ຂປລ
ຂປລ. ເມື່ອບໍ່ດົນມານີ້, 3 ອົງການຈັດຕັ້ງມະຫາຊົນ ກະຊວງສາທາລະນະສຸກ ໄດ້ສ້າງຂະບວນການບໍລິຈາກເລືອດ ເພື່ອຊ່ວຍເຫລືອສັງຄົມ ເນື່ອງໃນໂອກາດຂໍ່ານັບຮັບຕ້ອນ 3 ວັນປະຫວັດສາດ, ສະເຫລີມສະຫລອງວັນແພດລາວ ຄົບຮອບ 60 ປີ
ຂປລ. ເມື່ອບໍ່ດົນມານີ້, 3 ອົງການຈັດຕັ້ງມະຫາຊົນ ກະຊວງສາທາລະນະສຸກ ໄດ້ສ້າງຂະບວນການບໍລິຈາກເລືອດ ເພື່ອຊ່ວຍເຫລືອສັງຄົມ ເນື່ອງໃນໂອກາດຂໍ່ານັບຮັບຕ້ອນ 3 ວັນປະຫວັດສາດ, ສະເຫລີມສະຫລອງວັນແພດລາວ ຄົບຮອບ 60 ປີ, ຂໍ່ານັບຮັບຕ້ອນກອງປະຊຸມໃຫຍ່ອົງຄະນະພັກ ກະຊວງສາທາລະນະສຸກ ສະໄໝທີ X ໂດຍມີ ທ່ານ ພອນປະດິດ ສັງໄຊຍະລາດ ປະທານກຳມະບານກະຊວງ, ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ທ່ານ ຈັນທະລາ ສຸກສາຄອນ ຫົວໜ້າສະຖາບັນສູນເລືອດແຫ່ງຊາດ, ມີຄະນະພັກກະຊວງ, ຄະນະພັກຮາກຖານ, ຄະນະໜ່ວຍພັກ ແລະ ບັນດາ ສະມາຊິກຂອງ 3 ອົງການຈັດຕັ້ງມະຫາຊົນ ກະຊວງສາທາລະນະສຸກ ເຂົ້າຮ່ວມ.
ການບໍລິຈາກເລືອດໃນຄັ້ງນີ້, ເປັນຄັ້ງທີ 7 ຂອງ 3 ອົງການຈັດຕັ້ງມະຫາຊົນ ກະຊວງສາທາລະນະສຸກ ໄດ້ຈັດຂຶ້ນ ເຊິ່ງຄັ້ງທີ 1 ຈໍານວນເລືອດ ທີ່ໄດ້ຮັບບໍລິຈາກທັງໝົດ 247 ຖົງ, ຄັ້ງທີ 2 ໄດ້ 112 ຖົງ, ຄັ້ງທີ 3 ໄດ້ 162 ຖົງ, ຄັ້ງທີ 4 ໄດ້ 185 ຖົງ, ຄັ້ງທີ 5 ໄດ້ 149 ຖົງ, ຄັ້ງທີ 6 ໄດ້ 106 ຖົງ ແລະ ຄັ້ງທີ 7 ນີ້ ໄດ້ເລືອດທັງໝົດ 168 ຖົງ.
ສູນເລືອດແຫ່ງຊາດ ແລະ ສູນເລືອດແຂວງ ໃນທົ່ວປະເທດ ມີຄວາມຫຍຸ້ງຍາກໃນການເຄື່ອນ ໄຫວອອກຮັບບໍລິຈາກເລືອດ ຕາມສະຖານທີ່ຕ່າງໆ ທີ່ມີແຜນການກໍານົດໄວ້ ແລະ ບາງຄັ້ງກໍບໍ່ໄດ້ຕາມ ຈໍານວນຄາດໝາຍທີ່ວາງໄວ້, ແຕ່ຄວາມຕ້ອງການເລືອດ-ສ່ວນປະກອບຂອງເລືອດ ເຂົ້າໃນການປິ່ນປົວຄົນເຈັບຢູ່ໂຮງໝໍຕ່າງໆ ໃນທົ່ວປະເທດ ແມ່ນບໍ່ໄດ້ລົດລະ ໃນແຕ່ລະວັນ ແລະ ນັບມື້ນັບສູງຂຶ້ນ. ດັ່ງນັ້ນ, ຈຶ່ງມີຄວາມຈໍາເປັນທີ່ພວກເຮົາ ຈະຕ້ອງສືບຕໍ່ໃນການປຸກລະດົມ ຂົນຂວາຍບໍລິຈາກເລືອດ ຢ່າງເປັນປະຈໍາ ແລະ ຕໍ່ເນື່ອງ ດັ່ງຄຳຂວັນທີ່ວ່າ: “ໃຫ້ເລືອດ ຄືໃຫ້ຊີວິດ”, “ບໍລິຈາກເລືອດແມ່ນຮັກຊາດ ແລະ ພັດ ທະນາ”, “ເລືອດໜຶ່ງຢົດ ເພືື່ອອະນາຄົດຂອງຊາດ”, “ສິນໄຊແຫ່ງຍຸກສະໄໝ ຮ່ວມໄຈບໍລິຈາກເລືອດ”, “ບໍລິຈາກເລືອດ ແມ່ນພະລັງແຫ່ງຄວາມສາມັກຄີ, ມາຮ່ວມກັນບໍລິຈາກເລືອດເພື່ອຊ່ວຍຊີວິດ”.
ຂໍ້ມູນ-ພາບ: ສູນຂ່າວສານການແພດກະຊວງສາທາລະນະສຸກ
KPL
