ຂປລ. ບໍລິສັດ ເບທາໂກ ຈຳກັດ ມະຫາຊົນ ຫລື "BTG" ໄດ້ເປີດໂຮງງານຫົວອາຫານສັດແຫ່ງທຳອິດ ໃນ ສປປ ລາວ ເມື່ອບໍດົນຜ່ານມານີ້, ພາຍໃຕ້ງົບລົງທຶນ 650 ກວ່າລ້ານບາດ ໂດຍນຳໃຊ້ເຕັກໂນໂລຊີ ທີ່ທັນສະໄໝ ເຂົ້າໃນການຜະລິດຫົວອາຫານສັດ ແລະ ບໍລິຫານຊັບພະຍາກອນ ດ້ວຍກຳລັງການຜະລິດ 108.000 ໂຕນຕໍ່ປີ ແລະ ຈະສ້າງຜະລິດ ຕະພັນຄຸນນະພາບ ເພື່ອຮອງຮັບຄວາມຕ້ອງການ ທີ່ຂະຫຍາຍຕົວຢ່າງຕໍ່ເນື່ອງ ແລະ ເພີ່ມປະສິດທິພາບການບໍລິຫານຈັດການ ຕົ້ນທຶນ ຫລຸດຜ່ອນການນຳເຂົ້າ ຫົວອາຫານສັດ ຈາກປະເທດໄທ ແລະ ຮ່ວມຂັບເຄື່ອນເສດຖະກິດຂອງ ສປປ ລາວ ໃຫ້ເຕີບໃຫຍ່ ແລະ ຍືນຍົງ ໃຫ້ກຽດເຂົ້າຮ່ວມເປີດໂຮງງານດັ່ງກ່າວ, ມີຫົວໜ້າຫ້ອງການ ກະຊວງກະສິກຳ ແລະ ປ່າ ໄມ້, ກະຊວງແຮງງານ ແລະ ສະຫວັດດີການສັງຄົມ, ມີປະທານຜູ້ອຳນວຍການໃຫຍ່​ ໃນ​ກຸ່ມເບທາໂກ, ອຸປະທູດໄທ ປະຈຳ ລາວ, ພ້ອມດ້ວຍພາກສ່ວນທີ່ກ່ຽວຂ້ອງ ແລະ ແຂກຖືກເຊີນ ເຂົ້າຮ່ວມ.

ໂອກາດດັ່ງກ່າວ, ທ່ານ ວໍຣະວຸດ ວານິດກຸນບໍດີ ປະທານເຈົ້າໜ້າທີ່ປະຕິບັດການ ກຸ່ມທຸລະກິດຕ່າງປະເທດ ບໍລິສັດ ເບທາໂກ ຈຳກັດ ມະຫາຊົນ ຫລື BTG ກ່າວວ່າ: ເບທາໂກ ໃນຖານະຜູ້ປະກອບ ທຸລະກິດອາຫານ ແລະ ກະສິກຳ-ອຸດສາຫະກຳ ຄົບວົງຈອນ ຊັ້ນນຳລະດັບສາກົນ ເພື່ອການບໍລິໂພກໃນປະເທດ ແລະ ສົ່ງອອກໄປກວ່າ 20 ປະເທດທົ່ວໂລກ ລວມເຖິງການລົງທຶນ ໃນປະເທດເພື່ອນບ້ານທັງ ມຽນມາ, ລາວ ແລະ ກຳປູເຈຍ ໂດຍກຸ່ມທຸລະກິດຕ່າງປະເທດ ເນັ້ນໃສ່ການເພີ່ມປະລິມານ ຜົນຜະລິດດ້ວຍການເພີ່ມປະສິດທິພາບ ການຜະລິດຜ່ານ ການນຳເຕັກໂນໂລຊີ ທີ່ທັນສະໄໝມາໃຊ້ ເພື່ອໃຫ້ໄດ້ຜົນຜະລິດ ທີ່ດີມີຄຸນນະພາບ. ສະເພາະ ຢູ່ ສປປ ລາວ ລົງທຶນທັງໝົດ 650 ລ້ານບາດ ສ້າງໂຮງງານຜະລິດ ຫົວອາຫານສັດເບທາໂກ ແຫ່ງທຳອິດ ທີ່ມີການນຳໃຊ້ເຕັກໂນໂລຊີ ແລະ ນະວັດຕະກຳທີ່ທັນສະໄໝມາໃຊ້ໃນການຜະລິດຫົວອາຫານສັດ.

ໂຮງງານຫົວອາຫານສັດ ເບທາໂກ ລາວ ເປັນອີກໜຶ່ງໂຮງງານຫົວອາຫານສັດ ໃນຕ່າງປະເທດຂອງບໍລິສັດ ສາມາດຜະລິດ ຫົວອາຫານສັດໄດ້ຫລາຍຊະນິດ ທັງ ໝູ, ໄກ່ໄຂ່ ແລະ ໄກ່ຊີ້ນ ໂດຍນຳໃຊ້ເຕັກໂນໂລຊີ ການຜະລິດທີ່ທັນສະໄໝ ມາຍົກລະດັບຈັດການຫລາຍດ້ານ ເປັນຕົ້ນ ລະບົບ SCADA (Supervisory Control and Data Acquisition) ແລະ ລະບົບ SAP ນຳມາໃຊ້ໃນການຈັດການວັດຖຸດິບ ແລະ ຜະລິດຫົວອາຫານສັດ ເພື່ອຍົກລະດັບການຜະລິດ ໃຫ້ມີຄວາມຖືກຕ້ອງຫລາຍຂຶ້ນ; ລະບົບການບໍລິຫານຈັດການໂຮງງານ ເພື່ອຄວບຄຸມ ແລະ ລາຍງານຜົນຜະລິດ; ລະບົບການຜະ ລິດຫົວອາຫານສັດ ແລະ ການໃຊ້ສານປະສົມລ່ວງໜ້າ; ລະບົບການບັນຈຸຫົວອາຫານສັດທີ່ທັນສະໄໝ; ລະບົບການຈັດການຖານຂໍ້ມູນ ຜົນວິເຄາະວັດຖຸດິບ ຫົວອາຫານສັດ ເພື່ອການຄວບຄຸມຄຸນນະພາບ; ລະບົບການກຳຈັດຝຸ່ນ ແລະ ກິ່ນ ເພື່ອຫລຸດຜ່ອນຜົນກະທົບຕໍ່ສັງຄົມ ແລະ ສິ່ງແວດລ້ອມ.

ໂຮງງານຫົວອາຫານສັດເບທາໂກລາວ ຄາດວ່າ ຈະຊ່ວຍເພີ່ມປະສິດທິພາບ ການຜະລິດອາຫານສັດ ທີ່ມີຄຸນນະພາບ ແລະ ປອດໄພ ທັງຍັງເປັນການສົ່ງເສີມ ການໃຊ້ວັດຖຸດິບ ຫົວອາຫານສັດ ໃນ ສປປ ລາວ ແລະ ເປັນສ່ວນໜຶ່ງໃນການຂັບເຄື່ອນ ເສດຖະກິດຂອງປະເທດ ແລະ ສ້າງຄວາມໄດ້ປຽບທາງ ການແຂ່ງຂັນອີກດ້ວຍ. ທັງຈະຍົກລະດັບລະບົບຕ່ອງໂສ້ ການສະໜອງ ດ້ານອາຫານຂອງ ສປປ ລາວ ທັງໃນດ້ານເສດຖະກິດ, ສັງຄົມ ແລະ ສິ່ງແວດລ້ອມ ດ້ວຍການສົ່ງມອບອາຫານທີ່ມີຄຸນນະພາບ ແລະ ຄວາມປອດໄພສູງ ດ້ວຍການຜະລິດ ທີ່ຍືນຍົງ ທັງສ້າງອາຊີບໃຫ້ກັບ ຄົນໃນທ້ອງຖິ່ນ ເຊິ່ງຈະເຮັດໃຫ້ປະຊາຊົນ ໃນ ສປປ ລາວ ມີທາງເລືອກໃຫ້ການ ບໍລິໂພກອາຫານທີ່ດີ, ມີຄຸນນະພາບ ຖືວ່າເປັນສ່ວນໜຶ່ງ ໃນການຮ່ວມ ພັດທະນາ ແລະ ປັບປຸງລະບົບກະເສດອຸດສາຫະກຳ ແລະ ອາຫານໃນ ສປປ ລາວ ໃຫ້ມີມາດຕະ ຖານການຜະລິດໃນລະດັບສາກົນ ແລະ ປອດໄພຕໍ່ຜູ້ບໍລິໂພກ ຕະຫລອດຈົນ ເປັນຖານ ການຜະລິດ ແລະ ສົ່ງອອກໄປຍັງຕ່າງປະເທດໃນອະນາຄົດຕໍ່ໄປ.

ປັັດຈຸບັນ, ໂຮງງານຫົວອາຫານສັດເບທາໂກ ລາວ ມີອັດຕາການເດີນເຄື່ອງຢູ່ທີ່ 70% ຂອງການຜະລິດລວມ ແລະ ຄາດວ່າຈະຜະລິດເຕັມກຳລັງ 100% ຫລື 108.000 ໂຕນພາຍໃນປີ 2025 ແລະ ຍັງຈະມີແຜນຂະຫຍາຍກຳລັງການຜະລິດເປັນ 144.000 ໂຕນຕໍ່ປີ, ໃນປີ 2027 ເພື່ອຮອງຮັບການຂະຫຍາຍ ການຜະລິດປະຊຸສັດ ແລະ ອາຫານໃຫ້ຄອບຄຸມທັງ ສປປ ລາວ ແລະ ສົ່ງອອກໃຫ້ກັບຟາມກະສິກອນ ເຄືອຂ່າຍເບທາໂກ ໃນພື້ນທີ່ພາກອີສານຕອນກາງ ຂອງປະເທດໄທ.

KPL