*ເມື່ອ​ເວົ້າ​ເຖິງ​ເຂົ້າ​ປຸ້ນແຈ່ວ​ຂີງ ຖື​ວ່າ​ເປັນ​ອາຫານ​ເຍື່ອງໜຶ່ງທີ່ສັງຄົມນິຍົມບໍລິໂພກ ແລະ ເວົ້າເຖິງຫລາຍໃນປັດຈຸບັນ ເປັນອາຫານທີ່​ຖືກ​ປາກ ຖືກ​ໃຈ​ຫລາຍໆ​ຄົນ ບໍ່ວ່າຈະເປັນໄວກາງຄົນ, ໄວໜຸ່ມຍິງ-ສາວ, ຍິງ-ຊາຍ ​ ຈະ​ມັກ​ກິນ​ຫລາຍດ້ວຍ​ລົດ​ຊາດ​ທີ່​​ແຊບ​ຊ້ອຍ ຈາກການປຸງ​​ດ້ວຍ​ນໍ້າປາ​ແດກແຊບ​ນົວ,​ແຈ່ວ​ຂີງ ​ແລະ ​ເຄື່ອງຄຽງອື່ນໆ ບອກ​ເລີຍ​ວ່າ​ເຂົ້າກັນ​ແບບ​ສຸດໆ ບໍ່​ພໍ​ເທົ່າ​ນີ້ ຍັງ​ມີ​ເມ​ນູ​ເພີ່ມ​ຄວາມ​ແຊບ​ ຄື ປີ້ງ​ປາ, ປີ້ງ​ໄກ່,ລວກຍໍ່, ລວກຊີີ້ນ ​ແລະ ອື່ນໆອີກ. ປັດຈຸ ບັນທຸລະ​ກິດຮ້ານອາຫານ ​ເຂົ້າປຸ້ນ​ແຈ່ວ​ຂີງ ​ແມ່ນ​ມີ​ຫລາຍຮ້ານພໍສົມຄວນ ​ແລະ ​ແຕ່ລະ​ຮ້ານ​ກໍ​ຈະ​ມີຄວາມ​ແຊບທີ່ເປັນ​ເອກະລັກຂອງໃຜລາວ​ ສາມາດມັດ​ໃຈ​ລູກ​ຄ້າ​ໄດ້ ​ແລະ ​ໃນ​ຫລາຍໆຮ້ານ​ທີ່​ເວົ້າ​ມາ​ນີ້ ໜຶ່ງໃນນັ້ນກໍແມ່ນຮ້ານ​ບ້ານ​ເຂົ້າປຸ້ນ​ແຈ່ວ​ຂີງ ຈາກ​ບ້ານທ່າ​ເດື່ອ, ເມືອງຫາດ​ຊາຍ​ຟອງ, ນະຄອນຫລວງວຽງຈັນ ກໍ​ເປັນ​ອີກ​ຮ້ານໜຶ່ງທີ່​ສາມາດມັດ​ໃຈ​ລູກ​ຄ້າ​ໄດ້ ​ເຊິ່ງ​ທາງ​ຮ້ານ​ຈະ​ມີ​ສູດ​ມັດ​ໃຈ​ລູກ​ຄ້າ​ແນວ​ໃດ​ນັ້ນ​ເຮົາ​ມາ​ຟັງ​ຄໍາ​ຕອບ​ນໍາ​ກັນ​ເລີຍ.

ທ່ານ ນາງ ຄູນ ສີສົມ​ພອນ ​ເຈົ້າຂອງ​ຮ້ານ​ບ້ານເຂົ້າປຸ້ນແຈ່ວ​ຂີງ ​ໃຫ້​ຮູ້​ວ່າ:  ດັ່ງທີ່​ເຮົາ​ຮູ້​ນໍາ​ກັນ​ແລ້ວ​ວ່າ ​ບ້ານ​ທ່າ​ເດື່ອ ​ມີມູນ​ເຊື້ອ ການ​ເຮັດ​ເຂົ້າປຸ້ນມາ​ແຕ່​ດົນ​ນານ​ເວົ້າ​ລວມ, ​ເວົ້າ​ສະ​ເພາະ ຕົນ​ເອງ​ພໍ​ໃຫຍ່​ຮູ້ຈັກ​ຄວາມ​ກໍ​ໄດ້​ກິນ ​ແລະ ​ເຄີຍເຮັດມາ​ແລ້ວ ​ແຕ່​ກໍ່​ບໍ່​ຄິດ​ວ່າ ຈະ​ກາຍ​ມາເປັນ​ອາຊີບດັ່ງ​ທຸກ​ມື້​ນີ້, ​ແຕ່​ກ່ອນຕົນເອງແມ່ນປະກອບອາຊີບຂາຍເຄື່ອງຢູ່ສົ້ນຂົວມິດຕະພາບ ລາວ-ໄທ ແຫ່ງທີ I, ເມື່ອຮ້ານຍຸບ ແລ້ວ ຈຶ່ງຫັນມາເປີດຮ້ານບ້ານເຂົ້າປຸ້ນແຈ່ວຂີງຂຶ້ນຢູ່​ບ້ານ ທ່າ​ເດື່ອ ​ເມືອງ​ຫາດ​ຊາຍ​ຟອງ ນະຄອນຫລວງ​ວຽງຈັນ ໃນປີ 2018 ເປັນຕົ້ນມາ ທີ່ເລືອກສະຖານຢູ່ເຂດນີ້ຍ້ອນວ່າຕົນເອງເກີດ ແລະໃຫຍ່ຢູ່ບ້ານນີ້, ໃນໄລຍະທຳອິດ​ທີ່ເປີດຮ້ານ ຄົນ​ຍັງ​ບໍ່ທັນຮູ້ຈັກຫລາຍ ບໍ່​ເປັນ​ທີ່​ນິຍົມ​ຊົມ​ຊອບ​ປານ​ໃດ ຍ້ອນວ່າຮ້ານ​ເຂົ້າປຸ້ນແຈ່ວຂີງເຂດນີ້ ​ກໍ​ມີ​ຫລາຍ​ຮ້ານ ອີກຢ່າງໜຶ່ງຮ້ານ​ເຮົາກໍ​ເປີດ​ໃໝ່​ແດ່ ໃນໄລຍະນັ້ນມີພະນັກງານພຽງແຕ່ 2-3 ຄົນເທົ່ານັ້ນ, ​ແຕ່​ພໍ​ເປີດ​​ມາ​ໄດ້ໄລ​ຍະໜຶ່ງທຸລະກິດກໍເລີ່​ມດີ​ຂຶ້ນເລື້ອຍໆ​ລູກ​ຄ້າ​ກໍ​ຮູ້ຈັກ​ຫລາຍຂຶ້ນ ຈຶ່ງໄດ້ຮັບພະນັກງານເພ່ີມ ປັດຈຸບັນມີ 8 ຄົນ ເຊິ່ງຜົນຕອບຮັບທີ່ດີດັ່ງກ່າວນັ້ນ ຍ້ອນ​ລູກ​ຄ້າ​ທີ່​ມາ​ກິນ​ແລ້ວ​ມັກ​ໃນ​ລົດ​ຊາດ​ອາຫານ, ມັກບັນຍາກາດ ​ແລະ ການ​ບໍລິການ​ທີ່​ດີ​. ນອກຈາກນີ້, ຫົວ​ໃຈຫລັກສໍາຄັນຂອງທາງຮ້ານພວກເຮົາກໍ​ຄືເຂົ້າປຸ້ນ​ ເພາະວ່າເຂົ້າປຸ້ນທີ່ບີບ ແຕ່ ລະມື້ແມ່ນ​ເຮັດຈາກແປ້ງເຂົ້າ, ໝັກເອງ, ເຮັດ​ເອງ​ທຸກ​ຂັ້ນ​ຕອນນັບແຕ່ການໝັກເຂົ້າ, ໝັກແປ້ງເຂົ້າ, ໜວດແປງເຂົ້າ ຈົນເຖິງຂັ້ນຕອນບີບເສັ້ນເຂົ້າປຸ້ນ ສາເຫດທີ່ທາງຮ້ານເຮົາເຮັດເອງທຸກຂັ້ນຕອນເພື່ອໃຫ້​ໄດ້​ເສັ້ນເຂົ້າປຸ້ນທີ່ໜຽວໜຸ່ມ, ເນັ້ນ ຄວາມສະອາດ, ຄຸນນະພາບເປັນຫລັກ. ສຳລັບນໍ້າປາ​ແດກ ທາງຮ້ານເຮົາເຮັດເອງທຸກຂັ້ນຕອນເຊ່ັນກັນເພື່ອໃຫ້ໄດ້ລົດຊາດທີ່ແຊບນົວ​ເຂັ້ມ​ຂຸ້ນ ທີ່ເປັນສູດສະເພາະຂອງທາງຮ້ານພວກເຮົາ, ສ່ວນປີ້ງ​ປາ, ປີ້ງ​ໄກ່ ຈະ​ໃຊ້​ວິທີ​ປີ້ງ​ແບບ​ປິ່ນ ເພື່ອ​ເຮັດ​ ໃຫ້​ເນື້ອ​ປາ, ​ເນື້ອໄກ່ ຫວານ, ນຸ່​ມ​, ຜັກທີ່ນໍາມາເຮັດເຄື່ອງຄຽງນັ້ນກໍສົດໃໝ່ທຸກມື້. ຍັງ​ບໍ່ພໍ​ເທົ່ານີ້ ​ຮ້ານ​ເຮົາຍັງ​ມີຕໍາໝາກຫຸ່ງ​ຟຣີ ​ແຕ່​ລູກ​ຄ້າ​ຕ້ອງ​ໄດ້​ຕໍາ​ເອງຈຶ່ງ​ໄດ້​ລົດ​ຊາດ​ທີ່​ຖືກ​ໃຈ. ສໍາລັບລາຄາຊຸດ​ເຂົ້າປຸ້ນ​ ຈະ​ມີ 3 ປະ​ເພດ ຄື: ຊຸດນ້ອຍ 50.000 ກີບ, ຊຸດກາງ 60.000 ກີບ​, ຊຸດໃຫຍ່ 70.000 ກິີບ, ສ່ວນ ປີ້ງ​ໄກ່ ລາຄາ 170.000-190.000 ​ກີບ, ປາລາຕາ 90.000-95.000 ກີບຕໍ່​ໂຕ, ພ້ອມນັ້ນ, ພາຍໃນຮ້ານກໍຍັງມີກໍມີລວກຍໍ່, ລວກຊີ້ນ, ສົ້ມໝູຫໍ່ໃຫຍ່, ເຂົ້າໜົມຂົກ, ເຂົ້າຫລາມແຊບບ້ານທ່າເດື່ອ ແລະ ອື່ນໆຕື່ມອີກ.

ທ່ານ ນາງ ຄູນ ຍັງຮູ້ໃຫ້ຕື່ມວ່າ: ພາຍຫລັງເປີດຮ້ານມາ ເຮັດໃຫ້ຊີວິດການເປັນຢູ່ຂອງຄອບຄົວຕົນເອງດີຂຶ້ນເລື້ອຍໆ, ພ້ອມນັ້ນຍັງເປັນການສ້າງວຽກເຮັດງານທຳໃຫ້ກັບປະຊາຊົນເຂດດັ່ງກ່າວນຳອີກ. ນອກຈາກນີ້, ທ່ານ ນາງ ຄູນ ຍັງ​ໄດ້​ຖື​ໂອກາດ​ເຊີນຊວນລູກຄ້າທຸກໆທ່ານ ຖ້າມີໂອກາດກາຍໄປມາ ທາງນີ້ ລອງມາແວ່ຊິມລົດຊາດອາຫານໃນຮ້ານບ້ານ​ເຂົ້າປຸ້ນ​ແຈ່ວ​ຂີງ Ban jew khing ເພື່ອສຳຜັດລົດຊາດທີ່ເປັນເອກະລັກສະເພາະຂອງຮ້ານພວກເຮົາ ເຊິ່ງພາຍໃນ ຮ້ານຈະມີສະຖານທີ່ຈອດລົດກວ້າງຂວ້າງ ແລະ ຮ້ານຕິດກັບແຄມຂອງ.

ຮ້ານບ້ານ​ເຂົ້າປຸ້ນ​ແຈ່ວ​ຂີງ Ban jew khing ເປີດບໍລິການລູກຄ້າ ເວລາ 8:00ໂມງ-17:00ໂມງ, ສະຖານທີ່ຕັ້ງຢູ່ບ້ານທ່າ​ເດື່ອ, ເມືອງຫາດ​ຊາຍ​ຟອງ, ນະຄອນຫລວງວຽງຈັນ, ຂໍ້ມູນເພີ່ມຕື່ມສອບຖາມໄດ້ທີ່ ​ເຟສບຸກ ຮ້ານບ້ານ​ເຂົ້າປຸ້ນແຈ່ວ​ຂີງ Ban jew khing ຫລື ຕິດຕໍ່ສອບ​ຖາມ​ຜ່ານ​ເບີ​ໂທລະສັບ 020 54141111.

ບົດ+ພາບໂດຍ: ມາລີດາ

KPL