ຂປລ. ອົງການແພລນສາກົນ ປະຈຳ ສປປ ລາວ ຮ່ວມກັບຫ້ອງການສຶກສາທິການ ແລະ ກິລາ ເມືອງນາໝໍ້ ຈັດພິທີສະເຫລີມສະຫລອງ ວັນເດັກຍິງສາກົນ (IDG) ຢູ່ທີ່ເມືອງນາໝໍ້ ແຂວງອຸດົມໄຊ ເພື່ອ​ສືບ​ຕໍ່​ສະໜັບສະໜູນ​ໄວ​ໜຸ່ມ ໂດຍເນັ້ນ​​ໃສ່​ການ​ນໍາ​ພາ​ ແລະ​ ​ສະໜັບສະໜູນ​ ກ່ຽວ​ກັບ​ບັນ​ຫາ​ທີ່​ສໍາ​ຄັນ ​ທີ່​ມີ​ຜົນ​ກະ​ທົບຕໍ່​ຊີ​ວິດ​ ຂອງ​ເຂົາ​ເຈົ້າ​ ແນໃສ່ສ້າງຄວາມເຂັ້ມແຂງໃຫ້ແກ່ໄວໜຸ່ມ ເພື່ອເປັນຜູ້ນໍາໃນການສົ່ງເສີມ ຄວາມສະເໝີພາບທາງເພດ.

ໂອກາດນີ້, ສະມາຊິກສະໂມສອນສະໂມສອນນັກຮຽນ ຈາກ ໂຮງຮຽນມັດທະຍົມຕອນຕົ້ນ 4 ແຫ່ງໄດ້ ຮ່ວມກັນສະແດງທັກສະ ແລະ ທັດສະນະຂອງເຂົາເຈົ້າ ກ່ຽວກັບສຸຂະພາບຈະເລີນພັນ ແລະ ສິດທິ (SRHR), ຄວາມສະເໝີພາບ ທາງເພດ ແລະ ສຸຂານາໄມສ່ວນບຸກຄົນ, ລວມທັງການອະນາໄມປະຈໍາເດືອນ ໂດຍຜ່ານການສະ ແດງທີ່ມີຄວາມສ້າງສັນ, ການສະແດງລະຄອນ, ຮ້ອງເພງ, ຟ້ອນ ແລະ ການສະແດງແຟຊັ້ນ. ນອກຈາກນີ້, ນັກຮຽນຍັງໄດ້ ແບ່ງປັນຄວາມເຂົ້າໃຈ ແລະ ປະສົບການຂອງເຂົາເຈົ້າ ກ່ຽວກັບຄວາມເປັນເອກະລາດທາງຮ່າງກາຍ, ມາດຕະ ຖານທາງເພດ, ສິດສຸທິທາງເພດ ແລະ ອະນາຄົດຂອງເຂົາເຈົ້າ. ​ພ້ອມນີ້, ພາຍໃນ​ງານ​ຍັງ​ມີກິດຈະກຳ ຖາມ-ຕອບ ເພື່ອ​ໃຫ້​ໄວ​ໜຸ່ມ​ ​ແກ້​ໄຂ​ສິ່ງ​ທ້າ​ທາຍ​ທີ່ພວກເຂົາ​ກຳລັງຜະ​ເຊີນ​ໜ້າຢູ່.

ທ່ານ ນາງ ແຄໂຣລ໌ ມໍແທນສັນ (Carol Mortensen) ຜູ້ອໍານວຍການ ອົງການແພລນສາກົນ ປະຈຳ ສປປ ລາວ ໄດ້ເນັ້ນໜັກເຖິງ ຄວາມຮີບດ່ວນ ໃນການສ້າງຄວາມເຂັ້ມແຂງ ໃຫ້ແກ່ເດັກຍິງ ໃນ ສປປ ລາວ. ງານໃນຄັ້ງນີ້, ເປັນຈະສະແດງໃຫ້ເຫັນເຖິງ ທ່າແຮງອັນທີ່ຍິ່ງໃຫຍ່ຂອງໄວໜຸ່ມ ເວລາທີ່ພວກເຂົາໄດ້ຮັບໂອກາດ ໃນ ການນໍາພາກິດຈະກຳ ເພື່ອສ້າງຄວາມແຕກຕ່າງ; ເດັກ​ຍິງ​ທີ່​ເຂົ້າ​ຮ່ວມ​ໃນກິດຈະກຳໃນ​ມື້​ນີ້, ​ບໍ່​ພຽງ​ແຕ່​ແມ່ນ​ການ​ສ້າງ​ຄວາມ​ຮັບ​ຮູ້​ກ່ຽວ​ກັບ ​ບັນ​ຫາ​ທີ່​ສຳ​ຄັນ​ເທົ່າ​ນັ້ນ ແຕ່​ຍັງ​ໄດ້​ຊຸກ​ຍູ້​ໃຫ້ເກີດ ການ​ສົນ​ທະ​ນາ​ກ່ຽວ​ກັບ ​ຄວາມ​ສະ​ເໝີ​ພາບ​ທາງ​ເພດ​ ໃນ​ຊຸມ​ຊົນ​ຂອງ​ເຂົາ​ເຈົ້າ. ພ້ອມນີ້, ພາຍໃນງານ​ຍັງ​ໄດ້​ວາງສະ​ແດງ​ຜົນ​ສຳ​ເລັດ ​ແລະ ຫົວຄິດປະດິດ​ສ້າງ​ ໃນການ​ແກ້​ໄຂບັນຫາ SRHR ​ແລະ ຄວາມ​ສະ​ເໝີ​ພາບ​ທາງ​ເພດ.

ໂດຍໄດ້ຮັບການສະໜັບສະໜູນ ຈາກກະຊວງການຕ່າງປະເທດຍີ່ປຸ່ນ, ອົງການແພລນສາກົນ ປະຈຳປະເທດ ຢູ່ປຸ່ນ ພາຍໃຕ້ການຊີ້ນໍາ ຂອງສະຖານທູດຍີ່ປຸ່ນປະຈໍາລາວ, ອົງການແພລນສາກົນ ປະຈຳ ສປປ ລາວ ໄດ້ຈັດຝຶກອົບ ຮົມກ່ຽວກັບ SRHR ຢ່າງກວ້າງຂວາງ ໃຫ້ແກ່ເດັກນ້ອຍນັກຮຽນ, ໄວໜຸ່ມ, ພໍ່ແມ່ ແລະ ຄູອາຈານ. ຄວາມພະຍາ ຍາມເຫລົ່ານີ້, ແນໃສ່ເພື່ອທ້າທາຍມາດຕະຖານ ທາງເພດທີ່ເປັນອັນຕະລາຍ ຕໍ່ສຸຂະພາບ ແລະ ລຶບລ້າງຂໍ້ຫ້າມຕ່າງໆ ກ່ຽວກັບການເປັນປະຈໍາເດືອນ ແລະ ສຸຂານາໄມ.

 ນັບແຕ່ປີ 2023 ເປັນຕົ້ນມາ, ອົງການແພລນສາກົນ ປະຈຳ ສປປ ລາວ ໄດ້ດຳເນີນການປັບປຸງສຸຂານາໄມ ທີ່ສົ່ງເສີມບົດບາດຍິງ-ຊາຍ ຢູ່ ໂຮງຮຽນປະຖົມ ແລະ ມັດທະຍົມຕອນຕົ້ນ ໃນແຂວງອຸດົມໄຊ. ໂຄງ​ການ​ນີ້​ໄດ້​ສຸມ​ໃສ່​ການ​ປັບ​ປຸງ​ສຸ​ຂາ​ນາ​ໄມ​ ແລະ​ ສິ່ງອຳນວຍຄວາມສະດວກຕ່າງໆ. ພ້ອມກັນນັ້ນ, ໂຄງການຍັງໄດ້​ສ້າງ​ຄວາມ​ເຂັ້ມ​ແຂງ​ໃຫ້ແກ່​ນັກ​ຮຽນ, ພໍ່​ແມ່, ຄູ​ອາ​ຈານ ​ແລະ ​ສະ​ມາ​ຊິກ​ສະ​ໂມ​ສອນ​ນັກຮຽນ ​ມີ​ບົດ​ບາດ​ສຳຄັນ ໃນ​ການ​ເສີມ​ຂະ​ຫຍາຍ​ ຄວາມ​ສະເໝີ​ພາບ​ທາງ​ເພດ ​ແລະ​ ສ້າງການຍອມຮັບໃນການປັບປຸງ ບັນຫາ​ສຸ​ຂະ​ພາບ​ ໃນ​ຊຸມ​ຊົນ​ຂອງ​ເຂົາ​ເຈົ້າ.

ຂໍ້ມູນ-ພາບ: ອົງການແພລນສາກົນ ປະຈຳລາວ

KPL