ຂປລ. ຄະນະກຳມະການລະດັບຊາດ ປັບປຸງລັດຖະທຳມະນູນ (ຄລຊ) ຈັດກອງປະຊຸມທາບທາມ ຄໍາເຫັນໃສ່ຮ່າງລັດຖະທໍາມະນູນ ສະບັບປັບປຸງ ປີ 2025 ສຳລັບ 3 ແຂວງພາກເໜືອຄື: ແຂວງຫລວງພະບາງ, ອຸດົມໄຊ ແລະ ແຂວງໄຊຍະບູລີ ໃນວັນທີ 23 ມັງກອນ 2025 ຢູ່ແຂວງຫລວງພະບາງ ໂດຍການເປັນປະທານຂອງ ທ່ານ ພູວົງ ອຸ່ນຄຳແສນ ກຳມະການສູນກາງພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ຄະນະກຳມະການລະດັບຊາດ ປັບປຸງລັດຖະທຳມະນູນ,​ ມີ ທ່ານ ຄຳຈັນ ໂສຕາປະເສີດ ກຳມະການຄະນະປະຈຳສະພາແຫ່ງຊາດ, ປະທານກຳມາທິການບັນດາເຜົ່າ, ຄະນະກຳມະການລະດັບຊາດ ປັບປຸງລັດຖະທຳມະນູນ, ມີຄະນະກຳມະການປັບປຸງລັດຖະທຳມະນູນ,​ ເຈົ້າແຂວງ, ຮອງເຈົ້າ ແລະ ພາກສ່ວນກ່ຽວຂ້ອງ 3 ແຂວງເຂົ້າຮ່ວມ.​

       


ທ່ານ ພູວົງ ອຸ່ນຄຳແສນ ໄດ້ໃຫ້ຮູ້ວ່າ: ກອງປະຊຸມຄັ້ງນີ້, ແນໃສ່ປະກອບຄຳເຫັນ ໃສ່ເນື້ອໃນຮ່າງລັດຖະທຳມະນູນ ສະບັບປັບປຸງ ທີ່ຄະນະກຳມະການລະດັບຊາດ ໄດ້ນຳມາທາບທາມຄຳເຫັນ ໃຫ້ມີຄວາມຄົບຖ້ວນ, ຮັດກຸມ ແລະ ສອດຄ່ອງກັບໂຄງການການເມືອງ ສະບັບທີ 3 ແລະ ລາຍງານການເມືອງຕໍ່ກອງປະຊຸມໃຫຍ່ ຄັ້ງທີ XII ຂອງພັກປະຊາຊົນປະຕິວັດລາວ ເຮັດໃຫ້ຮ່າງລັດຖະທຳມະນູນກາຍເປັນສະບັບສົມບູນ; ເປັນການເຊື່ອມຊຶມ ແລະ ສ້າງຄວາມຮັບຮູ້ ເຂົ້າໃຈ ທີ່ຖືກຕ້ອງ ຕໍ່ຮ່າງລັດຖະທຳມະນູນສະບັບປັບປຸງ, ສືບຕໍ່ຍົກສູງສະຕິເຄົາລົບ ແລະ ປະຕິບັດລັດຖະທຳມະນູນໃນທົ່ວສັງຄົມ ໃຫ້ດີກວ່າເກົ່າ, ຮັບປະກັນການຄຸ້ມຄອງລັດ, ຄຸ້ມຄອງສັງຄົມ ດ້ວຍກົດໝາຍໃຫ້ມີປະສິດທິພາບ, ປະສິດທິຜົນ ທັງເປັນການປະກອບສ່ວນ ຍູ້ແຮງຂະບວນການແຂ່ງຂັນ ສ້າງຜົນງານ ຂໍ່ານັບຮັບຕ້ອນການດຳເນີນ ກອງປະຊຸມໃຫຍ່ສາມຂັ້ນ ແລະ ຂ່ຳນັບຮັບຕ້ອນ 3 ວັນປະຫວັດສາດທີ່ສຳຄັນຂອງຊາດ ໃນປີ 2025.

       



ກອງປະຊຸມ, ທ່ານ ຄຳຈັນ ໂສຕາປະເສີດ ໄດ້ອະທິບາຍການປັບປຸງເນື້ອໃນ ຂອງຮ່າງລັດຖະທຳມະນູນ ເຊິ່ງເຫດຜົນ ແລະ ຄວາມຈຳເປັນໃນການ ປັບປຸງລັດຖະທຳມະນູນ ສະບັບປີ 2015 ແນ ໃສ່ການປັບປຸງລະບົບອຳນາດແຫ່ງລັດ ໃຫ້ມີປະສິດທິພາບສູງ, ສ້າງບາດລ້ຽວໃໝ່ໃຫ້ແກ່ ການປົກປັກຮັກສາ ແລະ ສ້າງສາປະເທດຊາດ, ການເຊື່ອມໂຍງເສດຖະກິດພາກພື້ນ ແລະ ສາກົນ ແນໃສ່ສ້າງພື້ນຖານ ທາງດ້ານກົດໝາຍ ກໍຄື ນິຕິກຳທີ່ຈະວາງອອກໃນຕໍ່ໜ້າ ໃຫ້ຮັບປະກັນແນວທາງການເມືອງຂອງພັກ, ການຄຸ້ມຄອງ-ບໍລິຫານລັດໃນໄລຍະໃໝ່; ການປັບປຸງລັດຖະທຳມະນູນຄັ້ງນີ້ ຕົ້ນຕໍແມ່ນສຸມໃສ່ປັບປຸງບາງໝວດ, ບາງມາດຕາ ເພື່ອຮັບປະກັນ ຫລື ຮອງຮັບແນວທາງການເມືອງຂອງພັກ ແລະ ແນວທາງການຈັດຕັ້ງ, ການຄຸ້ມຄອງ-ບໍລິຫານລັດໃນໄລຍະໃໝ່ ກໍຄື ແນວທາງປ່ຽນແປງໃໝ່ໃນຊຸມປີຕໍ່ໜ້າ ໂດຍສະເພາະໃນສະໄໝທີ XII ຂອງພັກ ຫາກບໍ່ແມ່ນການປັບປຸງທັງໝົດເນື້ອໃນ ຂອງລັດຖະທຳມະນູນ. ໝາຍວ່າ ອັນໃດທີ່ເຂົ້າໃຈເປັນເອກະພາບ, ປະຕິບັດມີປະສິດທິຜົນ, ບໍ່ມີຄວາມສັບສົນ ຫລື ເປັນບັນຫາຫຍຸ້ງຍາກໃນການຈັດຕັ້ງປະຕິບັດ ກໍບໍ່ຈຳເປັນຕ້ອງປັບປຸງຕື່ມອີກ; ການປັບປຸງລັດຖະທຳມະນູນ ຕ້ອງມີເນື້ອໃນສອດຄ່ອງກັບບັນດາເນື້ອໃນຂອງໂຄງການການເມືອງຂອງພັກສະບັບທີ 3, ຮ່າງລາຍງານການເມືອງທີ່ຈະສະເໜີຕໍ່ກອງປະຊຸມໃຫຍ່ສະໄໝທີ XII ຂອງພັກ, ມະຕິ 05/ຄບສພ, ມະຕິ 04/ກມສພ ແລະ ຄໍາສັ່ງຂອງຄະນະເລຂາທິການສູນກາງພັກເລກທີ 173/ຄລສພ.
ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ປະກອບຄຳເຫັນຢ່າງມີຈຸດສຸມ ແລະ ເປັນປະໂຫຍດ ເພື່ອໃຫ້ ຄລຊ ນຳຄຳເຫັນໄປຄົ້ນຄວ້າ ແລະ ປັບປຸງຮ່າງລັດຖະທຳມະນູນ ໃຫ້ເປັນສະບັບສົມບູນ ເພື່ອນຳສະເໜີຕໍ່ກອງປະຊຸມ ສະໄໝວິສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ທີ່ຈະເປີດຂຶ້ນໃນທ້າຍ ເດືອນ ມີນາ 2025 ນີ້.

        ສຳລັບ ຮ່າງລັດຖະທຳມະນູນ (ສະບັບປັບປຸງ) ປະກອບດ້ວຍ 14 ໝວດ ແລະ 112 ມາດຕາ. ໃນນັ້ນ, ໄດ້ປັບປຸງ 48 ມາດຕາ, ເພີ່ມໃໝ່ 5 ມາດຕາ ແລະ ຮັກສາເນື້ອໃນໄວ້ຄືເກົ່າ 69 ມາດຕາ.

ຂ່າວ-ພາບ: ຢ່າຕົ້ງ

KPL