ຂປລ. ກອງປະຊຸມຄະນະກຳມາທິການຮ່ວມ ວ່າດ້ວຍການຮ່ວມມືສອງຝ່າຍ ດ້ານການຄ້າເສດຖະກິດ ວິທະຍາສາດ ແລະ ເຕັກນິກ ລະຫວ່າງ ສປປ ລາວ ແລະ ມົງໂກລີ (JC) ຄັ້ງທີ 12 ຈັດຂຶ້ນໃນວັນທີ 27 ມັງກອນ 2025 ຜ່ານມາ ທີ່ນະຄອນຫລວງວຽງຈັນ ໂດຍການເປັນປະທານຮ່ວມຂອງ ທ່ານ ບຸນແຝງ ພູມມະໄລສິດ ລັດຖະມົນຕີກະຊວງ ສາທາລະນະສຸກ, ທ່ານ ເດລເກຣ໌ໄຊຄານ ບໍຣ໌ຄູ ລັດຖະມົນຕີກະຊວງຖະໜົນ ແລະ ການຂົນສົ່ງ ແຫ່ງ ມົງໂກລີ ພ້ອມດ້ວຍຄະນະຜູ້ແທນ ຂອງສອງຝ່າຍ ເຂົ້າຮ່ວມ.

ກອງປະຊຸມໃນຄັ້ງນີ້, ຖືເປັນກົນໄກການຮ່ວມມືໜຶ່ງທີ່ສໍາຄັນ ເພື່ອສືບຕໍ່ທົບທວນຄືນ ການພົວພັນຮ່ວມມື ສອງຝ່າຍ ລາວ-ມົງໂກລີ ໃນໄລຍະຜ່ານມາ ໂດຍສະເພາະ ການຈັດຕັ້ງຜັນຂະຫຍາຍ ບັນດາຂໍ້ຕົກລົງເຫັນດີ ຂອງການນຳຂັ້ນສູງສອງປະເທດ ໃຫ້ເປັນຮູບປະທຳຍິ່ງຂຶ້ນ ເຊິ່ງສອງຝ່າຍ ໄດ້ເຫັນດີເປັນເອກະພາບກັນ ຕີລາຄາສູງຕໍ່ການຈັດຕັ້ງຜັນຂະຫຍາຍຜົນຂອງກອງປະຊຸມ JC ລາວ-ມົງໂກລີ ຄັ້ງທີ 11 ຜ່ານມາ ບົນພື້ນຖານສາຍພົວພັນມິດຕະພາບ ອັນເປັນມູນເຊື້ອ ແລະ ການຮ່ວມມືອັນດີງາມ ລະຫວ່າງ ສປປ ລາວ-ມົງໂກລີ ທີ່ສືບຕໍ່ນັບມື້ໄດ້ຮັບ ການພັດທະນາຂຶ້ນຢ່າງຕໍ່ເນື່ອງ,  ສະແດງອອກໃນການພົບປະແລກປ່ຽນ ການຢ້ຽມຢາມເຊິ່ງກັນ ແລະ ກັນ ຂອງບັນດາການນຳຂັ້ນສູງສອງປະເທດ ຢ່າງເປັນປົກກະຕິ ໃນໄລຍະຜ່ານມາ ໂດຍສະເພາະ ການຢ້ຽມຢາມລັດຖະກິດຢູ່ ສປປ ລາວ ຂອງທ່ານ ຄູເຣລສຸກຄ໌ ໂອຄະນາ ປະທານາທິບໍດີ ແຫ່ງ ມົງໂກລີ ໃນປີ 2023 ແລະ ການຢ້ຽມຢາມລັດຖະກິດທີ່ ມົງໂກລີ ຂອງ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໃນປີ 2024 ທີ່ຜ່ານມາ, ສອງຝ່າຍ ໄດ້ສະແດງຄວາມຊົມເຊີຍ ຕໍ່ການຮ່ວມມື ໃນບັນດາຂະແໜງການຕ່າງໆ ເປັນຕົ້ນ ດ້ານການເມືອງ-ຄວາມໝັ້ນຄົງເສດຖະກິດ-ການຄ້າ, ການລົງທຶນ, ກະສິກຳ, ການສຶກສາ, ວັດທະນະທຳ, ສາທາລະນະສຸກ, ໂຍທາທິການ-ຂົນສົ່ງ ແລະ ອື່ນໆ.

ໃນຕໍ່ໜ້າ ສອງຝ່າຍ ເຫັນດີຈະສືບຕໍ່ຊຸກຍູ້ສົ່ງເສີມການຮ່ວມມື ດ້ານເສດຖະກິດ-ການຄ້າ ແລະ ການລົງທຶນສອງຝ່າຍ ໃຫ້ຫລາຍຂຶ້ນ ໂດຍໄດ້ມອບໃຫ້ສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ມົງໂກລີ ສືບຕໍ່ໃນການປະສານສົມທົບກັນຢ່າງໃກ້ຊິດ ເພື່ອຊຸກຍູ້ໃຫ້ບັນດາບໍລິສັດເອກະຊົນ ຂອງແຕ່ລະປະເທດ ໃຫ້ມີການພົວພັນຮ່ວມມືກັນ ໃຫ້ດີກວ່າເກົ່າ, ເຫັນດີສືບຕໍ່ການຮ່ວມມື ໃນຂະແໜງກະສິກຳໃຫ້ຫລາຍຂຶ້ນ ໃນນັ້ນ, ຝ່າຍມົງໂກລີ ເຫັນດີຈະຊຸກຍູ້ຂົນຂວາຍບັນດານັກທຸລະກິດມົງໂກລີ ເຂົ້າມາລົງທຶນ ໃນຂະແໜງການລ້ຽງສັດຢູ່ ສປປ ລາວ ແນໃສ່ຍົກລະດັບດ້ານເຕັກນິກ ແລະ ການປຸງແຕ່ງຜະລິດຕະພັນຈາກແກະ (ຊີ້ນ ແລະ ຂົນແກະ). ພ້ອມນີ້, ສອງຝ່າຍ ຍັງໄດ້ປຶກສາຫາລື ເພື່ອຊອກຫາຊ່ອງທາງຄວາມເປັນໄປໄດ້ໃນການຂົນສົ່ງສິນຄ້າ ໂດຍສະເພາະ ສິນຄ້າກະສິກຳ ໂດຍນຳໃຊ້ເສັ້ນທາງລົດໄຟ ລາວ-ຈີນ ຈາກມົງໂກລີ ມາ ສປປ ລາວ ແລະ ຈາກ ລາວ ໄປ ມົງໂກລີ ລວມທັງການໃຫ້ບໍລິການ ຄົມມະນາຄົມຂົນສົ່ງ ທາງອາກາດ ເປັນຕົ້ນ ການເປີດຖ້ຽວບິນໂດຍກົງ ລະຫວ່າງປະເທດ ລາວ-ມົງໂກລີ ເຊິ່ງຈະສ້າງເງື່ອນໄຂອຳນວຍຄວາມສະດວກ ແກ່ການໄປມາຫາສູ່ກັນ ຂອງປະຊາຊົນດ້ວຍກັນ ກໍຄື ບັນດານັກທຸລະກິດ ແລະ ນັກທ່ອງທ່ຽວ ທັງນີ້ກໍເພື່ອປະກອບສ່ວນຊຸກຍູ້ ໃຫ້ຕົວເລກການຄ້າ ລະຫວ່າງສອງປະເທດ ລາວ-ມົງໂກລີ ໃຫ້ນັບມື້ເພີ່ມສູງຂຶ້ນ. ພ້ອມນັ້ນ, ສອງຝ່າຍ ຍັງໄດ້ສະແດງຄວາມຍິນດີຈະສືບຕໍ່ໃຫ້ການຮ່ວມມື ສະໜັບສະໜູນ ແລະ ຊ່ວຍເຫລືອເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ໂດຍສະເພາະ ການຮ່ວມມືຂອບ ອາຊຽນ ແລະ ໃນກຸ່ມປະເທດກໍາລັງພັດທະນາ ທີ່ບໍ່ມີຊາຍແດນຕິດກັບທະເລ ແລະ ອື່ນໆ.

ພາຍຫລັງສຳເລັດກອງປະຊຸມ ສອງຝ່າຍ ກໍໄດ້ຮ່ວມກັນລົງນາມເອກະສານ ເພື່ອຮັບຮອງເອົາບົດບັນທຶກ ກອງປະຊຸມຄະນະກໍາມາທິການຮ່ວມ ວ່າດ້ວຍ ການຮ່ວມມືສອງຝ່າຍ ລາວ-ມົງໂກລີ ຄັ້ງທີ 12 ເຊິ່ງຖືເປັນພື້ນຖານອັນໜັກແໜ້ນ ໃນການຊີ້ທິດເຍືອງທາງ ເພື່ອເສີມຂະຫຍາຍການຮ່ວມມື ສອງຝ່າຍໃນຊຸມປີຕໍ່ໜ້າ ໂດຍສະເພາະ ການຈັດຕັ້ງປະຕິບັດບົດ ບັນທຶກກອງປະຊຸມຄັ້ງນີ້ ໃຫ້ໄດ້ຮັບໝາກຜົນທີ່ເປັນຮູບປະທຳ ແລະ ນຳມາເຊິ່ງຜົນປະໂຫຍດ ທີ່ແທ້ຈິງແກ່ປະຊາຊົນ ລາວ ແລະ ມົງໂກລີ.

         
ສຳລັບ ກອງປະຊຸມຄະນະກຳມາທິການຮ່ວມ ວ່າດ້ວຍ ການຮ່ວມມືສອງຝ່າຍ ລາວ ແລະ ມົງໂກລີ ຄັ້ງທີ 13 ມົງໂກລີ ຈະສືບຕໍ່ເປັນປະທານ ຈັດຂຶ້ນ ໃນປີ 2027 ທີ່ປະເທດມົງໂກລີ.

KPL