ຂປລ
ຄໍລຳ “ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ” ສະບັບທ້າຍອາທິດຜ່ານມາ ກໍໄດ້ສະເໜີຫົວຂໍ້ກ່ຽວກັບ “ພ້ອມກັນຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ” ທ້າຍສະໄໝໃຫ້ປະກົດເປັນຈິງໃຫ້ທ່ານຜູ້ອ່ານແລ້ວ, ເຊິ່ງມາສະບັບນີ້ ຂໍສະເໜີກ່ຽວກັບແຜນນະໂຍບາຍປັບປຸງໂຄງສ້າງການຜະລິດ-ການບໍລິການຕື່ມ.
*ຄໍລຳ “ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ” ສະບັບທ້າຍອາທິດຜ່ານມາ ກໍໄດ້ສະເໜີຫົວຂໍ້ກ່ຽວກັບ “ພ້ອມກັນຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ” ທ້າຍສະໄໝໃຫ້ປະກົດເປັນຈິງໃຫ້ທ່ານຜູ້ອ່ານແລ້ວ, ເຊິ່ງມາສະບັບນີ້ ຂໍສະເໜີກ່ຽວກັບແຜນນະໂຍບາຍປັບປຸງໂຄງສ້າງການຜະລິດ-ການບໍລິການຕື່ມ. ຢູ່ໃນມະຕິວ່າດ້ວຍການສ້າງເສດຖະກິດ ເອກະລາດເປັນເຈົ້າຕົນເອງໃນໄລຍະໃໝ່ໄດ້ຊີ້ໃຫ້ເຫັນວ່າ: ຕ້ອງໄດ້ກວດກາ ແລະ ປະເມີນຄືນການກໍານົດຍຸດທະສາດ ພັດ ທະນາຂອງບັນດາຂະແໜງການຜະລິດ ແລະ ການບໍລິການ ດ້ວຍການສົມທົບແໜ້ນລະຫວ່າງການສົ່ງເສີມ, ພັດທະນາ ແລະ ຂະຫຍາຍທຸກທ່າແຮງບົ່ມຊ້ອນ ກັບການສ້າງຖານການຜະລິດ ແລະ ສິນຄ້າທີ່ເປັນປາຍແຫລມ ແລະ ມີຄວາມຍືນຍົງ; ຕ້ອງຖືເອົາກະສິກຳເປັນພື້ນຖານໃຫ້ແກ່ການຂະຫຍາຍອຸດສາຫະກຳ, ສຸມໃສ່ຍົກລະດັບຂົງເຂດກະສິກຳໃຫ້ທັນສະໄໝ, ນໍາໃຊ້ວິທະຍາສາດ, ເຕັກໂນໂລຊີ, ນະວັດຕະກໍາທີ່ເປັນມິດກັບສິ່ງແວດລ້ອມ ເຂົ້າໃນການສົ່ງເສີມການຜະລິດກະສິກຳໃຫ້ສອດຄ່ອງກັບສະພາບດິນຟ້າອາກາດຢູ່ແຕ່ລະບ່ອນ ແນໃສ່ສ້າງ ແລະ ຕອບສະໜອງແຫລ່ງວັດຖຸດິບທີ່ມີຄຸນນະພາບ ແລະ ພຽງພໍຮັບໃຊ້ການປຸງແຕ່ງກໍຄືສ້າງໃຫ້ມີຜະລິດຕະພັນກະ ສິກຳສົດ, ສະອາດ, ປອດສານພິດ ເພື່ອສົ່ງອອກທັງສາມາດຮັບໃຊ້ການທ່ອງທ່ຽວ ແລະ ການຊົມໃຊ້ພາຍໃນ, ທົດແທນການນໍາເຂົ້າ.
ຂະນະດຽວກັນກໍຕ້ອງລົງທຶນໃສ່ການກໍ່ສ້າງ ແລະ ຂະຫຍາຍພື້ນຖານໂຄງລ່າງດ້ານກະສິກຳ-ປ່າ ໄມ້ຢູ່ເຂດຊົນນະບົດໃຫ້ເຂັ້ມແຂງ. ສ້າງ ແລະ ຂະຫຍາຍພື້ນຖານອຸດສາຫະກຳ ຫລື ໂຮງຈັກ-ໂຮງງານ ດ້ານອຸດສາຫະກໍາທີ່ສໍາຄັນຈໍານວນໜຶ່ງ ເປັນຕົ້ນແມ່ນໂຮງງານປຸງແຕ່ງແຮ່ທາດ, ເຄມີພັນ, ປຸຍຊີວະພາບ, ຫົວອາຫານລ້ຽງສັດ, ການຜະລິດວັດສະດຸກໍ່ສ້າງ, ເຄື່ອງອຸປະໂພກ- ບໍລິໂພກ... ສືບຕໍ່ປັບປຸງ, ພັດທະນາ ແລະ ຍົກລະດັບພື້ນຖານໂຄງລ່າງ ແລະ ສິ່ງອໍານວຍຄວາມສະດວກ ເຂົ້າເຖິງແຫລ່ງທ່ອງທ່ຽວຕິດພັນກັບການສ້າງຜະລິດຕະພັນຮັບໃຊ້ການທ່ອງທ່ຽວແບບອະນຸລັກ, ການມີສ່ວນຮ່ວມຂອງປະຊາຊົນຢູ່ທ້ອງຖິ່ນ. ປັບປຸງການບໍລິການໂລຈິສຕິກ, ຈຸດຄ່ຽນຖ່າຍ, ຄວາມສາມາດໃນການບໍລິການຂົນສົ່ງສິນຄ້າ, ໂດຍສານຜ່ານແລວເສດຖະກິດຕ່າງໆ ໂດຍສະເພາະແລວເສດຖະກິດ ລາວ-ຈີນ, ຕາເວັນອອກ-ຕາເວັນຕົກ, ເໜືອ-ໃຕ້ກໍຄືການເຊື່ອມຕໍ ແລະ ເຂົ້າເຖິງຈຸດບໍລິການຂອງແລວທາງລົດໄຟ ລາວ-ຈີນ ເພື່ອປະຕິບັດຍຸດທະສາດເຊື່ອມຈອດ ດ້ານເສດຖະກິດໃຫ້ແຂງແຮງ ແລະ ມີລັກສະນະບຸກທະລຸສູງ.
ໂດຍ:ຢ່າຕົ່ງ
KPL