ຂປລ. ກົມພັດທະນາການທ່ອງທ່ຽວ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ຈັດສຳມະນາ ຖອດຖອນບົດຮຽນ ການຈັດຕັ້ງປະຕິບັດ ວຽກງານມາດຕະຖານການທ່ອງທ່ຽວ ຢູ່ ສປປ ລາວ ແລະ ປຶກສາຫາລື ເພື່ອສ້າງແຜນພັດທະນາ ການທ່ອງທ່ຽວຂອງ ສປປ ລາວ ສຳລັບ 2026-2030 ໃນວັນທີ 19-21 ພະຈິກ 2024 ໂດຍການເປັນປະທານຂອງ ທ່ານ ນາງ ດາລານີ ພົມມະວົງສາ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ມີຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ ຖວທ ນະຄອນຫລວງ, ແຂວງ ແລະ ຜູ້ຕາງໜ້າຈາກພາກສ່ວນທີ່ກ່ຽວຂ້ອງ ເຂົ້າຮ່ວມ.

ທ່ານນາງ ດາລານີ ພົມມະວົງສາ ​ໄດ້​ໃຫ້​ຮູ້ວ່າ: ການ​ສໍາ​ມະ​ນາຄັ້ງນີ້, ມີຄວາມໝາຍ, ຄວາມສຳ ຄັນຢ່າງຍິ່ງ ຕໍ່ກັບການພັດທະນາ ວຽກງານການທ່ອງທ່ຽວຂອງ ສປປ ລາວ ເຊິ່ງຈະໄດ້ຮ່ວມກັນປຶກສາຫາລື ເພື່ອສ້າງແຜນພັດທະນາການທ່ອງທ່ຽວຂອງ ສປປ ລາວ ສຳລັບ 2026-2030 ໂດຍສະເພາະ ການພັດທະນາ ການທ່ອງທ່ຽວຂອງ ສປປ ລາວ ຕາມແນວທາງທິດຍືນຍົງສີຂຽວ ໂດຍກຳນົດບັນດາກິດ ຈະກຳ ທີ່ຈະຈັດຕັ້ງປະຕິບັດໃນ 5 ປີຂ້າງໜ້າ ໃຫ້ບັນລຸຕາມເປົ້າໝາຍ ກໍຄື ຕົວຊີ້ບອກທີ່ວາງໄວ້. ການ ທ່ອງທ່ຽວ ແມ່ນອຸດສາຫະກຳທີ່ປອດຄວັນ ເຊິ່ງມີການເຕີບໃຫຍ່ຂະຫຍາຍຕົວຢ່າງວ່ອງໄວ, ຕໍ່ເນື່ອງ ແລະ ໄດ້ກາຍເປັນຂະແໜງການຕົ້ນຕໍ ທີ່ປະກອບສ່ວນສຳຄັນເຂົ້າໃນ ການພັດທະນາເສດຖະກິດ ໃຫ້ມີຄວາມເຂັ້ມແຂງ ຂອງຫລາຍໆປະເທດໃນໂລກ ລວມທັງ ສປປ ລາວ. ລັດຖະບານແຫ່ງ ສປປ ລາວ ໄດ້ຖືເອົາວຽກງານທ່ອງທ່ຽວ ເປັນເສດຖະກິດປາຍແຫລມຂະແໜງການໜຶ່ງ ທີ່ກະຕຸ້ນບັນດາຂະແໜງການທີ່ເປັນຕ່ອງໂສ້ ໃຫ້ມີການພັດທະນາໄປພ້ອມໆກັນ ດ້ວຍການສ້າງອາຊີບ ແລະ ລາຍຮັບທີ່ກວ້າງຂວາງ ເຊິ່ງນຳເອົາເງິນຕາຕ່າງປະເທດມາສູ່ ສປປ ລາວ ​ເປັນຈຳນວນຫລາຍພໍສົມຄວນ, ຊ່ວຍປະກອບສ່ວນເຂົ້າໃນ ການພັດທະນາເສດຖະກິດ-ສັງຄົມ ຂອງຊາດໃຫ້ມີຄວາມເຂັ້ມແຂງ, ຊ່ວຍຫລຸດຜ່ອນຄວາມທຸກຍາກ ຂອງປະຊາຊົນບັນດາເຜົ່າ ຕາມນະໂຍບາຍຂອງພັກ ແລະ  ລັດຖະບານ ທີ່ໄດ້ວາງອອກເທື່ອລະກ້າວ.

ທ່ານ ນາງ ດາລານີ ພົມມະວົງສາ ຍັງ​ໃຫ້​ຮູ້ອີກວ່າ: ວຽກງານການທ່ອງທ່ຽວຂອງ ສປປ ລາວ ໄດ້ຮັບການປັບປຸງ ແລະ ພັດທະນາເລື້ອຍໆມາ ແລະ ຫັນເຂົ້າສູ່ມາດຕະຖານເທື່ອລະກ້າວ ໂດຍສະ ເພາະໄດ້ຈັດຕັ້ງປະຕິບັດ 7 ມາດຕະຖານການທ່ອງທ່ຽວອາຊຽນ ແລະ ລາງວັນການທ່ອງທ່ຽວຍືນຍົງອາຊຽນ. ໃນໄລຍະຜ່ານມາ ມີຫລາຍພາກສ່ວນ ແລະ ສະຖານປະກອບການຫລາຍແຫ່ງ ກໍໄດ້ຮັບລາງ ວັນມາດຕະຖານການທ່ອງທ່ຽວອາຊຽນ ຫລາຍລາງວັນພໍສົມຄວນ. ນອກຈາກນີ້, ພວກເຮົາຍັງໄດ້ປັບບັນດາ ມາດຕະຖານການທ່ອງທ່ຽວອາຊຽນ ທີ່ກ່າວມານີ້, ມາເປັນມາດຕະຖານ ການທ່ອງທ່ຽວຂອງ ສປປ ລາວ ຕື່ມອີກ ແນໃສ່ເພື່ອພັດທະນາວຽກງານ ການທ່ອງທ່ຽວລາວ ໃຫ້ມີຄວາມເຂັ້ມແຂງ ແລະ ໄດ້ມາດຕະຖານ ​ໂດຍສະເພາະ ການສົ່ງເສີມ ແລະ ກະຕຸກຊຸກຍູ້ບັນດາຫົວໜ່ວຍທຸລະກິດຕ່າງໆ ໃຫ້ມີມາດຕະຖານທີ່ດີ, ມີຄວາມພ້ອມໃນການຕ້ອນຮັບແຂກ, ສາມາດສະໜອງຕາມຄວາມຮຽກຮ້ອງຕ້ອງ ການ ແລະ ຮັບປະກັນຄວາມເພິ່ງພໍໃຈ ແກ່ແຂກທີ່ໃຊ້ບໍລິການ.

ຂ່າວ: ທະນູທອງ

ພາບ: ຂັນໄຊ

KPL