ຂປລ. ໃນວັນທີ 25 ສິງຫາ 2025 ທ່ານ ບຸນມີ ພິມມະສອນ ປະທານສະພາປະຊາຊົນແຂວງຄຳມ່ວນ ໄດ້ຖືເປັນກຽດເຂົ້າຮ່ວມເປັນປະທານໃນພິທີເປີດ ຮ້ານເຊເວັນອີເລເວັນ (7-Eleven) ສາຂາບ້ານນາໂບ ຕັ້ງຢູ່ທີ່ເມືອງທ່າແຂກ ແຂວງຄໍາມ່ວນ ຢ່າງເປັນທາງການ ເຊິ່ງຖືວ່າເປັນຮ້ານ 7-Eleven ສາຂາທຳອິດຂອງແຂວງຄໍາມ່ວນ ໂດຍມີບັນດາແຂກຜູ້ມີກຽດທີ່ມາຮ່ວມສະແດງຄວາມຍິນດີຢ່າງຄຶກຄື້ນ.

ຮ້ານ 7-Eleven ສາຂານີ້ຕັ້ງຢູ່ຈຸດຍຸດທະສາດຂອງເມືອງທ່າແຂກ, ລຽບແຄມແມ່ນ້ຳຂອງ ໃນພື້ນທີ່ໃຈກາງເມືອງທີ່ມີຄວາມຄຶກຄື້ນ, ເປັນສູນລວມໃນດ້ານທີ່ພັກ ແລະ ສູນລວມກິດຈະກໍາຍາມແລງຂອງຜູ້ຄົນທ້ອງຖິ່ນ ແລະ ນັກທ່ອງທ່ຽວ ເປັນຮ້ານທີ່ບໍລິຫານໂດຍ ທ່ານ ນາງ ເພັດດາວວີ ບຸດທະວົງ ຜູ້ຮ່ວມທຸລະກິດຄົນລາວ ອາຍຸ 46 ປີ ຜູ້ທີ່ມີປະສົບການໃນດ້ານທຸລະກິດອະສັງຫາລິມະຊັບ, ການບໍລິການ ແລະ ການທ່ອງທ່ຽວ ລວມທັງມີຄວາມຕັ້ງໃຈ​ທີ່ຈະ​​ຍົກ​ລະດັບ​ຂະ​ແໜງ​ການ​ບໍລິການ ​ເພື່ອ​ສະໜັບສະໜູນ​ອຸດສະຫະກໍາ​ການທ່ອງທ່ຽວ​ໃນທ້ອງ​ຖິ່ນ ເພື່ອສ້າງ​ວຽກເຮັດງານທຳ, ອາຊີບ​ທັງທາງ​ກົງ ​ແລະ ທາງ​ອ້ອມ​ໃຫ້​ແກ່​ຄົນລາວ.

ທ່ານ ນາງ ເພັດດາວວີ ບຸດທະວົງ ຜູ້ຮ່ວມທຸລະກິດຮ້ານ 7-Eleven ສາຂາບ້ານນາໂບ ກ່າວວ່າ: ຮ້ານຄ້າຂາຍຍ່ອຍທັນສະໄໝເຊັ່ນ 7-Eleven ຈະເຂົ້າມາອຳນວຍຄວາມສະດວກ ແລະ ເປັນທາງເລືອກໃນການນໍາສະເໜີສິນຄ້າຄຸນນະພາບໄດ້ມາດຕະຖານກັບຄົນໃນທ້ອງຖິ່ນ ແລະ ນັກທ່ອງທ່ຽວໄດ້ຕະຫລອດ 24 ຊົ່ວໂມງ ເຮັດໃຫ້ເກີດການຂະຫຍາຍຕົວຂອງກິດຈະກໍາທີ່ກ່ຽວຂ້ອງກັບການທ່ອງທ່ຽວ, ທີ່ຈະສ້າງລາຍຮັບໃຫ້ຜູ້ຄົນໄດ້ຫລາຍຂຶ້ນ ນອກເໜືອຈາກການຈ້າງງານໂດຍກົງ. ທັງ​ນີ້​ຍັງ​ຖື​ເປັນ​ການ​ຝຶກ​ອົບ​ຮົມ​​ໃຫ້ຄົນ​ຮຸ່ນ​ໃໝ່, ​ໃຫ້​​ມີ​ຄວາມ​ຮູ້​ທີ່​ຈະ​ເປັນ​ປະໂຫຍດ​ຕໍ່​ການ​ພັດທະນາ​ທ້ອງຖິ່ນໃນ​ໄລຍະ​ຍາວ​.

ຮ້ານ 7-Eleven ເປັນທີ່ຍອມຮັບດ້ວຍຜະລິດຕະພັນທີ່ຫລາກຫລາຍມີຄຸນນະພາບ ມີລະບົບບໍລິຫານຈັດການທີ່ດີ ມີໂອກາດໄດ້ຮັບການສະໜັບສະໜູນຈາກທີມງານ CP All Lao ຕັ້ງແຕ່ການວາງແຜນ, ການລົງທຶນ, ແລະ ການຝຶກອົບຮົມພະນັກງານ, ເຮັດໃຫ້ມີຄວາມເຊື່ອໝັ້ນວ່າຈະສາມາດປະສົບຄວາມສຳເລັດ, ຮ່ວມສ້າງວຽກເຮັດງານທຳ, ສ້າງອາຊີບ ແລະ ສ້າງຄວາມພາກພູມໃຈໃຫ້ກັບສັງຄົມລາວໄປພ້ອມໆກັນຢ່າງຢືນຍົງໄດ້.

KPL