ຂປລ. ໃນວັນທີ 24 ກໍລະກົດ 2025 ຜ່ານມາ, ຄະນະຜູ້ແທນ  ຄະນະໂຄສະນາອົບຮົມສູນກາງພັກ ນຳໂດຍ ທ່ານ ລາວປາວຊົ່ງ ນະວົງໄຊ ຮອງຫົວໜ້າຄະນະໂຄສະນາ ອົບຮົມສູນກາງພັກ, ພ້ອມດ້ວຍຫົວໜ້າກົມ, ຮອງກົມ ອ້ອມຂ້າງຄະນະໂຄສະນາອົບຮົມສູນກາງພັກ ໄດ້ເຂົົ້າຮ່ວມແລກປ່ຽນ ແລະ ຢ້ຽມຊົມໂຮງງານເບຍລາວ ຢູ່ນະ ຄອນຫລວງວຽງຈັນ ໃຫ້ກຽດຕ້ອນຮັບໂດຍ ທ່ານ ສິດທິໄຊ ເກດຕະວົງ ຜູ້ອຳນວຍການຝ່າຍກິດຈະການອົງກອນ, ສັງຄົມ ແລະ ຄວາມຍືນຍົງ ບໍລິສັດເບຍລາວ ແລະ ພາກສ່ວນກ່ຽວຂ້ອງ ຂອງບໍລິສັດ ເບຍລາວ ເຂົ້າຮ່ວມ ແລະ ໄດ້ຢ້ຽມຊົມ ຂະບວນການຜະລິດ ນ້ຳດື່ມ, ຜະລິດເບຍ ແລະ ໄດ້ເຂົ້າໃຈເຖິງທຸລະກິດ ແລະ ບົດບາດຂອງ ບໍລິສັດເບຍລາວ ໃນການຊ່ວຍຂັບເຄື່ອນ ການພັດທະນາ ເສດຖະກິດ-ສັງຄົມ ຂອງ ສປປ ລາວ ຜ່ານນະວັດຕະກຳ ແລະ ຄວາມເປັນຜູ້ນຳທີ່ມີຄວາມຮັບຜິດຊອບ.

ໂອກາດນີ້, ທ່ານ ສິດທິໄຊ ເກດຕະວົງ ໄດ້ຍົກໃຫ້ເຫັນ ບົດບາດ ແລະ ພາບລວມຂອງບໍລິສັດ ເບຍລາວ, ລວມເຖິງຂະບວນການຜະລິດ ແລະ ການສົ່ງເສີມຜະລິດຕະພັນພາຍໃນ ຫລື GDP ຂອງປະເທດ, ຍົກໃຫ້ເຫັນ ລະບົບພະລັງງານສະອາດ, ການສົ່ງເສີມການປູກເຂົ້າແບບຍືນຍົງຂອງບໍລິສັດ ເພື່ອນຳມາເປັນວັດຖຸດິບ ໃນການປຸງແຕ່ງເບຍ ເຊິ່ງຊ່ວຍຍົກລະດັບການ ປູກເຂົ້າ ຂອງຊາວນາ ໃນທ້ອງຖິ່ນ ແລະ ການອະນຸລັກສິ່ງແວດລ້ອມ, ພ້ອມທັງ ນໍາສະເໜີແນວທາງ ການການຍົກລະດັບຜະລິດ ຕະພັນເບຍລາວ ໃຫ້ໄປສູ່ເວທີໂລກ.

ທ່ານ ດຳໝີ ສິງດວງຈັນ ຜູ້ອຳນວຍການຝ່າຍພົວພັນລັດຖະບານ ແລະ ບໍລິຫານ ບໍລິສັດເບຍລາວ ໄດ້ໃຫ້ຮູ້ວ່າ: ບໍລິສັດເບຍລາວ ມີໂຮງງານຜະລິດ ທັງໝົດ 3 ແຫ່ງ, ປະກອບມີ 5 ກຸ່ມຜະລິດຕະພັນຫລັກ ທີ່ລ້ວນແຕ່ເປັນຜະລິດຕະພັນຊັ້ນນຳ, ມີຊ່ອງທາງການຈັດຈຳໜ່າຍ ທີ່ມີຕົວແທນຈຳໜ່າຍ ຫລາຍກວ່າ 200 ຕົວແທນ ແລະ ລົດຂົນສົ່ງທີ່ພ້ອມກະຈາຍສິນຄ້າ ໃນບັນດາຕົວເມືອງໃຫຍ່ 600 ກວ່າຄັນໃນທຸກໆມື້ ໂດຍມີຕາໜ່າງການຈັດຈຳໜ່າຍທີ່ກວ້າງຂວາງ ຜ່ານໂຄງການສົ່ງເສີມຄູ່ຮ່ວມທຸລະກິດ ທີ່ແໜ້ນແຟ້ນ ແລະ ມີລະບົບອອນໄລ ທີ່ທັນສະໄໝ, ພ້ອມລະບົບຈັດສົ່ງ ທີ່ເຂົ້າເຖິງທຸກພື້ນທີ່ຫ່າງໄກ ໃນທົ່ວປະເທດ. ພ້ອມນີ້, ເບຍລາວ ຍັງໄດ້ກາຍເປັນທີ່ນິຍົມ ໃນຕະຫລາດສາກົນ ດ້ວຍການສົ່ງອອກຫລາຍກວ່າ 14 ລ້ານລິດ, ຜ່ານ 21 ຕົວແທນຈຳໜ່າຍ ໃນ 15 ປະເທດທົ່ວໂລກ ສ້າງລາຍຮັບຫລາຍກວ່າ 13 ລ້ານໂດລາສະຫະລັດ. ພ້ອມນັ້ນ, ບໍລິສັດເບຍລາວ ຍັງໄດ້ເສຍພາສີອາກອນ ໃຫ້ລັດຖະບານ ລາຍທີ່ສຸດ ສູງເຖິງ 5.259 ຕື້ກີບ ຫລື ຫລາຍກວ່າ 240 ລ້ານກີບ ໃນປີ 2024.

ໃນໄລຍະຜ່ານມາ ບໍລິສັດເບຍລາວ ໄດ້ປະກອບສ່ວນຊຸກຍູ້, ສົ່ງເສີມຊ່ວຍເຫລືອ ສັງຄົມລາວ ໃນຫລາຍໆດ້ານ ເປັນຕົ້ນ ດ້ານການສຶກສາ, ກິລາ, ສາທາລະນະສຸກ, ແກ້ໄຂຄວາມ ທຸກຍາກ, ແກ້ໄຂໄພພິບັດຕ່າງໆ, ບຸນປະເພນີ ແລະ ງານສຳຄັນຕ່າງໆ ທີ່ພັກ, ລັດຖະບານ ຈັດຂຶ້ນ. 

ຂ່າວ: ທະນູທອງ

ພາບ: ຂັນໄຊ

KPL