ຂປລ. ບໍລິສັດ ສະຕາໂທລະຄົມ (ຢູນີເທວ) ຈັດພິທີສະເຫລີມສະຫລອງ ວັນສ້າງຕັ້ງບໍລິສັດ ຄົບຮອບ 15 ປີ (16/10/2009-16/10/2024) ໃນວັນທີ 19 ພະຈິກ 2024 ​ໂດຍມີ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ, ທ່ານ ພົນເອກ ຟານ ວັນ ຢາງ ລັດຖະມົນຕີກະຊວງປ້ອງກັນປະເທດ ແຫ່ງ ສສ ຫວຽດນາມ, ມີທູດຫວຽດນາມ ປະຈຳ ລາວ, ບັນດາລັດຖະມົນຕີ, ເຈົ້າຄອງນະຄອນຫລວງວຽງຈັນ ແລະ ພາກສ່ວນກ່ຽວຂ້ອງ ພ້ອມແຂກຖືກເຊີນ ເຂົ້າຮ່ວມ.

ໂອກາດນີ້, ທ່ານ ພົນໂທ ວົງຄຳ ພົມມະກອນ ຮອງລັດຖະມົນຕີ ກະຊວງປ້ອງກັນປະເທດ ແຫ່ງ ສປປ ລາວ, ປະທານສະພາບໍລິຫານ ບໍລິສັດສະຕາ ໂທລະຄົມ ໃຫ້ຮູ້ວ່າ: ໃນປີ 2009 ບໍລິສັດ ສະຕາລະຄົມ ໄດ້ສຳເລັດການກໍ່ສ້າງລະບົບເຄື່ອຂ່າຍໂທລະຄົມ ແລະ ເປີດໃຫ້ບໍລິການຢ່າງເປັນທາງການ ໃນທົ່ວປະເທດ ພາຍໃຕ້ເຄື່ອງໝາຍການຄ້າ ຢູນີເທວ (Unitel) ເຊິ່ງຕະຫລອດໄລຍະ 15 ປີຜ່ານມາ Unitel ໄດ້ກາຍເປັນຜູ້ປະກອບການເຄືອຂ່າຍ ໂທລະຄົມທີ່ໃຫຍ່ກວ່າໝູ່ ຢູ່ ສປປ ລາວ ລວມທັງເລກໝາຍຜູ້ຊົມໃຊ້, ລາຍຮັບ ແລະ ໂຄງລ່າງພື້ນຖານ, ເປັນໜຶ່ງໃນວິສາຫະກິດທີ່ມອບພັນທະໃຫ້ລັດຖະ ບານ ຫລາຍທີ່ສຸດ, ໄດ້ຮັບການຕີລາຄາສູງ ຈາກລັດຖະບານ ແລະ ກະຊວງປ້ອງກັນປະເທດ ຂອງສອງປະເທດ, ເປັນວິສາຫະກິດຕົວແບບທີ່ປະສົບຜົນສໍາເລັດ ກ່ຽວກັບການຮ່ວມມືດໍາເນີນ ທຸລະກິດຂອງສອງປະເທດ ລາວ ແລະ ຫວຽດນາມ ເຊິ່ງ Unitel ສາມາດກໍ່ສ້າງລະບົບເຄື່ອຂ່າຍໂທລະຄົມທີ່ກວ້າງ ຂວາງ, ລວມມີຫລາຍກ່ວາ 9.000 ສູນສະຖານີ, ຮັບສົ່ງສັນຍານຈໍານວນ 38.000 km ສາຍສົ່ງອັອບຕິກ, ອັດຕາສ່ວນພື້ນທີ່ປົກຄຸມສັນຍານກວມເອົາ 91% ຂອງພື້ນທີ່ທົ່ວປະເທດ. ໃນນັ້ນ, ກວມເອົາ 83% ຂອງປະຊາກອນໃນທົ່ວປະເທດ, ມີສັນຍານ 4G, ກຳລັງເປີດ 5G ເຮັດໃຫ້ປະເທດ ສປປ ລາວ ກາຍເປັນໜຶ່ງໃນປະເທດ ທີ່ມີລະບົບໂທລະຄົມທີ່ດີທີ່ສຸດ ໃນບັນດາປະເທດຕາເວັນອອກສຽງໃຕ້. ເຖິງແມ່ນວ່າໃນທ້ອງຕະຫລາດຂອງລາວ ມີຜູ້ປະກອບການທາງດ້ານໂທລະຄົມເຖິງ 5 ເຄືອຂ່າຍ ທີ່ແຂ່ງຂັນກັນ, ແຕ່ Unitel ກໍຍັງກາຍເປັນເຄື່ອຂ່າຍ ທີ່ມີລູກຄ້າຜູ້ຊົມໃຊ້ເຖິງ 3,6 ລ້ານຄົນ.

ພ້ອມນີ້, Unitel ຍັງໄດ້ປະກອບສ່ວນຊ່ວຍເຫລືອສັງຄົມ ໃນການສ້າງວຽກເຮັດງານທໍາ ໃຫ້ປະຊາຊົນລາວ ຫລາຍກວ່າ 27.000 ຄົນ, ຊ່ວຍລັດຖະບານ ໃນການຫັນປ່ຽນເປັນດີຈິຕອນ ກໍ່ສ້າງລະ ບົບໂຄງລ່າງພື້ນຖານລັດຖະບານເອເລັກໂຕຣນິກ ແລະ ໄດ້ມີບັນດາໂຄງການພິເສດໃຫ້ ກະຊວງສາທາລະນາສຸກ, ກະຊວງສຶກສາ ທິການ ແລະ ກິລາ, ປະກອບສ່ວນຊ່ວຍເຫລືອສັງຄົມ ເປັນຕົ້ນ ກໍ່ສ້າງເສັ້ນທາງ, ຂົວ, ສ້າງໂຮງໝໍ, ໂຮງຮຽນ, ມອບທຶນການສຶກສາ ໃຫ້ຜູ້ດ້ອຍໂອກາດ, ຊ່ວຍເຫລືອປະຊາ ຊົນ ທີ່ຖືກຜົນກະທົບຈາກໄພທຳມະຊາດ ແລະ ອື່ນໆ. ບັນດາຜົນງານທີ່ພົ້ນເດັນທີ່ Unite ຍາດມາໄດ້ນັ້ນ, ເຮັດໃຫ້ Unitet ໄດ້ຮັບຫລຽນໄຊ ອິດສະຫລະຊັ້ນ I, ຫລຽນໄຊພັດທະນາຊັ້ນ I ຈາກລັດຖະບານລາວ, ໄດ້ຮັບຫລຽນໄຊແຮງງານຊັ້ນ III ຈາກລັດຖະບານຫວຽດນາມ, ໃບຍ້ອງຍໍຈາກລັດຖະບານລາວ, ທຸງແຂ່ງຂັນ ຈາກກະຊວງປ້ອງກັນປະເທດ ຫວຽດນາມ ແລະ ບັນດາລາງວັນຍ້ອງຍໍ ລະດັບສາກົນຮັກຫລາຍໆລາງວັນ.

ໃນໂອກາດດັ່ງກ່າວ, ລັດຖະບານລາວ ຍັງໄດ້ ປະດັບຫລຽນໄຊແຮງງານຊັ້ນ I, ຊັ້ນ II ແລະ ຊັ້ນ III ໃຫ້ບໍລິສັດດັ່ງກ່າວ, ທີ່ມີຜົນງານດີເດັ່ນປະກອບສ່ວນດ້ານເຫື່ອແຮງ, ສະຕິປັນຍາ ເຂົ້າໃນການປະຕິບັດໜ້າທີ່ ວຽກງານວິຊາສະເພາະ ​ແລະ ຊ່ວຍເຫລືອທຶນຮອນ ພັດທະນາເສດຖະກິດ-ສັງຄົມ ໃນໄລຍະຜ່ານມາ, ໃຫ້ກຽດປະດັບຫລຽນໂດຍ ທ່ານ ພົນເອກ ຈັນສະໝອນ ຈັນຍາລາດ.

ຂ່າວ: ທະນູທອງ

ພາບ: ເກດສະໜາ

KPL