*ດຽວນີ້ ສື່ສັງຄົມອອນລາຍໄດ້ເຂົ້າມາໃນຊີວິດປະຈໍາວັນຂອງພວກເຮົາ ເກືອບເວົ້າໄດ້ວ່າຂາດບໍ່ໄດ້ສໍາລັບຫລາຍຄົນ, ຍ້ອນວ່າປະໂຫຍດຂອງມັນກໍ່ມີຫລວງຫລາຍ, ແຕ່ໃນຂະນະດຽວກັນການເພີດເພີນກັບສັງຄົມອອນລາຍ ຈົນລືມສະຕິລະມັດລະວັງ ກ່ໍເກີດຄວາມເສຍຫາຍທາງຊັບສິນ, ກໍ່ຄືຕົກເປັນເຫຍື່ອຂອງກຸ່ມຄົນບໍ່ດີທ່ີສວຍໃຊ້ສື່ສັງຄົມຕົວະຍົວະຫລອກຫລວງ ສະແຫວງຫາຜົນປະໂຫຍດດ້ວຍເປົ້າໝາຍຕ່າງໆ. ສະນັ້ນ ການມີສະຕິລະວັງໃນການໃຊ້ອອນລາຍຈຶ່ງສໍາຄັນຫລາຍ ແລະ ຍັງແມ່ນວິທີທີ່ດີທີ່ສຸດ.

    ສະພາບສັງຄົມໂລກດຽວນ້ີ ກະແສການໃຊ້ສັງຄົມອອນລາຍຢູ່ໃນທຸກໄວອາຍຸ, ນັບແຕ່ໄວເຍົາຈົນເຖິງໄວເຖົ້າແກ່ຊະລາ. ສະນັ້ນ ກໍ່ບໍ່ເປັນເລື່ອງແປກປະຫລາດທີ່ມີຄົນອາໄສສື່ສັງຄົມອອນລາຍເປັນການສະແຫວງລາຍຮັບ ຫລື ນໍາໃຊ້ເປັນເຄື່ອງມືເພື່ອທັບຖົມໂຈມຕີຝ່າຍກົງກັນຂ້າມ ຫລື ຜູ້ທີ່ ຕົນບໍ່ມັກທັງເລື່ອງນ້ອຍໆ ແລະ ບັນຫາການເມືອງ...ເພາະຄືດັ່ງຮູ້ນໍາກັນ ສື່ສັງຄົມອອນລາຍໄດ້ແຜ່ຂະຫຍາຍເຂົ້າທຸກກຸ່ມຄົນທີ່ມີລະດັບການສຶກສາແຕກຕ່າງກັນໄປໂດຍຜ່ານຊ່ອງທາງອອນລາຍຕ່າງໆ ທັງ ອີເມວ, ເຟສບຸກ, ເວັບໄຊ ແລະ ສື່ສັງຄົມອື່ນ. ຫລາຍປີກ່ອນນີ້ພວກເຮົາເຫັນຂ່າວການຫລອກລວງຜ່ານອອນລາຍແມ່ນເກີດຂຶ້ນຢູ່ປະເທດອື່ນໆທັງໄກ ແລະ ໃກ້ເຮົາ. ແຕ່ດຽວນີ້ຂະບວນການຕົວະຍົວະຫລອກລວງ ເອົາຊັບສິນເງິນຄໍາມີຄ່າ ດ້ວຍຮູບແບບວິທີການຕ່າງໆນັ້ນ ກໍ່ເກີດມີຢູ່ໃນສັງຄົມເຮົາ ໂດຍຂະບວນການຢູ່ນອກປະເທດແດ່ ແລະ ໃນປະເທດ (ດັ່ງເຫັນຂ່າວເປັນ ທາງການຈັບຂະບວນການຄໍ ເຊັນເຕີ...).

    ດ້ວຍປະກົດການດັ່ງກ່າວ, ບັນຫາທີ່ຖືກຕັ້ງຂຶ້ນແມ່ນ ເຮົາຈະມີວິທີພື້ນຖານອັນໃດເພື່ອປ້ອງກັນ. ໃນສະພາບຫຍຸ້ງຍາກຊົ່ວຄາວທາງເສດຖະກິດ, ການສະແຫວງຫາກິນ ມີທຸກຮູບແບບ ແລະ ວິທີໂດຍພວກຄົນບໍ່ດີເຂົາບໍ່ຄິດ ເລື່ອງຈັນຍາທໍາ-ສິລະທໍາ ແລະ ຄວາມເມດຕາກະລຸນາ. ຂະບວນ ການຫລອກລວງມີທັງຜ່ານຊ່ອງທາງອີເມວ, ທາງໂທລະສັບ... ຫລອກລວງທັງເລື່ອງຄວາມຮັກ, ຖືກຫວຍ, ຊື້ສິນຄ້າຜ່ານອອນລາຍ, ຫລອກລວງຜ່ານບັນດາຊ່ອງທາງອອນລາຍຕ່າງ ແມ່ນມີຫລາຍຮູບແບບ...ຍົວະໃຫ້ເກີດຄວາມໂລບມາກ. ຕົວຢ່າງຢູ່ບ້ານເພິ່ນ ແລະ ເຮົາທີ່ມີແລ້ວອັນໜຶ່ງ ຕ້ອງມີສະຕິແມ່ນສ່ົງຈົດໝາຍມາທາງອີເມວ ແຈ້ງວ່າບັນຊີທະນາຄານຂອງເຮົາຖືກແຮັກຈະມີການປັບປຸງລະບົບໃຫ້ປອດໄພ, ຕ້ອງການຊື່ ແລະ ລະຫັດຜ່ານເຂົ້າບັນຊີ. ຜ່ານທາງໂທລະສັບກໍ່ມີຫລາຍພວກຄົນບໍ່ດີ ທີ່ເປັນຂະບວນການຄໍເຊັນເຕີສ້າງສະພາບອຸປະໂຫລກ ເລື່ອງນັ້ນນີ້ເພື່ອໃຫ້ເປົ້າໝາຍຕົກໃຈ ຂາດສະຕິໂອນເງິນໃຫ້ພວກເຂົາ ຫລື ໃຫ້ລະຫັດຜ່ານເຂົ້າບັນຊີ, ມີການອ້າງວ່າເປັນເຈົ້າໜ້າທີ່ ຝ່າຍນັ້ນຝ່າຍນີ້ ເພື່ອໃຫ້ເຮົາຫລົງເຊື່ອ-ຕາຍໃຈ...

     ອີງຕາມຂໍ້ມູນຂອງພາກສ່ວນກ່ຽວຂ້ອງຂອງກະຊວງເຕັກໂນໂລຊີ ແລະ ການສື່ສານໃຫ້ຮູ້ວິທີສັງເກດຄື ເນື້ອໃນສົນທະນາມາຈະກ້ຽວຂ້ອງເອກະສານຂໍ້ມູນທາງການເງິນ, ຂໍຂໍ້ມູນສ່ວນຕົວໂດຍມີການລົມຊັກຈູງຊວນເຊື່ອ ເພື່ອເກີດຄວາມສົນໃຈ ຈະມີຜົນປະໂຫຍດ ຫລື ເຮັດໃຫ້ຕົກໃຈວ່າຈະເກີດຄວາມເສຍຫາຍ; ເຄື່ອງມືສ່ືສານຂອງກຸ່ມຂະບວນການຄໍເຊັນເຕີ ມັກໃຊ້ຕິດຕໍ່ແມ່ນໂທລະສັບ, ໂທລະສັບຈະແປງໃຫ້ເປັນເບີໜ່ວຍງານຕ່າງໆ; ເຂົາໃຊ້ໂທລະສັບທີ່ບໍ່ສາມາດຕິດຕໍ່ກັບຄືນໄປຫາເຂົາໄດ້; ບາງເທື່ອເຂົາໃຊ້ໝາຍເລກໂທລະສັບທີ່ຍາວ ຫລື ຫລາຍໂຕກວ່າປົກກະຕິ...ສະຫລຸບ ວ່າ ເພື່ອຫລີກເວັ້ນຄວາມອັບປະໂຫຍດອັນເກີດຈາກອອນລາຍ ແມ່ນສະຕິລະວັງຕົວສໍາຄັນ, ບັນຫາທີ່ຍົກຂຶ້ນຂ້າງເທິງແມ່ນຂໍ້ມູນພື້ນຖານທີ່ນໍາແລກປ່ຽນນໍາບັນດາທ່ານ ເຊິ່ງພາກສ່ວນກ່ຽວຂ້ອງ ໄດ້ຖອດເອົາຈາກພຶດຕິກໍາຕົວຈິງທີ່ເກັບກໍາໄດ້ທັງໃນບ້ານເພິ່ນ ແລະ ບ້ານເຮົາ. ທຸກບັນຫາ ປ້ອງກັນໄດ້ແຕ່ຫົວທີ, ສະຕິ-ຄວາມຮັບຮູ້ຕໍ່ຂະບວນການຕົວະຍົວະຫລອກຫລວງຕ່າງໆແມ່ນສໍາຄັນ, ບໍ່ພະຍາຍາມເພີດເພີນນໍາບັນຍາກາດທາງອອນລາຍຈົນລືມສະຕິ, ນໍາໃຊ້ຢ່າງພໍດີເພື່ອໃຫ້ເກີດປະໂຫຍດທີ່ດີແກ່ຊີວິດ ແລະ ຄວາມສະຫງົບປອດໄພທັງເຮົາ, ຄອບຄົວ ແລະ ສັງຄົມ.

ໂດຍ: ຄ້ອງໃໝ່

KPL