*ເພາະ “ນ້ຳ (Water)” ເປັນອົງປະກອບທີ່ສຳຄັນຂອງທຸກໆຈຸລັງໃນຮ່າງກາຍຄົນເຮົາ, ໃນຮ່າງກາຍຄົນເຮົາມີນ້ຳປະມານ 60-70 ເປີເຊັນ ນ້ຳກະຈາຍຢູ່ໃນທຸກໆອະໄວຍະວະຕ່າງໆໃນຮ່າງກາຍນັບຕັ້ງແຕ່ສະໝອງ, ຕາ, ຫົວໃຈ, ປອດ, ໄຂ່ຫລັງ, ຕັບ, ກະດູກ, ກ້າມຊີ້ນ, ຜິວໜັງລວມໄປ ເຖິງໃນລະບົບໝູນວຽນເລືອດທ່ີປະກອບໄປດ້ວຍເລືອດ ແລະ ເສັ້ນເລືອດທີ່ມີນ້ຳເປັນສ່ວນປະກອບຫລາຍກວ່າ 90 ເປີເຊັນ. ດັ່ງນັ້ນ, “ນ້ຳ” ຈຶ່ງເປັນສ່ວນໜຶ່ງຂອງຊີວິດຄົນເຮົາທີ່ຂາດບໍ່ໄດ້ຢ່າງແທ້ຈິງ ເພາະມີຄວາມສຳຄັນຕໍ່ທຸກໆລະບົບໃນ ຮ່າງກາຍຊ່ວຍໃນການເຮັດວຽກລະດັບຈຸລັງໃນທຸກໆປະຕິກິລິຍາຊີວະເຄມີຂອງຮ່າງກາຍ.

     ການດືມນ້ໍາໃນທຸກໆມ້ື ຈ່ຶງເປັນສິ່ງທີ່ມະນຸດເຮົາຈະຂາດໄປ ບໍ່ໄດ້ເພາະເມື່ອໃດທີ່ເຮົາຂາດນ້ຳ ຫລື ແມ້ແຕ່ການໄດ້ຮັບບໍ່ພຽງພໍຍ່ອມສົ່ງຜົນກະທົບຕໍ່ສຸຂະພາບ ແລະ ການດຳລົງຢູ່ຂອງຊີວິດຢ່າງແນ່ນອນ ສະນັ່ນ, ຄົນເຮົາຄວນດື່ມນ້ຳມື້ລະເທົ່າໃດ? ເປັນຄຳຖາມທີ່ຫລາຍຄົນສົງໄສ ແລະ ຫາຄຳຕອບກັນມາຕະຫລອດຈາກຂໍ້ສະຫລຸບຂອງໜ່ວຍງານດ້ານສຸຂະພາບທົ່ວໂລກຕ່າງກໍ່ລົງຄວາມເຫັນເປັນສຽງດຽວກັນວ່າ ບໍ່ມີໂຕເລກຂອງປະລິມານທີ່ຕາຍໂຕນັ້ນເປັນຍ້ອນປະລິມານຂອງການໄດ້ຮັບນ້ຳຈະແຕກຕ່າງກັນອອກໄປຕາມອາຍຸ, ເພດ, ຂະໜາດຂອງຮ່າງກາຍ, ບັນຫາສຸຂະພາບທີ່ເປັນຢູ່, ສິ່ງແວດລ້ອມຮອບໂຕ ແລະ ກິດຈະກຳທີ່ເຮົາເຮັດໃນລະຫວ່າງມື້. ຢ່າງໃດກໍ່ຕາມມີໂຕເລກໂດຍປະມານວ່າໃນໄວຜູ້ໃຫຍ່ນັ້ນຄວນໄດ້ຮັບນ້ຳປະມານມື້ລະ 2-3 ລິດ (ຜູ້ຊາຍປະມານ 3 ລິດ ແລະ ຜູ້ຍິງ ປະມານ 2.2 ລິດ/ມື້) ຫລື ທີ່ເຮົາ ລຶ້ງຫູກັນດີວ່າເຮົາຄວນດື່ມນ້ຳມ້ືລະປະມານ 8 ຈອກ/ມື້ນັ້ນເອງ.

      ຈາກຂໍ້ມູນການສຳຫລວດໃນຫລາຍໆງານວິໄຈປັດຈຸບັນກັບພົບວ່າ ປະມານ 16-28% ມັກ ຈະດື່ມນ້ຳໃນແຕ່ລະມື້ບໍ່ພຽງພໍກັບປະລິມານທີ່ກ່າວມາຂ້າງເທິງ ເຊິ່ງແນ່ນອນວ່າ ການທີ່ໄດ້ຮັບນ້ຳບໍ່ພຽງພໍນີ້ຍ່ອມສົ່ງຜົນຕໍ່ສຸຂະພາບໃນຫລາຍດ້ານຕາມມາເຊັ່ນ: ມີຜົນຕ່ໍການເຮັດວຽກຂອງລະບົບປະສາດ ແລະ ສະໝອງ, ຫົວໃຈ ແລະ ການໄຫລວຽນເລືອດ, ການເຮັດວຽກຂອງໄຂ່ຫລັງ, ລະບົບເຜົາຜານ, ລະບົບການຍ່ອຍ ແລະ ການຂັບຖ່າຍລວມໄປເຖິງຜິວພັນອີກດ້ວຍ. 

   ໂດຍ: ມາລີດາ

KPL