ຂປລ. ກະຊວງແຮງງານງານ ແລະ ສະຫວັດດີການສັງຄົມ (ຮສສ) ​ເປັນ​ເຈົ້າພາບ ຈັດສຳມະນາກ່ຽວກັບແຮງງານ ເຄື່ອນຍ້າຍໃນອາຊຽນຄັ້ງທີ 17 (17th AFML) ພາຍໃຕ້ຫົວຂໍ້: “ວຽກງານເບິ່ງແຍງດູແລ ແລະ ການເຄື່ອນຍ້າຍແຮງງານໃນອາຊຽນ” ໃນລະຫວ່າງວັນທີ 13-14 ພະຈິກ 2024 ຢູ່ນະຄອນ ຫລວງວຽງຈັນ ​ໂດຍ​ມີ ທ່ານ ພົງໄຊສັກ ອິນຖາລາດ ຮອງລັດຖະມົນຕີ ກະຊວງແຮງງານງານ ແລະ ສະຫວັດດີການສັງຄົມ, ມີຜູ້ຕາງໜ້າເຈົ້າໜ້າທີ່ອາວຸໂສແຮງງານເຄື່ອນຍ້າຍອາຊຽນ, ຕາງໜ້າຜູ້ໃຊ້ແຮງງານ ແລະ ຕາງໜ້າຜູ້ອອກແຮງງານ ຂອງບັນດາປະເທດສະມາຊິກອາຊຽນ, ປະເທດຕີມໍ​ເລດສະ​ເຕ ໃນນາມຜູ້ສັງເກດການ, ກອງເລຂາອາຊຽນ, ອົງການແຮງງານສາກົນ (ILO), ອົງການສາກົນເພື່ອການເຄື່ອນ ຍ້າຍຖິ່ນຖານ (IOM), ຄູ່ຮ່ວມພັດທະນາ ແລະ ອົງການຈັດຕັ້ງສາກົນ ແລະ ຄູ່ຮ່ວມພັດທະນາເຂົ້າຮ່ວມ.

ທ່ານ ພົງໄຊສັກ ອິນຖາລາດ ໄດ້ກ່າວວ່າ: ການ​ສໍາ​ມະ​ນາຄັ້ງນີ້ພາຍໃຕ້ຫົວຂໍ້ “ວຽກງານເບິ່ງແຍງດູແລ ແລະ ການເຄື່ອນຍ້າຍແຮງງານໃນອາຊຽນ” ທີ່ໄດ້ກໍານົດ 2 ຫົວຂໍ້ຍ່ອຍເພື່ອສົນທະນາແລກປ່ຽນ ຄື:  ຕອບສະໜອງຄວາມຕ້ອງການໃນວຽກງານເບິ່ງແຍງດູແລ ຜ່ານການເຄື່ອນຍ້າຍແຮງງານ ແລະ ເພີ່ມທະວີການປົກປ້ອງ ແລະ ສົ່ງເສີມສິດທິຂອງຜູ້ອອກແຮງງານ ເຄື່ອນຍ້າຍເບິ່ງແຍງດູແລ ເປັນເວທີສຳມະນາທີ່ສໍາຄັນ ຊຶ່ງຈະໄດ້ຮ່ວມກັນທົບທວນຄືນ ການຈັດຕັ້ງປະຕິບັດ ບັນດາຄຳແນະນຳກ່ຽວກັບ ແຮງງານເຄື່ອນຍ້າຍໃນອາຊຽນ ຈາກກອງປະຊຸມ AFML ຄັ້ງທີ 16 ໃນປີຜ່ານມາ, ນຳສະເໜີ ແລະ ຮ່ວມກັນແລກປ່ຽນບົດຮຽນທີ່ດີ ໃນການຈັດຕັ້ງປະຕິບັດ ວຽກງານການເບິ່ງແຍງດູແລ, ຈັດກຸ່ມສົນທະນາແລກປ່ຽນ ເພື່ອສ້າງເປັນຄຳແນະນຳຈາກເວທີສຳມະນາ ກ່ຽວກັບແຮງງານເຄື່ອນຍ້າຍໃນອາຊຽນ ຄັ້ງທີ 17 ໂດຍປະເທດສະມາຊິກອາຊຽນ, ອົງການຈັດຕັ້ງສາກົນ ແລະ ອົງການຈັດທາງສັງຄົມ. ບັນດາຄໍາແນະນໍາທີ່ໄດ້ຮັບ ຈາກເວທີສຳມະນາກ່ຽວກັບ ແຮງງານເຄື່ອນຍ້າຍ ໃນອາຊຽນຄັ້ງທີ 17 ຄັ້ງນີ້ ຈະເປັນພື້ນຖານໃຫ້ແກ່ຄະນະ ກຳມະການຈັດຕັ້ງປະຕິບັດ ຖະແຫລງການອາຊຽນວ່າດ້ວຍການປົກປ້ອງ ແລະ ສົ່ງເສີມສິດທິຂອງຜູ້ອອກແຮງງານເຄື່ອນຍ້າຍ ນຳໄປຜັນຂະຫຍາຍ.

ທ່ານ ພົງໄຊສັກ ອິນຖາລາດ ໄດ້​ໃຫ້​ຮູ້ອີກວ່າ: ການເພີ່ມຂຶ້ນຂອງຜູ້ອາຍຸສູງ ຢູ່ບັນດາປະເທດພັດທະນາ ສົ່ງຜົນເຮັດໃຫ້ຂາດແຂນແຮງງານ ໂດຍສະເພາະ ຜູ້ອອກແຮງງານ ໃນຂົງເຂດເບິ່ງແຮງງານດູແລ. ໃນປີ 2015 ທົ່ວໂລກຕ້ອງການຜູ້ເບິ່ງແຍງ ຜູ້ອາຍຸສູງຫລາຍກວ່າ 110 ລ້ານຄົນ ແລະ ຮອດປີ 2030 ຕ້ອງການປະມານ 163 ລ້ານຄົນ ແລະ ໃນອາຊີ ຜູ້ອາຍຸສູງເພີ່ມຂຶ້ນຈາກ 3,7% ໃນປີ 2015 ເປັນ 4,9% ໃນປີ 2030. ສະນັ້ນ, ເພື່ອເປັນການສົ່ງເສີມ ການເຄື່ອນຍ້າຍແຮງງານ ໃນຂົງເຂດເບິ່ງແຍງດູເເລ ປະເທດຮັບ ຕ້ອງເອົາໃຈໃສ່ໃນການສ້າງເງື່ອນໄຂ ດຶງດູດຜູ້ອອກແຮງງານເຄື່ອນຍ້າຍ ໃນຂົງເຂດເບິ່ງແຍງດູເເລ. ໃນຂະນະດຽວກັນ ປະເທດສົ່ງ ຕ້ອງສ້າງເງື່ອນໄຂສະດວກ ໃຫ້ແກ່ເຄື່ອນຍ້າຍ ລວມທັງຮັບປະກັນ ດ້ານຄຸນນະພາບຂອງຜູ້ເບິ່ງແຍງດູເເລ.

ດັ່ງນັ້ນ, ບັນດາຄໍາແນະນໍາ ຈາກເວທີສຳມະນາກ່ຽວກັບ ແຮງງານເຄື່ອນຍ້າຍໃນອາຊຽນ ຄັ້ງທີ 17 (17th AFML) ຈະກາຍເປັນອົງປະກອບທີ່ສຳຄັນໃຫ້ແກ່ການປັບປຸງ ແລະ ພັດທະນານະໂຍບາຍກ່ຽວກັບ ວຽກງານເບິ່ງແຍງດູແລໃນລະດັບປະເທດ, ໃນຂອບການຮ່ວມມືສອງຝ່າຍ ແລະ ພາກພື້ນ ໂດຍຫັນເປັນແຜນງານ, ໂຄງການ ແລະ ກິດຈະກຳ ເພື່ອສ້າງເງື່ອນໄຂສະດວກ ແລະ ປົກປ້ອງຜູ້ເບິ່ງແຍງດູເເລ ບົນພື້ນຖານຖະແຫລງການອາຊຽນ ວ່າດ້ວຍການປົກປ້ອງ ແລະ  ສົ່ງເສີມສິດທິຂອງຜູ້ອອກແຮງງານເຄື່ອນຍ້າຍ.

ຂ່າວ: ສົມຫວັງ

ພາບ: ຂ່າວສານ ຮສສ

KPL