ຂປລ
ທ່ານ ສີ ຈິ້ນຜິງ,ປະທານ ປະເທດຈີນ ໄດ້ເດີນທາງ ໄປເຖິງແຄມຝັ່ງແມ່ນ້ຳຢົງຕິ້ງ ເມືອງເຟິ່ງຖາຍ ນະຄອນຫລວງ ປັກກິ່ງ ເພື່ອຮ່ວມກັບ ພະນັກງານ ແລະ ປະຊາຊົນ ເຂົ້າຮ່ວມ ການປູກຕົ້ນໄມ້ ຕາມພັນທະ ອີກຄັ້ງໜຶ່ງ ເຊິ່ງເປັນເທື່ອທີ 13 ທີ່ ທ່ານ ສີ ຈິ້ນຜິງ ເຂົ້າຮ່ວມກິດຈະກຳ ດັ່ງກ່າວ ນັບແຕ່ຂຶ້ນດຳລົງຕຳແໜ່ງ ເປັນເລຂາທິການໃຫຍ່ ຄະນະກຳມະການສູນກາງພັກ ກອມມູນິຈີນ ເປັນຕົ້ນມາ.
ຂປລ.ວິທະຍຸ ສາກົນແຫ່ງ ສປ ຈີນ,ເມື່ອບໍ່ດົນມານີ້, ທ່ານ ສີ ຈິ້ນຜິງ,ປະທານ ປະເທດຈີນ ໄດ້ເດີນທາງ ໄປເຖິງແຄມຝັ່ງແມ່ນ້ຳຢົງຕິ້ງ ເມືອງເຟິ່ງຖາຍ ນະຄອນຫລວງ ປັກກິ່ງ ເພື່ອຮ່ວມກັບ ພະນັກງານ ແລະ ປະຊາຊົນ ເຂົ້າຮ່ວມ ການປູກຕົ້ນໄມ້ ຕາມພັນທະ ອີກຄັ້ງໜຶ່ງ ເຊິ່ງເປັນເທື່ອທີ 13 ທີ່ ທ່ານ ສີ ຈິ້ນຜິງ ເຂົ້າຮ່ວມກິດຈະກຳ ດັ່ງກ່າວ ນັບແຕ່ຂຶ້ນດຳລົງຕຳແໜ່ງ ເປັນເລຂາທິການໃຫຍ່ ຄະນະກຳມະການສູນກາງພັກ ກອມມູນິຈີນ ເປັນຕົ້ນມາ.ຄວນປູກໄມ້ ໃຫ້ເປັນປ່າ ເພີ່ມພື້ນທີ່ສີຂຽວ ໃຫ້ປະເທດຊາດ ຢ່າງມີປະສິດທິຜົນ ຄືແນວໃດ? ໃນໂອກາດ ເຂົ້າຮ່ວມການປູກຕົ້ນໄມ້ປີນີ້, ທ່ານ ສີ ຈິ້ນຜິງ ໄດ້ເນັ້ນໜັກ “3ເອົາໃຈໃສ່ຕື່ມ” ເພື່ອຊີ້ນຳ ການຊຸກຍູ້ ການປູກໄມ້ ໃຫ້ເປັນປ່າ ເພີ່ມພື້ນທີ່ສີຂຽວ ແລະ ການສ້າງປະເທດຈີນ ທີ່ສວຍງາມ ຢ່າງມີວິທະຍາສາດຄື: ໜຶ່ງ: “ເອົາໃຈໃສ່ຕື່ມ ໃນການຍົກສູງຄຸນນະພາບ” ຢູ່ສະຖານທີ່ປູກຕົ້ນໄມ້ໃນປີນີ້, ທ່ານ ສີ ຈິ້ນຜິງ ໄດ້ໂອ້ລົມສົນທະນາກັບ ພະນັກງານ ແລະ ປະຊາຊົນ ຢ່າງສະໜິດສະໜົມ, ເພິ່ນໄດ້ຍົກໃຫ້ເຫັນວ່າ: “ປັດຈຸບັນ, ອັດຕາການປົກຫຸ້ມ ຂອງປ່າໄມ້ຢູ່ ສປ ຈີນ ໄດ້ລື່ນກາຍ 25%, ໄດ້ປະກອບສ່ວນ ປະມານ 25% ຂອງເນື້ອທີ່ພື້ນທີ່ສີຂຽວ ທີ່ເພີ່ມໃໝ່ ຂອງທົ່ວໂລກ, ຜົນງານເຫລົ່ານີ້ ຍາດມາໄດ້ ບໍ່ແມ່ນເລື່ອງງ່າຍ.”ພື້ນຖານສີຂຽວຂອງ ສປ ຈີນ ໄດ້ຮັບການເສີມຂະຫຍາຍ ຢ່າງຕໍ່ເນື່ອງ, ພ້ອມດຽວກັນນັ້ນ ກໍຍັງມີບັນຫາ ທີ່ຍອດປະລິມານຊັບພະຍາກອນປ່າໄມ້ທົ່ງຫຍ້າ ຍັງມີບໍ່ພຽງພໍ, ຄຸນນະພາບ ແລະ ປະສິດທິຜົນ ຍັງບໍ່ສູງເທົ່າທີ່ຄວນ.
ທ່ານ ສີ ຈິ້ນຜິງ ໄດ້ຊີ້ນຳວ່າ: ຕ້ອງເອົາໃຈໃສ່ຕື່ມ ໃນການຍົກສູງ ຄຸນນະພາບ, ປັບປຸງໂຄງສ້າງປ່າໄມ້, ພັດທະນາ ທຸລະກິດ ປ່າໄມ້ ໃຫ້ດີ ພ້ອມທັງ ຍົກສູງຄຸນນະພາບ ສິ່ງແວດລ້ອມ ທຳມະຊາດ ທົ່ງຫຍ້າ ໄປຄຽງຄູ່ກັນ. ຢູ່ສວນສາທິດ ການປູກໄມ້ຟື້ນຟູປ່າ ເຂດຫລວນເຟີ້ງ ຂອງໂຄງການ ຈຸດສຸມປູກໄມ້ ໃຫ້ເປັນປ່າ ເພີ່ມພື້ນທີ່ສີຂຽວ ຂອງເມືອງກວ່າງເຈີ ແຂວງຟູຈ້ຽນ, ໃນຜ່ານມາ, ເນື່ອງຈາກເປັນໂຄງສ້າງປ່າໄມ້ ປະກອບດ້ວຍພັນໄມ້ ພຽງຊະນິດດຽວ, ສະນັ້ນ ປ່າໄມ້ແຫ່ງນີ້ ຈຶ່ງມີຄຸນນະພາບຕ່ຳ, ຄວາມສາມາດຕ້ານທານ ໄພຄຸກຄາມ ຈາກພະຍາດ ສັດຕູພືດ ແລະໄພທຳມະຊາດ ຈຶ່ງຂ້ອນຂ້າງ ອ່ອນແອ. ແຕ່ວ່າໃນປັດຈຸບັນ, ທ້ອງຖິ່ນດັ່ງກ່າວ ໄດ້ປັບປຸງປ່າໄມ້ ປະເພດໃບເຂັມ ໃຫ້ເປັນປ່າປະສົມໄມ້ ປະເພດໃບໃຫຍ່ ແລະໄມ້ປະເພດໃບເຂັມ, ປັບປຸງປ່າໄມ້ພັນດຽວໃຫ້ເປັນປ່າໄມ້ ຫລາຍພັນ ແລະມີອາຍຸຕ່າງກັນ, ເພື່ອປັບປຸງໂຄງສ້າງປ່າໄມ້ ໃຫ້ດີຂຶ້ນ, ຍົກສູງບົດບາດ ດ້ານນິເວດຂອງປ່າໄມ້, ເພີ່ມຄວາມສາມາດ ເກັບຮັກສາກາກບອນ ຂອງປ່າໄມ້. ສອງ: “ເອົາໃຈໃສ່ຕື່ມໃນການພັດທະນາອຸດສາຫະກຳ”ທ່ານ ສີ ຈິ້ນຜິງ ໄດ້ຊີ້ນຳໃຫ້ເອົາໃຈໃສ່ຕື່ມ ໃນການພັດທະນາ ອຸດສາຫະກຳ, ນຳໃຊ້ວິທີການປະຕິຮູບ ໃຫ້ຫລາຍ ເພື່ອນຳໃຊ້ຊັບພະຍາກອນປ່າໄມ້ ແລະ ທົ່ງຫຍ້າ ໃຫ້ເກີດມີປະສິດທິຜົນ, ພັດທະນາ ອຸດສາຫະກຳປ່າໄມ້ ແລະ ທົ່ງຫຍ້າໃຫ້ເຕີບໃຫຍ່ ຂະຫຍາຍຕົວ.ປີ2024, ຍອດມູນຄ່າ ການຜະລິດ ດ້ານອຸດສາຫະກຳປ່າໄມ້ແລະທົ່ງຫຍ້າຂອງ ສປ ຈີນ ໄດ້ບັນລຸເຖິງ 10.170 ຕື້ຢວນ.ຜົນຜະລິດອາຫານຈາກປ່າໄມ້ຂອງສປ ຈີນ ບັນລຸຫລາຍກວ່າ 200 ລ້ານໂຕ້ນຕໍ່ປີ. ອາຫານຈາກປ່າໄມ້ ທີ່ດີຕໍ່ສຸຂະພາບ, ແບບທຳມະຊາດ ແລະ ມີຫລາກຫລາຍ ຊະນິດເຊັ່ນ: ໝາກກໍ່, ໝາກຊານ້ຳມັນ, ໝາກໂປ້ມ ເປັນຕົ້ນ: ໄດ້ກາຍເປັນ ຜະລິດຕະພັນ ກະສິກຳ ສຳຄັນ ອັນດັບ 3 ຂອງ ສປ ຈີນ ທີ່ຮອງຈາກສະບຽງອາຫານ ແລະ ພືດຜັກ.ປັດຈຸບັນ, ຢູ່ຕາແສງທ່ຽນຫ່ວງຜິງ ເມືອງອ່ານຈີ ແຂວງເຈີ້ຈ່ຽງ ໄດ້ເປີດການປະຕິບັດໂຄງການປັບປຸງ ຍົກລະດັບເຂດນິຄົມ ອຸດສາຫະກຳ ເສດຖະກິດປ່າໄມ້ເກືອບ 700 ເຮັກຕາ, ໃນຕໍ່ໜ້າ, ພາຍໃນເຂດນິຄົມ ຈະສ້າງເຂດ ທີ່ມີບົດບາດ ພິເສດຕ່າງໆເຊັ່ນ: ເຂດສຳຜັດ ສຳລັບ ນັກທ່ອງທ່ຽວ, ເຂດຕັ້ງແຄັ້ມ ເປັນຕົ້ນ, ເພື່ອສຸມກຳລັງ ເຂົ້າໃນການສ້າງ ກຸ່ມອຸດສາຫະກຳ ການທ່ອງທ່ຽວ. ສາມ: “ເອົາໃຈໃສ່ຕື່ມໃນການສ້າງຜົນປະໂຫຍດໃຫ້ແກ່ປະຊາຊົນ”ໃນການປູກຕົ້ນໄມ້ເທື່ອນີ້, ທ່ານ ສີ ຈິ້ນຜິງ ໄດ້ກ່າວເນັ້ນໜັກວ່າ: “ຕ້ອງເອົາໃຈໃສ່ຕື່ມ ໃນການສ້າງຜົນປະໂຫຍດ ໃຫ້ແກ່ ປະຊາຊົນ, ເພີ່ມພື້ນທີ່ສີຂຽວ ແລະ ຄວາມສວຍງາມ ຢູ່ອ້ອມຂ້າງປະຊາຊົນ, ເປີດກວ້າງຊ່ອງທາງໃນການປະກອບອາຊີບ ໃນຂະແໜງ ການປ່າໄມ້ທົ່ງຫຍ້າ ເພື່ອສ້າງລາຍຮັບເພີ່ມ ໃຫ້ປະຊາຊົນ.”ສະຖານທີ່ປູກຕົ້ນໄມ້ຕາມພັນທະທີ່ ທ່ານ ສີ ຈິ້ນຜິງ ເຂົ້າຮ່ວມໃນປີນີ້ ແມ່ນຕັ້ງຢູ່ແລວທາງສີຂຽວ ຕອນແມ່ນ້ຳຢົງຕິ້ງ ນະຄອນຫລວງປັກກິ່ງ. ລະບົບນ້ຳຢູ່ເຂດແຄວ້ນດັ່ງກ່າວ ມີຫລາກຫລາຍຮູບແບບ, ເຊິ່ງມີພື້ນທີ່ ແຄມນ້ຳຍາວຢຽດ ເຖິງ 7 ກິໂລແມັດ, ປັດຈຸບັນ, ທ້ອງຖິ່ນດັ່ງກ່າວກຳລັງສ້າງໂຄງການ “ລະບຽງຂຽວແຄມນ້ຳ” ທີ່ອະນຸລັກຮັກສາ ສິ່ງແວດລ້ອມ ທຳມະຊາດ ພ້ອມທັງສ້າງເປັນບ່ອນຫັດກາຍ ບໍລິຫານ ແລະ ພັກຜ່ອນຢ່ອນອາລົມ.ຊຸມປີຜ່ານມານີ້, ນະຄອນຫລວງປັກກິ່ງ ໄດ້ສ້າງສວນສາທາລະນະພັກຜ່ອນຢ່ອນອາລົມ, ສວນສາທາລະນະ ຂະໜາດນ້ອຍ, ພື້ນທີ່ສີຂຽວ ຂະໜາດນ້ອຍ ໃນເທດສະບານເມືອງໃຫ້ສຳເລັດ ງວດໜຶ່ງ, ໃນນີ້, ຍອດຈຳນວນ ສວນສາທາລະນະ ມີເຖິງ 1.100 ແຫ່ງ.ປັດຈຸບັນ, ສປ ຈີນ ໄດ້ສ້າງຕົວເມືອງປ່າໄມ້ແຫ່ງຊາດ ສຳເລັດແລ້ວ 212 ແຫ່ງ, ອັດຕາການປົກຫຸ້ມ ຂອງພື້ນທີ່ສີຂຽວ ໃນຕົວເມືອງ ບັນລຸ 43,32%, ປະຊາຊົນ ໃນຕົວເມືອງ ມີເນື້ອທີ່ ສວນສາທາລະນະ ແລະ ພື້ນທີ່ສີຂຽວ ສະເລ່ຍ 15,65 ຕາແມັດຕໍ່ຄົນ. ຍາມລະດູໃບໄມ້ປົ່ງ ຢູ່ບ້ານກ່າລາ ຕາແສງລິນຈື່ ເມືອງປ່າຢີ ນະຄອນລິນຈື່ ເຂດປົກຄອງ ຕົນເອງຊີ່ຈ້າງ ທາງພາກຕາເວັນຕົກສຽງໃຕ້ຂອງ ສປ ຈີນ, ດອກຄາຍເບັ່ງບານ ໄປທົ່ວໜ່ວຍພູ, ເຊິ່ງໄດ້ດຶງດູດ ນັກທ່ອງທ່ຽວ ຈາກແຫ່ງຕ່າງໆ ເດີນທາງມາທ່ຽວຊົມ. ໂດຍອີງໃສ່ ສວນດອກຄາຍ ຢູ່ພາຍໃນບ້ານ, ບ້ານແຫ່ງນີ້ ໄດ້ພັດທະນາ ການທ່ອງທ່ຽວ ແບບອະນຸລັກ ແລະ ເສດຖະກິດ ເຮືອນພັກປະຊາຊົນ, ເສດຖະກິດ ລວມໝູ່ ຂອງບ້ານໄດ້ເຕີບໃຫຍ່ ຂະຫຍາຍຕົວ, ປີ2024 ຜ່ານມາ, ຊາວບ້ານ ໄດ້ຮັບເງິນ ປັນຜົນ 100.000 ກວ່າຢວນ ຕໍ່ຄອບຄົວ. ສິ່ງແວດລ້ອມທຳມະຊາດ ທີ່ດີເປັນຄວາມຜາສຸກ ສຳລັບ ປະຊາຊົນ ທີ່ໃຫ້ຜົນປະໂຫຍດ ຢ່າງທົ່ວເຖິງທີ່ສຸດ. ຈາກ “ພື້ນທີ່ສີຂຽວ” ຢູ່ອ້ອມຂ້າງໂຕ ຕະຫລອດຮອດ “ເງິນຄຳ” ໃນຖົງເສື້ອ, ປະຊາຊົນຈີນ ກຳລັງຮູ້ສຶກ ໄດ້ເຖິງຄວາມສຸກ ທີ່ເພີ່ມຂຶ້ນ ຢ່າງບໍ່ຢຸດຢັ້ງ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
