ຂປລ. ທະນາຄານແຫ່ງ ສປປ ລາວ (ທຫລ) ຈັດເວທີສົນທະນາ ພາຍໃຕ້ຫົວຂໍ້: “ການຊໍາລະດ້ວຍ QR Code ຂອງ ສປປ ລາວ” ໃນວັນທີ 13 ກັນຍາ 2024 ເພື່ອເປັນການແລກປ່ຽນ ແລະ ສ້າງຄວາມເຂົ້າໃຈໃນການຊໍາລະດ້ວຍ QR Code ຂອງ ສປປ ລາວ ໂດຍການເປັນ ປະທານຂອງ ທ່ານ ສຸລິສັກ ທໍານຸວົງ ຮອງຜູ້ວ່າການ ທຫລ, ມີຄະນະກົມພາຍໃນທະນາຄານແຫ່ງ ສປປ ລາວ, ຜູ້ຕາງໜ້າຈາກກົມສື່ມວນຊົນ, ສະມາຄົມທະນາຄານລາວ, ບໍລິສັດ LAPNet, ທະນາຄານທຸລະກິດ, ສະຖາບັນການເງິນ, ຜູ້ໃຫ້ບໍລິການຊໍາລະເງິນ ທີ່ເປັນນິຕິບຸກຄົນເຂົ້າຮ່ວມ.

 

ໂອກາດນີ້, ທ່ານ ສຸລິສັກ ທໍານຸວົງ ຮອງຜູ້ວ່າການ ທຫລ ໄດ້ມີຄຳເຫັນວ່າ: ການຈັດເວທີສົນທະນາຄັ້ງນີ້,ເປັນການເຜີຍແຜ່ວຽກງານ ການຊໍາລະດ້ວຍ QR Code ຂອງ ສປປ ລາວ ທັງພາຍໃນ ແລະ ຂ້າມແດນ ເພື່ອສ້າງຄວາມຮັບຮູ້ ແລະ ຄວາມເຂົ້າໃຈໃຫ້ແກ່ສັງຄົມ, ຜູ້ໃຫ້ບໍລິການຊໍາລະ ແລະ ພາກສ່ວນກ່ຽວຂ້ອງອື່ນໆ ດ້ານການຊໍາລະດ້ວຍ QR Code ຂອງ ສ ປປ ລາວ ທັງພາຍໃນ ແລະ ຂ້າມແດນ ກໍຄື ນະໂຍບາຍມະຫາພາກດ້ານການຄຸ້ມຄອງລະບົບ ການຊໍາລະຍ່ອຍພາຍໃນ ແລະ ຂ້າມແດນ,​ ສົ່ງເສີມການຊໍາລະແບບດີຈິຕອນ ເພື່ອຫລຸດຜ່ອນ ການນໍາໃຊ້ເງິນສົດ, ສົ່ງເສີມການຊົມໃຊ້ ແລະ ການພັດທະນາ ດ້ານການໃຫ້ບໍລິການດັ່ງກ່າວ,​ ເຜີຍແຜ່ກົນໄກ ແລະ ວິທີການແກ້ໄຂຂໍ້ຂັດແຍ່ງ ຊຶ່ງເປັນບັນຫາທີ່ສັງຄົມພວມໃຫ້ຄວາມສົນໃຈ ແນ​ໃສ່​ປົກ​ປ້ອງ​ສິດ ແລະ ຜົນ​ປະ​ໂຫຍດ​ອັນ​ຊອບ​ທຳ​ຂອງ ​ຜູ້​ໃຊ້ບໍລິການກໍ່ຄືມວນຊົນໃນສັງຄົມ. ພ້ອມນີ້, ທະນາຄານ ແຫ່ງ ສປປ ລາວ  ກໍາລັງຂຸ້ນຂ້ຽວແກ້ໄຂຄວາມຫຍຸ້ງຍາກທາງດ້ານ ເສດຖະກິດ-ການເງິນ, ອັດຕາເງິນເຟີ້ ແລະ ອັດຕາແລກປ່ຽນ ຊຶ່ງວຽກງານທີ່ນໍາສະເໜີໃນຄັ້ງນີ້ ເປັນສ່ວນໜຶ່ງທີ່ຊ່ວຍ ສະໜັບສະໜູນການແກ້ໄຂບັນຫາດັ່ງກ່າວ, ດຶງລາຍຮັບເງິນຕາຕ່າງປະເທດ ແລະ ເງິນຕານອກລະບົບໃຫ້ເຂົ້າ ໃນລະບົບທະນາຄານ, ສົ່ງເສີມສະຖຽນລະພາບ ດ້ານການເງິນ-ເງິນຕາ, ສົ່ງເສີມການພັດທະນາດ້ານນະວັດຕະກໍາດ້ານການເງິນ ແລະ ຫລຸດດຜ່ອນການນໍາໃຊ້ເງິນສົດໃນສັງຄົມ, ທັງເປັນການຈັດຕັ້່ງຜັນຂະຫຍາຍຍຸດທະສາດການຫັນ ເປັນດີຈິຕອນຂອງລັດຖະບານ, ປະ​ກອບ​ສ່ວນ​ເຂົ້າ​ໃນ​ການ​ພັດ​ທະ​ນາ​​ເສດ​ຖະ​ກິດ-ສັງ​ຄົມ​ຂອງ​ ຊາດ.

ໂດຍເນື້ອໃນທີ່ນໍາສະເໜີ ແລະ ແລກປ່ຽນ ໃນຄັ້ງນີ້ປະກອບມີ: ສະພາບລວມການພັດທະນາ ການຊໍາລະດ້ວຍ QR Code ທັງພາຍໃນ ແລະ ຂ້າມແດນ, ຜົນປະໂຫຍດ, ຂໍ້ຫຍຸ້ງຍາກດ້ານການຊໍາລະດ້ວຍ QR Code, ດ້ານນະໂຍບາຍເປັນຕົ້ນ ການສົ່ງເສີມການນໍາໃຊ້ ແລະ ທິດທາງແຜນການໃນຕໍ່ໜ້າ; ວາລະແລກປ່ຽນສົນທະນາ ແມ່ນແລກປ່ຽນກ່ຽວກັບ ສິ່ງທ້າຍທາຍດ້ານການຊໍາລະດ້ວຍ QR Code ທັງພາຍໃນ ແລະ ຂ້າມແດນມີຄືແນວໃດ？; ປະກົດການຫຍໍ້ທໍ້ດ້ານ ການຊໍາລະທີ່ລະເມີດຕໍ່ກົດໝາຍກ່ຽວຂ້ອງ, ການກໍານົດວົງເງິນການຊໍາລະຂ້າມແດນດ້ວຍ QR Code; ຜະລິດຕະພັນ ແລະ ການປະກອບສ່ວນໃນການຊໍາລະດ້ວຍ QR Code ແລະ ກົນໄກການແກ້ໄຂຂໍ້ຂັດແຍ່ງ; ທັດສະນະ ແລະ ການປະກອບສ່ວນໃນການສົ່ງເສີມການຊໍາລະດ້ວຍ QR Code ຂອງຂະ      ແໜງການທະນາຄານ.

ການແລກປ່ຽນທາງດ້ານວິຊາການໃນຄັ້ງນີ້, ຈະເຮັດໃຫ້ຜູ້ຕາງໜ້າຈາກຜູ້ໃຫ້ບໍລິການຊໍາລະ ທີ່ເປັນທະນາ ຄານທຸ ະກິດ, ສະຖາບັນການເງິນທີ່ບໍ່ ແມ່ນທະນາຄານ ແລະ ນິຕິບຸກຄົນ, ຕາງໜ້າຮ້ານຄ້າ ແລະ ຜູ້ໃຫ້ບໍລິການທີ່ຮັບຊໍາລະຜ່ານ QR Code ລວມເຖິງຕາງໜ້າຜູ້ໃຊ້ ບໍລິການທີ່ເຂົ້າຮ່ວມ ໄດ້ຮັບຄວາມຮູ້ ແລະ ຄວາມເຂົ້າໃຈ ໃນວຽກງານການຊໍາລະດ້ວຍ QR Code ຊຶ່ງມີການໃຫ້ບໍລິການຊໍາລະ ເຊັ່ນ: ບໍລິການ QR Code ເພື່ອການໂອນເງິນລະຫວ່າງບຸກຄົນ ຫລື ບໍລິການ QR Code ເພື່ອການຊໍາລະເງິນລະເງິນ ທັງພາຍໃນ ແລະ ຂ້າມແດນ.

ຂ່າວ: ວຽງສະຫວັນ

KPL