ຂປລ
ສປປ ລາວ ສືບຕໍ່ແກ້ໄຂສະພາບຄວາມຫຍຸ້ງຍາກດ້ານເສດຖະກິດ ແລະ ໄພເງິນເຟີ້ຢ່າງ ເພື່ອຫລຸດຜ່ອນຜົນກະທົບໂດຍລວມໃນສັງຄົມຂະນະທີ່ບັນດາ 10 ປະເທດ ສະມາຊິກອາຊຽນກໍພວມຜະເຊີນໜ້າໄພເງິນເຟີ້ເຊັ່ນກັນ.
*ສປປ ລາວ ສືບຕໍ່ແກ້ໄຂສະພາບຄວາມຫຍຸ້ງຍາກດ້ານເສດຖະກິດ ແລະ ໄພເງິນເຟີ້ຢ່າງ ເພື່ອຫລຸດຜ່ອນຜົນກະທົບໂດຍລວມໃນສັງຄົມຂະນະທີ່ບັນດາ 10 ປະເທດ ສະມາຊິກອາຊຽນກໍພວມຜະເຊີນໜ້າໄພເງິນເຟີ້ເຊັ່ນກັນ. ຫລ້າສຸດໃນວັນທີ 7 ມິຖຸນາ 2024 ຄະນະກໍາມະການນະໂຍບາຍເງິນຕາ (ຄນງ) (Monetary Policy Committee) ໄດ້ດໍາເນີນກອງປະຊຸມຄັ້ງທີ 1 ຂອງປີ 2024 ໂດຍການເປັນປະທານຂອງ ທ່ານ ບຸນເຫລືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ, ປະທານຄະນະກໍາມະການນະໂຍບາຍເງິນຕາ, ມີຮອງປະທານຄະນະກໍາມະການ, ກໍາມະການ ແລະ ແຂກທີ່ຖືກເຊີນເຂົ້າຮ່ວມ.
ກອງປະຊຸມ ຄນງ ຄັ້ງນີ້ ແມ່ນໄດ້ປະເມີນສະພາບເສດຖະກິດ ແລະ ການຈັດຕັ້ງປະຕິບັດນະໂຍບາຍເງິນຕາໃນໄລຍະ 5 ເດືອນຕົ້ນປີ 2024 ແລະ ກຳນົດທິດທາງການຈັດຕັ້ງປະຕິບັດນະໂຍບາຍເງິນຕາໃນໄລຍະ 7 ເດືອນທ້າຍປີ 2024. ໃນໄລຍະ 5 ເດືອນຕົ້ນປີ 2024 ເສດຖະກິດ-ການເງິນ ສປປ ລາວ ໄດ້ຜະເຊີນກັບຄວາມທ້າທາຍຫລາຍດ້ານທັງສະພາບຢູ່ສາກົນເຊັ່ນ: ຫລາຍປະເທດຍັງມີອັດຕາເງິນເຟີ້ ໃນລະດັບສູງ, ຕະຫລາດການເງິນຍັງຜັນຜວນເຮັດໃຫ້ທະນາຄານກາງຂອງປະເທດທີ່ພັດທະນາແລ້ວ ຍັງສືບຕໍ່ປະຕິບັດນະໂຍບາຍເງິນຕາແບບຮັດກຸມ ໂດຍຮັກສາອັດຕາດອກເບ້ຍນະໂຍບາຍໄວ້ໃນລະດັບສູງ ໂດຍສະເພາະທະນາຄານກາງຂອງ ສ ອາເມລິກາ ແລະ ສະພາບຢູ່ພາຍໃນ ສປປ ລາວເອງ ໂດຍສະເພາະຄວາມບໍ່ສົມດູນຂອງລະບົບເສດຖະກິດ, ບັນຫາອັດຕາເງິນເຟ້ີສູງ ແລະ ເງິນກີບອ່ອນຄ່າ; ສະນ້ັນ, ທະນາຄານແຫ່ງ ສປປ ລາວ ຈຶ່ງ ໄດ້ນໍາໃຊ້ເຄື່ອງມືນະໂຍບາຍເງິນຕາໃນທິດທາງທີ່ຮັດກຸມຫລາຍຂຶ້ນ ໂດຍໄດ້ປັບເພີ່ມອັດຕາດອກເບ້ຍພື້ນຖານຂອງທະນາຄານແຫ່ງ ສປປ ລາວ ສະກຸນເງິນກີບ ຈາກ 7,5% ມາເປັນ 8,5% ຕໍ່ປີ; ແລະ ໄດ້ສືບຕໍ່ຮັກສາອັດຕາສ່ວນເງິນແຮຝາກບັງຄັບໄວ້ໃນລະດັບ 8% ສຳລັບສະກຸນເງິນກີບ ແລະ 10% ສຳລັບເງິນຕາຕ່າງປະເທດ.
ກອງປະຊຸມໄດ້ຕີລາຄາສະພາບ ເສດຖະກິດ-ການເງິນໃນໄລຍະ 7 ເດືອນຕໍ່ໜ້າ ຍັງຈະສືບຕໍ່ຜະເຊີນກັບສິ່ງທ້າທາຍຫລາຍດ້ານ ຈາກທັງສະພາບຂອງສາກົນຍັງມີຄວາມບໍ່ແນ່ນອນທາງດ້ານການດຳເນີນນະໂຍບາຍເງິນຕາຂອງຫລາຍປະເທດ; ລາຄານຳ້ມັນ ແລະ ຕະຫລາດເງິນຍັງສືບຕໍ່ຜັນຜວນ; ສົມທົບກັບສະພາບພາຍໃນຍັງມີຄວາມກົດດັນຫລາຍດ້ານເຊັ່ນ: ດຸນການຄ້າ, ພັນທະການຊຳລະກັບຕ່າງປະເທດກົດດັນຕໍ່ອັດຕາແລກປ່ຽນກະທົບຕໍ່ອັດຕາເງິນເຟີ້ທີ່ຍັງຢູ່ໃນລະດັບສູງ25%. ດັ່ງນັ້ນ, ທະນາຄານແຫ່ງ ສປປ ລາວ ຈະສືບຕໍ່ດຳເນີນນະໂຍ ບາຍເງິນຕາໃນທິດທາງທີ່ຮັດກຸມ ໂດຍ ຄນງ ມີມະຕິ 5 ຂໍ້ຄື: 1. ປັບ ຂຶ້ນອັດຕາດອກເບ້ຍພື້ນຖານຂອງ ທະນາຄານແຫ່ງ ສປປ ລາວ ສະກຸນ ເງິນກີບ ຈາກ 8,5% ຕໍ່ປີ ເປັນ 10% ຕໍ່ປີ; 2. ອອກເຄື່ອງມືນະໂຍບາຍ ເງິນຕາໃນຕະຫລາດເປີດ; 3. ປັບປຸງອົງປະກອບຂອງເງິນແຮຝາກບັງຄັບ; 4. ສືບຕໍ່ດຳເນີນນະໂຍບາຍອັດຕາແລກປ່ຽນໄປຕາມກົນໄກຕະຫລາດທີ່ມີການຄຸ້ມຄອງ ຂອງລັດ ແລະ 5. ສືບຕໍ່ຄຸ້ມຄອງເງິນຕາຕ່າງປະເທດຕາມແຜນທີ່ກຳນົດໄວ້.
ໂດຍ: ເກີດຂວັນໃຈ ມາລີຈັນສີ
KPL
