ຂປລ
ຂປລ. ໃນວັນທີ 13 ພະຈິກ 2024 ນີ້, ທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ ໄດ້ໃຫ້ກຽດຕ້ອນຮັບການເຂົ້າຢ້ຽມພົບປະ ຂອງຄະນະກໍາມະສູນກາງ ແນວລາວ ສ້າງຊາດ ປະຈໍາຢູ່ຕ່າງປະເທດຄື: ປະເທດຝຣັ່ງ, ອາເມລິກາ, ອົດສະຕຣາລີ, ນິວຊີແລນ, ອັງກິດ ແລະ ປະເທດການາດາ ໃນໂອກາດທີ່ນໍາພາພີ່ນ້ອງເຊື້ອຊາດລາວ ທີ່ດໍາລົງຊີວິດຢູ່ຕ່າງປະເທດ
ຂປລ. ໃນວັນທີ 13 ພະຈິກ 2024 ນີ້, ທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ ໄດ້ໃຫ້ກຽດຕ້ອນຮັບການເຂົ້າຢ້ຽມພົບປະ ຂອງຄະນະກໍາມະສູນກາງ ແນວລາວ ສ້າງຊາດ ປະຈໍາຢູ່ຕ່າງປະເທດຄື: ປະເທດຝຣັ່ງ, ອາເມລິກາ, ອົດສະຕຣາລີ, ນິວຊີແລນ, ອັງກິດ ແລະ ປະເທດການາດາ ໃນໂອກາດທີ່ນໍາພາພີ່ນ້ອງເຊື້ອຊາດລາວ ທີ່ດໍາລົງຊີວິດ ຢູ່ຕ່າງປະເທດ ມາເຂົ້າຮ່ວມກອງປະຊຸມ ພົບປະພີ່ນ້ອງເຊື້ອຊາດລາວ ຢູ່ຕ່າງປະເທດ ຄັ້ງປະຖົມມະລືກ ຢູ່ນະຄອນຫລວງວຽງຈັນ ສປປ ລາວ.
ໂອກາດນີ້, ທ່ານ ສິນລະວົງ ຄຸດໄພທູນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ບັນດາກໍາມະການສູນກາງ ແນວລາວສ້າງຊາດ ປະຈໍາຢູ່ຕ່າງປະເທດ ທີ່ໄດ້ເປັນຄັນທຸງ ໃນການເຕົ້າຄວາມສາມັກຄີ ບັນດາພີ່ນ້ອງເຊື້ອລາວ ທີ່ດໍາລົງຊີວິດຢູ່ຕ່າງປະເທດ ໄດ້ປຸກລະດົມ ແລະ ນໍາພາ ເດີນທາງມາເຂົ້າຮ່ວມກອງປະຊຸມໃນຄັ້ງນີ້ ເຊິ່ງກອງປະຊຸມດັ່ງກ່າວ, ສຸດທີ່ມີ ຄວາມໝາຍສໍາຄັນ ແລະ ເປັນຄັ້ງປະຫວັດສາດ ເພື່ອເປັນການເປີດໂອກາດອັນດີ ໃຫ້ພີ່ນ້ອງຄົນເຊື້ອຊາດລາວ ໄດ້ຫວນຄືນກັບມາຢ້ຽມຢາມ ບ້ານເກີດເມືອງນອນ, ໄດ້ພົບປະແລກປ່ຽນ ເຊິ່ງກັນ ແລະ ກັນ, ເປັນການເພີ່ມທະວີ ຮັດແໜ້ນການຮ່ວມມື ຢ່າງແໜ້ນແຟ້ນຫລາຍຂຶ້ນກວ່າເກົ່າ ລະຫວ່າງພີ່ນ້ອງເຊື້ອຊາດລາວ ທີ່ດໍາລົງຊີວິດຢູ່ຕ່າງປະເທດ ກັບປະຊາຊົນລາວ ບັນດາເຜົ່າທີ່ອາໄສ ຢູ່ພາຍໃນປະເທດ ແນໃສ່ສ້າງຄວາມຮັບຮູ້ເຂົ້າໃຈ ຕໍ່ແນວທາງນະໂຍບາຍຂອງພັກ-ລັດ ທີ່ມີຕໍ່ພີ່ນ້ອງຄົນເຊື້ອຊາດລາວ ຢູ່ຕ່າງປະເທດ ແລະ ໃຫ້ພີ່ນ້ອງຄົນເຊື້ອຊາດລາວ ໄດ້ເຂົ້າມາສໍາຜັດຕົວຈິງ ກັບສະພາບການດໍາລົງຊີວິດ ລວມເຖິງການພັດທະນາ ເສດຖະກິດ-ສັງຄົມ ຂອງລາວໃນປັດຈຸ ບັນ.
ພ້ອມກັນນີ້, ທ່ານປະທານສູນກາງແນວລາວສ້າງຊາດ ກໍໄດ້ຍົກໃຫ້ເຫັນມູນເຊື້ອ ຄວາມສາມັກຄີ ເປັນເປັນປຶກແຜ່ນ ຂອງປະຊາຊົນລາວບັນດາເຜົ່າ ບໍ່ວ່າໃນອາດີດ ກໍຄື ປັດຈຸບັນ ແລະ ການພັດທະນາ ເສດຖະກິດ-ສັງຄົມ ຂອງ ສປປ ລາວ ໃຫ້ຄະນະໄດ້ກໍາມະສູນກາງ ແນວລາວສ້າງຊາດ ປະຈໍາຢູ່ຕ່າງປະເທດ ຮັບຊາບຕື່ມອີກ.
ຂ່າວ: ສນຊ
KPL
