ຂປລ. ເມື່ອບໍ່ດົນມານີ້, ທ່ານ ບຸນມີ ວັນມະນີ ໄດ້ເຂົ້າຍື່ນສານຕາຕັ້ງຕໍ່ ທ່ານ ຣາມຈັນດຣາ ປໍເດວ ປະທານາທິບໍດີ ແຫ່ງ ເນປານ ເພື່ອດຳລົງຕຳແໜ່ງ ເປັນເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳ ເນປານ ເຊິ່ງມີສໍານັກງານຕັ້ງ ຢູ່ ນະຄອນຫລວງນິວແດນລີ, ປະເທດອິນເດຍ.

ໃນໂອກາດດັ່ງກ່າວ, ທ່ານ ຣາມຈັນດຣາ ປໍເດວ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ທ່ານ ບຸນມີ ວັນມະນີ ທີ່ໄດ້ຮັບການແຕ່ງຕັ້ງເປັນເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສປປ ລາວ ຄົນໃໝ່ ປະຈຳ ເນປານ ແລະ ເຊື່ອໝັ້ນວ່າ ທ່ານທູດ ຈະຊ່ວຍເຮັດໃຫ້ສາຍພົວພັນມິດຕະພາບ ແລະ ການຮ່ວມມືອັນດີງາມໄດ້ຮັບການສືບຕໍ່ເສີມຂະຫຍາຍຍິ່ງໆຂຶ້ນໃນອະນາຄົດ. ພ້ອມດຽວກັນນັ້ນ, ທ່ານ ກໍໄດ້ຝາກຄວາມຢື້ຢາມຖາມຂ່າວ, ຄວາມຮັກແພງ, ຄໍາອວຍພອນໄຊອັນປະເສີດ ແລະ ມິດຕະພາບການພົວພັນທີ່ດີ ມາຍັງ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ, ລັດຖະບານ ແລະ ປະຊາຊາຊົນລາວ ທຸກທົ່ວໜ້າ.

ທ່ານ ເອກອັກຄະລັດຖະທູດ ກໍໄດ້ສະແດງຄວາມຂອບໃຈ ແລະ ຖືໂອກາດດັ່ງກ່າວ ນຳເອົາຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດ ຈາກ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ເຖິງ ທ່ານ ປະທານາທິບໍດີ ຣາມຈັນທຣາ ປໍແດວ ແລະ ຜ່ານທ່ານ ໄປຍັງລັດຖະບານ ແລະ ປະຊາຊົນ ເນປານ. ນອກຈາກນັ້ນ, ທ່ານ ເອກອັກຄະລັດຖະທູດ ຍັງໄດ້ນໍາເອົາຄໍາເຊື້ອເຊີນຈາກ ທ່ານ ທອງລຸນ ສີສຸລິດ ເຖິງ ທ່ານ ປະທານາທິບໍດີເນປານ ເພື່ອໄປຢ້ຽມຢາມ ສປປ ລາວ ຢ່າງເປັນທາງການໃນໂອກາດທີ່ທ່ານສະດວກ.

ພ້ອມນີ້, ທ່ານ ປະທານາທິບໍດີ ແລະ ທ່ານ ເອກອັກຄະລັດຖະທູດ ໄດ້ພ້ອມກັນຕີລາຄາສູງ ເຖິງການພົວພັນ ອັນດີງາມ ລະຫວ່າງ ສປປ ລາວ ແລະ ເນປານ ແລະ ເຫັນຄວນໃຫ້ມີການຮ່ວມມືກັນໃຫ້ເປັນຮູບປະທຳ ເນື່ອງຈາກສອງປະເທດມີຫລາຍຢ່າງທີ່ຄ້າຍກັນ ເຊິ່ງລວມທັງພູມມີປະເທດ ແລະ ທ່າແຮງໃນການສ້າງເຄື່ອນໄຟຟ້ານໍ້າຕົກ. ໃນຂະນະດຽວກັນ, ທ່ານທູດ ໄດ້ອວຍພອນໄຊໃຫ້ ທ່ານປະທານາທິບໍດີ ຣາມຈັນດຣາ ປໍເດວ ພ້ອມດ້ວຍຄອບຄົວ ມີພາລານາໄມສົມບູນ, ມີຄວາມຜາສຸກ ແລະ ປະສົບຜົນສໍາເລັດໃນໜ້າທີ່ວຽກງານອັນສູງສົ່ງ ຂອງທ່ານ.

ພາຍຫລັງສໍາເລັດການຍື່ນສານຕາຕັ້ງ, ທ່ານ ເອກອັກຄະລັດຖະທູດ ຮ່ວມກັບກົງສູນກິຕິມະສັກລາວ ທີ່ ເນປານ ໄດ້ເຂົ້າໂອ້ລົມກັບຫົວໜ້າກົມອາຊີຕາເວັນອອກສ່ຽງໃຕ້, ກະຊວງການຕ່າງປະເທດ ເນປານ ເພື່ອແນະນຳຕົວ ພ້ອມທັງແລກປ່ຽນຄຳຄິດເຫັນເຖິງການສົ່ງເສີມການພົວພັນ ແລະ ທ່າແຮງໃນການຮ່ວມມືສອງຝ່າຍ ລາວ-ເນປານ ໃນອະນາຄົດ, ຊຸກຍູ້ໃຫ້ມີການລົງນາມໃນສັນຍາ ການຍົກເວັ້ນວິຊາ ສຳລັບ ໜັງສືຜ່ານແດນການທູດ ແລະ ລັດຖະການ ຂອງສອງປະເທດ, ດ້ານສາສະໜາທີ່ເນປານໄດ້ໃຫ້ທີ່ດິນແກ່ ສປປ ລາວ ຢູ່ລູມພີນີ (ບ່ອນປະສູດຂອງພະພຸດທະເຈົ້າ) ເພື່ອສ້າງວັດລາວ ແລະ ຂະແໜງການທ່ອງທ່ຽວທຳມະຊາດ.

KPL