*ພາກອຸດສາຫະກໍາທ່ອງທ່ຽວມາເລເຊຍ ປີ 2025 ຫາປີ 2026 ຄາດວ່າຈະເປັນປີດີທີ່ສຸດ ແລະ ຖືກທີ່ສຸດ ທີ່ຄົນລາວຄວນຂຶ້ນແຜນໄວ້ເພາະມີຫລາຍກິດຈະກໍາທີ່ໜ້າສົນໃຈຈັດສັນໄວ້ ເພື່ອສ້າງປະສົບການທ່ີບໍ່ມີວັນລືມຂອງທ່ານ. ທັງໝົດນ້ີໄດ້ຮັບການເປີດເຜີຍ ໃນງານເປີດປີການທ່ອງທ່ຽວມາເລເຊຍ ຫລື Visit Malaysia 2026 ຢູ່ລັດຈໍຮໍປະເທດ ມາເລເຊຍ ໃນວັນເສົາ 18 ມັງກອນ 2025 ທີ່ຜ່ານມາ. ຈຸດເດັ່ນຂອງການທ່ອງທ່ຽວມາເລເຊຍ 2026 ຍັງຄົງຮັກສາໄວ້ ຄໍາຂວັນຂອງການທ່ອງທ່ຽວ ມາເລເຊຍ ໃນຫລາຍໆປີຜ່ານມາ, ໂດຍທາງມາເລເຊຍ ເຄີຍມີຄວາມພະຍາຍາມ ໃນການປ່ຽນຊື່ມາຫລາຍຮອບ ແຕ່ກໍ່ຍັງບໍ່ມີຄໍາໃດທີ່ເໝາະສົມ ເທົ່າກັບ Malaysia, Truly Asia ຊຶ່ງເປັນຄໍາຂວັນທີ່ສະແດງ ໃຫ້ເຫັນການປະສົມປະສານຄວາມເປັນອາຊີຢ່າງແທ້ຈິງ. ສ່ວນສິ່ງທີ່ຈະແຕກຕ່າງ ຈາກການໂປຣໂມດການທ່ອງທ່ຽວ ທີ່ຜ່ານມາແມ່ນການສຸມໃສການທ່ອງທ່ຽວ ທີ່ມີຄວາມຍືນຍົງ ແລະ ວັດທະນາທໍາທີ່ຫລາກຫລາຍ. ວາງຍຸດທະສາດການທ່ອງທ່ຽວເພື່ອໃຫ້ນັກທ່ອງທ່ຽວໃຊ້ເວລາທ່ອງທ່ຽວຢູ່ມາເລເຊຍ ໃຫ້ໄດ້ຫລາຍມື້ຂຶ້ນຕື່ມ, ເນັ້ນດຶງດູດນັກທ່ອງທ່ຽວຄຸນນະພາບ, ແລະ ໃຫ້ທຸກລັດໃນມາເລເຊຍ ມີສ່ວນຮ່ວມໃນການຕ້ອນຮັບນັກທ່ອງທ່ຽວ.

      ຄາດການໄວ້ວ່າ ໃນປີ 2026,  ຈະໃຫ້ສາມາດດຶງດູດນັກທ່ອງທ່ຽວໃຫ້ໄດ້ຫລາຍກ່ວາ 35.6 ລ້ານຄົນ ຂອງນັກທ່ອງທ່ຽວຕ່າງປະເທດ, ສ້າງລາຍຮັບໃຫ້ປະເທດ ປະມານ 36 ຕື້ ໂດລາສະຫະລັດ. ລັດຖະບານມາເລເຊຍ ຍັງໄດ້ສຸມໃສ່ການພັດທະນາພື້ນຖານໂຄງລ່າງພື້ນຖານ ແລະ ການໂຄສະນາການທ່ອງທ່ຽວ ໃນຫລາຍຮູບແບບ. ມີສາຍການບິນ ທີ່ບິນກົງມາມາເລເຊຍຫລາຍກ່ວາ 3,100 ຖ້ຽວ, ຈຶ່ງເຮັດໃຫ້ມາເລເຊຍ ຢູ່ໃນຈຸດຍຸດທະສາດຂອງການທ່ອງທ່ຽວຂອງຄົນຈາກທົ່ວໂລກ. ຈຸດໝາຍປາຍທາງການທ່ອງທ່ຽວທ່ີສໍາຄັນຂອງມາເລເຊຍປະກອບມີ: ກົວລາລໍາເປີ, ປີນັງ, ມາລັກກາ, ສະລາວັກ, ລັງກາວີ, ເຊັລັງງໍ, ຈໍຮໍ, ຊາບາ, ໂຄທາບາລູ ແລະ ອື່ນໆ.

     ປັດຈຸບັນຄົນລາວສາມາດເດີນທາງມາທ່ຽວປະເທດມາເລເຊຍ ໄດ້ຢ່າງສະດວກສະບາຍ, ບໍ່ວ່າຈະເປັນການເດີນທາງໂດຍການບິນກົງນໍາສາຍການບິນ ແອເອເຊຍ ຈາກນະຄອນຫລວງວຽງຈັນ ຫາ  ກົວລາລໍາເປີ ໄດ້ທຸກໆວັນຈັນ ແລະ ວັນສຸກ. ລາຄາເລີ່ມຕົ້ນພຽງ 67 ໂດລາສະຫະລັດເທົ່ານັ້ນ. ນອກຈາກນີ້ ທ່ານຍັງສາມາດບິນນໍາ ແອເອເຊຍ ຜ່ານໄທໄປລົງມາເລເຊຍ ໄດ້ໃນທຸກໆມື້ເຊັ່ນກັນ. ສ່ວນແພັກເກດການໄປທົວມາເລເຊຍ ແມ່ນມີຫລາຍຮູບແບບ ໂດຍທ່ານສາມາດໄປທ່ຽວ ມາເລເຊຍ ໄດ້ໃນລາຄາເລີ່ມຕົ້ນພຽງ 9 ລ້ານກວ່າກີບ ລວມປີ້ຍົນໄປກັບອາຫານ ທີ່ພັກຈໍານວນ 4 ວັນ 3 ຄືນ !

ໂດຍ: ເກີດຂວັນໃຈ ມາລີຈັນສີ

KPL