ຂປລ
ຂປລ. ວັນທີ 3 ມິຖຸນາ 2024 ຜ່ານມາ, ທີ່ນະຄອນຫລວງ ຮ່າໂນ້ຍ, ທ່ານ ນາງ ຄຳເພົາ ເອີນທະວັນ ເອກ ອັກຄະລັດຖະທູດ ວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ພ້ອມຄະນະໄດ້ເຂົ້າຢ້ຽມຂ່ຳນັບທ່ານ ພົນເອກ ຟານ ວັນຢາງ ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ ແຫ່ງ ສສ ຫວຽດນາມ.
ຂປລ. ວັນທີ 3 ມິຖຸນາ 2024 ຜ່ານມາ, ທີ່ນະຄອນຫລວງ ຮ່າໂນ້ຍ, ທ່ານ ນາງ ຄຳເພົາ ເອີນທະວັນ ເອກ ອັກຄະລັດຖະທູດ ວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ພ້ອມຄະນະໄດ້ເຂົ້າຢ້ຽມຂ່ຳນັບທ່ານ ພົນເອກ ຟານ ວັນຢາງ ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ ແຫ່ງ ສສ ຫວຽດນາມ.
ທ່ານ ນາງ ຄຳເພົາ ເອີນທະວັນ ໄດ້ນຳເອົາຄຳຢ້ຽມຢາມຖາມຂ່າວອັນອົບອຸ່ນ ແລະ ຄຳອວຍພອນອັນປະ ເສີດ ຂອງການນຳພັກ, ລັດຖະບານ, ລັດຖະມົນຕີກະຊວງປ້ອງກັນປະເທດລາວ ເຖິງການນຳພັກ, ລັດຖະບານ, ທ່ານລັດຖະມົນຕີກະຊວງປ້ອງກັນປະເທດຫວຽດນາມ. ພ້ອມທັງສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ, ສະໜິດສະໜົມຂອງ ທ່ານ ພົນເອກ ຟານ ວັນຢາງ ແລະ ສະແດງຄວາມຂອບໃຈມາຍັງພັກ, ລັດຖະບານ, ກອງທັບ ແລະ ປະຊາຊົນຫວຽດນາມ ທີ່ໄດ້ໃຫ້ການຊ່ວຍເຫລືອ, ສະໜັບສະໜູນ ພັກ, ລັດຖະບານ, ກອງທັບ ແລະ ປະຊາຊົນລາວ ໃນການປະຕິບັດສອງໜ້າທີ່ຍຸດທະສາດທີ່ພັກ, ລັດ ແລະ ປະຊາຊົນມອບໝາຍໃຫ້. ໃນໄລຍະຜ່ານມາ, ສອງກະຊວງປ້ອງກັນປະເທດຂອງ ລາວ ແລະ ຫວຽດນາມ ໄດ້ພ້ອມກັນຈັດຕັ້ງຜັນຂະຫຍາຍແຜນການຮ່ວມມືປະຈຳປີໄດ້ຮັບຜົນສຳເລັດ ແລະ ປະກົດຜົນເປັນຈິງໃນຫລາຍດ້ານ. ໃນນັ້ນ, ພົ້ນເດັ່ນແມ່ນ ວຽກງານໂຄສະນາ, ສຶກສາອົບຮົມດ້ານການເມືອງແນວຄິດ, ວຽກງານແລກປ່ຽນຂໍ້ມູນຂ່າວສານດ້ານປ້ອງກັນຊາດ, ວຽກງານຄຸ້ມຄອງຊາຍແດນ, ວຽກງານຝຶກຊ້ອມ ແລະ ອື່ນໆ.
ທ່ານລັດຖະມົນຕີກະຊວງປ້ອງກັນປະເທດຫວຽດນາມ ໄດ້ສະແດງຄວາມຊົມເຊີຍ ແລະ ເຊື່ອໝັ້ນທ່ານ ນາງ ຄຳເພົາ ເອີນທະວັນ ໄດ້ຮັບໜ້າທີ່ເປັນເອກອັກຄະລັດຖະທູດລາວຄົນໃໝ່ ປະຈຳ ສສ ຫວຽດນາມ ເຊິ່ງຈະປະຕິບັດໜ້າທີ່ເປັນຂົວຕໍ່ ປະສານງານກັບພາກສ່ວນຕ່າງຂອງທັງສອງຊາດ ເພື່ອເສີມຂະຫຍາຍສາຍພົວພັນມິດຕະພາບ ລະຫວ່າງສອງປະເທດ ລາວ-ຫວຽດນາມ ໃຫ້ນັບມື້ນັບຂະຫຍາຍຕົວເຂົ້າສູ່ລວງເລິກ ແລະ ລວງກວ້າງ. ພ້ອມນີ້, ທ່ານຍັງໄດ້ຢືນຢັນວ່າ, ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ໂດຍສະເພາະແມ່ນກະຊວງປ້ອງກັນປະເທດຂອງສອງປະເທດ ໄດ້ຮັບການເພີ່ມພູນຄູນສ້າງຢ່າງຕໍ່ເນື່ອງ, ຮັບປະກັນປົກປັກຮັກສາສັນຕິພາບ ແລະ ຄວາມໝັ້ນຄົງເພື່ອສ້າງເງື່ອນໄຂໃຫ້ແກ່ການພັດທະນາເສດຖະກິດ-ສັງຄົມຂອງແຕ່ລະປະເທດ.
ໃນໂອກາດນີ້, ທ່ານ ນາງ ຄຳເພົາ ເອີນທະວັນ ໄດ້ໃຫ້ຄຳໝັ້ນສັນຍາວ່າ ຈະປະຕິບັດໜ້າທີ່ສຸດຄວາມສາ ມາດຂອງຕົນ ໃນການເປັນຂົວຕໍ່ສຳຄັນໃຫ້ແກ່ການຊຸກຍູ້ການຮ່ວມມືຂອງສອງຝ່າຍ ເພື່ອເສີມຂະຫຍາຍພົວພັນມິດ ຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.
ຂ່າວ-ພາບ: ສະຖານທູດລາວທີ່ຮ່າໂນ້ຍ
KPL
