ຂປລ. ເມື່ອບໍ່ດົນຜ່ານມານີ້, ສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ ຮ່ວມກັບ ອົງການສະຫະປະຊາຊາດ ກອງທຶນສຳລັບປະຊາກອນ ໃນ ສປປ ລາວ (UNFPA) ຈັດກອງປະຊຸມລະດົມການມີສ່ວນຮ່ວມຂອງບັນດາພາກສ່ວນກ່ວຂ້ອງ ແນໃສ່ເສີມຂະຫຍາຍ ການກະກຽມຄວາມພ້ອມ ໃນວຽກງານສຳຫລວດພົນລະ ເມືອງ ແລະ ທີ່ຢູ່ອາໄສຄັ້ງທີ V ຂອງ ສປປ ລາວ, ເຊິ່ງຈະຈັດຂຶ້ນໃນປີ 2025 ທີ່ຈະມາເຖິງນີ້, ໂດຍການ ເປັນປະທານ ຂອງ ທ່ານ ນາງ ພອນສາລີ ສຸກສະຫວັດ ຮອງລັດຖະມົນຕີກະຊວງແຜນການ ແລະ ການລົງທຶນ ໂດຍມີພາກສ່ວນກ່ຽວຂ້ອງ ເຂົ້າຮ່ວມ.

ໃນໄລຍະເຄິ່ງປີ 2024 ທີ່ຜ່ານມາ, ພາຍໃຕ້ການສະໜັບສະໜູນຈາກອົງການ UNFPA, ສູນສະຖິຕິແຫ່ງຊາດ ໄດ້ບັນລຸບາດກ້າວສຳຄັນ ໃນການສ້າງຄູ່ຮ່ວມຍຸດທະສາດ ໃນການ ກະກຽມຄວາມ ພ້ອມສຳຫລວດ ພົນລະເມືອງຄັ້ງນີ້ ເປັນຕົ້ນ ກັບອົງການຊ່ວຍເຫລືອ ແລະ ພັດທະນາປະເທດສະວິດ ແລະ ລຸກຊຳບວກ. ການຮ່ວມມືກັບບັນດາ ອົງການໃໝ່ເຫລົ່ານີ້ ໄດ້ເປັນສິ່ງເສີມສ້າງ ການຮ່ວມມືທີ່ມີຢູ່ແລ້ວກັບ ອົງການຊ່ວຍເຫລືອສາກົນ ຂອງປະເທດອາເມລິກາ (USAID) ແລະ ກະຊວງການຕ່າງປະເທດ ແລະ ການຄ້າ ປະເທດອົດສະຕາລີ ໃຫ້ດີຂຶ້ນກວ່າເກົ່າ ໂດຍສະເພາະ ການສະໜັບສະໜູນ ທາງການເງິນທີ່ສຳຄັນ ສຳລັບການກະກຽມ ແລະ ການດຳເນີນປະຕິບັດການສຳຫລວດພົນລະເມືອງ ແລະ ທີ່ຢູ່ອາໄສ. ນອກຈາກນີ້, ຍັງມີການຊ່ວຍເຫລືອຈາກ ອົງການຊ່ວຍ ເຫລືອ ສປ ຈີນ ເຊິ່ງເປັນການຮ່ວມມື ໂດຍກົງກັບສູນສະຖິຕິແຫ່ງຊາດ. ຂະນະດຽວກັນ, ການ​ຮ່ວມ​ມື​ກັບ​ພາກ​ລັດ, ພາກ​ເອກະ​ຊົນ, ນັກ​ຊ່ຽວຊານ​ສາກົນ ​ກໍ​ໄດ້ຮັບການ​ເພີ່ມ​ທະວີຂຶ້ນ ເຊິ່ງປະກອບສ່ວນ​ເຂົ້າ​ໃນ​ ຜົນສຳ​ເລັດ​ຂອງການດຳເນີນ ການເຮັດທົດລອງສຳຫລວດພົນລະເມືອງ ແລະ ທີ່ຢູ່ອາໄສ​ ​ໃນ​ຕົ້ນ​ປີ​ນີ້. ຂີດໝາຍສຳຄັນອີກອັນໜຶ່ງ ກໍແມ່ນການສ້າງນະໂຍບາຍດ້ານການສຳຫລວດທີ່ ຮັບປະກັນ ຄວາມສະເໝີພາບ ລະຫວ່າງຍິງ-ຊາຍ.

ໂອກາດດັ່ງກ່າວ, ທ່ານ ນາງ ພອນສາລີ ສຸກສະຫວັດ ໄດ້ສະແດງ ຄວາມຂອບໃຈຕໍ່ອົງການ UNFPA, ບັນດາຄູ່ຮ່ວມພັດທະນາ ແລະ ບັນດາກະຊວງ ທີ່ໄດ້ປະກອບສ່ວນ ເຂົ້າໃນການ ກະກຽມ ການສຳຫລວດພົນລະເມືອງ ແລະ ທີ່ຢູ່ອາໄສຢ່າງຕໍ່ເນື່ອງ ເຊິ່ງຜົນ​ການ​ສຳ​ຫລວດ ​ຈະ​ມີ​ບົດບາດ​ສຳຄັນ​ໃນ​ການ​ຕິດຕາມ ​ແລະ ປະຕິບັດ​ແຜນ​ພັດທະນາ​ ເສດຖະກິດ-ສັງຄົມ​ແຫ່ງ​ຊາດ 5 ປີ​  (2021-2025) ​ແລະ ວາງ​ທິດ​ທາງ​ໃໝ່​ໄລຍະ 2026-2030. ຂໍ້ມູນທີ່ເກັບກຳໄດ້ນັ້ນ ຈະເປັນຈຸດອ້າງອິງທີ່ສຳຄັນ ໃນການປະເມີນ ຄວາມຄືບໜ້າ ຂອງ ສປປ ລາວ ໄປສູ່ເປົ້າໝາຍ ການພັດທະນາແບບຍືນຍົງ (SDGs), ICPD PoA ແລະ ຄວາມພະຍາຍາມ ທີ່ຫລຸດພົ້ນຈາກ ສະຖານະພາບ ປະເທດດ້ອຍພັດທະນາ (LDC).

ທ່ານ ແກມບິດ ຄາບິຣິ ຜູ້ປະສານງານດ້ານນະໂຍບາຍ ແລະ ການສຳຫລວດພົນລະເມືອງ ໄດ້ຮຽກຮ້ອງ ໃຫ້ມີຄວາມຮ່ວມມືທີ່ເຂັ້ມແຂງຍິ່ງຂຶ້ນ, ການດຳເນີນງານຮ່ວມກັນ ແລະ ການສະໜັບສະໜູນ ຈາກພາກສ່ວນທີ່ກ່ຽວ ຂ້ອງ ແລະ ຜູ້ມີສ່ວນຮ່ວມ ທັງໝົດເພື່ອແກ້ໄຂສິ່ງທ້າທາຍ ແລະ ຊ່ອງວ່າງທີ່ມີຢູ່ແລ້ວ ເພື່ອຮັບປະກັນວ່າ ການສຳຫລວດພົນລະເມືອງ ແລະ ທີ່ຢູ່ອາໄສ ຄັ້ງທີ 5 ຈະດຳເນີນຕໍ່ໄປ ຢ່າງຄຸ້ມຄ່າ, ມີປະສິທິພາບ ແລະ ປະສິທິຜົນ. ພ້ອມນີ້, ທ່ານຍັງໄດ້ຢືນຢັນຄືນຄຳໝັ້ນສັນຍາຂອງ UNFPA ທີ່ຈະສະໜັບສະໜູນ  ສູນສະຖິຕິ ຂອງແຫ່ງຊາດ ໃນທຸກດ້ານ ແລະ ໄລຍະຂອງການສຳຫລວດພົນລະເມືອງ ແລະ ທີ່ຢູ່ອາໄສ ລວມທັງມາດຕະການ ກ່ອນການນັບ, ໄລຍະການນັບ ແລະ ພາຍຫລັງການນັບຈຳນວນ ໂດຍຮັບຮູ້ເຖິງຄວາມຕ້ອງການ ອັນສຳຄັນຂອງຂໍ້ມູນທີ່ຖືກຕ້ອງ, ທັນເວ ລາ ແລະ ເຊື່ອຖືໄດ້.

ພະນັກງານພາກສະໜາມ ປະມານ 13.000 ຄົນ ຈະຖືກຄັດເລືອກ ເພື່ອເກັບກຳ ຂໍ້ມູນຈາກ ປະມານ 1,4 ລ້ານ​ຄົວ​ເຮືອນ ໃນຂອບເຂດທົ່ວປະເທດ, ການສຳຫລວດພົນລະເມືອງ ແລະ ທີ່ຢູ່ອາໄສ ຈະເຮັດໜ້າທີ່ເປັນຮາກຖານສຳຄັນ ສຳລັບການວາງແຜນ ແລະ ພັດທະນາປະເທດຊາດໃນອະນາຄົດ.

KPL