ຂປລ. ເມືອງຕຸ້ມລານ ຮ່ວມກັບເມືອງວາປີ, ເມືອງເລົ່າງາມ, ເມືອງຄົງເຊໂດນ ແລະ ເມືອງລະ ຄອນເພັງ ແຂວງສາລະວັນ ຈັດກອງປະຊຸມໜູນວຽນ ເພື່ອປຶກສາຫາລື ສົ່ງເສີມການລ້ຽງໄກ່ລາດ ພັນພື້ນເມືອງ ເພື່ອສະໜອງຕະຫລາດພາຍໃນ ໃຫ້ພຽງພໍກັບຄວາມຕ້ອງການ ໃນວັນທີ 2 ເມສາ 2025 ໂດຍການເປັນປະທານຮ່ວມຂອງ ທ່ານ ບົວແກ້ວ ວົງຄຳຈັນ ເຈົ້າເມືອງຕຸ້ມລານ ແລະ ທ່ານ ນາງ ສອນທິດາ ອຸນາພົນ ປະທານບໍລິສັດ ພັດທະນາ ແຫລ່ງທ່ອງທ່ຽວ ນໍ້າຕົກຕາດເຍືອງ ຫລັກ 40 ເມືອງປາກຊ່ອງ ແຂວງຈຳປາສັກ, ມີເຈົ້າເມືອງ, ຮອງເຈົ້າເມືອງ, ຜູ້ຕາງໜ້າຈາກຫ້ອງວ່າການເມືອງ, ຫ້ອງການກະສິ ກຳ ແລະ ປ່າໄມ້ເມືອງ, ຄອບຄົວຕົວແບບຜູ້ລ້ຽງໄກ່ ​ແລະ ພາກສ່ວນກ່ຽວຂ້ອງເຂົ້າຮ່ວມ. ​ເພື່ອປຶກສາຫາລື, ຖອດຖອນບົດຮຽນກັນ ພາຍຫລັງມີໂຄງການ ຮ່ວມມືສົ່ງເສີມການລ້ຽງໄກ່ລາດເປັນສິນຄ້າ.

​ໃນກອງປະຊຸມ ຜູ້ຕາງໜ້າຈາກ 5 ເມືອງດັ່ງກ່າວ ໄດ້ລາຍງານສະພາບການລ້ຽງໄກ່ລາດ ຢູ່ເມືອງຂອງຕົນ, ພ້ອມທັງສະເໜີວິທີການ, ຂໍ້ສະດວກ, ຂໍ້ຫຍຸ້ງຍາກ ໃນການລ້ຽງໄກ່ລາດ, ລວມເຖິງສິ່ງທ້າທາຍ ແລະ ສິ່ງທີ່ຂາດເຂີນຕ່າງໆ ທີ່ເມືອງ ກໍຄື ປະຊາຊົນກຸ່ມລ້ຽງໄກ່ ມີຄວາມຕ້ອງການ ເພື່ອນຳໃຊ້ເຂົ້າໃນການລ້ຽງໄກ່ ໃຫ້ມີປະສິດທິພາບ ແລະ ປະສິດທິຜົນ. ພ້ອມນີ້, ກອງປະຊຸມຍັງໄດ້ປຶກສາຫາລື, ແລກປ່ຽນປະສົບການ ເພື່ອຊອກຫາຊ່ອງທາງໃໝ່ໆ ໃນການພັດທະນາການລ້ຽງໄກ່ລາດພັນພື້ນເມືອງ ໃຫ້ມີຄວາມໝັ້ນຄົງ, ຍືນຍົງ, ໃຫ້ຜົນຜະລິດສູງ ແລະ ສາມາດຕອບສະໜອງ ໃຫ້ພຽງພໍກັບຄວາມຮຽກ ຮ້ອງຕ້ອງການຂອງຕະຫລາດ, ກ້າວໄປເຖິງເປັນສິນຄ້າສົ່ງອອກໄປຕ່າງປະເທດ ໃນອະນາຄົດ. ພ້ອມນັ້ນ, ກອງປະຊຸມຍັງໄດ້ເຫັນດີເປັນເອກະພາບກັນ ໃນຫລາຍບັນຫາສຳຄັນ ເປັນຕົ້ນ ການສ້າງກອງທຶນຂອງບ້ານ ໂດຍການເກັບຄ່າບໍລິການຄົວໄກ່, ທັງໄກ່ລາດ ແລະ ທຸກປະເພດໄກ່ ທີ່ນໍາມາຄົວຢູ່ນໍາກຸ່ມ ປຸງແຕ່ງ ໃນລາຄາ 4.000 ກີບຕໍ່ໂຕ. ໃນນັ້ນ, ແບ່ງເຂົ້າເປັນກອງທຶນຂອງບ້ານ 2.000 ກີບ. ພ້ອມທັງ ໃຫ້ຫ້ອງການກະສິກຳ-ປ່າໄມ້ເມືອງ ຂຽນແຜນສ້າງທະນາຄານວັກຊີນ ເພື່ອສະໜອງໃຫ້ກຸ່ມລ້ຽງໄກ່, ສ້າງຕັ້ງໂຮງງານປຸງແຕ່ງຫົວອາຫານ ແລະ ອື່ນໆ ໃຫ້ເປັນຮູບປະທຳໂດຍໄວ.

ທ່ານ ນາງ ສອນທິດາ ອຸນາພົມ ໄດ້ມີຄໍາເຫັນວ່າ: ການຊຸກຍູ້ສົ່ງເສີມປະຊາຊົນລ້ຽງໄກ່ລາດ ພັນພື້ນເມືອງເປັນສິນຄ້າ ຢູ່ບັນດາເມືອງ ໃນແຂວງສາລະວັນ ໄດ້ເລີ່ມ​ປະຕິບັດມາແຕ່ປີ 2023 ໂດຍໄດ້ແບ່ງຄວາມຮັບຜິດຊອບໃຫ້ບັນດາເມືອງ ລ້ຽງໄກ່ລາດ ແບບເປັນຕ່ອງໂສ້ ເປັນຕົ້ນ ເມືອງຄົງເຊໂດນ ໃຫ້ເປັນເມືອງຈຳໜ່າຍ-ເມືອງຂາຍ, ການລ້ຽງເປັນສຳຮອງ; ເມືອງລະຄອນເພັງ ເປັນເມືອງເພາະພັນລູກໄກ່ ສະໜອງໃຫ້ບັນດາເມືອງທີ່ລ້ຽງໄກ່; ເມືອງຕຸ້ມລານ ແມ່ນເມືອງແມ່ພັນໄກ່ ກໍຄື ຄັດຈ້ອນເອົາແມ່ພັນໄກ່ ທີ່ມີເອກລັກພື້ນບ້ານດັ້ງເດີມ ຂອງເມືອງທີ່ມີຊື່ສຽງ ໄປປະສົມພັນ ໃຫ້ເມືອງລະຄອນເພັງ, ພ້ອມທັງລ້ຽງໄກ່ລາດ ສະໜອງໃຫ້ກຸ່ມລ້ຽງໄກ່ ຕື່ມອີກ; ເມືອງວາປີ ແມ່ນເມືອງລ້ຽງໄກ່ລາດພື້ນເມືອງ ຈໍາໜ່າຍໃຫ້ເມືອງຄົງເຊໂດນ. ສຳລັບ ເມືອງເລົ່າງາມ ແມ່ນໃຫ້ເປັນຫລັກ ໃນການເຮັດໂຮງງານຜະລິດຫົວອາຫານ ສະໜອງໃຫ້ບັນດາເມືອງ ເນື່ອງຈາກເປັນ ເມືອງກະສິກຳ (ມີສິ່ງເສດເຫລືອຈາກພືດຜັກຕ່າງໆ) ພ້ອມທັງລ້ຽງໄກ່. ທັງນີ້, ກໍເພື່ອຕອບສະໜອງຄວາມຕ້ອງການວັດຖຸດິບ ກໍຄື ໄກ່ລາດ ໃຫ້ແກ່ຮ້ານປີ້ງໄກ່ນາປົ່ງ ເຊິ່ງເປັນຜະລິດຕະພັນ ທີ່ເປັນເອກະລັກ ແລະ ມີຊື່ສຽງຂອງແຂວງສາລະວັນ ໂດຍບໍລິສັດພັດທະນາ ແຫລ່ງທ່ອງທ່ຽວ ນໍ້າຕົກຕາດເຍືອງ ໄດ້ໃຫ້ການສະໜັບສະໜູນໃນດ້ານຕ່າງໆ ເປັນຕົ້ນ ດ້ານເຕັກນິກວິຊາການ, ແນະນຳແນວທາງຕ່າງໆ, ຊຸກຍູ້ສົ່ງເສີມໃຫ້ພໍ່ແມ່ປະຊາຊົນ ສ້າງສູນເພາະພັນແນວພັນໄກ່ກັບທີ່ ເຊິ່ງເປັນສູນລວມຂອງບ້ານ ແລະ ສ້າງເປັນສູນລວມຕະຫລາດຈໍາໜ່າຍ, ທັງຄໍ້າປະກັນທາງດ້ານລາ ຄາ. ພ້ອມນີ້, ຍັງໄດ້ສະໜອງຕູ້ຟັກໄຂ່, ວັກຊີນກັນພະຍາດ, ທັງເປັນຕະຫລາດຮອງຮັບ ຕື່ມອີກ. ທັງໝົດນີ້, ກໍ​ເພື່ອແນໃສ່ ສ້າງການລ້ຽງໄກ່ລາດພື້ນເມືອງ ແບບເປັນຕ້ອງໂສ້ ລະຫວ່າງເມືອງຕໍ່ເມືອງ ເພື່ອສົ່ງເສີມອາຊີບທີ່ເປັນມູນເຊື້ອ, ສ້າງວຽກເຮັດ ແລະ ສ້າງລາຍໄດ້ໃຫ້ປະຊາຊົນພາຍໃນເມືອງ ຕິດພັນກັບການທ່ອງທ່ຽວ ໃຫ້ເປັນຮູບປະທຳ ເທື່ອລະກ້າວ.

​ໂອກາດ​ນີ້, ທ່ານ ບົວແກ້ວ ວົງຄຳຈັນ ໄດ້ສະແດງຄວາມດີໃຈ ທີ່ໄດ້ເປັນເຈົ້າພາບຈັດກອງປະຊຸມ ເພື່ອຖອດຖອນບົດຮຽນ ກ່ຽວກັບການລ້ຽງໄກ່ລາດ ຮ່ວມກັບບັນດາເມືອງອ້ອມຂ້າງ ທີ່ກ່ຽວຂ້ອງໃນຄັ້ງນີ້ ເຊິ່ງຈະເປັນຜົນດີ ແລະ ສ້າງປະໂຫຍດໃຫ້ກັບເມືອງຕຸ້ມລານ ໃນການນຳເອົາບົດຮຽນ ທີ່ຖອດຖອນໄດ້ໃນຄັ້ງນີ້ ໄປໜູນໃຊ້ ກໍຄື ໄປແນະນຳ-ນຳພາປະຊາຊົນ ກຸ່ມລ້ຽງໄກ່ລາດ ໃຫ້ຖືກຕາມຫລັກການ, ຖືກຕາມເຕັກນິກວິຊາການ ກ້າວໄປເຖິງການລ້ຽງແບບມີເຕັກນິກທີ່ທັນສະໄໝ ເພື່ອເຮັດໃຫ້ການລ້ຽງໄກ່ລາດ ຢູ່ພາຍໃນເມືອງ ໄດ້ຮັບຜົນດີຂຶ້ນກວ່າເກົ່າ. ເມືອງຕຸ້ມລານ ເປັນເມືອງທີ່​ມີມູນເຊື້ອການລ້ຽງໄກ່ລາດພັນພື້ນເມືອງ ມາແຕ່ບູຮານ, ມາຮອດປັດຈຸບັນ ມີກຸ່ມຜູ້ລ້ຽງໄກ ທັງໝົດ 10 ກຸ່ມ, 80 ກວ່າຄອບຄົວ, ສາມາດສ້າງລາຍຮັບ, ສ້າງຊີວິດການເປັນຢູ່ໃຫ້ກຸ່ມຜູ້ລ້ຽງດີຂຶ້ນເທື່ອລະກ້າວ ເຊິ່ງການສົ່ງເສີມການລ້ຽງໄກລາດ ພື້ນເມືອງ ໃນແຂວງສາລະວັນ ກໍຄື ຢູ່ເມືອງຕຸ້ມລານ ຖືເປັນໜຶ່ງໃນແນວທາງ ທີ່ສຳຄັນ ທີ່ສາມາດຊ່ວຍຍົກລະດັບຄຸນນະພາບຊີວິດການເປັນຢູ່ ຂອງປະຊາຊົນ ໃຫ້ດີຂຶ້ນເທື່ອລະກ້າວ.

ຂ່າວ-ພາບ: ທະນູທອງ

KPL