*ເມື່ອບໍ່ດົນມານີ້ ແຂວງເຊກອງ ໄດ້ຈັດກອງປະຊຸມຄະນະຊ້ີນໍາຂັ້ນແຂວງ ຄັ້ງທີ I ເພື່ອກຽມຄວາມພ້ອມແກ່ການສຳຫລວດພົນລະເມືອງ ແລະ ທ່ີຢູ່ອາໄສທ່ົວປະເທດ ຄັ້ງທີ V ໂດຍການເປັນປະທານຂອງທ່ານ ເຫລັກໄຫລ ສີວິໄລ ເຈົ້າແຂວງໆເຊກອງ, ຫົວໜ້າຄະນະຊີ້ນໍາການສໍາຫລວດພົນລະເມືອງ ແລະ ທ່ີຢູ່ອາໄສທ່ົວປະເທດ ຄັ້ງທີ V ຂັ້ນແຂວງ, ມີຂະແໜງການກ່ຽວຂ້ອງອ້ອມຂ້າງແຂວງ ແລະ ເມືອງ 4 ຕົວເມືອງເຂົ້າຮ່ວມ.

      ທ່ານ ເຫລັກໄຫລ ສີວິໄລ ໄດ້ກ່າວວ່າ: ກອງປະຊຸມຄັ້ງນີ້ ແມ່ນເປັນການກະກຽມຄວາມພ້ອມຮອບດ້ານໃຫ້ແກ່ການສໍາຫລວດພົນລະເມືອງ ແລະ ທີ່ຢູ່ອາໄສທົ່ວປະເທດຄັ້ງທີ V ປີ 2025 ຂອງແຂວງເຊກອງ ໃຫ້ສາມາດດໍາເນີນໄປຕາມແຜນການ ແລະ ໄດ້ຮັບໝາກຜົນສູງສຸດ. ສະນ້ັນ, ຄະນະຊີ້ນໍາຂັ້ນແຂວງ, ຂັ້ນເມືອງ ແລະ ຂະແໜງການກ່ຽວຂ້ອງຕ້ອງຖືສໍາຄັນວຽກງານສໍາຫລວດພົນລະເມືອງ ແລະ ທີ່ຢູ່ອາໄສເປັນວຽກບຸລິມະສິດ, ເປັນພັນທະໜ້າທີ່ ແລະ ຕິດຕາມຊຸກຍູ້ວຽກງານດັ່ງກ່າວເປັນປະຈໍາ ເພື່ອເຮັດໃຫ້ການສໍາຫລວດໄດ້ຮັບຂໍ້ມູນທີ່ມີຄຸນນະພາບຮັບໃຊ້ເຂົ້າໃນວຽກງານຕ່າງໆ ພ້ອມທັງໃຫ້ແຕ່ລະພາກສ່ວນກະກຽມຄວາມພ້ອມຮັບປະກັນການດໍາເນີນການສໍາຫລວດໃຫ້ໄດ້ຈັດຕັ້ງປະຕິບັດຕາມແຜນການ; ຄະນະຊີ້ນໍາຂັ້ນແຂວງ- ເມືອງ ຕ້ອງໄດ້ເອົາໃຈໃສ່ໃກ້ຊິດຕິດແທດ ແລະ ປະຈໍາການປົກກະຕິເພື່ອລາຍງານຜົນການສໍາຫລວດແຕ່ລະໄລຍະ, ກະກຽມງົບປະມານຮັບໃຊ້, ອຸປະກອນຮັບໃຊ້ທີ່ຈໍາເປັນໃນການເດີນສໍາຫລວດ.

     ສ່ວນຄະນະຮັບຜິດຊອບຂ້ັນບ້ານຕ້ອງມີສ່ວນຮ່ວມໃນການສະໜອງຂໍ້ມູນໃຫ້ລະອຽດຊັດເຈນ ແລະ ອັນສໍາຄັນຂະແໜງການກ່ຽວຂ້ອງຂັ້ນແຂວງ, ຂັ້ນເມືອງຕ້ອງໄດ້ສຸມໃສ່ວຽກງານໂຄສະນາເຜີຍແຜ່, ປຸກລະດົມທົ່ວປວງຊົນເຂົ້າຮ່ວມການສໍາຫລວດ ເພື່ອຮັບປະກັນໃຫ້ການຈັດຕັ້ງປະຕິບັດການສໍາຫລວດພົນລະເມືອງ ແລະ ທີ່ຢູ່ອາໄສທົ່ວປະເທດຄັ້ງທີ V ປີ 2025 ໂດຍສະເພາະຢູ່ແຂວງເຊກອງ ໃຫ້ບັນລຸຕາມຄາດໝາຍທີ່ວາງໄວ້.

ໂດຍ: ພຸດທະສອນ

KPL