ຂປລ. ກອງປະຊຸມຄະນະກໍາມະການຊີ້ນໍາຮ່ວມ ລະຫວ່າງ ລັດຖະບານແຫ່ງ ສປປ ລາວ ແລະ ອົງການສະຫະປະຊາຊາດ(ສປຊ) ຈັດຂຶ້ນໃນວັນທີ 2 ເມສາ 2025 ເພື່ອປຶກສາຫາລືບັນດາຜົນສໍາເລັດ, ຄວາມຄືບໜ້າ ແລະ ບັນດາເປົ້າໝາຍບຸລິມະສິດ ຂອງຄາດໝາຍທີ່ນອນຢູ່ ໃນຂອບການຮ່ວມມື ລະ ຫວ່າງ ລັດຖະບານລາວ ແລະ ອົງການ ອົງການສະຫະປະຊາຊາດ (ສປຊ) ພາຍໃຕ້ການເປັນປະທານຮ່ວມຂອງ ທ່ານ ນາງ ມຸກດາວັນ ສີສຸລິດ ຫົວໜ້າກົມອົງການຈັດຕັ້ງສາກົນ, ກະຊວງການຕ່າງປະເທດ ຮ່ວມກັບ ທ່ານ ບາໂຄເດຍ ເບີຄານອຟ ຜູ້ປະສານງານອົງການ ສປຊ ປະຈໍາ ສປປ ລາວ, ມີຜູ້ຕາງໜ້າຈາກບັນດາກະຊວງ ແລະ ອົງການເຄື່ອຂ່າຍ ສປຊ ເຂົ້າຮ່ວມ.

 ກອງປະຊຸມຄັ້ງນີ້, ໄດ້ຮັບຮອງເອົາບົດລາຍງານຄວາມຄືບໜ້າ ການພັດທະນາ ປະຈໍາປີ 2024 ເຊິ່ງບົດລາຍງານດັ່ງກ່າວ ໄດ້ລາຍງານກ່ຽວກັບທ່ວງທ່າການພັດທະນາໃນປີ 2024 ໂດຍສະເພາະ ສະ ພາບຜົນກະທົບຂອງ ການພັດທະນາ ເສດຖະກິດ-ສັງຄົມ, ລວມທັງບັນດານະໂຍບາຍພາຍໃນປະເທດ ແລະ ນະໂຍບາຍຂອງສາກົນ ທີ່ຊ່ວຍສະໜັບສະໜູນການຈັດຕັ້ງປະຕິບັດວຽກງານ ແລະ ຄວາມພະຍາ ຍາມຕ່າາງໆຢູ່ຂັ້ນທ້ອງຖິ່ນ ແລະ ເພື່ອຊຸກຍູ້ຄວາມຄືບໜ້າການພັດທະນາ. ​ໃນບົດລາຍງານ ຍັງໄດ້ຍົກໃຫ້ເຫັນເຖິງຄວາມຄືບໜ້າ ຂອງຂະແໜງການຕ່າງໆ ເຖິງວ່າຈະຜະເຊີນກັບສິ່ງທ້າທາຍ ໃນຫລາຍຢ່າງກໍຕາມ, ອັນໂດດເດັ່ນ ກໍຄື ຄວາມຄືບໜ້າໃນການແກ້ໄຂບັນຫາໂລກລະບາດ ເຊັ່ນ: ມາລາເລຍ ແລະ ໄຂ້ໝາກແດງ. ນອກນັ້ນ, ກໍຍັງມີຂໍ້ລິເລີ່ມການຮຽນຮູ້ ເພື່ອສົ່ງເສີມຜົນໄດ້ຮັບຂອງການຮຽນການສອນ ໂດຍສະ ເພາະແມ່ນເດັກນ້ອຍທີ່ອາໄສຢູ່ ເຂດຫ່າງໄກສອກຫລີກ, ໂຄງການສະໜອງອາຫານທ່ຽງ ກໍໄດ້ຮັບການຂະຫຍາຍຕົວ ໄປຫາຫລາຍໂຮງຮຽນໃນຫລາຍຂົງເຂດ ແລະ ສືບຕໍ່ເປັນໂຄງການທີ່ໄດ້ປະກອບສ່ວນ ສະໜອງໂພຊະນາການທີ່ສໍາຄັນໃຫ້ແກ່ຄອບຄົວ ແລະ ຊູມຊົນໃນທ້ອງຖິ່ນ. ໃນປີ 2024, ມີຫລາຍແຂວງໄດ້ປະກາດເປັນແຂວງສຸຂານາໄມ ແລະ ຢຸດຕິການຖ່າຍຊະຊາຍ ຍ້ອນມີການປັບປຸງການເຂົ້າເຖິງນໍ້າສະ ອາດ ແລະ ສຸຂາອານາໄມຫລາຍຂຶ້ນກວ່າເກົ່າ; ວຽກງານການໃຫ້ການບໍລິການ ການປົກປ້ອງ ຜູ້ເຄາະຮ້າຍຈາກຄວາມຮຸນແຮງ ແລະ ການທໍາຮ້າຍຮ່າງກາຍ ກໍໄດ້ຮັບການຂະຫຍາຍຕົວ ຄຽງຄູ່ກັບການສະໜອງ ການບໍລິການທີ່ປຶກສາ ແລະ ການປົກປ້ອງເດັກ ກໍໄດ້ຮັບການຂະຫຍາຍຕົວເຊັ່ນດຽວກັນ. ນອກນັ້ນ, ຍັງມີໂຄງການປົກປ້ອງທາງສັງຄົມ ກໍໄດ້ສະໜອງການຊ່ວຍເຫລືອທີ່ຈໍາເປັນ ໃຫ້ແກ່ກຸ່ມປະຊາຊົນທີ່ບອບບາງທີ່ສຸດ, ລວມທັງຜູ້ພິການ ແລະ ເສຍອົງຄະ, ບັນດາຄອບຄົວທີ່ໄດ້ຮັບຜົນກະທົບ ຈາກໄພນໍ້າຖ້ວມ  ກໍໄດ້ຮັບການຊ່ວຍເຫລືອສຸກເສີນຈາກ ອົງການ ສປຊ ແລະ ພື້ນທີ່ພັດທະນາຈໍານວນຫລາຍເຮັກຕາ ກໍໄດ້ຮັບການກວດກູ້ຈາກ ລະເບີດບໍ່ທັນແຕກທີ່ຕົກຄ້າງ. 

 ສະເພາະວຽກງານການວ່າງນະໂຍບາຍແຫ່ງຊາດ, ອົງການ ສປຊ ໄດ້ສະໜັບສະໜູນຜ່ານ ກົນໄກຂະບວກນການໂຕະມົນ, ການພັດທະນາຍຸດທະສາດການຂ້າມຜ່ານ ອອກຈາກສະຖານະພາບປະ ເທດດ້ອຍພັດທະນາຂອງ ສປປ ລາວ ແລະ ການຮ່າງບົດລາຍງານແຫ່ງຊາດແບບສະໝັກໃຈ ສະບັບທີ 3 ກ່ຽວກັບການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ. ພ້ອມນັ້ນ, ສປຊ ກໍໄດ້ສະໜັບສະໜູນ ການປະຕິຮູບນິຕິກໍາຈໍານວນໜຶ່ງ ໂດຍສະເພາະນິຕິກໍາກ່ຽວກັບ ວຽກງານສາທາລະນະສຸກ ແລະ ການສຶກສາ ເຊິ່ງຍຸດທະສາດຕ່າງໆກໍໄດ້ ມີການພັດທະນາຂຶ້ນເພື່ອສະໜັບສະໜູນ ວຽກງານການເຄື່ອນຍ້າຍຖິ່ນຖານທີ່ເປັນລະບົບ, ການຫັນປ່ຽນທາງດ້ານກະສິກໍາ, ການສ້າງລະບົບແຈ້ງເຕືອນໄພລວງໜ້າສໍາລັບທຸກຄົນ, ການປົກປັກຮັກສາຊີວະນານາພັນ ແລະ ການຫລຸດຜ່ອນມົນລະພິດ ຈາກສິ່ງເສດເຫລືອປລາສຕິກ.

ສຳລັບແນວທາງຍຸດທະສາດໃນປີ 2025, ກອງປະຊຸມຄະນະກໍາມະການຊີ້ນໍາຮ່ວມ ໄດ້ປຶກສາຫາລື ແລະ ລົງເລິກກ່ຽວກັບການຍົກລະດັບການຮ່ວມມື ແລະ ຄວາມພະຍາຍາມຮ່ວມກັນໃຫ້ຫລາຍຂື້ນກວ່າເກົ່າ, ຊຸກຍູ້ໃຫ້ມີການເຊື່ອມໂຍງສອດຄ່ອງກັນຫລາຍຂຶ້ນ ແລະ ເພີ່ມທະວີປະສິດທິພາບ ໃຫ້ຫລາຍຂຶ້ນກວ່າເກົ່າໃນປີ 2025. ບັນດາອົງການເຄື່ອຂ່າຍ ສປຊ ກໍໄດ້ແລກປ່ຽນກ່ຽວກັບບຸລິມະສິດຍຸດທະສາດ ໃນປີ 2025 ທີ່ກ່ຽວຂ້ອງກັບຂະແໜງການ ແລະ ການສະເໜີຂົງເຂດການຮ່ວມມືໃໝ່ໆ ລວມທັງ ການມີສ່ວນຮ່ວມກັບໄວໜຸ່ມ ກ່ຽວກັບການຫັນເປັນດີຈິຕອນ, ການຫັນປ່ຽນລະບົບອາຫານ, ການສະໜອງທຶນສີຂຽວ, ການປັບຕົວກັບການປ່ຽນແປງດິນຟ້າອາກາດ ແລະ ການປົກປ້ອງທາງສັງຄົມ.

ຂ່າວ: ກິດ​ຕາ

KPL