູດປະກອບດ້ວຍດິນແດນສອງສ່ວນ ໂດຍມີທະເລຈີນໃຕ້ ຂັ້ນລະຫວ່າງ ມາເລເຊຍ ຕາເວັນຕົກ ແລະ ມາເລເຊຍຕາເວັນອອກ
ເນື່ອງໃນໂອກາດ ວັນຊາດຂອງປະເທດ ສະຫະພັນລັດ ມາເລເຊຍ (Federation of Malaysia) ຫລືເອີ້ນວ່າ ມາເລເຊຍ (Malaysia) ຄົບ ຮອບ 50 ປີ(31/8/1975-31/8/2025) ໂດຍມີນະຄອນຫລວງຊື່ວ່າ ກົວລາລຳເປີ(Kualalampur), ມາເລເຊຍ ຕັ້ງຢູ່ໃນເຂດເສັ້ນສູນສູດປະກອບດ້ວຍດິນແດນສອງສ່ວນ ໂດຍມີທະເລຈີນໃຕ້ ຂັ້ນລະຫວ່າງ ມາເລເຊຍ ຕາເວັນຕົກ ແລະ ມາເລເຊຍຕາເວັນອອກ, ມີເນື້ອທີ່ລວມ 329.847 ກິໂລຕາແມັດ ໃຫຍ່ເປັນອັນດັບ 5 ຂອງ ປະເທດສະມາຊິກ ອາຊຽນ, ກວມເອົາປະຊາກອນ 34,2 ລ້ານກວ່າຄົນໃນປີ (2025), ມີຊາຍແດນທິດ ເໜືອຕິດກັບໄທ; ທິດໃຕ້ຕິດກັບ ສິງກະໂປ; ທິດຕາເວັນອອກ ສ່ຽງເໜືອຕິດກັບ ຟີລິບປິນ ແລະ ທິດຕາເວັນຕົກຕິດກັບຊ່ອງແຄບ ມະລາກາ ແລະ ເກາະສຸມາຕາຂອງປະເທດ ອິນໂດເນເຊຍ. ປະຊາຊົນສ່ວນໃຫຍ່ ນັບຖືສາສະໜາ ອິດສະລາມ; ພາສາທາງການ ມາເລເຊຍ; ໃຊ້ສະກຸນເງິນ ຣິງກິດ(Ringgit).
ມາເລເຊຍ ເປັນປະເທດ ອຸດສາຫະກຳໃໝ່ ທີ່ກ້າວໜ້າແຫ່ງໜຶ່ງ ໃນອາຊີຕາເວັນອອກສ່ຽງໃຕ້, ລະບົບເສດຖະກິດແບບເສລີ, ໂດຍໃຊ້ກົນໄກ ຕະຫລາດ ລັດຖະບານ ພະຍາຍາມສົ່ງເສີມ ອຸດສາຫະກຳ ການທ່ອງທ່ຽວ ແລະ ບໍລິການ . ຜົນຜະລິດກະສິກຳສຳຄັນໄດ້ແກ່: ນໍ້າມັນປາມ, ຢາງພາລາ, ຖົ່ວລຽນ, ໂກໂກ ແລະ ເຂົ້າ ອື່ນໆ. ໂດຍມີລວມຍອດຜະລິດຕະພັນພາຍໃນປະເທດ(GDP) ເຕີບໂຕຂຶ້ນສະເລ່ຍ 5,1%ຕໍ່ປີ (ໃນປີ 2024); ສ່ວນລາຍໄດ້ສະເລ່ຍຕໍ່ຫົວຄົນ 11,867 ກວ່າໂດລາສະຫະລັດຕໍ່ປີ; ສິນຄ້າສົ່ງອອກປະເພດເຊັ່ນ: ເອເລັກໂຕຣນິກ, ຜະລິດຕະພັນປິໂຕຣລຽມ, ຜະລິດຕະພັນເຄມີ, ນໍ້າມັນປາມ,ຜະລິດຕະພັນເຄມີ. ສິນຄ້ານໍາເຂົ້າປະເພດ: ອຸປະກອນໄຟຟ້າ ແລະ ເອເລັກໂຕຣນິກ, ເຄື່ອງຈັກອຸດສາຫະກຳ ແລະ ອື່ນໆ. ສ່ວນປະເທດຄູ່ການຄ້າທີ່ສຳຄັນໄດ້ແກ່: ຈີນ, ສິງກະໂປ, ສ.ອາເມລິກາ, ເຂດຮົ່ງກົງ(ຈີນ), ຍີ່ປຸ່ນ, ໄທ, ສ.ເກົາຫລີ ແລະ ເຂດໄຕ້ຫວັນ(ຈີນ) ຕາມລຳດັບ.
ນອກນີ້ ຍັງມີແຫລ່ງທ່ອງທ່ຽວ ທີ່ສຳຄັນຫລາຍແຫ່ງຄື: ອາຄານແຝດເປໂຕຣນັສ(Petronas Twin Tower) ປະກອບດ້ວຍ 88 ຊັ້ນ ແລະ ມີຄວາມສູງທ່ີສຸດ ໃນໂລກເຖິງ 452 ແມັດ; ສະໜາມເມີເດກາ (Merdeka Square), ເປັນທີ່ຕັ້ງ ຂອງ ເສົາທຸງປະຈຳຊາດສູງທີ່ສຸດ ໃນໂລກ ແລະ ວັດມຸດສະລິມ ທ່ີມີ ການປະດັບຕົບແຕ່ງຢ່າງສວຍງາມ ແລະ ແຫ່ງອື່ນໆ.
ປະເທດສປປລາວ ແລະ ປະເທດມາເລເຊຍ ມີສາຍພົວພັນທາງການທູດ ຮ່ວມກັນນັບແຕ່ວັນທີ 1.7.1966 ເປັນຕົ້ນມາ, ຊຶ່ງທັງສອງຝ່າຍ ໄດ້ຕີລາຄາຜົນສຳເລັດ ແຫ່ງການພົວພັນ ຮ່ວມມືລະຫວ່າງ ສອງລັດຖະບານ ກໍ່ຄືປະຊາຊົ ສອງຊາດລາວ-ມາເລເຊຍ, ຊຶ່ງໃນໄລຍະຜ່ານມາສາຍພົວພັນມິດຕະພາບ ແລະ ການຮ່ວມມື ອັນດີງາມລະຫວ່າງ ສອງປະເທດ ແມ່ນໄດ້ຮັບການ ເສີມສ້າງ ແລະ ຂະຫຍາຍຕົວ ຢ່າງຕໍ່ເນື່ອງ ເທິງພື້ນຖານ ຄວາມໄວ້ເນື້ອເຊື່ອໃຈ, ເຄົາລົບເຊິ່ງກັນ ແລະ ກັນ, ຄວາມປາຖະໜາດີ ແລະ ຄວາມເຂົ້າອົກເຂົ້າໃຈ ສະແດງອອກ ໃນການພົວພັນຮ່ວມມືດ້ານການເມືອງ, ການທະຫານ, ເສດຖະກິດ, ວັດທະນະທຳ, ການສຶກສາ ແລະ ກິລາ, ການພົວພັນຢ່າງໃກ້ຊິດ ລະຫວ່າງປະຊາຊົນສອງຊາດ ແລະ ການແລກ ປ່ຽນ ຢ້ຽມຢາມຂອງ ຜູ້ນຳຂັ້ນສູງ ແລະ ບັນດາກະຊວງຂະແໜງການ ຕ່າງໆຂອງສອງປະເທດ. ໂດຍ ສອງຝ່າຍ ຕ່າງກໍ່ສະແດງ ຄວາມມຸ້ງຫວັງທີ່ຈະສືບຕໍ່ເສີມສ້າງ ແລະ ຮັດແໜ້ນການພົວພັນມິດຕະພາບ ອັນດີງາມລະຫວ່າງ ສອງປະເທດ ໃຫ້ນັບມື້ແຕກດອກອອກຜົນ ແລະ ເຕີບໃຫຍ່ຂະຫຍາຍຕົວຍິ່ງຂຶ້ນໃນຕໍ່ໜ້າ ເພື່ອຜົນປະໂຫຍດຮ່ວມກັນຂອງສອງປະເທດ, ເພື່ອສັນຕິພາບ, ສະຖຽນລະພາບ, ມິດຕະພາບ ການຮ່ວມມື ເພື່ອພັດທະນາ ໃນພາກພື້ນ ແລະ ໃນໂລກ.
ໂດຍ: ດາວັນ
KPL
