ຂປລ. ສປປ ລາວ ກໍຄື ກະຊວງສຶກສາທິການ ແລະ ກິລາ ຮ່ວມກັບອົງການ UNESCO ແລະ ແຜນງານການເຊື່ອມໂຍງແບບ ຍືນຍົງຂອງ EU-ASEAN-ໂຄງການ ການສຶກສາຊັ້ນສູງ (SCOPE-HE) ຈັດກອງປະຊຸມນະໂຍບາຍອາຊຽນ ວ່າດ້ວຍການສຶກສາຊັ້ນສູງ 2024 ພາຍໃຕ້ຫົວຂໍ້ “ການມີສ່ວນຮ່ວມໃນ ການຂັບເຄື່ອນວຽກງານ ການສຶກສາຊັ້ນສູງ ໃນການສ້າງຄວາມຍືນຍົງ ແລະ ຄວາມຫລາກຫລາຍ ເພື່ອການເຊື່ອມໂຍງ ແລະ ການມີສ່ວນຮ່ວມຂອງທຸກພາກສ່ວນ” ຂຶ້ນໃນວັນທີ 11 ພະ ຈິກ 2024 ນີ້, ຢູ່ນະຄອນຫລວງວຽງຈັນ ໂດຍມີ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາ ແລະ ກິລາ, ມີຮອງເລຂາທິການໃຫຍ່ ປະຊາຄົມວັດທະນະທໍາ-ສັງຄົມອາຊຽນ, ຫົວໜ້າຝ່າຍຮ່ວມມື, ຄະນະຜູ້ແທນອີຢູ ປະຈຳ ລາວ, ຜູ້ອໍານວຍການພາກພື້ນ, ຫ້ອງການພາກພື້ນຂອງອົງການ UNESCO ປະຈຳບາງກອກ ແລະ ຜູ້ປະສານງານອົງການສະຫະປະຊາຊາດ ພ້ອມດ້ວຍ ຄະນະຜູ້ແທນຈາກປະ ເທດ ອາຊຽນ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ກອງປະຊຸມໃນຄັ້ງນີ້, ໄດ້ເຕົ້າໂຮມເອົາບັນດາຜູ້ສ້າງໂຍບາຍ, ນັກວິຊາການ, ຜູ້ນໍາທາງດ້ານອຸດສາຫະກຳ ແລະ ອົງການຈັດຕັ້ງສາກົນ ຈາກທົ່ວພາກພື້ນອາຊຽນ ເພື່ອຊຸກຍູ້ການຮ່ວມມື ແລະ ແກ້ໄຂສິ່ງທ້າທາຍ ທີ່ປະເຊີນໜ້າກັບການສຶກສາຊັ້ນສູງ, ຄົ້ນຫາຍຸດທະສາດຕ່າງໆ ເພື່ອສ້າງຄວາມເຂັ້ມແຂງ ໃຫ້ບັນດາລະບົບການສຶກສາ ຊັ້ນສູງຂອງອາຊຽນ ແນໃສ່ການສ້າງ ຄວາມຍືນຍົງ, ການປັບຕົວ ແລະ ການມີສ່ວນຮ່ວມຂອງທຸກພາກສ່ວນ ໃນຂົງເຂດການສຶກສາຊັ້ນສູງ.

ໂອກາດດັ່ງກ່າວ, ທ່ານ ຫລ້າວັນ ວົງຄໍາສານ ຫົວໜ້າກົມການສຶກສາຊັ້ນສູງ ກະຊວງສຶກສາທິການ ແລະ ກິລາ ​ໄດ້ໃຫ້ຮູ້ວ່າ: ສປປ ລາວ ໄດ້ຮັບກຽດເປັນເຈົ້າພາບ ຈັດກອງປະຊຸມ ນະໂຍບາຍອາຊຽນ ວ່າດ້ວຍການສຶກສາຊັ້ນສູງ ເປັນຄັ້ງທໍາອິດ ເຊິ່ງເປັນຂີດໝາຍສໍາຄັນ ໃນການກໍານົດນະໂຍບາຍ ດ້ານການສຶກສາຕ່າງໆ ແລະ ຊ່ວຍໃຫ້ປະເທດສະມາຊິກອາຊຽນ ແລະ ອີຢູ ເຮັດວຽກຮ່ວມກັນຢ່າງມີປະສິດທິຜົນ ແນໃສ່ສ້າງການສຶກສາຊັ້ນສູງ ທີ່ເຊື່ອມໂຍງ ແລະ ເຊື່ອມຈອດກັນໃຫ້ຫລາຍຂຶ້ນ ເຊິ່ງໃນໄລຍະ 4 ປີຕໍ່ໜ້າຂະແໜງການກ່ຽວຂ້ອງ ຍັງມີແຜນຈະຈັດກອງປະຊຸມ ແລະ ສົນທະນາທາງດ້ານນະໂຍບາຍຈໍານວນ 6 ຄັ້ງຢູ່ປະເທດສະມາຊິກອາຊຽນ ແລະ ເອີລົບ. ການສົນທະນາເຫລົ່ານີ້ ຈະກວມເອົາບັນດາປະ ເດັນທີ່ສໍາຄັນ ເຊັ່ນ: ການຈ້າງງານ, ທັກສະດີຈິຕອນ ແລະ ການສຶກສາແບບຍືນຍົງ ຕື່ມອີກ.

ກອງປະຊຸມ ໃນຄັ້ງນີ້, ໄດ້ສຸມໃສ່ປຶກສາຫາລືຫລາຍບັນຫາສໍາຄັນ ເປັນຕົ້ນ ການພົວພັນຂອງຜູ້ມີສ່ວນຮ່ວມ ແລະ ຄວາມຫລາກຫລາຍການຂະຫຍາຍໂອກາດ ໃນການເຂົ້າເຖິງການ ສຶກສາຊັ້ນສູງ ແລະຄົ້ນຄວ້າວິທະຍາສາດ, ການສົ່ງເສີມຄວາມສາມາດ ໃນການຈ້າງງານ, ນະວັດຕະກຳທີ່ກ່ຽວຂ້ອງ ກັບການສຶກສາຊັ້ນສູງ, ສິ່ງທ້າທາຍ ແລະ ຄວາມຍືນຍົງ ໃນການຫັນ ເປັນດີຈິຕອນ ໃນຂົງເຂດການສຶກສາ ແລະ ການສົ່ງເສີມການເຄື່ອນຍ້າຍ, ການເຊື່ອມໂຍງລະຫວ່າງພາກພື້ນ ແລະ ສາກົນ.

ທ່ານ ນາງ ແວລີ ສະເມັດ ຫົວໜ້າຝ່າຍຮ່ວມມື, ຄະນະຜູ້ແທນອີຢູ ປະຈຳ ລາວ ໃຫ້ຮູ້ວ່າ: ໂຄງການການສຶກສາຊັ້ນສູງ ຂອງອົງການ SCOPE ມີທຶນປະຕິບັດກິດຈະກຳທັງໝົດ ຈໍານວນ 9,3 ລ້ານໂດລາສະຫະລັດ ເຊິ່ງໄດ້ສະແດງໃຫ້ເຫັນເຖິງ ຄວາມມຸ່ງໝັ້ນຂອງພວກເຮົາ ໃນການປະຕິບັດຄູ່ຮ່ວມມືຍຸດທະສາດ ອາຊຽນ-ອີຢູ (2023-2027) ຜ່ານການເພີ່ມທະວີການ ແລກປ່ຽນລະຫວ່າງ ປະຊາຊົນກັບປະຊາຊົນ ແລະ ການຮ່ວມມືໃນຂົງເຂດສຶກສາ, ວິທະຍາສາດ ແລະ ວັດທະນະທຳ. ພ້ອມນີ້,  ສະຫະພາບເອີລົບ ຍັງມຸ່ງໝັ້ນ ໃນການສືບຕໍ່ເປັນຄູ່ ຮ່ວມມືທີ່ເຂັ້ມແຂງ ກັບປະເທດອາຊຽນ ໃນຂົງເຂດການສຶກສາຊັ້ນສູງ, ໂດຍຜ່ານໂຄງການສຶກສາຊັ້ນສູງ SCOPE, ເຊັ່ນດຽວກັນກັບບັນດາໂຄງການ Erasmus Plus ແລະ Horizon Europe ເຊິ່ງກອງປະຊຸມໃນຄັ້ງນີ້ ຈະສ້າງໂຄງຮ່າງປຶກສາຫາລື ທີ່ມີຄວາມໝາຍ, ປະກອບສ່ວນເຂົ້າໃນ ການບັນລຸການພັດທະນາ ການສຶກສາຊັ້ນສູງອາຊຽນ ໃນປີ 2025.

ຂ່າວ-ພາບ: ທະນູ​ທອງ

KPL