ຂປລ. ຊຸດຝຶກອົບຮົມ ວຽກງານສ້າງຄວາມເຂັ້ມແຂງທາງດ້ານກົດໜາຍ ໃຫ້ແກ່ພະນັກງານອົງ ການໄອຍະການປະຊາຊົນ, ສານປະຊາຊົນ ແລະ ອົງການສຶບສວນ-ສອບສວນ ຈັດ​ຂຶ້ນ​ໃນ​ວັນ​ທີ 1-3 ກໍລະ ກົດ 2024 ຢູ່​ແຂວງ​ຄຳ​ມ່ວນ ໂດຍພາຍໃຕ້ການ ເປັນປະທານຮ່ວມຂອງ ທ່ານ ຄໍາເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດ, ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ, ມີຫົວໜ້າກົມ, ຫົວໜ້າສະຖາບັນຝຶກອົບຮົມວຽກງານໄອຍະການ ອົງການໄອຍະການ ປະຊາຊົນສູງສຸດ, ຫົວໜ້າ-ຮອງຫົວໜ້າອົງການໄອຍະການ ປະຊາຊົນແຂວງ, ພະນັກງານໄອຍະການປະຊາຊົນ ເຂດ 1, ເຂດ 2 ຜູ້ຕາງໜ້າຈາກສານປະຊາຊົນແຂວງ, ເຂດ, ເຈົ້າໜ້າທີ່ສຶບສວນ-ສອບສວນ ພ້ອມດ້ວຍພາກສ່ວນທີ່ກ່ຽວຂ້ອງ ອ້ອມຂ້າງແຂວງຄໍາມ່ວນ ​ເຂົ້າຮ່ວມ.

​ໂອກາດ​ນີ້, ທ່ານ ຄໍາເພັດ ສົມວໍລະຈິດ ໄດ້ມີເນັ້ນໜັກຕໍ່ຄະນະຮັບຜິດຊອບ, ນັກວິທະຍາກອນ ແລະ ບັນດາຜູ້ທີ່ເຂົ້າຮ່ວມຝຶກອົບຮົມ ຈົ່ງພ້ອມກັນເອົາໃຈໃສ່ປະຕິບັດ ລະບຽບການເຂົ້າຮ່ວມຝຶກອົບ ຮົມຢ່າງເຂັ້ມງວດ, ເປັນເຈົ້າການປະສານສົມທົບ ການປະກອບຄວາມຄິດຄວາມເຫັນ ໃຫ້ມີຄວາມກົມກຽວ ແນໃສ່ເຮັດໃຫ້ຊຸດຝຶກອົບຮົມຄັ້ງນີ້ ປະສົບຜົນສໍາເລັດຕາມລະດັບຄາດໜາຍທີ່ວາງໄວ້.

ພ້ອມ​ນີ້, ທ່ານ ແກ້ວອຸດອນ ບຸດສິງຂອນ ກໍ​ໄດ້​ມີເຫັນຕໍ່ຊຸດຝຶກອົບຮົມຄັ້ງນີ້ວ່າ: ໃຫ້ຖືເອົາລະ ບຽບການຝຶກອົບຮົມຄັ້ງນີ້ ເປັນບາດກ້າວໜຶ່ງທີ່ເປັນບົດຮຽນ, ເປັນບ່ອນອີງໃຫ້ແກ່ ການປະຕິບັດໜ້າທີ່ ຄວນມີຢ່າງເປັນລະບົບ ໃຫ້ແຕ່ລະພາກສ່ວນຕາມ ທີ່ກົດໜາຍທີ່ກໍານົດໄວ້, ເພີ່ມທະວີໃນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນທີ່ກໍານົດໄວ້ ໃນກົດໜາຍຢ່າງເຂັ້ມງວດ. ສະນັ້ນ, ບັນດາທ່ານທີ່ເຂົ້າຮ່ວມຝຶກອົບຮົມ ຕ້ອງນໍາເອົາບົດຮຽນ ໄປສົມທຽບໃສ່ກັບພຶດຕິກໍາຕົວຈິງ ໃນການເຄື່ອນໄຫວປະ ຕິບັດໜ້າທີ່ວຽກງານຢູ່ທ້ອງຖິ່ນຂອງຕົນ, ມີຄວາມຖືກຕ້ອງ ຫລື ມີ​ຂໍ້ຄົງຄ້າງບັນຫາໃດຕ້ອງຊອກ ໃຫ້ເຫັນສາເຫດໃນຕົວ ແລະ ນອກຕົວ ເພື່ອວາງແຜນການ, ມີມາດຕະການປັບປຸງແກ້ໄຂ ໃຫ້ມີຄວາມເປັນເອກະພາບ ໃນການປະຕິບັດໜ້າທີ່ວຽກງານ ໃຫ້ຖືກຕ້ອງ ຕາມກົດໜາຍຢ່າງເຂັ້ມງວດ ເພື່ອປະກອບສ່ວນໃນການຄຸ້ມຄອງລັດ, ຄຸ້ມຄອງສັງຄົມດ້ວຍລະບຽບກົດໜາຍໃຫ້ມີຜົນສັກສິດ; ນໍາເອົາບົດຮຽນດັ່ງກ່າວໄປໜູນໃຊ້ເຂົ້າ ໃນວຽກງານຢູ່ທ້ອງຖິ່ນຕົນ ໃຫ້ເກີດປະສິດທິພາບ ແລະ ປະສິດທິຜົນສູງຂຶ້ນ; ເອົາໃຈໃສ່ຍົກລະດັບ ຄວາມຮູ້, ຄວາມສາມາດ ແລະ ຄວາມເຂົ້າໃຈແຈ້ງກ່ຽວກັບວຽກງານ ຕິດຕາມກວດກາການດໍາເນີນຄະດີອາຍາ, ການຕິດຕາມກວດກາ ການດໍາເນີນຄະດີແພ່ງ ລວມທັງທິດສະດີ ແລະ ຕົວຈິງໄປຄວບຄູ່ກັນ ​ເຊິ່ງເປັນອີກບາດກ້າວໜຶ່ງ ທີ່ພວກເຮົາໄດ້ຍົກ ບັນຫາຂຶ້ນມາຄົ້ນຄວ້າ ເພື່ອຄວາມເປັນເອກະພາບ ໃນການຈັດຕັ້ງປະຕິບັດໃນພຶດຕິກໍາຕົວຈິງ ແລະ ຂອດການປະສານສົມທົບກັນລະ ຫວ່າງ ເຈົ້າໜ້າທີ່ສືບສວນ-ສອບສວນ, ສານ, ອົງການໄອຍະການ ແລະ ພາກສ່ວນທີ່ກ່ຽວຂ້ອງ ໃຫ້ມີຄວາມເປັນເອກະພາບ ແລະ ສອດຄ່ອງກັບກົດໜາຍ.

ຈາກນັ້ນ, ທ່ານ ພຸດທະວົງ ບົວລະພາ ຫົວໜ້າກົມກວດກາທົ່ວໄປ ຕາງໜ້າຄະນະໄດ້ມອບຄອມພິວເຕີ ຈໍານວນ 2 ຊຸດ ໃຫ້ອົງການໄອຍະການປະຊາຊົນ ແຂວງຄໍາມ່ວນ ເພື່ອນໍາໃຊ້ເຂົ້າໃນ ວຽກງານວິຊາສະເພາະ ໃຫ້ມີຄວາມວ່ອງໄວ ແລະ ທັນສະໄໜ ຂຶ້ນ​ເທື່ອ​ລະ​ກ້ວ.

ຂ່າວ: ວົງເດືອນ

KPL