ຂປລ
ຂປລ. ສະພາແຫ່ງຊາດ ແຫ່ງ ສປປ ລາວ ຮ່ວມກັບ ສະພາແຫ່ງຊາດ ແຫ່ງ ສສ ຫວຽດນາມ ຈັດສຳມະນາ ວິທະຍາສາດ ກ່ຽວກັບປັບປຸງລັດຖະທຳມະນູນ ແລະ ບົດຮຽນການຄົ້ນຄວ້ານິຕິບັນຍັດ ພາຍໃຕ້ການເປັນປະທານຮ່ວມຂອງ ສະຫາຍ ຈະເລີນ ເຢຍປາວເຮີ ກຳມະການສູນກາງພັກ, ຮອງປະທານສະພາແຫ່ງຊາດ ແຫ່ງ ສປປ ລາວ ແລະ ສະຫາຍ ຫວຽນ ຄັກ ດິ້ງ ກຳມະການສູນກາງພັກ, ຮອງປະທານສະພາແຫ່ງຊາດ ແຫ່ງ ສສ ຫວຽດນາມ ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ຂປລ. ສະພາແຫ່ງຊາດ ແຫ່ງ ສປປ ລາວ ຮ່ວມກັບ ສະພາແຫ່ງຊາດ ແຫ່ງ ສສ ຫວຽດນາມ ຈັດສຳມະນາ ວິທະຍາສາດ ກ່ຽວກັບປັບປຸງລັດຖະທຳມະນູນ ແລະ ບົດຮຽນການຄົ້ນຄວ້ານິຕິບັນຍັດ ພາຍໃຕ້ການເປັນປະທານຮ່ວມຂອງ ສະຫາຍ ຈະເລີນ ເຢຍປາວເຮີ ກຳມະການສູນກາງພັກ, ຮອງປະທານສະພາແຫ່ງຊາດ ແຫ່ງ ສປປ ລາວ ແລະ ສະຫາຍ ຫວຽນ ຄັກ ດິ້ງ ກຳມະການສູນກາງພັກ, ຮອງປະທານສະພາແຫ່ງຊາດ ແຫ່ງ ສສ ຫວຽດນາມ ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ສະຫາຍ ຈະເລີນ ເຢຍປາວເຮີ ໄດ້ກ່າວວ່າ: ກອງປະຊຸມໃນຄັ້ງນີ້, ເປັນກອງປະຊຸມທີ່ມີຄວາມສຳຄັນຫລາຍ ເນື່ອງຈາກວ່າຈະໄດ້ຮັບຟັງການສະເໜີບົດຮຽນ ກ່ຽວກັບການຄົ້ນຄວ້າ ວິທະຍາສາດດ້ານນິຕິບັນຍັດ ຂອງສອງສະພາແຫ່ງຊາດ ລາວ-ຫວຽດນາມ ເຊິ່ງເຊື່ອໝັ້ນ ວ່າ ຈະກາຍເປັນບົດຮຽນທີ່ສຳຄັນທີ່ສຸດ ເຮັດໃຫ້ສະພາແຫ່ງຊາດລາວ ໃນການປັບປຸງ ຍົກລະດັບການຄົ້ນຄວ້າວິທະຍາສາດ ດ້ານນິຕິບັນຍັດຂອງຕົນສູ່ບາດກ້າວໃໝ່.
ໃນໂອກາດນີ້, ສະຫາຍ ສິນທະລາ ຫລ້າສຸກສະໄໝ ຫົວໜ້າສະຖາບັນຄົ້ນຄວ້າ ນິຕິກຳ ຂອງສະພາແຫ່ງຊາດລາວ ໄດ້ກ່າວວ່າ: ສະຖາບັນຄົ້ນຄວ້ານິຕິກຳສະພາແຫ່ງຊາດ ເປັນເສນາທິການ ໃຫ້ແກ່ຄະນະປະຈຳສະພາແຫ່ງຊາດ ໄດ້ສຸມໃສ່ການຄົ້ນຄວ້າຫົວຂໍ້ ວິທະຍາສາດ, ຫລັກສຸດ, ທັກສະ, ປື້ມຄູ່ມື, ຄົ້ນຄວ້າຄັດຫຍໍ້ ແລະ ສົມທຽບກົດໝາຍຂອງຕ່າງປະເທດ ເພື່ອເປັນຂໍ້ມູນໃນການສ້າງ ແລະ ປັບປຸງກົດໝາຍ; ເປັນໃຈກາງໃນການຈັດຝຶກອົບຮົມ ການຍົກສູງຂີດຄວາມສາມາດ ໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ພະນັກງານທີ່ເປັນເສນາທິການ ໃນຫົວຂໍ້ວິທະຍາສາດ ແລະ ຫລັກສູດຕ່າງໆ ຢ່າງກວ້າງຂວາງ. ນອກຈາກນີ້, ຍັງເປັນ ບ່ອນອີງໃນການຄົ້ນຄວ້າສ້າງ, ປັບປຸງກົດໝາຍ ແລະ ນິຕິກຳຕ່າງໆ. ນອກຈາກນີ້, ສະຫາຍ ສິນທະລາ ຫລ້າສຸກສະໄໝ ຍັງຍົກໃຫ້ເຫັນຫລັກການພື້ນຖານໃນການສ້າງ, ປັບປຸງກົດໝາຍ ແລະ ນິຕິກໍາ ເຊິ່ງຕ້ອງສອດຄ່ອງກັບແນວທາງນະໂຍ ບາຍ ພັກປະຊາຊົນປະຕິວັດລາວ ເປັນພັກກຳອຳນາດ, ເປັນຜູ້ວາງແນວທາງນະໂຍບາຍຂອງພັກ, ນຳພາ, ຊີ້ນຳ ຕໍ່ທຸກຂົງເຂດວຽກງານ, ການສ້າງ, ປັບປຸງກົດໝາຍ ແລະ ນິຕິກຳ ຕ້ອງສອດຄ່ອງກັບເນື້ອໃນຈິດໃຈ ແລະ ໄປຕາມແນວທາງນະໂຍບາຍຂອງພັກ. ນອກຈາກນີ້, ຍັງຕ້ອງສອດຄ່ອງກັບລັດຖະທຳມະນູນ ຂອງລະບອບປະຊາທິປະໄຕປະຊາຊົນລາວ ເຊິ່ງແມ່ນໝາກຜົນລວມຍອດແຫ່ງສະຕິປັນຍາ ແລະ ການປະກອບຄວາມເຫັນຢ່າງກວ້າງຂວາງ ຂອງປະຊາຊົນໃນທົ່ວປະເທດ ທີ່ສ່ອງແສງຢ່າງຈະແຈ້ງເຖິງເຈດຈຳນົງອັນສູງສົ່ງ, ຍາວນານ ແລະ ຄວາມຕັດສິນໃຈຢ່າງແຮງກ້າ ຂອງວົງຄະນະຍາດແຫ່ງຊາດ ທີ່ຈະພ້ອມກັນສູ້ຊົນ ເພື່ອບັນລຸຈຸດໝາຍສ້າງປະເທດລາວ ໃຫ້ເປັນປະເທດ ສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນະຖາວອນ.
ຂ່າວ: ກິດຕາ
ພາບ: ຂັນໄຊ
KPL
