*ກອງປະຊຸມລາຍງານຄວາມຄືບໜ້າຂອງກໍາມະການເຕັກນິກ-ຈັດການແຂ່ງຂັນ ເພື່ອການກະກຽມງານມະຫາກຳກິລານັກຮຽນມັດທະຍົມສຶກສາທົວ ປະເທດຄັ້ງທີ VII ປີ 2024 ທີ່ແຂວງສາລະວັນ ໄດ້ຈັດຂື້ນໃນວັນທີ 19 ພະຈິກນີ້, ທີ່ສະໂມສອນແຂວງສາລະວັນ ໂດຍພາຍໃຕ້ການເປັນປະທານຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ, ຮອງປະທານຈັດງານກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ,ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ, ຮອງປະທານຈັດງານ, ມີບັນດາທ່ານຫົວໜ້າ-ຮອງຫົວໜ້າກົມ, ບັນດາທ່ານຫົວໜ້າ-ຮອງຫົວໜ້າພະແນກສຶກສາທິການ ແລະ ກິລາ 18 ແຂວງ, ນະຄອນຫຼວງ, ບັນດາທ່ານປະທານ ສະຫະພັນກິລາແຫ່ງຊາດ ແລະ ບັນດາທ່ານປະທານ ສະຫະພັນກິລາລາວ 12 ສະຫະພັນຂອງແຂວງສາລະວັນ ເຂົ້້າຮ່ວມ.

     ທ່ານ ຄໍາພາວັນ ກວ້າງມະນີວັນ ຫົວໜ້າກົມກິລາມວນຊົນ, ພະລະ ແລະ ສີລະປະສຶກສາ ໃນນາມ ຫົວໜ້າກໍາມະການເຕັກນິກ-ຈັດການແຂ່ງຂັນ ໄດ້ລາຍງານໃຫ້ຮູ້ວ່າ: ໄລຍະຜ່ານມາ ກຳມະການເຕັກນິກ-ຈັດການແຂ່ງຂັນໄດ້ມີການຈັດຕັ້ງປະຕິບັດໜ້າໜ້າວຽກຢ່າງເປັນປົກກະຕິ, ມີການປັບປຸງບາງນິຕິກຳ, ບັນດາໜ້າວຽກຕາມທິດຊີ້ນໍາ ແລະ ມະຕິກອງປະຊຸມເຕັກນິກທົ່ວປະເທດຄັ້ງທີ 1 ໂດຍມີຜົນສໍາເລັດຫຼາຍດ້ານ ເປັນຕົ້ນ: ສຳເລັດການຄົ້ນຄວ້າ ແລະ ກຳນົດເອົາ 12 ປະ ເພດກິລາບັນຈຸເຂົ້າໃນການແຂ່ງຂັນ; ສຳເລັດການຄົ້ນຄວ້າ ແລະ ກຳນົດເອົາລາຍການແຂ່ງຂັນຂອງ 12 ປະເພດກິລາໂດຍມີທັງໝົດ 128 ລາຍການແຂ່ງຂັນ; ສໍາລັດການຈັດກອງປະຊຸມຮ່ວມກັບ 12 ສະຫະພັນກິລາແຫ່ງຊາດເພື່ອຄົ້ນຄວ້າຮັບຮອງລະບຽບການຈັດການແຂ່ງຂັນຂອງກິລາ 12 ປະເພດ ໂດຍໄດ້ອີງໃສ່ຂໍ້ກຳນົດຂອງການຈັດງານ ແລະ ກະຕິກາຂອງສາກົນ; ສຳເລັດການລົງຊຸກຍູ້ການກໍ່ສ້າງສ້ອມແປງສະໜາມແຂ່ງຂັນ ແລະ ຝຶກຊ້ອມກິລາ ເພື່ອໃຫ້ຖືກຕ້ອງຕາມລະບຽບການຈັດການແຂ່ງຂັນ ແລະ ກຳນົດຕາຕະລາງສະຖານທີ່ ແລະ ວັນເວລາ ແຂ່ງຂັນກິລາ; ສຳເລັດການປະມູນຈັດຊື້-ຈັດຈ້າງ ອຸປະກອນຮັບໃຊ້ບໍລິຫານ ແລະ ອຸປະກອນຮັບໃຊ້ຈັດການແຂ່ງ ຂັນ ກິລາ; ສຳເລັດອອກຂໍ້ຕົກລົງຂອງລັດຖະມົນຕີວ່າດ້ວຍການແຕ່ງຕັ້ງບຸກຄະລາກອນກຳມະການຕັດສິນຈາກ ສະຫະພັນສູນກາງ ແລະ ສະຫະພັນຂອງແຂວງ ລວມທັງຜູ້ຊ່ວຍວຽກຕ່າງໆທີ່ນອນຢູ່ໃນວຽກເຕັກນິກ- ຈັດການແຂ່ງຂັນ ທີ່ບັນຈຸເຂົ້າໃນ 12 ປະເພດກິລາ ພ້ອມທັງກຳນົດໄລຍະເວລາປະຈໍາການຂອງຄະນະຮັບຜິດຊອບຈັດການແຂ່ງຂັນກິລາແຕ່ລະປະເພດ; ສຳເລັດການລົງຕິດຕາມກວດກາ ແລະ ກຳນົດສະໜາມຝຶກຊ້ອມ ແຂ່ງຂັນກິລາທັງ 12 ປະເພດ.

    ກຳມະການເຕັກນິກ-ຈັດການແຂ່ງຂັນທັງໝົດແມ່ນໄດ້ເລີ່ມປະຈຳການທີ່ແຂວງ ສາລະວັນ ນັບແຕ່ວັນທີ 14 ພະຈິກ 2024 ເປັນຕົ້ນມາ ໂດຍນໍາໃຊ້ຫ້ອງກ້ອງສະໜາມເປັນຫ້ອງການປະຈຳການ. ແຜນໃນຕໍ່ໜ້າ ຈະສືບຕໍ່ຕິດຕາມຊຸກຍູ້ການລົງທະບຽນເຂົ້າຮ່ວມແຂ່ງຂັນດ້ວຍລາຍຊື່ ແລະ ລາຍການແຂ່ງຂັນຂອງຄະນະນໍາກອງເລຂາ, ຄູຝຶກ ແລະ ນັກກິລາຂອງບັນດາແຂວງ ທີ່ຍັງບໍ່ທັນລົງທະບຽນໃຫ້ສຳເລັດກ່ອນວັນທີ 25 ພະຈິກ 2024.ຈາກນັ້ນ, ຜູ້ເຂົ້າຮ່ວມກອງປະຊຸມ ໄດ້ຮ່ວມປະກອບຄໍາເຫັນຢັ້ງຢືນຄວາມຖືກຕ້ອງ ແລະຄວາມເປັນເອກະພາບທາງດ້ານເນື້ອໃນເພື່ອເປັນບ່ອນອີງໃນການຈັດຕັ້ງປະຈິບັດວຽກງານໃນຂັ້ນຕໍ່ໄປໃນຕອນບ່າຍຂອງວັນດຽວກັນ ໄດ້ມີການຈັບສະຫຼາກແປງສາຍກິລາໃນປະເພດທີມ 2  ປະເພດ ຄື: ບານເຕະ, ບານສົ່ງ ຕື່ມອີກ.