ຂປລ. ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ຈາມ ນິມົນ ລັດຖະມົນຕີ ກະຊວງການຄ້າ ແຫ່ງ ຣາຊະອານາຈັກກຳປູເຈຍ ພ້ອມດ້ວຍຄະນະ ໃນວັນທີ28 ມັງກອນ 2025 ທີ່ສຳນັກງານນາຍົກລັດຖະມົນຕີ ໃນໂອກາດເດີນທາງມາເຂົ້າຮ່ວມ ກອງປະຊຸມ ຄະນະກຳມະການ ຮ່ວມດ້ານການຄ້າ ລະຫວ່າງ ສປປ ລາວ ແລະ ກຳປູເຈຍ ຄັ້ງທີ 2 ຢູ່ນະຄອນຫລວງວຽງຈັນ.

ໃນໂອກາດນີ້, ທ່ານນາຍົກລັດຖະມົນຕີ ກໍໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ທ່ານລັດຖະມົນຕີ ກະຊວງການຄ້າ ແຫ່ງ ຣາຊະອານາຈັກກຳປູເຈຍ ແລະ ຄະນະ ທີ່ໄດ້ເດີນທາງມາເຂົ້າຮ່ວມກອງປະຊຸມ ຢູ່ ສປປ ລາວ ໃນຄັ້ງນີ້, ເຊິ່ງເປັນການຜັນຂະຫຍາຍເນື້ອໃນ ການຕົກລົງຂອງການນຳສອງຝ່າຍ ໂດຍສະເພາະໃນໄລຍະ ທີ່ທ່ານນາຍົກລັດຖະມົນຕີ ໄດ້ເປັນຢ້ຽມຢາມ ຣາຊະອານາຈັກກຳປູເຈຍ ໃນເດືອນທັນວາ 2024 ຜ່ານມາ ທັງເປັນການປະກອບສ່ວນສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີອັນເປັນມູນເຊື້ອ ທີ່ມາແຕ່ດົນນານ ແລະ ການເປັນຄູ່ຮ່ວມຍຸດທະສາດຮອບດ້ານ ແລະ ໝັ້ນຄົງຍາວນານ ລະຫວ່າງ ສປປ ລາວ ແລະ ຣາຊະອານາຈັກກຳປູເຈຍ ເວົ້າລວມ, ເວົ້າສະເພາະ ລະຫວ່າງ ກະຊວງການຄ້າ ຂອງ ສປປ ລາວ ແລະ ກະຊວງການຄ້າ ແຫ່ງ ຣາຊະອານາຈັກກຳປູເຈຍ ໃຫ້ມີຄວາມແໜ້ນແຟ້ນຍິ່ງໆຂຶ້ນ ພ້ອມທັງໄດ້ສະແດງຄວາມຊົມເຊີຍ ຕໍ່ບັນດາຜົນສໍາເລັດອັນໃຫຍ່ຫລວງຂອງລັດຖະບານ ແລະ ປະຊາຊົນກຳປູເຈຍ ທີ່ຍາດມາໄດ້ໃນຊຸມປີຜ່ານມາ; ໄດ້ຕີລາຄາສູງ ຕໍ່ການພົວພັນຮ່ວມມື ຂອງສອງປະເທດ ໃນໄລຍະຜ່ານມາ ຊຶ່ງການນຳຂັ້ນຕ່າງໆ ໄດ້ມີການແລກປ່ຽນການຢ້ຽມຢາມ ເຊິ່ງກັນ ແລະ ກັນ ຢ່າງເປັນປົກກະຕິ; ຕີລາຄາສູງ ແລະ ສະແດງຄວາມຊົມເຊີຍຕໍ່ ສອງກະຊວງການຄ້າລາວ ແລະ ກຳປູເຈຍ ທີ່ໄດ້ຈັດກອງປະຊຸມດັ່ງກ່າວນີ້ຂຶ້ນ ເພື່ອຄວາມເປັນເອກະພາບ ໃນການຜັນຂະຫຍາຍ ຜົນຂອງການພົບປະລະຫວ່າງສອງນາຍົກລັດຖະມົນຕີລາວ-ກຳປູເຈຍ ໃຫ້ໄດ້ຮັບໝາກຜົນ ເປັນຮູບປະທຳຕົວຈິງ ພ້ອມນີ້, ໄດ້ສະເໜີໃຫ້ສອງຝ່າຍເພີ່ມທະວີການພົວພັນ ທາງດ້ານເສດຖະກິດ-ການຄ້າ ໃຫ້ສົມຄູ່ກັບການພົວພັນ ຮ່ວມມືທາງດ້ານການເມືອງ, ການຕ່າງປະເທດ ລວມທັງການຮ່ວມມື ຂອງສອງກະຊວງການຄ້າລາວ ແລະ ກຳປູເຈຍ ໂດຍຈະໄດ້ເພີ່ມທະວີການເຊື່ອມໂຍງເຊື່ອມຈອດ ກໍຄື ການຂົນສົ່ງ, ການຄ້າຜ່ານແດນ; ໄດ້ສະເໜີໃຫ້ຝ່າຍກຳປູເຈຍ ຊຸກຍູ້ບັນດານັກທຸລະກິດ ກຳປູເຈຍ ເຂົ້າມາລົງທຶນຢູ່ ສປປ ລາວ ໃນຂົງເຂດທີ່ ສປປ ລາວ ມີທ່າແຮງ  ລວມທັງເຂດການຄ້າຊາຍແດນ, ເຂດເສດຖະກິດພິເສດ. ພ້ອມກັນນີ້, ຍັງໄດ້ຝາກຄວາມຢ້ຽມຢາມຖາມຂ່າວ ໄປຍັງທ່ານ ນາຍົກລັດຖະມົນຕີ ແຫ່ງຣາຊະອານາຈັກກຳປູເຈຍ ຕື່ມອີກ.

ໃນໂອກາດດຽວກັນ, ທ່ານລັດຖະມົນຕີກະຊວງການຄ້າ ແຫ່ງຣາຊະອານາຈັກກຳປູເຈຍ ກໍໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານນາຍົກລັດຖະມົນຕີ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ ໃນຄັ້ງນີ້ ແລະ ແຈ້ງໃຫ້ຊາບ ກ່ຽວກັບຜົນຂອງກອງປະຊຸມ ຄະນະກຳມະການຮ່ວມດ້ານການຄ້າ ລາວ-ກຳປູເຈຍ ຄັ້ງທີ 2,​ ພ້ອມທັງຈະສືບຕໍ່ຮ່ວມມືກັບ ກະຊວງອຸດສາຫະກໍາ ແລະ ການຄ້າ ແລະ ພາກສ່ວນກ່ຽວຂ້ອງຂອງ ສປປ ລາວ ເພື່ອເພີ່ມມູນຄ່າການຄ້າຂອງສອງປະເທດ ໃຫ້ຫລາຍຂຶ້ນກວ່າເກົ່າ.

KPL