ຂປລ
ຂປລ. ພິທີວາງສີລາລືກ ໂຄງການບູລະນະສ້ອມແປງ ໂຮງໝໍມິດຕະພາບ (ຕຶກເກົ່າ) ພາຍໃຕ້ການຊ່ວຍເຫລືອຈາກ ສະຫະພັນຣັດເຊຍ ໂດຍຜ່ານ ຫ້ອງການປະສານງານໂຄງການຂອງ ສະຫະປະຊາຊາດ (UNOPS) ຈັດຂຶ້ນໃນວັນທີ 28 ມັງກອນ 2025 ຜ່ານມານີ້ ໂດຍມີ ທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ, ມີທູດຣັດເຊຍ ປະຈໍາ ລາວ, ຜູ້ອໍານວຍການໂຮງໝໍມິດຕະພາບ, ຜູ້ປະສານງານອົງການສະຫະປະຊາຊາດ ປະຈໍາ ລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ຂປລ. ພິທີວາງສີລາລືກ ໂຄງການບູລະນະສ້ອມແປງ ໂຮງໝໍມິດຕະພາບ (ຕຶກເກົ່າ) ພາຍໃຕ້ການຊ່ວຍເຫລືອຈາກ ສະຫະພັນຣັດເຊຍ ໂດຍຜ່ານ ຫ້ອງການປະສານງານໂຄງການຂອງ ສະຫະປະຊາຊາດ (UNOPS) ຈັດຂຶ້ນໃນວັນທີ 28 ມັງກອນ 2025 ຜ່ານມານີ້ ໂດຍມີ ທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ, ມີທູດຣັດເຊຍ ປະຈໍາ ລາວ, ຜູ້ອໍານວຍການໂຮງໝໍມິດຕະພາບ, ຜູ້ປະສານງານອົງການສະຫະປະຊາຊາດ ປະຈໍາ ລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ໂຄງການບູລະນະສ້ອມແປງໂຮງໝໍມິດຕະພາບ ສະຫະພັນຣັດເຊຍ ໄດ້ຈັດສັນງົບ 12,9 ລ້ານໂດລາສະຫະລັດ ໃຫ້ອົງການ UNOPS ໂດຍແຈ້ງຜ່ານກະຊວງການຕ່າງປະເທດ ມາຍັງກະຊວງສາທາລະນະສຸກ ເຖິງໂຮງໝໍມິດຕະພາບ ໂດຍມີຈຸດປະສົງ ໃນການປັບປຸງປົວແປງ ໂຮງໝໍມິດຕະພາບ ລາວ-ໂຊຫວຽດ ເຊິ່ງເປັນສັນຍາລັກ ຂອງສາຍພົວພັນຮ່ວມມື ລະຫວ່າງ ສອງພັກ-ສອງລັດ ກໍຄື ສະຫະພັນຣັດເຊຍ ແລະ ສປປ ລາວ ທີ່ໄດ້ເປີດນຳໃຊ້ມາແຕ່ປີ 1988 ຮອດປັດຈຸບັນ ກໍເປັນເວລາ 37 ປີ ເຊິ່ງເຫັນວ່າບາງຈຸດ, ບາງພາກສ່ວນ ກໍມີສະພາບເກົ່າແກ່ຊຸດໂຊມ, ເປ່ເພຫລາຍສົມຄວນ ຈຶ່ງຈຳເປັນຕ້ອງໄດ້ບູລະນະຄືນໃໝ່ໃຫ້ຈົບງາມ ແລະ ມີໃບໜ້າໃໝ່. ພ້ອມນັ້ນ, ຍັງສະແດງໃຫ້ເຫັນເຖິງ ສາຍພົວພັນອັນດີງາມ ໄມຕີຈິດ ມິດຕະພາບ ລະຫວ່າງ ປະຊາຊົນ ກໍຄື ລັດຖະບານສະຫະພັນຣັດເຊຍ ແລະ ສປປ ລາວ ອີກດ້ວຍ.
ການບູລະນະສ້ອມແປງໂຮງໝໍມິດຕະພາບ ໃນຄັ້ງນີ້, ຈະໄດ້ສ້ອມແປງອາຄານຕຶກເກົ່າ, ສ້ອມແປງຫໍພັກພະນັກງານ, ກໍ່ສ້າງລະບົບຫ້ອງນ້ຳໃໝ່, ປັບປຸງລະບົບນ້ຳ ລວມມີ ອ່າງເກັບນ້ຳ, ລະບົບທໍ່ສົ່ງ, ລະບົບປ້ຳ ແລະ ອື່ນໆ.
ປັດຈຸບັນ ໂຮງໝໍມິດຕະພາບແມ່ນເປັນ 1 ໃນ 5 ຫົວໜ່ວຍງົບປະມານ ທີ່ລັດຖະບານ ມອບໃຫ້ຈັດຕັ້ງປະຕິບັດການເຮັດທົດລອງ ຫັນຫົວໜ່ວຍກຸ້ມຕົນເອງດ້ານງົບປະມານ ເຊິ່ງການບູລະນະສ້ອມແປງ ໂຮງໝໍມິດຕະພາບຕຶກເກົ່າ ແມ່ນຈະເປັນທ່າແຮງ ໃຫ້ທາງໂຮງໝໍຢ່າງຫລວງຫລາຍ ແລະ ເຮັດໃຫ້ປະຊາຊົນ ທີ່ມາໃຊ້ບໍລິການໃນໂຮງໝໍ ມີຄວາມສະດວກສະບາຍຫລາຍຂຶ້ນ ເຊິ່ງສອດຄ່ອງກັບນະໂຍບາຍ 5 ດີ 1 ພໍໃຈ ທີ່ກະຊວງສາທາລະນະສຸກໄດ້ວາງອອກ.
ຂໍ້ມູນ-ພາບ: ບຸນຕອມ
KPL
